O Le Faavavau o Aso Uma

Saunia e Elder Quentin L. Cook

O Le Korama a Aposetolo e Toasefululua

O le lotomaualalo e uiga po o ai i tatou ma le faamoemoega o le Atua mo i tatou e taua.

Talu mai la’u auaunaga i le Misiona i Peretania o se taulealea, ua ou fiafia i uiga malie o Peretania. O nisi taimi e tino mai i se faiga e te taulima ai le olaga e ala i le tuu o oe lava i lalo, tauagafau, ma le lotomaualalo. O se faataitaiga o lea mea o se atatosi o le taumafanafana. O taumafanafana i Peretania e matuai pupuu lava ma e faafuasei ona oo mai. E pei ona ta’ua e se tasi o tusitala filemu, “Ou te fiafia i le taumafanafana a Peretania, o se aso e sili ona ou fiafia i ai i le tausaga.”¹ O le tagata e sili ona ou fiafia i ai o le katuni Peretania sa faaalia i lona moega ua tuai ona ala i le taeao ma sa ia fai atu i lana taifau, “Oi aue! Pei ua ta moeumi ma misia ai le taumafanafana.”²

E i ai se talafaatusa i lenei mea malie i lo tatou olaga i lenei lalolagi matagofie. E manino lava ia mau e faapea o lo tatou olaga i le tino o se taimi e puupuu tele. E mafai ona faapea atu mai se vaaiga o le faavavau, o lo tatou taimi i le lalolagi e matua puupuu lava e pei o le taumafanafana a Peretania.³

O nisi taimi o le faamoemoega o le tagata ma lona ola ai, e faamatalaina foi i ni faaupuga maualalo lava. O le perofeta o Mose na soifua a’e i le mea atonu e faaigoa e nisi i aso nei, o se talaaga e le laumaua. E pei ona tusia i le Penina Tau Tele, o le Alii, i le tapenaina o Mose mo lona tofiga faaperofeta, na tuuina atu ia te ia se vaaiga aoao o le lalolagi ma le fanauga uma a tagata na i ai ma sa foafoaina.⁴ O le tali tau atuatuvale a Mose: “O lenei … ua ou iloa ai o le tagata o se mea noa, o se mea ou te le’i mafaufauina lava.”⁵

Mulimuli ane, i se mea na tino mai o se faafitifiti i lagona o le le taua atonu na oo ia Mose, sa folafola mai ai e le Atua Lona faamoemoega moni: “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata.”⁶

Ua tutusa i tatou uma i luma o le Atua. Ua manino Lana aoaoga faavae. Ua tatou faitau i le Tusi a Mamona, “Ua tutusa tagata uma i le Atua,” e aofia ai le “uliuli pe paʼepaʼe, pologa pe saoloto, o tane ma fafine”⁷ O le mea lea, ua valaaulia tagata uma e o mai i le Alii.⁸

Soo se tasi e faasausili i lalo o le fuafuaga a le Tama ona o itu e pei o lanu, itupa, tagatanuu, gagana, po o tulaga tau i le tamaoaiga e matuai sese lava ma e le malamalama i le faamoemoega moni o le Alii mo fanau uma a lo tatou Tama.⁹

O le mea e leaga ai, i o tatou taimi e toetoe o vaega uma o faapotopotoga, ua tatou vaaia ai le olaola o le taua o le tagata lava ia ma le faasausili ae ua faitioina le lotomaualalo ma le tali atu i le Atua. O le tele o faalapotopotoga ua leiloa o latou faavae ma e po foi malae pe aisea ua tatou i ai i lenei lalolagi. O le lotomaualalo moni, lea e taua mo le faataunuuina o le faamoemoega o le Alii mo i tatou, ua seasea vaaia.¹⁰

E taua le malamalama i le maoae o le lotomaualalo, amiotonu, uiga, ma le atamai o Keriso e pei ona faaalia i tusitusiga paia. E faavalevalea le manatu maualalo i le taua o le taumafai pea lava pea mo nei uiga auaumama faaKeriso ma uiga faaleatua i aso taitasi, aemaise lava o le lotomaualalo.¹¹

E manino ia mau e faapea e ui ina matua’i puupuu lenei olaga, ae e taua lava. Na fai mai Amoleka, o le sa avea ma soa faifeautalai a Alema i le Tusi a Mamona, “O le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega.”¹² Tatou te le mananao e momoe loa i lenei olaga, faapei o la’u tagata o le ata katuni.

O le faataitaiga a le Faaola o le lotomaulalo ma le ositaulaga mo tagata uma, o le mea aupito maoae lea na tupu i le talafaasolopito. Sa naunau le Faaola, e ui o se tasi o le Aiga Atua, e sau i le lalolagi o se pepemeamea ma amata ai se soifuaga lea na aofia ai le aoao atu ma le faamalologa o Ona uso ma tuafafine ma taualuga ai i tiga e le mafaamatalaina i Ketesemane ma luga o le satauro ina ia faaatoatoa ai Lana Togiola. O lenei faatinoga o le alofa ma le lotomaualalo e Keriso ua lauiloa faapea o Lona faamaualalo.¹³ Na Ia faia lenei mea mo alii ma tamaitai uma ua foafoaina ma o le a foafoaina e le Atua.

E le finagalo lo tatou Tama Faalelagi e lotovaivai pe fiu Ana fanau i la latou sailiga mo le mamalu selesitila. Pe a tatou mafaufau moni i le Atua le Tama ma Keriso le Alo, po o ai i La’ua, ma mea ua La ausia mo i tatou, e faatumulia i tatou i le migao, maofa, lotofaafetai, ma le lotomaualalo.

O Lotomaualalo e Taua e Fesoasoani ai i le Alii e Faatu Lana Ekalesia

Sa fai e Alema se fesili e talafeauga foi i aso nei: “Afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?”¹⁴ Sa faaauau le tala a Alema, “Pe afai e valaaulia outou e feoti i le taimi nei, … ua lava lo outou lotomaualalalo?”¹⁵

O taimi uma lava ou te faitau ai e uiga ia Alema le Itiiti o ositaulagaina lana matafaioi o se ao o le malo ina ia folafola le upu a le Atua,¹⁶ e faagaeetia au. E manino lava sa i ai se molimau maoae a Alema i le Atua le Tama ma Iesu Keriso ma sa lagonaina e tatau ona ia tali atoatoa atu ia i La’ua e aunoa ma se faatuai. Sa sa’o ana faamuamua ma le lotomaualalo e lafoai mamalu faalenuu ma tulaga aua sa ia iloa e sili ona taua le auauna atu i le Alii.

O le lava ma totoe o le lotomaualalo i o tatou olaga e fesoasoani ai i le faatuina o le Ekalesia e aupito taua. E fesoasoani se faataitaiga o le talafaasolopito o le Ekalesia tatou te malamalama ai. Ia Iuni o le 1837, sa musuia ai le Perofeta o Iosefa Samita a o i ai i le Malumalu o Katelani, e valaau le Aposetolo o Heber C. Kimball e ave le talalelei a Iesu Keriso i “Egelani … ma tatala le faitotoa mo le faaolataga o lena atunuu.”¹⁷ Sa tofia le Aposetolo o Orson Hyde ma ni isi e o faatasi ma ia. Sa ofoofogia le tali atu a Elder Kimball. “O le manatu i le tofia i se misiona taua sa toetoe ina a ou le gafataulimaina. … Toetoe a [ou] sauni e magoto ifo i lalo o le avega sa tuu mai i o’u luga.”¹⁸ Ae ui o lea, sa ia tauaveina le misiona ma le faatuatua a’iai, tautinoga, ma le lotomaualalo.

O nisi taimi o le lotomaualalo o le taliaina lea o valaauga pe a tatou lagona tatou te le agavaa. O nisi taimi o le lotomaualalo o le auauna atu ma le faamaoni pe a tatou lagona tatou te gafatia se tofiga e sili atu le taua. Ua faamautu mai e taitai lotomaualalo i saunoaga ma faataitaiga e le o le nofoaga tatou te auauna atu ai, ae o le ala tatou te auauna atu ai ma le faamaoni.¹⁹ O nisi taimi o le lotomaualalo o le faatoilaloina lea o lagona tiga pe a tatou manatu ua soona fai i tatou e taitai po o isi tagata.

I le aso 23 o Iulai, 1837 sa fono ai le Perofeta o Iosefa Samita ma Elder Thomas B. Marsh, Peresitene o le Korama a le Toasefululua. Na manino le le fiafia o Elder Marsh ina ua valaauina e le Perofeta uso e toalua o lana Korama e o i Egelani e aunoa ma le logoina o ia. Ina ua feiloai Iosefa ma Elder Marsh, sa faataatia ese soo se lagona tiga, ma sa maua e le Perofeta se faaaliga ofoofogia. Ua avea nei ma vaega e 112 o le Mataupu Faavae ma Feagaiga ²⁰ O loo aumai ai se taitaiga maoae mai le lagi e tusa ai ma le lotomaualalo ma le galuega faafaifeautalai. Fuaiupu e 10 ua faitauina, “Ia e lotomaulalo; ona taitaiina ai lea o oe e le Alii lou Atua, ma tali atu i au talosaga.”²¹

O lea faaaliga na tupu i le aso tonu lava na tautino atu ai e Elders Kimball, Hyde, ma John Goodson, i le lotomaulalo uma, le Toefuataiga mai o le talalelei a Iesu Keriso i le Falesa o Vauxhall i Preston, Egelani.²² O le uluai taimi lea na folafola atu ai e faifeautalai le talalelei toefuataiina i fafo atu o Amerika i Matu i le tisipenisione lenei. O le taunuuga o la latou taumafaiga faafaifeautalai na toetoe o le taimi lava lea na maua ai papatisoga o e liliu mai ma oo atu ai ina toatele tagata auai faamaoni.²³

O vaega na sosoo ai o le faaaliga o loo taiala ai le taumafaiga a faifeautalai i ona po nei. Latou te faitau i se vaega, “Soo se tasi tou te auina atu i lo’u igoa … o le a i ai le mana e tatala ai le faitotoa o lo’u malo i soo se atunuu … o le tulaga e oo i ai le latou faamaualalalo o i latou lava i o’u luma, ma tumau i lau upu, ma faalogo i le leo o lo’u Agaga.”²⁴

O le lotomaualalo o se vaega taua o lenei taumafaiga maoae faafaifeautalai e mafai ai e le Alii ona faatu Lana Ekalesia i se ala ofoofogia.

Ma le faafetai, o loo tatou vaaia pea lea mea i le Ekalesia i ona po nei. Ua ofo atu e tagata o le au paia, e aofia ai ma le tupulaga faia’e o latou taimi ma tolopo le a’otauina ma galuega ina ia auauna atu i misiona. E toatele tagata matutua o le au paia ua tuua galuega ae faia isi osigataulaga ina ia auauna atu ai i le Atua po o le a lava le tulaga e valaauina ai i latou. Tatou te le faatagaina faafitauli faaletagata lava ia e faalavefauina pe seueseina i tatou mai le faataunuuina o Ona faamoemoega.²⁵ O le auaunaga i le Ekalesia e manaomia ai le lotomaualalo. Tatou te auauna atu ma le lotomaualalo faatasi ai ma o tatou manatu, mafaufau, ma le malosi atoa. I vaega uma o le Ekalesia, e taua le malamalama i le uiga faaKeriso o le lotomaualalo.

O Le Lotomaualalo Faifaipea e Taua i le Fesoasoani e Saunia ai Tagata Taitoatasi e Feiloai ma le Atua

O le sini o le faamamaluina o le Alii ma le gauai atu o i tatou lava i Lona finagalo²⁶ ua le o faatauaina i faalapotopotoga i aso nei e pei ona sa i ai i aso ua mavae. E talitonu nisi taitai Kerisiano o isi faatuatuaga o loo tatou ola i se lalolagi ua le toe amanaia ai le faa-Kerisiano.²⁷

I le tele o augatupulaga, o le mana o le Judeo-Christian o le lotomaualalo ma amiomama faaleagafesootai o le tauagafau ma le fetala’i, o le tagavai taatele lea sa i ai.

I le lalolagi i ona po nei, ua i ai se faamamafa faateleina o le faamaualuga, manatu faasausili ia te ia lava, ma le mea ua ta’ua o le “faafiatonu“ lea i nisi taimi e tau atu ai i le leai o se lotomaualalo moni. Fai mai nisi o mea moni e taua mo le fiafia i aso nei e aofia ai le “ia mao’i, ia malosi, ia fuatele mai—ma le mea e sili ona taua, aua le faalagolago i isi tagata … aua o lou manuia ua … i ou lava lima.”²⁸

Ua fautuaina mai e tusitusiga paia se isi faiga e ese ai. Ua fautua mai e tatau ona avea i tatou ma soo moni o Iesu Keriso. O lenei mea e aofia ai le faavaeina o se lagona mamana o le tali atu i le Atua ma se aga atu faamaualalo i le olaga. Na aoao mai e le Tupu o Peniamina o le tagata natura o se ita lea i le Atua, ma sa fautua mai e manaomia ona tatou gauai atu i tatou lava “i uunaiga a le Agaga Paia.” Sa ia faamalamalama mai, faatasi ai ma isi mea, o lenei mea e manaomia ai le “usiusitai, agamalu, lotomaualalo, onosai, [ma le] tumu i le alofa”²⁹

Ua faaaoga sese e nisi le talitonuina o se faailogaga o le tagata natura ma uiga ia o ni faafeagai o le lotomaualalo, agalelei, alofamutimutivale, lotofaamagalo, ma le amio solia. E mafai ona tatou faailogaina lo tatou lava tulagaese o ni fanau a le Atua e aunoa ma le faaaogaina o le ta’utalitonuina e fai ma ‘alofaga o se amio e le o Keriso.

I la tatou tulimataiga mo le lotomaualalo, ua fatuina e le initoneti o ona po nei ni luitau e ‘alofia ai le faamaualuga. O faataitaiga e lua o le faiga faaloloto ia “tau lava o a’u e tilotilo mai i ai” po o le osofaia o isi i le faia o tusiga ita ma uumi i fesootaiga faaagafesootai. Toe tasi le isi faataitaiga o le “gugutu le ‘aina.” Ua faauigaina o “se faamatalaga e foliga mai e tauagafau pe tuu ai oe lava i lalo [po o se ata] o lona faamoemoega moni lava o le faatosina mai lea i se mea o loo e mitamita ai.”³⁰ Ua lapataia mai pea i tatou e perofeta e uiga i le faamaualuga ma faamamafa mai ai mea le aoga o le lalolagi.³¹

O le faateleina o le solofa ifo o fesootaiga faaaloalo ua avea foi ma se popolega. O le mataupu faavae faavavau o le faitalia e manaomia ai lo tatou faaaloalogia o filifiliga e tele tatou te le ioeina. O taua ma fefinauaiga lea ua tele ina solia ai “tuaoi o aga masani faatamalii.”³² Tatou te manaomia ia tele atu le tauagafau ma le lotomaualalo.

Ua lapatai mai Alema i le “faafefete a’e i luga i le faamaualuluga o outou loto,” i le manatu faapea ua sili atu lo outou lelei nai lo o se tasi,” ma le sauaina o e lotomaualalo ua “savavali e tusa ma le faatulagaga a le Atua.”³³

Ua ou maua le lelei faamaoni i tagata o faatuatuaga uma o e ua lotomaualalo ma lagonaina latou te tali atu i le Atua. O le toatele o i latou ua mulimuli i le perofeta o le Feagaiga Tuai o Mika, o le na tautino mai, “Se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feoa’i ma lou Atua ma le loto faamaulalo?”³⁴

A oo ina tatou lotomaualalo faamaoni, tatou te tatalo mo le lotofaamagalo ma faamagalo atu foi i isi. Pei ona tatou faitauina i le Mosaea, na aoao mai Alema e faapea o le tele o taimi e salamo ai, o le a faamagalo e le Alii a tatou solitulafono.³⁵ I se isi itu, e pei ona ta’ua mai i le Tatalo a le Alii,³⁶ a tatou le faamagalo atu i solitulafono a isi, ua tatou aumaia i tatou lava i lalo o le ta’usalaga.³⁷ Ona o le Togiola a Iesu Keriso, ua faamagaloina ai a tatou agasala e ala i le salamo. A tatou le faamagalo atu i e agaleaga mai ia i tatou, ua tatou teena le Togiola a le Faaola. O le teulotoina o se mea e le fiafia ai ma musu e faamagalo atu ma musu e taulima ma le lotomaualalo a tatou fegalegaleaiga i se ala faaKeriso o le a aumaia moni lava i tatou i lalo o le ta’usalaga. O le teulotoina o se mea e le fiafia ai o se mea oona i o tatou agaga.³⁸

Se’i ou lapatai atu foi faasaga i soo se ituaiga o faasausili. Ua faia e le Alii, e ala mai i le perofeta o Moronae se eseesega manino i le va o le faasausili ma le lotomaualalo: “E faatauemu e valelea, ae o le a faanoanoa i latou; ma ua lava lou alofa tunoa mo e agamalu.” Na toe tautino atili mai le Alii, “Ou te avatu i tagata ia vaivaiga ina ia faalotomaualalo ai i latou; ma ua lava lou alofa tunoa mo tagata uma o e e latou te faalotomaualalo ai i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”³⁹

O le lotomaualalo e aofia ai le lotofaafetai mo o tatou mau faamanuiaga ma fesoasoani mai le lagi. O le lotomaualalo e le o se ausiaga iloga pe o se faatoilaloina o ni luitau maoae. O se faailoga o le malosi faaleagaga. O le mauaina o le mautinoa le leoa faapea e mafai ona tatou faalagolago i le Alii i lea aso ma lea aso o lea itula foi ma lea itula, e auauna atu ia te Ia, ma ausia ai Ona faamoemoega. Ou te tatalo o le a tatou taumafai pea lava pea i lenei lalolagi o fefinauaiga, mo le lotomaualalo moni i aso uma. Sa faaupu faapea e se solo e fiafia i ai:

O le su’ega o le maoa’e o le ala lea

E fetaia’i ai le tagata ma le faavavau i Aso Taitasi.⁴⁰

Ou te tuuina atu se molimau mautu i le Faaola ma Lana Togiola ma le taua lofituina o le auauna atu ia te Ia ma le lotomaualalo i aso taitasi ma aso uma. I le suafa, o Iesu Keriso, amene.