Ia Fealofani e Pei Ona Ia Alofa Mai Ia I Tatou

Saunia e Elder Jose L. Alonso

O Le Fitugafulu

E ala i le auauna atu ma le faamagaloina o isi ona o le alofa moni, e mafai ona faamaloloina ma tatou te maua le malosi e faatoilalo ai a tatou lava luitau.

I le taimi o le Paseka Mulimuli, na tuuina mai e le Faaola se poloaiga fou i Ona soo, e faapea:

“O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou.

“O le mea lea e iloa ai e tagata uma lava o o’u soo outou, pe afai ua outou fealofani.”¹

Sa tuuina atu i soo a le Faaola se poloaiga fou e faia se isi mea, se mea silisili, ma se mea e sili ona paia. O lenei poloaiga fou ma le valaaulia ua aotele atu i le fuaitau autu “faapei ona ou alofa atu ia te outou.”

O Le Alofa o Le Faatino; O Le Alofa o Le Auauna Atu

“O le alofa o se lagona o le tautinoga loloto, popole, ma le alofa. “O le faataitaiga silisili o le alofa o le Atua mo Lana fanau o loo maua i le Togiola Lē Gata a Iesu Keriso.”² “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”³ “O le alofa mo le Atua ma tagata o se uiga lea o soo o Iesu Keriso.”⁴

I ni nai tausaga ua mavae, a o fa tausaga o le atalii ulumatua o le ma atalii, o Jose, sa ia taaalo ai ma lou toalua. A o la talie ma fiafia faatasi, sa fesili atu le atalii o le ma atalii ia te ia, “Tinamatua, e te alofa ia te au?”

Sa ia tali atu ia te ia, “Ioe, Jose, ou te alofa ia te oe.”

Ona ia fai atu lea o se isi fesili ia te ia: “E faapefea ona e iloa e te alofa ia te au?”

Sa ia faamatala atu ia te ia ona lagona ma tau atu foi ia te ia mea uma sa ia faia ma naunau e faia mo ia.

Mulimuli ane, sa faia e lou toalua ia Jose le fesili lea e tasi, e aofia ai lenei fesili ootia: “E faapefea ona e iloa e te alofa ia te au?”

I se tali mama ae faamaoni, na ia faapea mai, “Ou te alofa ia te oe aua ou te lagonaina i totonu o lou loto.” O le uiga agaalofa o Jose i lona tinamatua i lena aso ma taimi uma e faaalia ai o le alofa o se tuufaatasiga o amioga e oo lava i lagona loloto.

Na aoao mai le Tupu o Peniamina, “Ma faauta, ua ou tau atu nei mea ia te outou ina ia mafai ona outou aoaoina, pe a outou auauna atu i o outou uso-a-tagata, ua nao lo outou auauna atu lava lea i lo outou Atua.”⁵

I le lalolagi i le aso o loo i ai le tele o mafatiaga ona o tulaga eseese, o le auina atu o se savali tesi ma se ata malie po o le tuuina i luga o se ata manaia ma faaupuga “Ou te alofa ia te oe” e lelei ma e taua. Ae o le mea e manaomia ona faia e le toatele o i tatou, o le tuu lea i lalo o a tatou masini feaveai ma, faatasi ai ma o tatou lima ma vae, e fesoasoani atu ai i isi o matua manaomia le fesoasoani. O le alofa e aunoa ma le auaunaga ua pei o le faatuatua e mate e aunoa ma galuega; e le aoga moni lava.

O Le Alofa o Le Faamagalo Atu

O le alofa mama o Keriso, o le alofa le pona lea,⁶ e le gata e uunaia i tatou e galulue ma tuuina atu auaunaga ae ia maua foi le malosi e faamagalo atu ai, e tusa lava po o le a le mea na tupu. Sei ou faasoa atu ia te outou se mea na tupu lea na aafia ai ma suia ai lou olaga. Ua tuuina mai e Ted ma Sharon, o matua o Cooper, ia te au le faatagaga e faasoa atu ai le mea na tupu i lo latou aiga i le silia ma le iva tausaga ua tuanai atu. O le a ou faamatala atu le mea na tupu mai le vaaiga a Ted, o le tama o Cooper:

O le aso 21 Aokuso 2008, o le aso muamua lea o le aoga, ma o Ivan, Garrett, ma Logan, o uso matutua e toatolu o Cooper sa i ai uma i le faatali pasi e faatali pasi e o ai. Sa i ai Cooper, e fa tausaga le matua i luga o lana uila, ma sa savali lou toalua o Sharon.

Sa i ai lou toalua i le isi itu o le auala ma sa talo mai ia Cooper e kolosi le auala. I le taimi lava lea e tasi, sa faia lemu ai e se taavale se afega agavale ma alu ai luga o Cooper.

Sa ou maua se valaau mai se tuaoi e tau mai ia te au o Cooper na lavea i se taavale. Sa vave ona aveina atu lau taavale i le faatali pasi e vaai o ia. Sa taoto Cooper i luga o le vao, o loo tauivi e manava, ae sa leai ni manuaga na iloa atu.

Sa ou tootuli i lalo i talaane o Cooper ma fai atu ni mea faamalosiau e pei “O le a lelei. Onosai.” I lena taimi sa o mai ai lou taitai vaega o faitaulaga sili, o Nathan, ma lona toalua. Sa ia fautuaina le ma tuu atu ia Cooper o se faamanuiaga faaleperisitua. Sa ma tuu o ma lima i luga o le ulu o Cooper. Ou te le manatua mea na ou tau atu i le faamanuiaga, ae ou te manatua manino le i ai o isi i o matou autafa, ma o lena taimi sa ou iloa ai o le a maliu Cooper.

Sa ave atu Cooper e le helikopa i le falemai ae, sa maliu lava. Sa ou lagona le tau mai e le Tama Faalelagi ia te au ua maea ou tiute faalelalolagi ia Cooper ma ua i ai nei Cooper i Lana tausiga.

Sa mafai ona matou faaaluina se taimi ma Cooper i le falemai. Sa saunia e le au faigaluega iina o ia ina ia mafai ona matou siiina o ia ma faamavae ma faataga lo matou faaaluina o le tele o le taimi ma ia, siiina o ia, e pei ona matou mananao ai.

I le agai atu i le fale, sa ma vaai ma lou toalua ua tumu i le faavauvau i le tasi ma le isi ma amata ona talanoa e uiga i le tama lea sa aveina le taavale. Ma te le iloaina o ia, e ui e na o le tasi le magaala le mamao ese sa nofo ai, ma sa i ai i totonu o la matou tuaoi o le uarota.

Sa faigata le aso na sosoo ai aua sa matou lofituina atoa uma i le faavauvau. Sa ou faapau ifo i ou tulivae ma tatalo se tatalo sili ona faamaoni ua ou tuuina atu muamua. Sa ou ole atu i le Tama Faalelagi i le suafa o lou Faaola e aveese lou faavauvau lofituina. Na Ia faia lava.

I le faaiuga o lena aso, sa faatulaga ai e se tasi o fesoasoani i la matou au peresitene o le siteki mo i maua e feiloai atu i le alii talavou—le avetaavale o le taavale—ma ona matua i le fale o le fesoasoani. Sa ma faatali ma Sharon i le taunuu mai o le tama ma ona matua. Ina ua matala le faitotoa, sa ma feiloai ia i latou mo le taimi muamua. Sa musumusu mai lou epikopo i lou taliga, “Alu atu ia te ia.” Sa ma opoina ma Sharon o ia i se opo faalevaega tele. Sa matou fetagisi faatasi mo se taimi na foliga mai o se taimi umi lava. Sa ma tau atu ia te ia sa ma iloa o le mea na tupu o se faalavelave faafuasei moni lava.

Sa o se vavega ia Sharon ma au, le auala na ma lagonaina ai ma o loo ma lagonaina pea. Ona o le alofa tunoa o le Atua, sa mafai ai ona ma uia le ala sao, le ala manino, na o le pau lea o le ala, ma alofa ai i lenei tama talavou lelei.

Sa amata ona matou vavalalata tele ma ia ma lona aiga i le aluga o tausaga. Sa ia faasoa maia ona taimi sili ona taua ma i maua. Na ma o foi i le malumalu ma ia a o ia sauni mo lana misiona.⁷

Sa iloa e Ted e aunoa ma se masalosalo e alofa lo tatou Tama Faalelagi ia i tatou. Na te silafia o le mafai ona faamagalo atu, ma faasaoloto o ia lava i lena auala, e suamalie e pei o le faamagaloina. E oo mai lenei suamalie mai le mulimuli i le faataitaiga a lo tatou Faataitaiga sili. I le Tusi a Mamona, sa tautino atu Alema i le Faaola: “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.”⁸

Uso e ma tuafafine, o le tala matagofie lena e uiga i le alofa moni ma le faamagalo atu. E mafai foi ona tatou maua le olioli ma le fiafia pe a tatou auauna atu ma faamagalo atu i isi. E masani ona faapea mai Georgy, o se atalii o se tasi o ou atalii, “O le a le ituaiga o aiga o i ai i tatou?” Ma na ia talia lena fesili, “O i tatou o se aiga fiafia!”

Ua fautua mai Peresitene Thomas S. Monson ia i tatou, e faapea: “Sei o tatou suesueina o tatou olaga ma naunau e mulimuli i le faataitaiga a le Faaola e ala i le agalelei, agaalofa, ma le alofa mama.”⁹

Ou te iloa e alofa lo tatou Tama Faalelagi ma Lona Alo, o Iesu Keriso ia i tatou ma naunau e fesoasoani ia i tatou e galulue a o tatou alolofa i le tasi ma le isi e pei ona La alolofa mai ia i tatou. Ma ou te iloa, e ala i le auauna atu ma le faamagaloina o isi ona o le alofa moni, e mafai ona faamaloloina ma tatou maua le malosi e faatoilalo ai a tatou lava luitau. Ou te molimau atu ai i le suafa o Iesu Keriso, amene.