Mauaina o le Faatuatuaga a le Alii ma Lou Aiga

Saunia e Elder Richard J. Maynes

O Le Fitugafulu

O alii e i ai le “faamaoni o le loto” o alii ia e ao ona faatuatuaina—aua e fausia le faatuatuaina i luga o le amio sao.

Uso e, masalo e leai se faamalo sili atu e mafai ona tatou maua mai le Alii nai lo le iloaina e Na te faatuatuaina i tatou e avea ma e agavaa e umia le perisitua ma ni tane ma ni tama maoae.

E tasi le mea e mautinoa lava: o le mauaina o le faatuatuaga a le Alii o se faamanuiaga e oo mai e ala i taumafaiga silisili mai ia i tatou. O le faatuatuaina o se faamanuiaga e faalagolago i le usiusitai i tulafono a le Atua. O le mauaina o le faatuatuaga a le Alii e oo mai o se taunuuga o le faamaoni i feagaiga na tatou osia i vai o le papatisoga ma i malumalu paia. A tatou tausia la tatou tautinoga i le Alii, e tuputupu ae Lona faatuatuaina o i tatou.

Ou te fiafia uma i tusitusiga paia anamua ma aso nei lea e faaaoga ai le fuaitau “faamaoni o lona loto” pe a faamatalaina se uiga o se tagata amiotonu.¹ O le amio sao po o le leai o se amio sao o se elemene taua o le uiga faaletagata o se tasi. O alii e i ai le “faamaoni o le loto” o alii ia e ao ona faatuatuaina—aua e fausia le faatuatuaina i luga o le amio sao.

O le avea ma alii o le amio sao o lona uiga o ou faamoemoega, faapea foi ma au amioga, e mama ma amiotonu i vaega uma o lou olaga, i nofoaga faitele ma i nofoaga tumaoti. Faatasi ai ma faaiuga taitasi tatou te faia, tatou te atili agavaa ai i le faatuatuaga a le Atua po o le faaitiitia o Lona faatuatuaina. O lenei mataupu faavae e sili atu ona manino i a tatou tiutetauave ua tofia mai le lagi o ni tane ma ni tama.

Ua tatou maua se tiutetauave paia o ni tane ma ni tama mai perofeta, tagatavaai, ma tali faaaliga o aso nei e gata ai, i le pepa o faamatalaga “O Le Aiga: O Se Folafolaga i le Lalolagi.” Ua aoao i tatou e lenei pepa o faamatalaga e faapea (1) “e tatau ona pulefaamalumalu tama i o latou aiga i le alofa ma le amiotonu,” (2) “e tuuina atu [e tama] mea e manaomia o le olaga ma le puipuiga mo o latou aiga,” ma (3) o tama e nafa ma le puipuiga o o latou aiga.²

Mo i tatou ina ia maua le faatuatuaga a le Atua, e manaomia ona tatou ausia nei tiutetauave na tofia mai le lagi e tolu i o tatou aiga i le ala a le Alii. E pei ona toe taua i le folafolaga o le aiga, o le ala a le Alii e faataunuu ai nei tiutetauave faatasi ma o tatou ava “o se paaga tutusa.”³ Ia te au, o le uiga o lenei mea, tatou te le faia se faaiuga taua e faatatau i nei tiutetauave e tolu e aunoa ma le lotogatasi atoatoa ma o tatou ava.

O le mea muamua e tatau ona tatou faia e maua ai le faatuatuaga a le Alii o le tuu lea o lo tatou faalagolago ia te Ia. Sa faaali mai e Nifae lenei ituaiga o tautinoga ina ua ia tatalo atu: “Le Alii e, ua ou faalagolago ia te oe, ma o le a ou faalagolago pea ia te oe e faavavau.” O le a ou lē tuu atu loʼu faalagolago i le lima o le tagata.”⁴ Sa tautino atoatoa atu Nifae e fai le finagalo o le Alii. E faaopoopo i le faapea atu e na te “faia mea ua poloaiina e le Alii,” sa lei maluelue Nifae i lana tautinoga e faataunuu lana tofiga, e pei ona faaalia i le faamatalaga lenei: “E pei ona soifua le Alii, ma e pei foi ona tatou ola, tatou te le o ifo lava i lalo i lo tatou tama i le vao seiloga ua uma ona tatou faataunuuina o le mea na poloaiina ai i tatou e le Alii.”⁵

Ona sa faalagolago muamua Nifae i le Atua, sa tuu atu ai e le Atua le faatuatuaga sili ia Nifae. Sa faamanuiaina o ia e le Alii i le tele naua o le Agaga na manuia ai lona olaga, olaga o lona aiga, ma olaga o ona tagata. Ona sa pulefaamalumalu Nifae i le alofa ma le amiotonu ma saunia mo ma puipuia lona aiga ma tagata, sa ia tusia, “Ma sa oo ina matou ola e tusa ma le ala o le fiafia.”⁶

Ina ia tuuina se vaaiga a se tamaitai e uiga i lenei mataupu, sa ou fai atu i ou afafine e toalua ua faaipoipo e fesoasoani mai ia te au. Sa ou fai atu pe mafai ona la tuuina mai i se fuaiupu se tasi pe lua le auala la te vaai ai i le taua o le faatuatuaina e pei ona aafia ai lo la olaga faaipoipo ma le aiga. O ni manatu nei a Laura Harris ma Christina Hansen.

Muamua, o Lara: “O se tasi o mea aupito taua ia te au o le iloaina a o feagai lo’u toalua ma lona aso, o loo ia faia ni filifiliga lea e faaalia ai le faaaloalo ma alofa ia te a’u. A mafai ona ma faatuatuaina le tasi ma le isi i lenei auala, e aumaia le filemu i lo ma aiga, lea ma te mafai ai ona ma olioli i le tausi ae faatasi o lo ma aiga.”

O manatu a Christina: “O le mauaina o le faatuatuaina i se tagata e talitutusa i le mauaina o se faatuatua i se tagata. A aunoa ma lena faatuatuaina ma le faatuatua, e i ai le fefe ma le masalosalo. Mo a’u, o se tasi o faamanuiaga silisili e oo mai mai le mafai ona faatuatuaina atoatoa o lo’u toalua o le filemu—filemu o le mafaufau i le iloaina e na te faia moni lava mea na te fai mai e fai. E aumaia e le faatuatuaina le filemu, alofa, ma se siosiomaga lea e mafai ona tuputupu ae ai lena alofa.”

E lei vaai lava Lara ma Christina i mea na tusia e le isi. E mataina ia te au le mafaufau taitasi ai o i laua uma i faamanuiaga o le filemu i le aiga e avea o se taunuuga tuusao o le mauaina o se tane e mafai ona la faatuatuaina. E pei ona faaalia i faataitaiga a ou afafine, e avea le mataupu faavae o le faatuatuaina o se matafaioi taua naua i le atiaeina o se aiga e totonugalemu ia Keriso.

Sa mafai foi ona ou fiafia i lena aganuu e tasi o le totonugalemu ia Keriso i le tuputupu ae ai i se aiga lea sa faamamalu ai e lou tama lona perisitua ma maua le faatuatuaga a le aiga atoa ona o le “faamaoni o lona loto.”⁷ Sei ou faasoa atu ia te outou se mea na tupu i lou talavou lea e faaalia ai le aafiaga lelei tumau e mafai e se tama e malamalama ma ola i le mataupu faavae o le fausia o le faatuatuaina i luga o le amiosao ona i ai i luga o lona aiga.

A o ou talavou lava, sa faavaeina e lou tama se kamupani e faapitoa i le gaosiga tau enisinia. E enisinia, gaosia, ma faapipiiina e lenei pisinisi laina gaosi enisinia i le lalolagi atoa.

A ou i ai i le aoga tulagalua, sa manao lou tama ou te aoao i le auala e galue ai. Sa ia manao foi ia te au e aoao i faamatalaga uma o le pisinisi. O la’u galuega muamua na aofia ai le tausiga o le fanua ma le valiina o vaega o fale sa le mafai ona iloa e tagata lautele.

Ina ua ou ulufale i le aoga maualuga, sa siitia a’u ou te galue i le vaega lautele o le falegaosi mea. Sa ou manao e aoao le auala e faitau ai mamanu ma gaosi masini mo le gaosiga o uamea mamafa. Ina ua maea le faaiuina mai le aoga maualuga, sa ou auai i le iunivesite ona sosoo ai lea ma le ulufale atu i le misiona. O le toe foi mai i le fale i le maea ai o la’u misiona, sa alu sa’o lava i le galuega. Sa ou manaomia le maua o se tupe mo tupe faaalu o leisi tausaga aoga.

I se tasi aso e lei leva ona maea lau misiona, sa ou galue i le falegaosi ina ua valaauina au e lou tama i totonu o lona ofisa ma fesili mai pe ou te manao e ma te o i se malaga faapisinisi i Los Angeles. O le taimi muamua lea ua valaaulia ai au e lou tama e faatasi atu ma ia i se malaga faapisinisi. Sa ia faataga moni au e alu atu i nofoaga faitele e fesoasoani e fai ma sui o le kamupani.

Ae matou te lei tuua mo le faigamalaga, sa ia saunia au i ni nai faamatalaga e uiga i lenei tagata faamoemoeina fou. Muamua, o le tagata o se kamupani faavaomalo. Lua, sa latou faafouina o latou laina gaosi i le lalolagi atoa i tekinolosi tau enisinia sili ona fou. Tolu, e lei sapalaia muamua e la matou kamupani i latou i auaunaga faaleenisinia po o le faatekinolosi. Ma le mea mulimuli, o le latou taitai maualuga o le kamupani e pule i mea tau fefaatauaiga sa taloina lenei fonotaga e iloilo ai le matou ofa lea sa tuuina atu i se galuega fou. O lenei fonotaga sa tuuina mai ai se avanoa fou ma taua na faamoemoeina mo la matou kamupani.

Ina ua mavae le taunuu ai i Los Angeles, sa ma o ma lo’u tama i le faletalimalo o le pule mo le fonotaga. O le faagasologa muamua o mataupu faapisinisi o le talanoaina lea ma iloiloina ia vaega o mamanu faaenisinia o le galuega. O le isi aitema o le talanoaga na faatatau i auiliiliga o le faagaoioiga, e aofia ai le fuafuaina ma aso e tiliva ai. O le aitema mulimuli na talanoaina na taulai i le tau, tuutuuga, ma tulaga. O i tonu a sa manaia ai le fonotaga.

Sa faamatala mai e le taitai o le kamupani ia i matou o le matou talosaga, o le tau pito i maualalo lea mai tau uma na auina mai mo le galuega. Ma le fia iloa, sa ia tau mai ai le tauofoga e lona lua le tau maualalo. Ona ia fesili mai lea pe ma te mananao e toe aumai i tua le matou talosaga ma toe auina atu. Sa ia taua o la matou tau fou e tatau ona sau i lalo ifo tonu lava o le isi tauofoga maualuga e sosoo ae. Ona ia faamatala mai lea o le a matou vaevaea tutusa ma ia ia talā fou ia o le a faaopoopoina. Sa ia faamatalaina i le faapea mai o le a manuia ai tagata uma. O le a manumalo le matou kamupani aua o le a maua le tele atu o tupe nai lo le matou tauofoga muamua na tuuina atu. O le a manumalo lana kamupani aua o le a latou fai pisinisi pea ma le tauofoga sili ona maualalo. Ma, e moni lava, e malo o ia aua e maua lana vaega o le tupe faaopoopo aua sa ia tuufaatasia lenei tauofoga maoae.

Ona ia aumaia lea o lona numera o le pusa meli e mafai ai ona matou auina atu lana tupe na ia talosagaina. I le maea ai o nei mea uma, sa ia vaai mai i lo’u tama ma fesili mai, “Ea, ua i ai se ta maliliega?” Na faateia lava au, na tu i luga lou tama, faatalofa, ma tau atu ia te ia o le a ma toe fesootai mai ia te ia.

I le mavae ai o le tuua o le fonotaga, sa ma o i totonu o le taavale totogi, ma sa liliu mai lou tama ia te au ma fesili mai, “Ia, o le a sou manatu i le mea e tatau ona ta faia?”

Sa ou tali atu i le faapea atu ou te manatu e le tatau ona ma taliaina lana ofa.

Ona fesili mai lea o lou tama, “E te manatu ua ia i taua se tiutetauave i o tatou tagata faigaluega uma ia faatumauina se aofaiga o galuega faamoemoeina?”

A o ou mafaufau ai i lana fesili ma a o lei mafai ona ou tali atu, sa ia taliina lana lava fesili. Sa ia fai mai, “Faalogo, Rick, o le taimi lava e te faia ai se fesuiaiga tau tupe pe fetuunaia lou amio sao, e faigata tele ona toe maua mai. Aua lava nei faia, pe faa-tasi aua lava.”

O le mea moni ua ou faasoa atu ai lenei aafiaga o lona uiga sa le galo lava ia te au mea na aoao ai au e lou tama i lena uluai malaga faapisinisi ma ia. Ou te faasoa atu lenei aafiaga e faamatala ai le uunaiga tumau tatou te maua o ni tama. E mafai ona e vaai faalemafaufau i le faatuatuaga sa ia te au i lou tama ona o le amio sao o lona loto. Sa ia ola ai i nei mataupu faavae e tasi i lona olaga tumaoti ma lou tina, lana fanau, ma tagata uma sa ia fegalegaleai faatasi.

Uso e, o la’u tatalo i lenei afiafi ina ia tatou tuu muamua lo tatou faalagolago i le Alii, e pei ona faaalia e Nifae, ona maua lea o le faatuatuaga a le Alii e ala i le amio sao o o tatou loto, e faapena foi le faatuatuaina a o outou ava ma fanau. E pei ona tatou malamalama ma faaaoga lenei mataupu faavae paia o le fausia o le faatuatuaina i luga o le amio sao, o le a tatou faamaoni i a tatou feagaiga paia. O le a tatou manuia foi i le pulefaamalumalu ai i o tatou aiga i le alofa ma le amiotonu, saunia o mea e manaomia o le olaga, ma le puipuia o o tatou aiga mai mea leaga o le lalolagi. O nei upumoni ou te molimau atu ai ma le agaga lotomaualalo i le suafa o Iesu Keriso, amene.