O Le Areto Ola Na Alu Ifo Mai le Lagi

Saunia e Elder D. Todd Christofferson

O Le Korama a Aposetolo e Toasefululua

Afai tatou te naunau e mau ia Keriso ma ia mau o Ia i totonu o i tatou, o lona uiga o le paia o le mea lea tatou te sailia.

O le aso na sosoo ai ma le fafagaina faavavega e Iesu Keriso o le toa 5,000 i Kalilaia i le na o le “lima potoi areto, ma i’a iti e lua,”¹ sa Ia toe fetalai atu foi i tagata i Kapanaumi. Na silafia e le Faaola e toatele e lei naunau i Ana aoaoga e pei ona mananao ia toe fafagaina.² O lea, na Ia taumafai ai e faatalitonuina i latou i le matua taua naua o “lena mea e ‘ai e tumau i le ola e faavavau, e foaiina atu ia te outou e le Atalii o le tagata.”³ Na tautino atu e Iesu:

“O a’u o le areto o le ola.

“Na aai e o outou tama le manai i le vao, a ua oti i latou.

“O lenei le areto ua alu ifo mai le lagi, ai se ai ai ona le oti lea o ia.

“O a’u le areto ola na alu ifo mai le lagi: pe a ai se tasi i lenei areto ona ola ai lea o ia e faavavau: o le areto foi ou te avatua, o lo’u tino lea, ou te avatua ma ola o le lalolagi.”⁴

O le uiga [o le fetalaiga a le Faaola] na matuai nenefu i Lana aufaalogologo o e sa malamalama o Lana fetalaiga e na o le faaletino. O le tali atu ma le le fiafia i lea manatu, sa latou taumanatunatu ai, “E mafai faapefea e lenei tagata ona aumai o lona tino tatou te aai ai?”⁵ Sa toe faamalamalama atili e Iesu le mataupu:

“E moni e moni, ou te fai atu ia te outou, afai tou te le aai i le tino o le Atalii o le tagata, a le inu foi i lona toto, ua le i totonu ia te outou le ola.

“O lē ai i lo’u tino ma inu i lo’u toto, ua ia te ia le ola e faavavau; ou te toe faatuina foi o ia i le aso gataaga.

“Aua o lo’u tino o le mea e ‘ai moni lea, o lo’u toto foi o le mea e inu moni lea.”⁶

Ona Ia fetalai atu lea i le uiga maoae o Lana atavali:

”O le ’ai i lo’u tino ma inu i lo’u toto, e tumau o ia ia te au, o a’u foi ia te ia.

“E faapei ona soifua o le Tama ua na auina mai a’u, o loo ola foi a’u i le Tama; e faapea foi o le ‘ai ia te au, e ola lea ia te au.”⁷

E lei maua lava e Lana aufaalogologo le mea na fetalai ai Iesu, ma e “toatele … , ina ua latou faalogo atu i lenei mea, sa latou fai mai, “O le upu faigata lena; o ai ea se na te mafaia ona faalogologo i ai? … [Ma] mai lena taimi e toatele soo na toe solomuli, ma ua le toe savavali faatasi ma ia.”⁸

O le ‘ai o Lona tino ma inu i Lona toto o se ala uiga ese lea o le faaali atu o le ala e tatau ai ona tatou matua aumaia atoatoa o le Faaola i o tatou olaga—i o tatou tagata—ina ia tasi i tatou. Pe faapefea ona tupu lenei mea?

Muamua, ua tatou malamalama o le ositaulagaina o Lona tino ma le toto, na togiolaina ai Keriso mo a tatou agasala ma faatoilalo ai le oti, i le tino ma le agaga.⁹ Ua manino ai lava, tatou te aai i Lona tino ma feinu i Lona toto pe a tatou taliaina mai ia te Ia le mana ma faamanuiaga o Lona Togiola.

O le aoaoga faavae a Keriso ua ta’u mai ai le mea e tatau ona tatou faia ina ia maua ai le alofatunoa togiola. O le talitonu lea ma faatuatua ia Keriso, ia salamo ma papatiso, ma maua le Agaga Paia, “ona oo mai ai lea o se faamagaloga o a outou agasala i le afi ma i le Agaga.”¹⁰ O le faitotoa lea, o lo tatou ala i le alofatunoa togiola a le Faaola ma i le ala sa’o ma le vaapiapi e tau atu i Lona malo.

“O le mea lea, afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tamā: O le a outou maua le ola e faavavau.

“… Ma o lenei, faauta, o le mataupu faavae lenei a Keriso, ma o le mataupu faavae moni lenei e tasi a le Tamā, ma le Alo, ma le Agaga Paia, o ni Atua ua tasi, ua leai se gataaga.”¹¹

E matagofie le mafaufau loloto i le faatusa o le faamanatuga o le Talisuaga a le Alii. Ua faatusa le falaoa ma le vai i le tino ma le toto o Ia o le Areto o le Ola ma le Vai Ola,¹² e faamanatu mai ai lava ma le loto nutimomoia ia i tatou le tau na Ia totogiina e togiolaina ai i tatou. A o tofitofi le falaoa, tatou te manatua ai le tino na tuimomomoina o le Faaola. Sa matauina e Elder Dallin H. Oaks i se tasi taimi e faapea “ona e tofitofi ma vaevaeina, e tulaga ese fasi falaoa taitasi, e pei o tagata taitoatasi o e aai ma feinu i ai e tulaga ese. E ia tei tatou uma ni agasala eseese e salamo ai. E ia tei tatou uma ni manaoga eseese ina ia faamalolosia e ala i le Togiola a le Alii o Iesu Keriso, o lē tatou te manatuaina i lenei sauniga.”¹³ Pe a tatou feinu i le vai, tatou te mafaufau i le toto na Ia faamaligiina i Ketesemane ma i luga o le satauro ma lona mana faapaia.¹⁴ I le iloa ai “e leai se mea e le mama e mafai ona ulu atu i lona malo,” ua tonu ai ia i tatou e i ai faatasi ma “i latou o e ua faamamaina o latou ofu i le toto [o le Faaola], ona o lo latou faatuatua, ma le salamo i a latou agasala uma, ma lo latou faamaoni e oo i le iuga.”¹⁵

Ua ou tautala atu e uiga i le mauaina o le alofatunoa togiola o le Faaola e aveesea ai a tatou agasala ma pisia o na agasala o ia i tatou. Ae i se tulaga faafaatusa, o loo i ai se faauigaga sili atu o le aai i Lona tino ma feinu i Lona toto, ma o lena faauigaga o le teuloto o tomai ma uiga o Keriso, aveesea o le natura faaletagata ma avea ma Au Paia “e ala i le togiola a Keriso le Alii.”¹⁶ A o tatou aai ma feinu i le falaoa ma le vai o le faamanatuga i vaiaso taitasi, o le a lelei lo tatou mafaufau pe o le a le atoatoa e tatau ai ona tatou faaaofia ai Ona uiga ma le mamanu o Lona soifua e aunoa ma se agasala i o tatou lava tagata. Semanu e le mafai e Iesu ona togiola mo agasala a isi vagana ai e leai se agasala a Ia Lava. Talu ai e leai se aia a le faamasinotonu ia te Ia, o lea ua mafai ai e Ia ona ofoina mai o Ia lava e suitulaga ai, ina ia faamalie ai le faamasinoga tonu ma aumai ai le alofamutimutivale. Pe a tatou manatua ma faamamaluina Lana taulaga togiola ua tatau foi ona tatou mafaufau loloto i Lona soifua e aunoa ma se agasala.

Ua ta’u mai ai i i le manaomia ona tatou taumafai malosi e faatino la tatou vaega. E le mafai ona faamalieina i tatou e tumau ai i le mea ua tatou i ai, ae e tatau ona tatou agai atu pea e le aunoa i luma “ia oo i le fua o le ua matua e tatau ma le tumu o Keriso”¹⁷ Pei o le tama o le Tupu o Lamonae, e tatau ona tatou naunau e lafoai a tatou agasala uma¹⁸ ae taulai atu i mea ua faamoemoe mai ai le Alii ia i tatou, taitoatasi ma i tatou faatasi.

E lei leva talu ai, sa faamatala mai ai e se uo ia te au sona aafiaga ao avea ma peresitene o se misiona. Sa faia sona taotoga na manaomia ai ni vaiaso e toefotuai ai le malosi. I le taimi o lona fotuaiga, sa tuuto atu le tele o lona taimi e faitau ai ma manatunatu loloto i tusitusiga paia. I se tasi aoauli a o ia manatunatu loloto i upu a le Faaola i le mataupu e 27 o le 3 Nifae, sa ia faagalegale moe. Sa ia faasoa mulimuli mai:

“Sa oo ina fai la’u miti lea na tuuina mai ai se vaaiga atoatoa le mafaagaloina o lo’u olaga. Sa faatilotilo a’u i a’u agasala, o filifiliga le lelei, o taimi … sa ou taulima ai tagata ma le le onosai, faatasi ai ma lo’u le faia o mea lelei sa tatau ona ou tautala atu ai pe faia foi. … Sa faaali mai ia te atu [se] [iloiloga] atoa o lo’u olaga i ni nai minute, ae sa foliga mai sa matua umi atu. Sa ou ala, ua ou te’i ma … faapa’u ifo ai loa lava i lena taimi i o’u tulivae i autafa o lo’u moega ma amata ona ou tatalo, ma ole atu mo se faamagaloga, ma sasaa atu lagona o lo’u loto e pei ou te lei faia lava muamua.

“A o lei faia la’u miti, sa ou le’i iloaina o loo ou matua manaomia tele ona salamo. O o’u sese ma vaivaiga na faafuasei ona matua manino mai ia te au o le ava i le va o le tagata na ou i ai ma le paia ma le agalelei o le Atua na [pei] e faitau miliona maila. I la’u tatalo i lena afiafi, sa ou faaali atu ai lo’u lotofaafetai loloto i le Tama Faalelagi ma le Faaola faatasi ma lo’u loto atoa ona o mea sa La’ua faia mo au, ma mo fegalegaleaiga sa ou faatauaina ma lo’u toalua ma le fanau. Ao ou i ai i o’u tulivae, sa ou lagonaina foi le alofa ma le alofamutimutivale sa matua maoae e ui i lo’u lagonaina o le le agavaa. …

“E mafai ona faapea atu ua ou le toe pei o le mea sa ou i ai talu mai lena aso. … Sa suia lo’u loto. … O le mea na sosoo ai sa ou atiina a’e le lotoalofa tele atu i isi, ma le gafatia sili atu e alofa ai, faaluaina i se lagona o le faanatinati e talai le talalelei. … Ua mafai ona ou malamalama i savali o le faatuatua, faamoemoe, ma le meaalofa o le salamo o loo maua i le Tusi a Mamona [e pei] e lei faia muamua.”¹⁹

E taua le iloaina, o le faaaliga manino a lenei tamalii lelei e uiga i ana agasala ma vaivaiga e lei faalotovaivai ai o ia pe na taitai atu ai i le faanoanoa. Ioe, sa ia lagona le te’i ma le salamo. Sa ia lagonaina lelei lona manaomia ona salamo. Sa lotomaualalo o ia, ae sa ia lagonaina le lotofaafetai, filemu, ma le faamoemoe—faamoemoe moni—ona o Iesu Keriso, “o le areto ola lea e sau mai le lagi.”²⁰

Sa talanoa lau uo e uiga i le ava na ia iloaina i lana miti i le va o lona olaga ma le paia o le Atua. Paia o le upu sa’o lea. O le ‘ai i le tino ma inu i le toto o Keriso o lona uiga ia tulimatai atu i le paia. Ua poloai mai le Atua, “Ia paia outou; aua o A’u nei e paia lava a’u.”²¹

Sa fautuaina i tatou e Enoka, “Ia aoao atu i lau fanau, e ao i tagata uma, i soo se mea lava, ona salamo, po o o le a leai se ala e mafai ai ona latou mautofi i le malo o le Atua, ona e leai se mea lē mama e mafai ona mau iina, pe mau i ona luma; ona, i le gagana a Atamu, o le Tagata Paia o lona suafa lea, ma o le suafa o lana Toatasi na Fanaua o le Atalii o le Tagata, o Iesu Keriso lava.”²² A o ou tamaitiiti, sa ou taumanatunatu pe aisea i le Feagaiga Fou e tele taimi e faasino atu ai ia Iesu (e oo foi ia te Ia lava) o le Atalii o le Tagata a’o Ia moni lava o le Alo o le Atua, ae o loo manino i le saunoaga a Enoka o nei ta’ua o se faailoaga moni o Lona faaleagaga ma le paia—O Ia o le Atalii o le Tagata o le Paia, le Atua le Tama.

Afai tatou te naunau e mau ia Keriso ma ia mau o Ia i totonu o i tatou,²³ o lona uiga o le paia o le mea lea tatou te sailia, i le tino ma le agaga.²⁴ Tatou te sailia lena mea i le malumalu lea o loo tusivane i luga le “E Paia i le Alii.” Tatou te sailia i a tatou faaipoipoga, aiga, ma fale. Tatou te sailia i vaiaso taitasi pe a tatou olioli i le aso paia o le Alii.²⁵ Tatou te sailia i mea tatou te faia i o tatou olaga i aso taitasi: o a tatou tala, o lavalava, o o tatou mafaufauga. E pei ona ta’ua e Peresitene Thomas S. Monson, “O i tatou o fua o mea uma tatou te faitauina, o mea uma tatou te matamata ai, o mea uma tatou te faalogo ai ma mea uma tatou te mafaufau i ai.”²⁶ Tatou te sailia le paia pe a tatou amoina o tatou satauro i aso taitasi.²⁷

Na matauina e Sister Carol F. McConkie: “Ua tatou iloaina le anoanoai o tofotofoga, faaosoosoga, ma faigata lea e mafai ona tosoesea i tatou mai mea uma e mama ma tauleleia i luma o le Atua. Peitai ua ofo mai e o tatou aafiaga faaletino le avanoa e filifili ai le paia. E masani lava o osigataulaga tatou te faia e tausia ai a tatou feagaiga lea e faamamaina ai i tatou ma faapaiaina.”²⁸ Ma i “osigataulaga tatou te faia” ou te faaopoopo atu auanaga tatou te tuuina atu.

Ua tatou iloa “pe a [tatou] auauna atu i o outou uso a tagata, ua na o lo outou auauna atu lava lea i lo [tatou] Atua.”²⁹ Ma ua faamanatu mai foi e le Alii ia i tatou o lena auaunaga o se vaega taua o Lona soifuaga ma ona uiga: “Aua foi o le Atalii o le tagata na le sau o ia ina ia auauna tagata ia te ia, ae peitai ia auauna o ia, ma foaiina atu lona ola o le togiola e sui a’i tagata e toatele”³⁰ Na aoao mai ma le poto ia Peresitene Marion G. Romney: “O le auauna atu e le o se mea tatou te tigaina ai i lenei lalolagi ina ia tatou maua ai le aia tatau e nonofo ai i le malo selesitila. O le auauna atu o uiga tonu lea e faavae ai se olaga faaeaina i le malo selesitila.”³¹

Na valoia e Sakaria e faapea o le aso e nofotupu ai le Alii, e oo lava i uamea tagitagi o solofanua o le a i ai le faaupuga “E paia ia Ieova.”³² I lena lava agaga, sa faapipii ai e le Au Paia paionia i nei vanu lena lava faamanatu, “E paia i le Alii,” i luga o mea masani po o mea faatauvaa faapea foi mea e fesootai sa’o ma le faatuatua ma faiga faalelotu. Sa tusivaneina i luga o ipu inu ma ipu mafolafola o le faamanatuga ma sa lolomiina i luga o tusi faamaonia o faauuga o le Au Fitugafulu, ma fu’a a le Aualofa. “E Paia i le Alii” o loo vaaia foi i luga o faamalama e faalauiloa ai oloa o le Zion’s Cooperative Mercantile Institution, le faleoloa o le ZCMI. Sa maua foi i luga o le ulu o se samala ma i luga o se atigipalau. “E Paia i le Alii” sa tusivaneina i luga o ‘au o faitotoa o le fale o Polika Iaga, le Fale o le Ofagapi. O nei faasinoga i le paia i ni nofoaga e foliga mai e le masani ai pe le mafaufauina e ono foliga mai e le talafeagai, ae o loo ta’u mai ai le loloto ma le tatau ai i taimi uma ona tatou taulai atu i le paia.

O le ‘aai i le tino o le Faaola ma feinu i Lona toto o lona uiga o le tuuese mai o tatou olaga soo se mea e le ogatusa ma se uiga faaKeriso ma avea Ona uiga faaleatua mo i tatou lava. O le faauigaga tele atu lea o le salamo: e le gata i le liliu ese mai agasala ua tuanai ae “o se liliu atu o le loto ma le agaga i le Atua”³³ ma agai i luma. E pei ona tuu i la’u uo i lana miti faafaaaliga, o le a faaali mai e le Atua ia i tatou o tatou faaletonu ma vaivaiga, ae o le Ia fesoasoani foi ia i tatou e faaliliu le vaivai i le malosiaga.³⁴ Afai tatou te fesili ma le lotofaamaoni, “Se a se mea ou te lei faia?”³⁵ O le a Ia le tuua lava i tatou e taumate, ae o le a Ia tali mai i le alofa ina ia tatou fiafia. Ma o le a Ia tuu maia ia i tatou le faamoemoe.

O se taumafaiga lofituina, ma o le a matuai taufaafefe lava pe afai tatou te taumafai na o i tatou lava mo le paia. O le mea moni fiafia e le o tuua lava na o i tatou. Ua ia i tatou le alofa o le Atua, o le alofa tunoa o Keriso, le mafanafana ma le taitaiga a le Agaga Paia, ma le faaaumea ma le faamalosiauga a le Au Paia i le tino o Keriso. Aua nei faamalieina i tatou i le mea ua tatou i ai nei, ae aua foi nei o tatou lotovaivai. Ua uunaia i tatou e se viiga faigofie ae ootia:

Faaalu se taimi ia paia ai, le lalolagi o loo natinati;
faaalu le tele o le taimi na o oe i le mea lilo ma Iesu.
I le vaavaai atu ia Iesu, e tatau ona e avea e pei o ia;
e vaaia e au uo o Ia i au amioga.36

Ou te molimau atu o Iesu Keriso, “o le areto ola na alu ifo mai le lagi,”³⁷ ma “o ai lava e ‘ai i [Lona tino] ma inu i [Lona toto, e maua e ia le ola e faavavau,”³⁸ i le suafa o Iesu Keriso, amene.