O Le Siufofoga o le Alii
Saunia e Elder Neil L. Andersen
O Le Korama a Aposetolo e Toasefululua
Ou te molimau atu i lenei konafesi ua tatou faalogo ai i le siufofoga o le Alii. O le suega mo tatou taitoatasi o le auala tatou te tali atu ai.
Muamua lava, o se upu agalelei mo le fanau iti. Ioe, o le sauniga mulimuli lenei, ma o a’u o le failauga faaiu.
Talu ai nei, a o ou asiasi atu i le Malumalu o Provo City Center, sa ou faamemelo lava i se atavali ua faaigoaina First Vision from Afar. Ua faaalia i le atavali le malamalama ma le mana mai le lagi a o asiasi ifo le Tama ma le Alo i le Taulealea o Iosefa Samita.
E ui e le o faia se faatusatusaga i le mea paia na tupu lea na amata ai le Toefuataiga, ae e mafai ona ou mafaufau i se vaaiga faapena lea o le a atagia ai le malamalama ma le mana faaleagaga o le Atua o alu ifo i luga o lenei konafesi aoao ma, i se taunuuga, e sosolo atu ai lena mana ma le malamalama i le lalolagi atoa.
Ou te tuu atu la’u tautinoga o Iesu o le Keriso, o loo Ia taitaia mataupu o lenei galuega paia, ma o le konafesi aoao o se tasi lea o taimi taua tele Na te tuu mai ai faatonuga i Lana Ekalesia ma ia i tatou taitoatasi.
O Le Aoaoina mai Luga
I le aso na faatulaga ai le Ekalesia, sa tofia ai e le Alii Iosefa Samita e avea ma perofeta, tagatavaai, ma aposetolo a le Alii o Iesu Keriso1 ma fetalai atu i le Ekalesia:
“Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa.
“Ona o le faia o nei mea o le a lē manumalo ai faitotoa o seoli ia te outou; … ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei.”2
Mulimuli ane, o uso uma o le Au Peresitene Sili ma le Korama a Aposetolo e Toasefululua sa lagolagoina foi ma faauuina o ni perofeta, tagatavaai, ma talifaaaliga.3
O lenei la, a o tatou feiloai ai i lalo o le taitaiga a Peresitene Thomas S. Monson, tatou te tulimatai atu e faalogo i le “finagalo o le Alii, … o le mafaufau o le Alii, … o le siufofoga o le Alii, ma o le mana lea a le Atua mo le Olataga.”4 Tatou te faalagolago i Lana folafolaga: “Pe i lou lava leo po o i le leo o a’u auauna, ua tutusa lava.”5
I le vāvāō ma le fenumiai o lo tatou lalolagi i nei aso, o le faatuatuaina ma le talitonuina o upu a le Au Peresitene Sili ma le Korama a le Toasefululua e taua tele i lo tatou tuputupua’e faaleagaga ma le tumau.6
Ua tatou o mai faatasi mo lenei konafesi matagofie. E faitau miliona le Au Paia o Aso e Gata Ai ma isi o faatuatuaga i le silia ma le 200 atunuu, e tautatala i le silia ma le 93 gagana, o loo auai i nei sauniga pe faitau foi i savali o le konafesi.
Ua tatou o mai ma tatalo ma saunia. Mo le toatele o i tatou, o loo i ai ni popolega e manaomia vave ni tali, ma ni fesili aupito faamaoni. Tatou te mananao ia faafou lo tatou faatuatua i lo tatou Faaola, o Iesu Keriso, ma ia faamalosia lo tatou tomai e tetee atu ai i faaosoosoga ma aloese ai mai mea faalavefau. Ua tatou o mai ina ia aoaoina mai lugā.
O Le Mafaufau ma le Finagalo o le Alii
Mo le Au Peresitene Sili ma le Toasefululua, o e e masani ona saunoa i konafesi taitasi, o le tiutetauave tele o le sauniaina o a latou savali o se avega fai soo ma se faatuatuaga paia.
I ni tausaga ua mavae, a o lei auauna atu o se Pulega Aoao, sa ou fesili atu ai ia Elder Dallin H. Oaks pe eseese ni ana lauga e saunia mo konafesi taitasi a siteki. Sa ia tali mai e leai ae sa ia faaopoopo mai, “Ae o a’u lauga o le konafesi aoao e ese la. E ono oo atu tusiga faataitai i le 15 i le 20 ia mautinoa ou te ta’u atu mea e finagalo le Alii ou te ta’u atua.”7
O le a le taimi ma pe faapefea ona oo mai musumusuga mo se lauga o le konafesi aoao?
Faatasi ai ma ni autu e lei atofaina, matou te vaaia le tuufaatasiga matagofie faalelagi o mataupu ma autu o upumoni e faavavau i konafesi taitasi uma.
Sa ta’u mai e se tasi o le Usoga ia te a’u o lana mataupu mo lenei konafesi sa tuu atu ia te ia i le taimi lava na maea ai lana lauga ia Aperila talu ai. Sa ta’ua e le isi uso i le tolu vaiaso talu ai, sa ia tatalo pea ma faatalitali i le Alii. O le isi ina ua fesiligia, po o le a le umi e tusia ai se lauga e faapitoa le maaleale, sa tali mai, “Luasefulu-lima tausaga.”
E i ai taimi e oo vave mai ai se manatu autu, ae o le anotusi ma auiliiliga e manaomia ai pea se tauiviga tele faaleagaga. O le anapogi ma le tatalo, suesue ma le faatuatua, o vaega lava ia o le faagasologa. E le finagalo le Alii i ni manatu faafoliga e faaitiitia ai Lona siufofoga i Lana Au Paia.
E tele ina oo mai le taitaiga mo se lauga o le konafesi aoao i le po po o le vaveao, a o mamao ese le lauga mai manatu o le mafaufau. E faafuasei lava, ona tafe mai i nisi taimi ia malamalamaaga sa lei faamoemoeina, o upu ma fuaitau patino, o se faaaliga paia.8
A o e faalogologo, atonu e matua saolele lava savali e te mauaina, pe ono faapatinoina foi mo na o oe lava.
I le lauga ai i le tele o tausaga ua tuanai i se konafesi aoao, sa ou faamatalaina ai se fasifuaitau na oo mai i lo’u mafaufau a o ou tuufesili pe sa ou saunia e auauna atu i se misiona. O le fasifuaitau “E te le iloa mea uma, ae ua lava mea ua e iloa!”9 Sa i ai se tamaitai talavou sa nofo ai i le konafesi aoao i lena aso sa fai mai ia te a’u sa ia tatalo mo se talosaga a se alii e fia faaipoipo ia te ia, sa ia tuufesili ai po o le a le lelei o lona iloaina o lea alii talavou. Ina ua ou tautala i upu “E te le iloa mea uma, ae ua lava mea ua e iloa,” sa faamautu atu e le Agaga ia te ia ua lava lona iloaina lelei [o le alii lea]. Ua la faaipoipo ma le fiafia mo le tele o tausaga.
Ou te folafola atu a e saunia lou agaga, ma e sau ma tulimatai atu o le a e faalogo i le siufofoga o le Alii, o le a oo atu manatu ma lagona i lou mafaufau ua faapatinoina faapitoa lava mo oe. Ua uma lava ona e lagonaina i lenei konafesi, pe o le a e lagonaina foi, pe a e suesueina savali i ni vaiaso o lumanai nei.
Mo le Taimi Nei ma Masina o i Luma Atu
Na saunoa mai Peresitene Monson:
“Faaalu se taimi e faitau ai savali o le konafesi.”10
“Mafaufau loloto [i ai]. … Ua ou iloa … e tele atu isi mea ou te mauaina mai nei lauga musuia pe a ou suesue i ai i se tulaga e loloto atu.”11
O aoaoga o le konafesi aoao o mea ia ua finagalo le Alii tatou te mafaufau loloto i ai i masina o i luma.
O le leoleo mamoe “e muamua atu [i ana mamoe], ona mulimuli atu ai lea o mamoe ia te ia: aua ua latou iloa lona leo.”12
E tele lava ina taitai atu e Lona siufofoga i tatou e sui se mea i o tatou olaga. Ua Ia valaaulia i tatou ia salamo. Ua Ia valaaulia i tatou ia mulimuli atu ia te Ia.
Mafaufau i saunoaga nei mai lenei konafesi:
O Peresitene Henry B. Eyring mai lenei taeao: “Ou te tuu atu la’u molimau o loo soifua le Atua le Tama ma e finagalo ia tou toe foi atu i le aiga ia te Ia. O le Ekalesia moni lenei a le Alii o Iesu Keriso. Na te silafia oe; e alofa o Ia ia te oe; ma o loo leoleo o Ia ia te oe.”13
O Peresitene Uchtdorf mai ananafi: “Ou te molimau atu a tatou amatalia pe faaauau foi i lenei malaga maoae lea e tau atu i le Atua, o le a lelei atili o tatou olaga … ma o le a faaaogaina i tatou e le Alii i ni auala ofoofogia e faamanuiaina i latou o siomiaina i tatou, ma faataunuu Ona faamoemoega e faavavau.”14
O Peresitene Nelson mai ananafi i le afiafi: “Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga.”15
O Elder Oaks mai ananafi: “Ou te molimau atu o le folafolaga i le aiga o se malelega o upumoni e faavavau, o le finagalo lea o le Alii mo Ana fanau o loo sailia le ola e faavavau.”16
Ma Elder Ballard mai i ni nai minute ua tea: “E tatau ona tatou taliaina ma le agaalofa fanau a le Atua ma tafiesea soo se faaituau, e aofia ai le faailogalanu, faailoga tagata, ma le manatu faapito.”17
Ona o loo i ai sa tatou minute faaopoopo, ou te fia faaopoopo atu se manatu puupuu e uiga ia Elder Robert D. Hales. Sa tau atu e le Au Peresitene Sili ia Elder Hales e mafai ona ia tuuina atu se savali puupuu i le sauniga o le taeao o le Aso Sa pe a faatagaina e lona soifua maloloina. E ui sa le faatagaina e lona soifua maloloina, sa ia saunia se savali, lea sa ia faamaeaina i le vaiaso ua tea ma faasoa maia ia te au. I le tauina mai o lona maliu pe tusa ma le tolu itula ua mavae, ou te faasoa atua na o le tolu laina mai i lana saunoaga.
I le siiina mai ia Elder Hales: “A tatou filifili e maua le faatuatua, ua saunia i tatou e tutu i le afioaga o le Atua. … I le mavae ai o le Faasatauroga o le Faaola, e na o i latou ‘na faamaoni i le molimau ia [te Ia] a’o i soifua i latou i la le tino’ sa Ia faaali mai i ai. MF&F 138:12.] O i latou ‘na teena molimau … a … perofeta [sa le mafai] na vaai [i le] mamalu [o le Faaola], pe na vaai i ona fofoga.’ [MF&F 138:21.] … O lo tatou faatuatua e saunia ai i tatou ina ia i ai i le afioaga o le Alii.”
E maeu le agalelei o le Alii e uunaia Peresitene Russell M. Nelson i le faaiuga o le sauniga o lenei taeao e malaga ese faatopetope mai le fale, faamisi lana taumafataga o le aouli, ma nanati atu i talaane o le moega a Elder Hales, e mafai ai ona ia tauunuu atu ma i ai iina, o lona peresitene o le korama, faatasi ai ma Mary Hales lalelei a o faauu ai Elder Hales mai le olaga faaletino.
Tali atu i le Siufofoga o le Alii
Ou te molimau atu, i lenei konafesi ua tatou faalogo ai i le siufofoga o le Alii.
E le tatau ona tatou atuatuvale pe a feteenai upu a auauna a le Alii ma manatu o le lalolagi, ma o nisi foi taimi, e feteenai ma o tatou lava manatu. O le auala lava lenei e i ai i taimi uma. Matou te tootutuli i totonu o le malumalu faatasi ma le matou Usoga. Ou te faamaonia le lelei o o latou agaga. O lo latou manao silisili o le faafiafiaina lea o le Alii ma fesoasoani i fanau a le Atua ia toefoi atu i Lona afioaga.
O Fitugafulu, o Au Epikopo, o le Aualofa, Tamaitai Talavou, Peraimeri, ma isi taitai o ausilali ua faaopoopoina musumusuga maoae i lenei konafesi, ma ua faapena foi i musika matagofie ma tatalo musuia.
O loo i ai se oa natia o le taitaiga faalelagi o loo faatalitali mo lou mauaina i savali o le konafesi aoao. O le suega la mo i tatou taitoatasi o le auala tatou te tali atu ai i mea tatou te faalogo i ai, o mea tatou te faitau i ai, ma mea tatou te lagonaina.
Se’i o’u faasoa atua se aafiaga e uiga i le tali atu i upu faaperofeta mai le soifuaga o Peresitene Russell M. Nelson:
I le 1979, lima tausaga a o lei valaauina o se Pulega Aoao, sa auai ai Uso Nelson i se fonotaga a o lumanai ai le konafesi aoao.“Sa lu’iina ai e [Peresitene Spencer W. Kimball] tagata uma na auai ia faauumi a latou laa i le avatuga o le talalelei i le lalolagi atoa. Faatasi ma isi atunuu na ta’ua faapitoa e Peresitene Kimball o Saina, ma tautino mai, ‘E tatau ona tatou auauna atu i tagata Saina. E tatau ona tatou aoaoina le latou gagana. E tatau ona tatou tatalo mo i latou ma fesoasoani ia i latou.’”18
I le 54 tausaga, sa maua ai e Uso Nelson se lagona i le taimi o le sauniga e tatau ona ia suesueina le gagana Meneterini. E ui o se fomai tipitipi pisi mo le fatu, ae sa vave ona ia maua le auaunaga a se faiaoga.
E lei leva talu ona amata ana suesuega, ae auai atu Dr. Nelson i se fonotaga tele ma sa nofo ai ma e lei faamoemoeina i talaane o “se fomai tipitipi iloga a Saina, Dr. Wu Yingkai. … … Ona sa suesueina e [Uso Nelson] le Meneterini, o lea sa amata ai [se] talanoaga [ma Dr. Wu]. ”19
O le manao o Dr. Nelson e mulimuli i le perofeta na taitai atu ai i le asiasiga a Dr. Wu i le Aai o Sate Leki ma le malaga atu o Dr. Nelson i Saina e fai ni aoaoga ma faatino ni taotoga.
O lona alofa mo tagata Saina, ma lo latou alolofa ma le faaaloalo mo ia, sa faatupulaia.
Ia Fepuari 1985, sefulu masina talu ona valaauina o ia i le Korama a le Toasefululua, sa maua ai e Elder Nelson se telefoni faateia mai Saina o loo aioi mai ia Dr. Nelson e alu atu i Beijing e fai se taotoga mo le fatu ua faaletonu o le tagata pese opera sili ona lauiloa i Saina. Faatasi ai ma le faamalosiauga a Peresitene Hinckley, sa toefoi atu ai Elder Nelson i Saina. O le taotoga mulimuli lava na ia faia o totonu i le atunuu o Saina.
Na o le lua tausaga talu ai, ia Oketopa 2015, sa toe faamamaluina ai foi Peresitene Russell M. Nelson i se malelega aloaia, na faaigoaina ai o ia o se “uo ua leva a Saina.”
Ae o ananafi, sa tatou faalogo ai ia Peresitene Russell M. Nelson ua 93 nei tausaga le matua na saunoa e uiga i le augani a Peresitene Thomas S. Monson ia i “tatou taitoatasi [i le konafesi ia Aperila talu ai] ia suesue ma le agaga tatalo ma mafaufau loloto i le Tusi a Mamona i aso taitasi.”
E pei lava ona sa ia faia a o avea ma se fomai tipitipi pisi, ina ua ia totogiina se faiaoga Meneterini, sa vave ave foi e Peresitene Nelson le fautuaga a Peresitene Monson, ma faaaoga i lona lava olaga. E sili atu nai lo le tau na ona faitau, sa ia saunoa ai sa ia “faia ni lisi o mea e uiga i le Tusi a Mamona, o mea e na te faamautuina, o mea na te faamaoniaina, o mea na te faataunuuina, o mea na te faamaninoina, ma mea na te faaalia mai.”20
O le mea e mata’ina ai, i le avea ma se molimau lona lua, sa saunoa ai foi Peresitene Henry B. Eyring i lenei taeao e tusa ma lona tali atu i le apoapoaiga a Peresitene Monson. Tou te manatua upu nei? “E pei foi o le toatele o outou sa ou faalogo i upu a le perofeta o le siufofoga lava lea o le Alii ia te a’u. Ma e pei foi o le toatele o outou, sa ou filifili ai e usitai i na upu.”21
Tau ina ia tatou vaai atu i nei mea o ni faataitaiga mo o tatou lava olaga.
O Se Folafolaga ma se Faamanuiaga
Ou te folafola atu ia te oe a o e faafofoga i le siufofoga o le Alii ia te oe i aoaoga o lenei konafesi aoao, ona faatino lea o na uunaiga, o le a e lagonaina le aao o le lagi i ou luga, ma o le a faamanuiaina ai lou olaga ma olaga o isi o loo siomiaina oe.22
I lenei konafesi, ua tatou mafaufau ai lava i lo tatou perofeta pele. Matou te alolofa ia te oe, Peresitene Monson. Ou te faamaea atu i ana lava upu na tuuina atu mai lenei pulelaa. Ou te talitonu o se faamanuiaga e finagalo o ia e tuuina mai ia i tatou taitoatasi i le aso, pe ana mafai ona ia faatasi ma i tatou. Ua ia saunoa mai: “A o tatou tuua ai lenei konafesi, ou te talosagaina faamanuiaga o le lagi i o outou luga taitoatasi. … Ou te tatalo ia faamanuiaina outou ma o outou aiga e lo tatou Tama Faalelagi. Ia avea savali ma le agaga o lenei konafesi ma foliga vaaia o mea uma tou te faia—i o outou aiga, i tou galuega, i tou fonotaga, ma i a outou feoaiga uma.”
Sa ia faaiuina: “Ou te alofa ia te outou Ou te tatalo mo outou. Ia faamanuia le Atua ia te outou. Ia i ai Lona filemu folafolaina faatasi ma outou i le asō ma aso uma.”23
I le suafa, o Iesu Keriso, amene.