Ina Ia Atoa Lo Outou Olioli
Saunia e Jean B. Bingham
Peresitene Aoao o le Aualofa
O Iesu Keriso o le pogai o faamalologa uma, filemu, ma le alualu i luma e faavavau.
Uso e ma tuagane, o se fiafiaga le i ai faatasi ma outou. Ma o le mea lena ou te fia manao e talanoa ai ma outou i lenei taeao—o le mauaina o se olioli atoatoa.
Sa i ai se tala tomua talu ai nei e faitauina, “O mala ua fesouaina ai le atunuu [ma le] lalolagi.”1 Mai afa ma lologa i mugala ma lamala, mai afisosolo ma mafui’e i taua ma faama’i faataumaoi, e foliga mai “ua vavao le lalolagi uma.”2
E faitau miliona tagata ua sui mea e nonofo ai, ma e le faitaulia ola ua afaina i nei luitau. O le fefinauai i aiga ma nuu faapea foi tauiviga i totonu ma le fefe, masalosalo, ma le faamoemoega ua le taulau e tuua ai foi i tatou i le fememea’i. E mafai ona faigata ona lagonaina le olioli lea na aoao mai e Liae o le faamoemoega lea o le olaga.3 Ua tatou fesili uma lava i nisi o taimi, “O fea e mafai ona ou liliu i ai mo se filemu? Fea lo’u filemu … ?”4 Tatou te tau manatunatu, pe faapefea ona ou maua le olioli e ui i faigata o le olaga nei?
O le tali atonu e faigofie tele, ae ua faamaonia le moni mai lava i ona po o Atamu. E maua le olioli tumau i le taulai atu i lo tatou Faola, o Iesu Keriso, ma le ola ai i le talalelei e pei ona faaa’oa’o ma aoao mai e Ia. O le tele tatou te aoao ai, faatuatua, ma faataitai ia Iesu Keriso, o le tele foi lena o lo tatou malamalama o Ia o le pogai o le faamalologa, filemu, ma le alualu i luma e faavavau. Ua Ia valaaulia i tatou taitoatasi e o mai ia te Ia,5 o se valaaulia sa faauigaina e Peresitene Henry B. Eyring “o le valaaulia aupito taua e mafai e soo se tasi ona talia.”6
Aoao e uiga ia Iesu Keriso
E faapefea ona tatou o mai ia te Ia? O Aperila talu ai, na fautua mai ai Peresitene Russell M. Nelson ma Elder M. Russell Ballard ia tatou suesueina le“O Le Keriso Soifua”7 o se vaega o lo tatou aoao e uiga i le Faaola. E toatele na taliaina le lu’i ma ua faamanuiaina. E lei leva talu ai, sa avatu ai e se uo pele i ana fanau matutua taitoatasi ni kopi o se tusiga e i ai ata o le talalelei e faapupula ai fasifuaitau taitasi. Sa ia fautuaina lana fanau e fesoasoani i a latou fanau ia malamalama ma taulotoina. I se taimi mulimuli ane, sa faasoa mai ai e la’u uo se vitio o le tamateine a lana tama e ono tausaga, o Laynie, o tauloto ma le naunautai ma le to’a. Sa ou iloaina ai afai e mafai ona fai e se ono-tausaga, e mafai foi la ona ou faia!
Ao ou suesueina le soifuaga ma aoaoga a Iesu Keriso ma taulai atili ma tautino atu e tauloto le “O Le Keriso Soifua, sa faateleina lo’u lotofaafetai ma le alofa mo lo tatou Faaola. O fuaiupu taitasi o lena tusiga musuia o loo i ai se lauga ma ua faalauteleina ai lo’u malamalama i Ana matafaioi paia ma le misiona i le lalolagi nei. O mea sa ou aoaoina ma lagonaina i lea vaitau o le suesue ma toe tomanatu i ai, ua faamautu ai e moni lava o Iesu “o le malamalama, o le ola, ma le faamoemoe o le lalolagi.”8 O tusitusiga paia anamua ma upu a perofeta o aso e gata ai na tusia pe sa faaleo e vivii atu ai ia te Ia, o loo molimau mai ai “o Lona ala o le ala e tau atu i le fiafia i lenei olaga ma le ola e faavavau i le lalolagi a sau.”9
Ia Faatuatua ia Iesu Keriso
A o outou suesue i le soifuaga o Keriso ma aoaoga i auala e le mafaitaulia, o le a faateleina lo outou faatuatua ia te Ia. O le a oo ina outou iloa e alofa o Ia ia te outou taitoatasi ma e malamalama lelei foi ia te oe. I le 33 tausaga o Lona soifua ai i le olaga nei, sa mafatia o ia i le teenaina, sauaga, galala i le fia taumafa, fiainu, ma le le lava,10 tuuatoatasi, sauaina i upu ma le faaletino, o se oti matautia i lima o tagata agasala.11 I le Faatoaga o Ketesemane ma i luga o le satauro i Kalevaria, sa Ia lagonaina ai o tatou tiga uma, mafatiaga, faaosoosoga, ma’i, ma vaivaiga.12
Po o a lava mea ua tatou mafatia ai, o Ia o le pogai o le faamalologa. O i latou ua aafia i soo se ituaiga o sauaga, se toesea ogaoga, ma’i faaumiumi po o se mafatiaga le ma’alofia, tuua’iga le moni, sauaga matuia, po o se faatamaiaga faaleagaga mai le agasala po o le le malamalama e mafai ona faaatoatoa e le Togiola o le lalolagi. Peitai, o le a Ia le ulufale mai e aunoa ma se valaaulia. E tatau ona tatou o mai ia te Ia ma faatagaina o Ia e faatino Ana vavega.
I se tasi aso matagofie o le tautotogo sa ou tuua ai le faitotoa e tatala se’i maua ai se ea fou. Sa lele mai se tamai manulele i le faitotoa sa matala ma iloa ai e le o le mea lea sa manao e sau i ai. Sa felelea’i faataamilo i le potu, ma lele faafia atu i le faamalama tioata i se taumafaiga e sola. Sa ou taumafai e taiala malie atu o ia agai i le faitotoa sa matala, ae sa fefe ma saga sesegi ai lava. Na i’u ina pau i luga o pupuni o le faamalama ua vaivai ma ua le mautonu. Sa ou tago i le pulumu ma tuutuu malie atu le itu felefele i luga i le mea sa faapuna ai le manulele ma le gatete. A o ou tuuina le ulu o le pulumu i autafa o ona vae, sa laalaa ifo ma le musua le manulele i luga o tala o le pulumu. Sa ou savali lemu i le faitotoa na matala ma faato’ato’a le uuina o le pulumu i le mea sa ou mafaia. O le taimi lava na ma taunuu ai i le faitotoa na matala, sa lele saoasaoa ese loa le manulele i lona saolotoga.
E pei o le manulele, o nisi taimi tatou te fefefe ai e talitonuina ona tatou te le malamalama i le alofa atoatoa o le Atua ma le naunauga e fesoasoani ia i tatou. Ae a tatou suesue i le fuafuaga a le Tama Faalelagi ma le misiona a Iesu Keriso, ona tatou malamalama lea na pau lo La’ua faamoemoega o lo tatou fiafia e faavavau ma le alualu i luma.13 E fiafia i La’ua e fesoasoani mai pe a tatou ole atu, saili, ma tuitui atu.14 Pe a tatou faaaoga le faatuatua ma tatala atu ma le lotomaualalo i tatou lava i a La’ua tali, ona faasaoloto ai lea o i tatou mai le taotaomia i le le malamalama ma talitonuga sese, ma mafai ai ona faasino mai ia i tatou le ala i luma.
O Iesu Keriso o le punavai o le filemu. Ua Ia valaaulia i tatou e “faalagolago atu i [Lona] aao ua lava”15 ma ua folafola mai le “filemu … e silisili i mea uma o loo manatu i ai,”16 o se lagona e oo mai pe a “fetalai mai e [Lona Agaga] le filemu i o tatou agaga”17 tusa lava po o a luitau o loo siomia ai i tatou. Pe o ni tauiviga patino, faalavelave faaleaiga, po o faafitauli faalenuu, o le a oo mai le filemu pe a tatou talitonu ua i ai i le Alo Pele e Toatasi a le Atua le mana e faamalolo ai o tatou agaga tiga.
Sa faalagolago atu Sesana Potovini, o se tasi o nai Au Paia i Karatova, i Kalaotia i le Faaola ina ua maliliu lona toalua ma ona matua uma i totonu o le ono masina i le tausaga na te’a nei. Na faatumulia i le faanoanoa, ae o le i ai o se molimau e faavavau aiga, o lea sa ia faaaogaina ai ana tupe uma sa teu e malaga ai i le malumalu i Suitiselani, lea sa faamauina ai o ia i lona toalua ma ona matua. Sa ia faamatala mai o na aso i le malumalu o se faatumutumuga lea i lona olaga. Ona o lana molimau mausali ia Iesu Keriso ma Lana Togiola, lea sa ia lagonaina ai le filemu ma ia maua le faamalologa lea foi na avea ma malosiaga ia i latou sa vagaia o ia.
O le faatuatua ia Iesu Keriso e aumaia atili ai isi mau meaalofa nai lo le na o le faamalologa ma le filemu. E pei ona faasoa mai e Peresitene Henry B. Eyring: “Ou te faafetai lava mo le tele o auala ua asiasi mai ai le Alii ia te au faatasi ma Le Faamafanafana i taimi sa ou manaomiaina ai le filemu. Ae e le na o lo tatou mafanafana o loo popole ai lo tatou Tama oi le Lagi ae faapena foi lo tatou alualu i luma.”18
Ona o le Togiola a Iesu Keriso, lea e aofia ai meaalofa o le togiola ma le toetu, ua mafai ai ona tatou salamo, suia, ma alualu i luma e faavavau. Ona o le mana Na te tuuina mai ia te i tatou pe a tatou usiusitai, ua mafai ai ona faateleina lo tatou gafatia nai lo le mea e tatou te mafaia e i tatou lava. Atonu tatou te le malamalama atoatoa pe faapefea, ae o i tatou taitoatasi ua lagonaina le faateleina o le faatuatua ia Keriso ua mauaina foi se malamalama sili atu i le faasinomaga paia ma le faamoemoega, e taitai atu ai i tatou e faia filifiliga e ogatusa ma lena malamalama.
E ui i se lalolagi o le a taumafai e ‘auato i tatou i lalo e faapei “o meaola,”19 ole iloa ai o le Atua o lo tatou Tama ua faamautinoa ai e i ai lo tatou gafatia paia ma le folafolaga tautupu. E ui i se lalolagi e fai mai ia i tatou o lenei olaga e leai se faamoemoe, o le iloaina na faia e le Alo Pele e Toatasi o le Atua ia mafai ona togiolaina i tatou ma toetutu ua tatou maua ai le faamoemoe mo le alualu i luma e faavavau.
Faaa’oa’o ia Iesu Keriso
A o tatou aoao atili e uiga ia Iesu Keriso, ua tatou atiina ae le faatuatua sili atu ia te Ia ma tatou mananao lava i tatou e mulimuli i Lana faataitaiga. O le tausiga o Ana poloaiga ua avea ma o tatou naunauga silisili. E naunau atu o tatou loto e fesoasoani i mafatiaga o isi e pei ona sa Ia faia, ma ua tatou mananao ia i latou ia maua le filemu ma le fiafia ua tatou maua.
Aisea ua mamana tele ai le taumafai e faia e faapei ona Ia fai? Talu ai ona ua tatou faatinoina lo tatou faatuatua, ua tuuina atu ai e le Agaga Paia le molimau i upumoni e faavavau.20 Na faatonu e Iesu Ona soo e tausi Ana poloaiga aua ua Ia silafia a tatou mulimuli i Ana faataitaiga, o le a amata ona tatou maua le olioli, ma a o faaauau pea ona tatou i ai i Lona ala, o le a tatou oo i le atoaga o le olioli. Sa Ia faamalamalama mai, “Ua ou fai atu nei mea ia te outou, ina ia tumau ai lo’u olioli ia te outou”21
Pe o fausia a tatou molimau i le faavae papa o Iesu Keriso ma Lana talalelei? A oo ina luluti mai afa o le olaga i o tatou luga, pe tatou te fitivale ea e sue pe faapefea ona fai po o se feau i le initoneti mo se fesoasoani? O le faaavanoa o se taimi e fausia ai ma faamalolosia lo tatou iloa ma molimau ia Iesu Keriso o le a selesele mai ai vaegatofi mauoa i taimi o tofotofoga ma faigata. O le faitauina o tusitusiga paia i aso taitasi ma le manatunatu loloto i upu a perofeta soifua, punouai i tatalo anoa faaletagata lava ia, ‘ai ma inu ma le naunautai i le faamanatuga i vaiaso taitasi, tuuina atu o le auaunaga e faapei ona faia e le Faaola—o nei gaoioiga faigofie taitasi e avea ma se poloka e fai se fausaga mo se olaga fiafia.
O le a se mea e aumaia ai le olioli ia te oe? Le vaaiga o e pele ia te oe pe a uma se aso umi? Le lotomalie ona o se galuega ua lelei ona fai? Le sulu i mata o se tasi pe a e tausoaina a latou avega? O upu o se viiga e pa’i loloto atu i lou loto? Le faatalofa a se uo pele? Vaai se taimi patino e tomanatu ai i ou faamanuiaga, ona sue lea o ni auala e faasoa atu ai. A o faifai pea lou aapa atu ma auauna atu ma siitia ou tuagane ma uso i lo outou pitonuu po o le lalolagi atoa, o le a e lagonaina le filemu sili atu ma le faamalologa ma le alualu i luma.
O Mai ia te Ia. Ou te molimau atu a e faatotonugalemuina lou olaga ia Iesu Keriso, o le a e maua le olioli i ou tulaga, tusa lava po o le a. E moni, “O Ia, ma ua na o Ia lava,”22 o le tali lea. Ia faaalu le taimi ma maua se taimi ia iloa ai Iesu Keriso e ala i le suesueina filiga, atiaeina o le faatuatua sili atu ia te Ia, ma taumafai ia avea atili e faapei o Ia. A o tatou faia, o le a uunaia i tatou e fai atu, “Ia faafetaia le Atua mo le meaalofa le mafaatusalia o Lona Alo paia lea.”23 I le suafa paia ma mamalu o Iesu Keriso, amene.