O Ē Tauaveina le Malamalama Faalelagi
Saunia e Peresitene Dieter F. Uchtdorf
Fesoasoani Lua i le Au Peresitene Sili
I le avea ai ma sē e tauaveina le perisitua a le Atua ma se soo o Iesu Keriso, o oe o sē e tauaveina le malamalama.
Sa tu se toeaina matua i le laina i le falemeli e faatau ni faailoga tusi i le laulau tautua. Sa matauina e se tamaitai talavou e fai si faigata ona ia savali ma ofo atu e faaali atu ia te ia le auala e faatau ai faailoga tusi mai se masini e sefe ai le taimi. Sa fai atu le toeaina matua, “Faafetai lava, ae e sili ia te au le faatali. E le fesili mai le masini ia te a’u e uiga i o’u gugu.”
O nisi taimi e aoga ai le talanoa atu i se tasi e uiga i o tatou faafitauli.
O tiga, faanoanoa, ma ma’i o aafiaga ia tatou te tausoaina uma—o taimi o measese, faanoanoaga, ma le le manuia e mafai ona faaopoopo atu i se faaputuga o manatuaga o mea tatou te teufatuina.
A oo mai la i lo tatou tulaga manuia faaletino, tatou te taliaina le matutua ma faama’i o se vaega o la tatou malaga faaletino. Tatou te saili le fautuaga a tagata atamamai e malamalama i le tino faaletino. A tatou mafatia mai le ātu faalelagona po o le ma’i faalemafaufau, tatou te saili atu i le fesoasoani a tagata atamamai e togafitia nei ituaiga o ma’i.
E pei lava ona tatou feagai ma tofotofoga faaletino ma faalelagona i lenei olaga faitino, tatou te feagai foi ma luitau faaleagaga. O le toatele o i tatou ua oo i ni taimi i o tatou olaga na matua musaesae ai a tatou molimau. Atonu foi ua tatou oo i ni taimi e foliga mai ua mamao ese atu lo tatou Tama Faalelagi. E i ai foi ni taimi tatou te faapelepele ai i mea a le Agaga ma o tatou loto atoa. E i ai foi taimi latou te foliga mai ai ua itiiti le taua pe ua faaitiitia foi le taua.
O le asō ou te fia talanoa atu ai i le soifua maloloina faaleagaga—le auala e mafai ai ona tatou maua le faamalologa mai le le toaga, ma savali i se ala o le soifua maloloina faaleagaga e ola.
Ma’i Faaleagaga
O nisi taimi e oo mai ai le ma’i faaleagaga ona o se taunuuga o le agasala po o manu’aga faalelagona. O nisi taimi e sausau malie ai lava le lafotuina faaleagaga lea e faafaigata ai ona tatou iloaina le mea o loo tupu. E pei o vaega o papa e faaputuputu, e faapena tiga ma faanoanoaga faaleagaga e mafai ona fatufatu i le aluga o taimi, ma mamafatu ai i o tatou agaga seia oo ina a toetoe lava lematatalia le mamafa tele. Mo se faataitaiga, e mafai ona tupu lenei mea pe a lofituina tele o tatou tiutetauave i galuega, aiga, ma le ekalesia lea tatou te le vaaia ai le olioli o le talalelei. Tatou te ono lagonaina foi e pei ua le o toe i ai se mea tatou te foai atua, pe faapea foi o le ola ai i poloaiga ua le gafatiaina e lo tatou malosi.
Ae e le faapea la e moni tofotofoga faaleagaga ona faapea ai lea e le mafai ona foiaina.
E mafai ona faamaloloina i tatou faaleagaga.
E oo lava i manu’aga faaleagaga loloto—ioe, e oo lava i na mea e ono foliga mai e le matineia—e mafai lava ona faamaloloina.
A’u uo pele, o le mana faamalolo o Iesu Keriso e le o misi i o tatou aso.
O le aao faamalolo a le Faaola e mafai ona suia ai olaga i o tatou aso e pei lava ona sa Ia faia i Ona aso. Afai tatou te maua le faatuatua, e mafai ona Ia uuina o tatou lima, faatumu o tatou loto i le malamalama ma le faamalologa faalelagi, ma fetalai mai ia i tatou upu faamanuia, “Ina tu ia i luga, ave ia lou moega, ma ia e savali.”1
Pouliuli ma le Malamalama
Po o le a lava le mea o mafua ai o tatou ma’i faaleagaga, e tasi lava le mea e tutusa uma ai: o le leai o se malamalama faalelagi.
E faaitiitia e le pouliuli lo tatou tomai e vaai ai ma le manino. Na te faanenefuina la tatou vaai i mea na sa i ai le taimi muamua na manino ai. A tatou i ai i le pouliuli, o le a mautinoa lava lo tatou faia o ni filifiliga le lelei, ona e le mafai ona tatou vaaia mea lamatia i lo tatou ala. A tatou i ai i le pouliuli, e mautinoa lava o le a leiloa atu le faamoemoe, ona e le mafai ona tatou vaaia le filemu ma le olioli o loo faatalitali mai ia i tatou pe afai tatou te fetaomi pea i luma.
O le malamalama, i le isi itu, na te faatagaina i tatou e vaai atu i mea e pei ona latou i ai. Na te faatagaina i tatou e iloatino le va o le upumoni ma le measese, le va o mea e taua ma mea e le taua. A tatou i ai la i le malamalama, e mafai ona tatou faia ni filifiliga amiotonu e fua i mataupu faavae moni. A tatou i ai i le malamalama, tatou te maua “se susulu atoatoa o le faamoemoe,”2 ona e mafai ona tatou vaai atu i o tatou tofotofoga faaletino mai se vaaiga e faavavau.
O le a tatou maua se faamalologa faaleagaga pe a tatou o ese mai atalafoia o le lalolagi ma o atu i le Malamalama o Keriso e faavavau.
O le faateleina o lo tatou malamalama ma le faaaogaina o le manatu faaleaoaoga faavae o le malamalama, o le faateleina foi lena o le mafai ona puipuia o i tatou mai ma’i faaleagaga o loo mafatia ai pe faaatuatuvale ai i tatou mai itu uma; o le lelei atili foi lena o lo tatou auauna atu o e tauaveina ma le malosi, lototele, popole ma le lotomaualalo le perisitua paia—o auauna ma soo moni a lo tatou Tupu pele ma faavavau.
O Le Malamalama o le Lalolagi
Na fetalai mai Iesu Keriso, “O a’u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.”3
O le a le uiga o lenei mea?
E faigofie lava: O le e mulimuli ma le faamaulalo ia Iesu Keriso o le a lagonaina ma faasoa atu Lona malamalama. O lena malamalama o le a faatuputeleina seia oo lava ina tafiesea le pouliuli sili ona pogisa.
O lona uiga o loo i ai se mana, se faatosinaga malosi, lea e pogai mai le Faaola. O le [mana] lea “ua susulu atu mai luma o le Atua e faatumulia ai le loaloa o le vateatea.”4 Ona o lenei mana e faamalamalamaina, siitiaina, ma faasusuluina o tatou olaga, e masani lava ona ta’ua e tusitusiga paia o le malamalama, ae o loo faasino atu foi i ai o le agaga ma le upumoni.
I le Mataupu Faavae ma Feagaiga tatou te faitau ai, “O le afioga a le Alii o le upumoni lea, ma o soo se mea ua moni, o le malamalama lea, ma o soo se mea ua malamalama, o le Agaga lea, o le Agaga lava lea o Iesu Keriso.”5
O lenei malamalamaaga loloto—o le malamalama o le agaga lea, o le upumoni foi lea ma o lenei malamalama e susulu atu i agaga uma e o mai i le lalolagi—e taua tele e pei ona faamoemoe i ai. O le Malamalama o Keriso e faamalamalamaina ma faatumuina agaga o tagata uma e faalogo atu i le siufofoga o le Agaga.6
O le Malamalama o Keriso ua tumu ai le atulaulau.
Ua tumu ai le lalolagi.
Ma e mafai ona tumu ai loto uma.
“E le faailogaina tagata e le Atua.”7 O loo avanoa Lona malamalama i tagata uma—taualoa pe faatauvaa, mauoa pe mativa, faamanuiaina pe le tagolima.
A tatala atu lou mafaufau ma lou loto e talia le Malamalama o Keriso ma mulimuli atu ma le lotomaualalo i le Faaola, o le a e maua atili le malamalama. I lea laina ma lea laina, sina mea itiiti iinei ma sina mea itiiti i o, o le a e aoina atili ai le malamalama ma le upumoni i lou agaga, seia oo lava ina tafiesea le pogisa mai lou olaga.8
O le a tatalaina e le Atua ou mata.
O le a foai atu e le Atua ia te oe se loto fou.
O le alofa o le Atua, le malamalama, ma le upumoni o le a faamatua’ia mea fou e fotu mai i le olaga, ma o le a toefanaufouina oe i se olaga fou ia Keriso Iesu.9
Ua folafola mai e le Alii, “Ma afai e tau-tasi o outou mata i loʼu mamalu, o le a faatumulia o outou tino atoa i le malamalama, ma o le a leai se pouliuli e ia te outou; ma o lena tino ua faatumulia i le malamalama e malamalama i mea uma.”10
O le vaifofo silisili lea mo le ma’i faaleagaga. E mou ese le pouliuli pe a oo mai le malamalama.
O Se Talafaatusa mo le Pouliuli Faaleagaga
Peitai, o le a le faamalosia lava e le Atua i tatou ia taliaina Lona malamalama.
Afai e oo ina tatou toafimalie i le pouliuli, e mautinoa lava o le a le suia o tatou loto.
Ina ia tupu se suiga, e manaomia ona tatou faatagaina ma le mataalia le malamalama ia ulu mai i totonu.
I taimi o a’u malaga faataamilo i le tatou paneta o le lalolagi a o kapeteni ai i se vaalele, sa ou maofa pea i le matagofie ma le atoatoa o foafoaga a le Atua. Sa faapitoa lo’u maofa i le sootaga i le va o le lalolagi ma le la. Ou te manatu i ai o se lesona loloto o meafaitino, i le auala o loo i ai le pouliuli ma le malamalama.
E pei ona tatou iloaina uma, o itula uma e 24 e liliu i le aso ma le aso e liliu i le po.
O lea la, o le a le po?
O le po e leai a se mea ua na o se atalafoia.
E oo lava i po sili ona pogisa, e le muta lava le faasusulu mai e le la o lona malamalama. E faaauau pea ona susulu tele mai. Ae o le afa o le lalolagi o loo i ai i le pouliuli.
O le leai o le malamalama e mafua ai ona pogisa.
A oo ina pa’u mai le pogisa o le po, tatou te le faanoanoa ma popole faapea ua le toe i ai se la. Tatou te le manatu ua le o toe i ai le la iina pe ua mate foi. Ua tatou malamalama o loo tatou i ai i se atalafoia, o le a faaauau pea ona taamilo le lalolagi, ma e iu lava ina toe oo mai ave o le la ia i tatou.
O le pouliuli e le o se faailoga lena e le o i ai se malamalama. Ae tele lava, o lona uiga tatou te le o i ai i le nofoaga sa’o e maua ai le malamalama. I le gasetoto o le la talu ai nei sa toatele na faia ni taumafaiga maoae ina ia oo atu i le vaega manifinifi o se atalafoia na fatuina e le masina, i le ogatotonu o le susulu malamalama o le la.
I lea lava auala e tasi, e faaauau pea ona susulu mai le malamalama faaleagaga i luga o mea uma na foafoaina e le Atua. O le a faia e Satani taumafaiga uma e tulei atu ai i tatou i se atalafoia o a tatou lava faiga. O le a ia faamalosia i tatou e fatu so tatou lava ia gasetoto; o le a ia tuleia i tatou i le pouliuli o loo i ai ana mea leaga.
E mafai e le pouliuli faaleagaga ona tosoina se veli o le galo o mea ia i latou sa savavali muamua i le malamalama ma olioli i le Alii. E ui i lea, i taimi o le pouliuli matuia, e faafofogaina e le Atua a tatou aioiga faamaulalo, ao tatou tatalo atu, “Le Alii e, ua ou faatuatua; ia e fesoasoani i lo’u le faatuatua.”11
O aso o Alema, sa toatele i latou na tauivi e talia mea faaleagaga, ma “ona o lo latou le talitonu,” sa le mafai ai e le malamalama ma le upumoni o le Atua ona ulufiaina o latou agaga; “ma sa faamaaa o latou loto.”12
O i Tatou o Ē Tauaveina le Malamalama
Uso e, o lo tatou lava faitalia pe tatou te i ai i le nofoaga sa’o e vaai atu ai i le malamalama faalelagi ma le upumoni o le talalelei a Iesu Keriso. E tusa lava pe oo mai le po ma foliga mai ua pogisa le lalolagi, e mafai lava ona tatou filifili e savavali i le malamalama o Keriso, tausi i Ana poloaiga, ma molimau atu ma le lototele i Lona moni ma Lona silisiliese.
I le avea ai ma sē e tauaveina le perisitua a le Atua ma se soo o Iesu Keriso, o oe o sē e tauaveina le malamalama. Ia fai pea mea e te iloaina o le a faafaileleina ai Lona malamalama faalelagi. “Tuu i luga lo outou malamalama”13 ma “ia [faa]pupula atu i luma o tagata”—e le faapea ina ia latou vaai i ai ma faamemelo ai ia te outou, ae “ina ia latou iloa la outou amio lelei, latou te vivii atu ai i lo outou Tama o i le lagi.”14
Ou uso e pele, o outou o meafaigaluega i aao o le Alii faatasi ma le faamoemoega o le aumaia o le malamalama ma le faamalologa i agaga o fanau a le Tama Faalelagi. Atonu e te le lagonaina le agavaa e faamalolo ai i latou ua gasegase faaleagaga—ae mautinoa lava e le sili atu ma se tagata faigaluega o le falemeli ua agavaa e fesoasoani i [se toeaina] mafatia. Atonu e te feagai ma ni ou lava luitau faaleagaga. Ae ui i lea, ua valaauina oe e le Alii. Ua Ia tuu atu ia te oe le pule ma le tiutetauave e aapa atu ai ia i latou o loo mafatia. Ua Ia faaee atu ia te oe Lona mana paia o le perisitua e aumai ai le malamalama i le pouliuli ma siitia ma faamanuia fanau a le Atua. Ua toefuatai mai e le Atua Lana Ekalesia ma Lana talalelei faapelepele, “lea e faamalolo ai le agaga ua manu’alia.”15 Ua Ia saunia le ala i le soifua maloloina faaleagaga; e maua ai le faamalologa mai le le toaga ae agai atu i le soifua maloloina faaleagaga e ola.
O taimi uma tou te ua’i atu ai o outou loto i le Atua i tatalo faamaulalo, tou te mauaina Lona malamalama. O taimi uma tou te saili atu ai i Lana afioga ma Lona finagalo i totonu o tusitusiga paia, e faatuputeleina ai lava le susulu o le malamalama. O taimi uma tou te matauina ai se tasi o mafatia ma ositaulaga ai lou lava toafimalie e aapa atu ai ma le alofa, e faalauteleina le malamalama ma maena. O taimi uma e te teenaina ai se faaosoosoga ae filifili le mama, o taimi uma e te saili atu ai [mo se faamagaloga] pe faamagalo atu, o taimi uma e te molimau atu ai ma le lototele e uiga i le upumoni, e tuliesea e le malamalama le pouliuli ma tosina mai ai isi o loo saili foi i le malamalama.
Mafaufau i ou lava aafiaga, o taimi o auaunaga i le Atua ma uso a tagata pe a susulu mai le malamalama faalelagi i lou olaga—i totonu o malumalu paia, i le laulau faamanatuga, i se taimi filemu o mafaufauga loloto ma le agaga tatalo, i a outou faatasiga faaleaiga, po o taimi e faatino ai se auaunaga faaleperisitua. Ia fefaasoaai na taimi ma aiga, uo, ae maise lava ma a outou autalavou o loo saili i le malamalama. E manaomia ona latou faalogo atu ia te oe o lenei malamalama e oo mai ai le faamoemoe ma le faamalologa.
E aumai e le malamalama o Keriso le faamoemoe, fiafia, ma le faamalologa o soo se manu’a po o se ma’i faaleagaga.16 O i latou e lagonaina lenei uunaiga faamamaina e avea ma meafaigaluega i aao o le Malamalama o le Lalolagi ma e mafai ona tuu atua le malamalama i isi.17 O le a latou lagonaina le mea sa lagonaina e le Tupu o Lamonae: “O lenei malamalama sa faatumulia ai lona agaga i le olioli tele naua, ua tafi ese ai le ao o le pogisa, ma ua faamumu a’e ai i lona agaga le malamalama o le ola tumau faavavau.”18
Ou uso e pele, o la tatou sailiga o le saili atu lea i le Alii seia oo ina musaesae Lona malamalama o le ola tumau faavavau i totonu o i tatou ma oo ai ina mausali ma malolosi a tatou molimau e oo lava i le lotolotoi o le pogisa.
O la’u tatalo ma le faamanuiaga ina ia outou manuia i le ausiaina o lou taunuuga o ē umiaina le perisitua a le Atua Silisiliese ma o ē tauaveina ma le fiafia Lona malamalama faalelagi. I le suafa paia o Iesu Keriso, amene.