Gasetoto Faaleagaga
Saunia e Elder Gary E. Stevenson
O Le Korama a Aposetolo e Toasefululua
Aua le faatagaina faalavefau o le olaga e punitia ai le malamalama o le lagi.
I le aso 21 o Aokuso o lenei tausaga, e lua ni mea e le masani ona tutupu na gauai atu i ai le vaaiga a tagata i le salafa o le lalolagi. O le mea muamua o le faamanatuina o le 90 tausaga o lo tatou perofeta pele, o Peresitene Thomas S. Monson. I lena taimi, sa ou i ai i se tofiga i le Eria o le Pasefika ma na faagaeetia e le gata i le iloaina e le Au Paia i Ausetalia, Vanuatu, Niu Sila, ma Farani Polenisia o lana matatia faaletagata lava ia, ae sa latou fiafia foi i le faamanatuina. Sa ou lagona le faamanuiaina e avea ma se vaega o le latou faaaliga mafana o le faatuatua ma le alofa mo lenei tamalii maoae. O se uunaiga le vaaia o le fesootaiga o loo faaalia e Au Paia o Aso e Gata Ai ma lo latou perofeta.
Ioe, o Peresitene Monson, i le silafia ai o i latou o e fia faamanuia atu lona aso fanau, ua faamatalaina ai le mea na te mafaufauina o se meaalofa lelei o se aso fanau: “Saili se tagata o loo mafatia pe o gasegase pe o tuuatoatasi ma fai se mea mo i latou. Pau na o le mea ou te manao ai.”1 Matou te alolofa ma lagolagoina oe, Peresitene Monson.
Gasetoto o le La
O le isi mea e le masani ai ma e faalelagi na tupu i le aso lava lea e tasi ma na tosinaina le faitau miliona o tagata i le lalolagi, o le gasetoto atoa lea o le la. O le taimi muamua lea ua sopoia ai e se gasetoto le Iunaite Setete atoa i le 99 tausaga.2 Ua e vaai i se gasetoto o le la? Atonu e mafai ona ou faamatalaina auiliili atili lenei mea.
E gasetoto atoa le la pe a uia e le masina le va o le lalolagi ma le la, ma toetoe a punitia atoa ai soo se malamalama mai le la.3 O se mea ou te ofo ai le mafai ona tupu o lenei mea. Afai e te vaai faalemafaufau i le la e telē pei se pa’u masani o le uila, o le masina i le faatusatusa i ai, masalo e telē pei o se maamaa laitiiti.
E faapefea e se malamalama o loo susulu mai i se tino selesitila telē ona punitia atoa e se mea e matua faatauvaa lava le faatusalia o le telē?
E ui e faa 400 le lapoa atu o le la nai lo le masina, e faa 400 foi le mamao ese mai le lalolagi.4 Mai se vaaiga mai le lalolagi, o lenei faatulagaga e foliga mai ai o le la ma le masina e talitutusa lava le tetelē. A tutu faatasi le toalua, e foliga mai o loo punitiaina e le masina le la atoa. O a’u uo ma aiga o e na i le eria lea na iloa atoa ai le gasetoto o le la, sa faamatala le auala na suitulaga ai e le pogisa le malamalama, sa iloa atu fetu, ma sa taofi le pepese o manulele. Na amata ona malulu le ea, aua e faaitiitia e le gasetoto le fua o le vevela i le silia ma le 20 tikeri Fahrenheit (11 tikeri Celsius).5
Sa latou faamatalaina se lagona o le maofa, ofo tele, ma o nisi taimi o le atuatuvale, i le iloaina e aumaia e se gasetoto nisi o tulaga lamatia. Peitai, e tatau ona latou faaeteete e puipui mai le faaleagaina tumau o mata po o le “gasetoto tauaso” i le taimi e tupu ai le gasetoto. Sa maua le saogalemu aua sa latou faaaogaina matatioata ua faaaupegaina i tioata tiufaasolo faapitoa lea e puipuia o latou mata mai soo se tulaga lamatia faamoemoeina.
O Le Tala Faatusa
I le tulaga lava e tasi lea e mafai ai e se tamai masina ona punitia le la maoae, faatamaia ai lona malamalama ma le mafanafana, e mafai ona tupu se gasetoto faaleagaga pe a tatou faatagaina ni faalavefau laiti ma atuatuvale—ia tatou te fetaiai i o tatou olaga masani—ia faalatalata atili mai ma latou punitia ai le tulaga maoae, susulu, mafanafana o le malamalama o Iesu Keriso ma Lana talalelei.
Na faalautele mai e Elder Neal A. Maxwell lenei tala faatusa ina ua ia saunoa mai: “E oo lava i se mea laitiiti e pei o se limamatua o se alii, pe a tuu faalatalata atu i le mata, e mafai ona faatauasoina o ia mai le la tele lava. Ae o loo i ai lava iina le la. O le tauaso e mafua mai i le tagata lava ia. A tatou taulai tele atu i mea e le taua, o le faamuamuaina o i latou e punitia ai le tatou vaaiga mamao i le lagi.”6
E manino lava e leai se tasi o i tatou e manao e punitia e aunoa ma se mafuaaga le tatou vaaiga mamao atu i le lagi pe faataga se gasetoto faaleagaga e tupu i o tatou olaga. Sei ou faasoa atua ni manatu e mafai ona fesoasoani ia i tatou i le puipuia mai le gasetoto faaleagaga lea e mafua ai le faatamaia tumau faaleagaga o i tatou.
Matatioata Faaletalalelei: Faatumauina o se Vaaiga Faaletalalelei
Tou te manatuaina la’u faamatalaga e uiga i matatioata faapitoa e faaaoga e puipuia ai le faatamaia o mata po o le tauaso mai le gasetoto o le la? O le vaai atu i se gasetoto faaleagaga e ala atu i tioata malupuipuia ma faamaluluina a le Agaga e aumaia ai se vaaiga o le talalelei, ma puipuia ai i tatou mai le tauaso faaleagaga.
Tatou mafaufau i nai faataitaiga. O le i ai o upu a perofeta i o tatou loto ma le avea o le Agaga Paia ma o tatou fesoasoani, e mafai ai ona tatou pulatoa atu i se malamalama faalelagi ua punitia sina vaega e ala atu i “matatioata faaletalalelei.”
E faapefea la ona tatou faaaogaina o tatou matatioata faaletalalelei? O nisi nei o faataitaiga: Ua tau mai e o tatou matatioata faaletalalelei ia i tatou e finagalo le Alii ina ia tatou aai ma feinu i le faamanatuga i vaiaso taitasi ma e Na te finagalo foi ia tatou suesue i tusitusiga paia ma faia tatalo i aso taitasi. Ua latou faailoa mai foi ia i tatou o le a faaosoosoina i tatou e Satani ia aua le faia. Ua tatou iloa o lana mataupu o le saili e aveese lo tatou faitalia e ala i faatosinaga ma faaosoosoga faalelalolagi. E oo lava i aso o Iopu, atonu na i ai nisi na aafia i se gasetoto faaleagaga, ua faamatalaina: “Latou te fetaiai ma le pouliuli i le ao, ma tautagotago i le aoauli e peiseai o le po.”7
Uso e ma tuafafine, a ou talanoa atu e uiga i le vaai atu e ala i matatioata faaletalalelei, faamolemole ia silafia ou te le o fautua atu ia aua nei o tatou faailoaina pe talanoaina luitau e feagai ma i tatou po o le tatou savavali fiafia ma le le nofouta i mailei ma mea leaga ua tuuina e le fili i o tatou luma. Ou te le o talanoa atu i le faaaogaina o tioata pogisa—ae o le faafeagai. O loo ou fautua atu ina ia tatou vaavaai atu i luitau e ala atu i tioata faaletalalelei. Ua matauina e Elder Dallin H. Oaks faapea “o le vaaiga o le gafatia lea e vaai atu i faamatalaga uma e faatatau i ai i se fesootaiga anoa.”8 O se vaaiga faaletalalelei e faalauiteleina lo tatou vaai atu i se vaaiga faavavau.
A e faaaogaina matatioata faaletalalelei, o le a maua le taulaiga ma le vaaiga mamao i le ala o e mafaufau ai e uiga i au mea e faamuamua, ou faafitauli, ou faaosoosoga, ma e oo lava i au mea sese. O le a e vaai atu i le malamalama susulu atu e le mafai ona e vaai i ai e aunoa ma ni [matatioata faaletalalelei].
O le mea e ese ai, e le na o mea le lelei e mafua ai se gasetoto faaleagaga i o tatou olaga. E masani lava, o gaoioiga mataina pe lelei foi lea tatou te tuuto atu i ai i tatou lava, e mafai ona latalata tele mai ua latou punitia ai le malamalama o le talalelei ma aumaia ai le pouliuli. O nei tulaga lamatia po o faalavefau e aofia ai le aotauina ma le faamanuiaina, mana ma faatosinaga, naunautaiga, e oo lava i taleni ma meaalofa.
Na aoao mai Peresitene Dieter F. Uchtdorf faapea “soo se amioga lelei pe a soona fai e mafai ona avea ma mea leaga. … E i ai le taimi e mafai ai ona avea mea tatou te ausia ma faalavefau, ae avea faamoemoega ma ni mea faasalavei.”9
Sei ou faasoaina atu ni faataitaiga auiliili maoae e mafai ona avea ma elemene ola mo le aloese mai o tatou lava gasetoto faaleagaga.
Ala o Faasalalauga Faaleagafesootai
I nai masina talu ai sa ou lauga ai i le Konafesi a Tamaitai i BYU.10 Sa ou faamatalaina le ala e faasalalau atu ai e tekinolosi o ala faasalalau faaagafesootai “le malamalama o se Faaola … i atunuu uma, ituaiga, gagana, ma tagata.”11 O nei tekinolosi na aofia ai uepisaite a le Ekalesia e pei o le LDS.org ma le Mormon.org; polokalama o masini feaveai e pei o le Potutusi o le Talalelei, Alaata Mamona, LDS Tools, ma le Family Tree; ma polokalama o ala o faasalalauga faaagafesootai e aofia ai le Facebook, Instagram, Twitter, ma le Pinterest. Ua mauaina e nei polokalama o ala o faasalalauga faaagafesootai le faitau selau ma miliona o likes, faasoa, maimoa, retweets, ma pins ua matua lelei ma vave i le faasoaina atu o le talalelei i aiga, uo, ma paaga.
Ae ui i lea, mai amioga lelei uma ma le faaaogaina talafeagai o nei tekinolosi, e i ai ni lamatia o fesootai ma i latou pe a faalatalata tele atu i ai, e mafai ona tuuina i tatou i se gasetoto faaleagaga ma punitia ai le malamalama ma le mafanafana o le talalelei.
O le faaaogaina o ala o faasalalauga faaagafesootai, polokalama o masini feaveai, ma taaloga e mafai ona matua faamaumau taimi ma faaitiitia ai fesootaiga faafesagai. O lenei leiloa o talanoaga faaletagata lava ia e mafai ona taofia ai le atiaeina o tomai faaagafesootai ma suitulaga i faataitaiga faaleagaga taua, aemaise i le autalavou.
E lua tulaga lamatia e faatatau i ala faasalalau faaagafesootai o le faafoliga ma faatusatusaga faavaivailoto.
O le tele o ata ua tuu i luga o ala o faasalalauga e foliga mai o loo faaalia ai le olaga i le tulaga sili—e masani lava e le talafeagai. Ua tatou vaai uma lava i ata matagofie o sitaili o fale, nofoaga matagofie mo tafaoga, ata o tagata o ataata, faamatalaga o sauniga o meaai, ma ata o tino e foliga e le mafai ona maua.
Ia, mo se faataitaiga, o se ata atonu e te vaai i ai i luga o se faitotoa o ala o faasalalauga faaagafesootai a se tagata. Peitai e le o maua atoa le ata o le mea moni o loo tupu i le olaga.
A tatou faatusatusa i ai o tatou lava olaga masani ma olaga o isi ua lelei le mamanuina e pei ona faaalia i luga o ala o faasalalauga faaagafesootai, o nisi taimi e tuua ai i tatou ma lagona o le lotovaivai, lotovale, ma le toilalo e pei ua tatou leiloa i le olaga.
O se tagata se toatasi lea na faasoa mai ni ona lava ata se tele, sa fai mai, masalo i se tulaga taufaalili, “O le a se mea e fiafia fua ai pe afai e te le tuuina i luga?”12
Sa faamanatu mai ia i tatou e Sister Bonnie L. Oscarson i lenei taeao, o le manuia i le olaga e le o le tele o likes ua tatou maua po o le tele o uo ua tatou maua i ala faasalalau faaagafesootai. Peitai, e i ai se uiga i le fesootai anoa ma isi ma faaopoopo atu le malamalama i o latou olaga.
Talosia, e mafai ona tatou aoao ia sili atu le moni, saili nisi uiga malie, ma faaitiitia le lotovaivai pe a fetaiai ma ni ata o loo faaali mai ni tulaga faafoliga ma e masani ona taitai atu ai i faatusatusaga faavaivailoto.
O le faatusatusa e foliga mai e le na o se faailoga o o tatou taimi ae o taimi foi ua mavae. Sa lapataia e le Aposetolo o Paulo tagata o lona taimi “o loo fefuafuai i latou ia te i latou, ma fefaatusatusai i latou ia te i latou, e le popoto i latou.”13
Faatasi ai ma le tele naua o faaaogaaga talafeagai ma musuia o tekinolosi, sei o tatou faaaogaina e aoao atu ai, musuia, ma siitia i tatou lava atoa ai ma le uunaia o isi ina ia avea ma o latou tagata sili ona lelei—nai lo le faaali atu o o tatou tagata faafoliga. E tatau ona tatou faia mea uma tatou te mafaia e aoao atu ai ma faataitai ia faaaogaaga amiotonu o tekinolosi i le tupulaga faiae ma lapataia i tulaga lamatia e faatatau i ai ma le faaaogaina le lelei. O le maimoaina o ala o faasalalauga faaagafesootai i tioata o le talalelei, e mafai ai ona tatou taofiaina mai le avea o se gasetoto faaleagaga i o tatou olaga.
Faamaualuga
Sei o tatou talanoa nei i le puniala ua loa tausaga, o le faamaualuga. O le faamaualuga o le faafeagai o le lotomaualalo ma o se naunau lea e gauai atu i le finagalo o le Alii.”14 A faamaualuga, tatou te mananao ia avatu le mamalu ia i tatou lava nai lo le tuuina atu i isi, e aofia ai le Alii. O le faamaualuga e masani lava o le faatautava; o le lilifa atu i le sailiga ia sili atu mea ua maua ma mafaufau ua tatou sili atu nai lo isi. O le faamaualuga e masani ona iu i lagona o le ita ma le inoino; e mafua ai le ita o se tasi po o le taofia ai o le faamagalo atu. Ae peitai, o le faamaualuga e mafai ona taomia ai i le uiga faaKeriso o le lotomaualalo.
O mafutaga, e oo lava i aiga vavalalata ma e pele ia i latou, aemaise lava i aiga vavalalata ma e pele ia i latou—e oo foi i va o tane ma ava—e atiaeina i le lotomaualalo ae taofiofia e le faamaualuga.
I le tele o tausaga ua tea, na valaau mai se pule o se faleoloa tele ia te a’u e talanoa e uiga i lana kamupani, lea ua faatau e se tasi o ana tagata faipisinisi faatauva. Sa matua popole lava o ia ma le tele o isi tagata faigaluega i le laumua e ono leai ni a latou galuega. O le iloaina sa lelei le ma masaniga ma le pule sinia o le kamupani o le a faataua, sa ia fesili mai ai pe mafai ona ou faailoa atu o ia ma tuu atu se upu lelei mo ia, e oo lava i le setiina o se feiloaiga mo ia. Ona ia faaiu lea i le faamatalaga lenei: “Ua e iloa le latou tala? ‘E fano e agamalu!”
Sa ou malamalama i lana tala ma faapea ua fuafua e avea o se tala malie. Sa ou mauaina le tala malie. Ae sa i ai se mataupu faavae taua lea na ou lagona atonu e aoga ia te ia. Sa ou tali atu, “E moni lava, ae e le o le latou tala lena. O le mea moni, ua na o se faafeagai. ‘O e agamalu … [e] fai mo o latou tofi le lalolagi’15 o le latou tala lena.”
I lou aafiaga i le Ekalesia faapea foi i la’u matata faigaluega, o nisi o tagata maoae, sili ona lelei ua ou iloa o tagata sili ona agamalu ma lotomaualalo.
O le lotomaualalo ma le agamalu e ogatusa lava. Ia tatou manatua “e leai se tasi e ono talia i luma o le Atua, vagana ai i latou o e ua agamalu ma maualalalo i le loto.”16
Ou te tatalo o le a tatou taumafai e aloese i le gasetoto faaleagaga o le faamaualuga i le taliaina o le uiga o le lotomaualalo.
Faaiuga
I se faaiuga, o le gasetoto o le la, e moni, o se mea ofoofogia o le natura lea e mafai ona ufitia atoa ai le tulaga matagofie, mafanafana, ma le malamalama o le la e ala i se mea faatauvaa, ma mafua ai le pouliuli ma le malulu.
O se mea ofoofogia foi talitutusa e mafai ona toe faia i se tulaga faaleagaga, pe afai o isi mea laiti ma lē taua e faatagaina e faalatalata mai ma punitia ai le matagofie, mafanafana, ma le malamalama faalelagi o le talalelei a Iesu Keriso, e sui ai i se pouliuli malulu.
O matatioata ua mamanuina e puipui ai le vaaiga a i latou o i le vaega o le gasetoto atoa o le la e mafai ona puipuia mai ai i le faaleagaina tumau ma e oo lava i le tauaso.17 O matatioata faaletalalelei o loo aofia ai se malamalamaaga ma le molimau e uiga i mataupu faavae o le talalelei, ma o sauniga ua sauniaina se vaaiga faaletalalelei lea e talitutusa lava ona saunia se puipuiga sili atu faaleagaga ma le manino mo se tasi o aafia i lamatiaga o se gasetoto faaleagaga.
Afai e te iloaina soo se mea e foliga mai o loo punitiaina le malamalama ma le olioli o le talalelei i lou olaga, ou te valaaulia oe e tuu i se vaaiga faaletalalelei. Vaavaai e ala atu i ni tioata faaletalalelei ma ia mataalia e aua le faatagaina ni mea e le taua i le olaga e faanenefuina lau vaaiga e faavavau o le fuafuaga sili o le fiafia. I se faapuupuuga, aua nei faatagaina faalavefau o le olaga e punitia ai le malamalama o le lagi.
Molimau
Ou te molimau atu po o le a lava se faalavefau o ono punitia ai la tatou vaaiga o le malamalama o le talalelei, o loo i ai lava iina le malamalama. O lena punavai o le mafanafana, upumoni, ma le susulu o le talalelei lea a Iesu Keriso. Ou te molimau atu i se Tama Faalelagi alofa; i Lona Alo, o Iesu Keriso, ma le matafaioi a le Alo o le avea ma o tatou Faaola ma Togiola. I le suafa, o Iesu Keriso, amene.