Pepese ma le Faamatalaina o Tala
Ina ua valaauina i ma’ua ma lo’u toalua o Sandra, e auauna atu i le Misiona a Durban Aferika i Saute, na amata ona ma vaavaai mo se galuega fesoasoani i le lotoifale. Na avea a’u ma se tasi o le Aufaipese a le Tapeneko mo le silia i le 20 tausaga, ae o lo’u toalua, o se tagata sa fesoasoani i faletusi, na ia faia le faitauga tala i se aoga tulagalua. Ina ua tonu i le peresitene o le matou misiona e tatala le galuega talai i se nuu laitiiti e le mamao ese atu, na ma iloaina o le ma avanoa lea.
Na ma asiasi atu i le nuu laitiiti ma iloa ai e leai ni faletusi i aoga, ae na o se faletusi laitiiti mo tagata lautele i le taulaga. Na faailoa atu i ma’ua e alii faifeautalai talavou i le faatonu o le faletusi. Na ma faamatala atu ia te ia, ma te mananao e faia se taimi mo faitauga tala mo tamaiti i vaiaso taitasi. Na tau le gauai mai o ia, ae ina ua mavae se taimi o mafaufau loloto, sa malie loa o ia e faasalalau atu le tala i le nuu ma taumafai loa e fai.
O le aso muamua e toalima tamaiti na o mai. Na faasolosolo lava ina toatele na o mai. Ina ua mavae ni nai masina, sa ma mauaina ai foi le fesoasoani a se tamatai talavou, o se tagata e le’i leva ona liliu mai, na manaia lana tautala faaIgilisi ma le faaSulu. Na tuputupu ae lava le aofai o tamaiti na auai mai i le faitauga tala, ma sa fiafia foi le faatonu faapea ma matua i le mea na tupu.
O tagata Sulu e ese le fiafia e pepese, o lea na matou faaopoopoina i ai ni pese faigofie ma ni solo i taimi o le faitauga tala. E oo ane i le faaiuga o le ma misiona, ua tailua pe taitolu foi vasega mo aoga pese ma faitauga tala i le vaiaso, ina ia taulimaina ai le silia i le toa 100 o tamaiti na auai mai. O se matuā faamanuiaga lava pe a matou fetaui ma nei tamaiti i soo se mea lava, ae amata ona latou usuina mai ni pese ma tauloto mai ni solo ia i ma’ua.
Na i ai foi se isi faamanuiaga na aliae mai i la ma auaunaga i lenei eria. A o tuputupu ae pea le aofai o tagata auai o le Ekalesia i le lotoifale, na matou manaomia ai se nofoaga e amata ona fai ai a matou sauniga i Aso Sa, sa faapea ona tauanau mai le faatonu o le faletusi matou te faaaogaina le faletusi e aunoa ma se totogi.
Ma te matuā faafetai tele ona sa fesoasoani mai le Alii ia i ma’ua i le sailia o se auala e faaaoga ai a ma’ua taleni, auauna atu i le alalafaga, ma fesoasoani e tatala se eria a le misiona.