Valavala, ae Lotogatasi Pea

Saunia e Elder Joni L. Koch

O Le Fitugafulu

I le Ekalesia, e ui i o tatou eseesega, e faamoemoe mai le Alii ina ia tatou tasi!

Ia Iuni 1994, sa ou aveina ma le naunautai le taavale e toe foi i le fale mai galuega e matamata i le TV lo matou au soka faavaomalo o loo taaalo i le Ipu o le Lalolagi. E lei umi ona amatalia lau faigamalaga, sa ou vaai mamao atu i se alii e le atoatoa le malosi i luga o le auala savali o toso faatopetope lana nofoa faataavalevale ua teuteuina i la matou fua Pasila. Sa ou iloa i lena taimi o le a alu foi o ia i le fale e matamata i le taaloga!

Ina ua fesopoai o ma ala, na feiloai o ma mata; mo se taimi puupuu, sa ou lagona malosi le lotogatasi ma lena alii! Sa eseese ni vaega na ma agai i ai, e le iloa e le tasi le isi, sa manino le eseese o tulaga faaagafesootai ma faaletino, ae o le ma faamemelo e tasi mo le soka ma le alofa mo lo ma atunuu na ma lagona ai le lotogatasi i lena lava taimi! Ou te lei toe vaaia lena alii talu mai lena taimi, ae i le asō, i le tele o tausaga ua tea, e mafai pea ona ou vaai i na fofoga ma lagona lena sootaga malosi ma lena alii. E ui i lea, na matou manumalo i lena taaloga ma le Ipu o le Lalolagi i lena tausaga!

I le Ekalesia, e ui i o tatou eseesega, e faamoemoe mai le Alii ina ia tatou tasi! Na Ia fetalai mai i le Mataupu Faavae ma Feagaiga, “Ia tasi outou; ma afai tou te le tasi e le a au outou.”¹

A tatou ulu atu i se falelotu po o se malumalu e tapuai ai o se vaega, e tatau ona tuu ese o tatou eseesega, e aofia ai le tupuaga, tulaga faaagafesootai, vaega faaupufai e filifili ai, ausiaga faaleaoaoga ma faalegaluega, ma ia taulai atu i a tatou faamoemoega faaleagaga e tutusa. Tatou te usuina faatasi viiga, manatunatu e uiga i feagaiga e tasi i le taimi o le faamanatuga, fai atu faatasi se “amene” leotele pe a maea lauga, lesona, ma tatalo—o lona uiga tatou te ioeina faatasi mea na faasoa mai.

O nei mea lea tatou te faia faatasi e fesoasoani e fatuai se lagona malosi o le lotogatasi i totonu o le potopotoga.

Ae, o le mea moni e iloa ai, faamausaliina, pe faatamaia ai lo tatou lotogatasi o le auala o tatou amioai ai pe a tatou valavala ma tagata o le Ekalesia. E pei ona tatou iloa uma, e le mafai ona aloese mai ma e masani ai le iu lava ina tatou talanoa e uiga i le tasi ma le isi.

E faalagolago i mea tatou te filifili e fai atu e uiga i le tasi ma le isi, o a tatou upu o le a “fili faatasi o latou loto i le lotogatasi,”² e pei ona aoao mai Alema i Vai o Mamona, pe o le a latou faatamaia le alofa, faatuatuaina, ma le agalelei lea e tatau ona ia i tatou.

O loo i ai tala e tau leiloa le faatamaia ai o le lotogatasi e pei o le “Ioe, o ia o se epikopo lelei; oi, ae pe ana e vaai ia te ia a o laitiiti!”

Atonu o se vaega sili ona aoga o lenei tala “E lelei tele le epikopo, ma ua ia tuputupu ae i le matua ma le atamai i le aluga o tausaga.”

E tele taimi tatou te tuu ai ni faailoga tumau i tagata i le faaapea atu “E le mafai ona sui le matou peresitene o le Aualofa, e faigata tele o ia!” I le faatusatusa i ai, atonu tatou te faapea atu, “Ua tau le mafai ona fetuunai le peresitene o le Aualofa; atonu o ia feagai ma ni taimi faigata. Sei o tatou fesoasoani ia te ia ma lagolagoina o ia!”

Uso e ma tuafafine, e leai so tatou aia tatau e faamatala ai soo se tasi, aemaise lava mai la tatou Ekalesia, o se tagata e leaga! Nai lo lena, e tatau ona atagia i a tatou upu e uiga i o tatou uso a tagata lo tatou talitonuga ia Iesu Keriso ma Lona Togiola ma ona o Ia, e mafai ai ona tatou suia mo le lelei!

E amata e nisi le faitioina ma fevaevaeai ai ma taitai ma tagata o le Ekalesia mo mea e matua laiti lava.

O le tulaga lea mo se alii e suafa ia Simonds Ryder, na avea ma se tagata o le Ekalesia i le 1831. Ina ua uma ona faitau i se faaaliga e faatatau ia te ia, sa le mautonu i le vaai atu i lona igoa o Rider ua sese le sipelaga, ma le mataitusii nai lo le y. O lona tali atu i lenei mea na uunaia ai lona fesiligia o le perofeta ma iu atu ai i le fasiotia o Iosefa ma liliuese ai mai le Ekalesia.³

E faapena foi lo tatou oo ai i ni aoaiga mai i o tatou taitai faaleekalesia, lea e avea o se suesuega pe o faapefea lo tatou lotogatasi ma i latou.

Sa na o le 11 ou tausaga, ae ou te manatua le 44 tausaga ua mavae, sa faia se toefaafouga tele o le falelotu lea sa auai ai lou aiga i le lotu. A o lei amataina le toefaafouga, sa i ai se fonotaga lea sa talanoaina ai e taitai o le lotoifale ma le eria le auala e auai ai tagata o le ekalesia i le galuega i lena taumafaiga. O lo’u tama, o le sa pulefaamalumalu muamua i lena iunite mo le tele o tausaga, sa faailoa atu lona manatu malosi o lenei galuega e tatau ona faia e se konekarate ae le o tagata e leai ni tomai.

E le gata sa teena lona manatu, ae sa matou faalogo na ogaoga ma faalauaitele le aoaiina o ia i lena tulaga. O lenei tamalii o le sa matuai tuuto i le Ekalesia ma o se sui o le Taua Lona II i Europa, ua masani i le teenaina ma le tau atu mo mea sa ia talitonu i ai! Atonu e mafaufau se tasi po o le a lana tali i le maea ai o lenei mea na tupu. Pe na te tumau pea i lona manatu ma faaauau pea le tetee atu i le faaiuga ua uma ona faia?

Sa matou vaaia ni aiga i la matou uarota ua faavaivai i le talalelei ma sa taofi le auai mai i sauniga ona sa le mafai ona latou tasi ma i latou sa taitai. Sa matou molimauina foi a matou uo mai le Peraimeri ua le faamaoni i lo latou talavou aua sa saili masei pea o latou matua i tagata i totonu o le Ekalesia.

Peitai, sa filifili lo’u tama ia tumau pea i le tasi ma o matou uso a Au Paia. Ma i nai aso mulimuli ane, ina ua potopoto tagata o le uarota e fesoasoani i le fausiaina, sa ia “valaaulia” lo matou aiga e mulimuli atu ia te ia i le faletapuai lea o le a faaavanoa ai i matou lava e fesoasoani i soo se auala.

Sa ou lē mautonu. Sa mafai lava ona ou fesili atu ia te ia, “Tama, aisea tatou te o ai e fesoasoani i le fausiaina pe afai na e tetee i le faia e tagata o le au paia?” Ae o le vaaiga i ona foliga na faalotovaivaia ai au mai le faia o lena mea. Sa ou manao ina ia ou malosi mo le toe faapaiaga. O le mea e lelei ai, sa ou filifili e filemu ma tau lava o le alu e fesoasoani i le fausiaina!

E lei vaai Tama i le faamaeaina o le faletapuai, aua sa maliu o ia a o lei maea lenei galuega. Ae sa faaauau pea e lo matou aiga le faia o la matou vaega seia maea, ma o lena mea sa faatasia i matou ma ia [Tama], ma tagata o la matou uarota, taitai, ma le mea sili, ma le Alii!

I nai taimi a o lei oo i Ona aafiaga tiga i Ketesemane, ina ua tatalo atu Iesu i le Tama mo Ana Aposetolo ma le Au Paia uma, sa Ia fetalai atu, “Ina ia tasi i latou uma, faapei o oe le Tama o i totonu ia te au, o au foi o i totonu ia te oe.”⁴

Uso e ma tuafafine, ou te molimau atu a tatou filifili ia tasi ma tagata ma taitai o le Ekalesia—i taimi uma tatou te potopoto faatasi ai, aemaise pe a tatou valavala ai—o le a tatou lagona foi le lotogatasi atoatoa ma lo tatou Tama Faalelagi ma le Faaola. I le suafa, o Iesu Keriso, amene.