Elder Juan A. Uceda

Au Peresitene o Fitugafulu

A o savali sopo i mea na faaleagaina o Machu Picchu i Peru o se faifeautalai talavou, sa see ese ai Elder Juan A. Uceda mai le auala vaiti. I le pipii mau ai ma le naunautai i ni lala na tautau i le 2,000 futu (610 m) i luga ae o se vaitafe, sa ia tatalo faatauanau mo se fesoasoani. Sa ia tatalo i le amataga o lena aso ma ona laugutu, o lana tala lea, ae “ina ua tauau ina fano, sa ou tatalo mai le loto.” O le taimi lava sa toetoe a pau ai, sa toso ae ai o ia e se isi faifeautalai i le saogalemu.

O se tasi o le tele o lesona sa ia aoaoina i lena aso o le “ia tatalo pea, tatalo pea ‘ma le loto faamaoni, ma le manatu moni i ai, [faatinoina] o le faatuatua ia Keriso’ (Moronae 10:4).”

Sa lagolagoina Elder Uceda o se Fitugafulu o le Pulega Aoao i le aso 3 o Aperila, 2010. Sa ia auauna atu o se Faatonu Sili Lagolago i le Matagaluega a Faifeautalai ma o se Fesoasoani Eria i le Eria o Amerika Matu Sautesasae ina ua valaauina o ia i le Au Peresitene o Fitugafulu i le aso 1 Aokuso, 2017.

Mai le 2010 i le 2013 sa ia auauna atu o se fesoasoani i le Au Peresitene o le Eria o Amerika i Saute Matuisisifo, ma mai le 2013 i le 2016 sa ia auauna atu o le Peresitene o le Eria o Amerika i Saute Matuisisifo.

Sa aotauina Elder Uceda i Peru. Sa ia lesitala i le Inisitituti o Jose Carlos Mariátegui i Lima, lea sa ia suesue ai i tomai faatausitusi ma le va i fafo. Sa ia aoga i pulega o pisinisi i le Inisitituti o Centro Andino de G.E. Institute. O ia sa faauu mai i le Iunivesite o San Luis Gonzaga, lea sa ia maua ai se faailoga o le matuaofaiva i le sootaga ma le va i fafo.

Sa galue Elder Uceda i le Matagaluega a Aoga a le Ekalesia o se faatonusili o le eria mo Peru ma Bolivia. Sa ia tuua Peru i le 2003 e masii atu i New Jersey, ISA, e fesoasoani i lona tama i lo latou pisinisi o le aiga.

Talu mai le auai i le Ekalesia i le 1972, sa auauna atu Elder Uceda i le tele o valaauga, e aofia ai o se faifeautalai faamisiona i le Misiona o Lima Peru, au peresitene o le Aoga Sa a le siteki, epikopo, fautua maualuga, fesoasoani i se au peresitene o le siteki, peresitene o le siteki, peresitene o le Misiona o Lima Peru i Matu (1992–95), ma le Fitugafulu Eria.

Sa ia faaipoipo ia Maria Isabel Bendezu ia Mati 1979. O i laua o ni matua o se fanau e toalima.