O Le Perisitua ma le Mana Togiola o le Faaola

Saunia e Elder Dale G. Renlund

O Le Korama a Aposetolo e Toasefululua

Ae, mo le ausiaina o faamoemoega a le Tama Faalelagi, e tatau ona avanoa le mana togiola a Keriso i fanau a le Atua. E tilivaina atu e le perisitua nei avanoa.

Ta vaai faalemafaufau faatasi i se roketi ua uliina atu i se tulaga ina ia saunia mo le masii atu i luga. Vaai faalemafaufau la i le afi. O le suauu, i se mumu faatonutonu, e liua i le kesi vevela lea e puna mai i fafo, ma tuuina atu le uunaiga manaomia e tulei ai le roketi i le vanimonimo. O le mea mulimuli, mafaufau i le uta o loo nofo i luga o le roketi. E faatoa iloa atoa le taua o le uta pe a oo i le mea e tatau ona i ai ma galue e pei ona tatau ai. E le manaomia ona avea se tasi ma saienisi o roketi e talisapaiaina, o le taatiatia ai o se satelite taugata mo fesootaiga i le lalolagi i se faleteuoloa o le a itiiti ai le taua. O le misiona a le roketi e na o le tilivaina lava o se uta.

I lenei afiafi, ou te fia faatusaina le perisitua ua tatou umiaina i se roketi ma le avanoa e manuia ai mai le mana togiola a le Faaola i le uta o tilivaina atu e se roketi.

Ona o Lana taulaga togiola, ua i ai ia Iesu le pule ma le mana e togiola ai tagata uma. Ina ia mafai ona maua Lona mana togiola, ua Ia faamatuu atu ai se vaega o Lana pule ma le mana i alii o i le lalolagi. O lenei pule ma le mana ua faamatuuina mai ua ta’ua o le perisitua. E faatagaina ai e umia le perisitua e fesoasoani i le Tama Faalelagi ma Iesu Keriso i le La galuega—o le aumaia o le olataga ma le faaeaga i fanau a le Atua. Ua faia ona e tuuina atu ai i Lana fanau le avanoa e maua ai faamanuiaga o le mana togiola a le Faaola.

E taua le mana togiola a Iesu Keriso ona e leai se tasi o i tatou e mafai ona toe foi atu i lo tatou aiga faalelagi e aunoa ma se fesoasoani. I le olaga faaletino, tatou te faia ai pea mea sese ma solia tulafono a le Atua. Tatou te pisipisia i le agasala ma e le mafai ona faatagaina e toe nofo i le afioaga o le Atua. Tatou te manaomia le mana togiola a le Faaola e mafai ai ona tatou toe faalelei ma le Tama Faalelagi. Na motusia e Iesu Keriso noataga o le oti faaletino, ma mafai ai ona toetutu tagata uma. Ua Ia ofoina mai le faamagaloga o agasala, e faalagolago lea i le usiusitai i tulafono ma sauniga o Lana talalelei. E ala atu ia te Ia, ua ofoina mai ai le faaeaga. O le avanoa ia manuia mai le mana togiola a le Faaola o le uta sili lea ona taua o le foafoaga.

Ae, mo le ausiaina o faamoemoega a le Tama Faalelagi, e tatau ona avanoa le mana togiola a Keriso i fanau a le Atua.¹ E tilivaina atu e le perisitua nei avanoa. O le roketi lea. E taua le perisitua aua ua na o lana pule e faatautaia ai ia sauniga ma feagaiga talafeagai i luga o le fogaeleele. Afai e toilalo le perisitua i le tuuina atu o le avanoa ia manuia ai mai le mana togiola a le Faaola, o le a la lona faamoemeoga? Pe ua na o se mea faapapa lavelave e gauai atu i ai? Ua faamoemoe le Atua ia faaaoga le perisitua ia sili atu nai lo se vasega i Aso Sa po o le avea ma se avanoa mo le auauna atu. Na te faamoemoe ina ia tilivaina le uta.

O faaletonu laiti i roketi e mafai ona faatoilalo ai se misiona. O tāpuni manutinuti ma le vaivai o le tino [o le roketi] e mafua ai ona faaletonu se roketi. Ina ia puipuia le perisitua mai tulaga faafaatusa o le manutinuti o tāpuni ma le vaivai o le tino, ua puipuia ai e le Atua lona faaeeina atu ma le faaaogaina.² O le faaeeina atu o le perisitua ua malupuipuia e ala i ki o le perisitua, o aia tatau ia o le au peresitene ua tuuina atu i alii.³ O le faaaogaina o le perisitua ua malupuipuia i feagaiga lea e faia e lē o loo umiaina le perisitua. O le faaaogaina o le perisitua e puleaina uma e ki ma feagaiga o le perisitua. O le tofi o le perisitua o se alii e tuuina atu taitoatasi ma e le tutoatasi mai ia te ia;⁴ o le perisitua e le o se punavai le mailoa o le mana tutoatasi.

E maua uma le Perisitua Arona ma le Perisitua Mekisateko e ala i le feagaiga.⁵ E fuafuaina e le Atua ia tuutuuga ae talia e alii. I le talanoa lautele atu, e osi feagaiga e umia le perisitua e fesoasoani i le Atua i Lana galuega. I le amataga o lenei tisipenisione, sa faamalamalama mai e Iesu Keriso, o le feagaiga o le perisitua e “faamauina i luga o outou i le manatu ia te outou, ma ua le nao mo le manatu ia te outou, ae mo le manatu i le lalolagi atoa … ona ua latou le o mai ia te a’u.”⁶

E aoao e lenei mea o le faamoemoega o le perisitua o le valaaulia lea o isi e o mai ia Keriso i le fesoasoani atu ia i latou ia maua le talalelei toefuataiina. Ua tatou maua le perisitua ina ia mafai ona tatou fesoasoani atu i fanau a le Tama Faalelagi ina ia faamamaina le avega o le agasala ma avea faapei o Ia. E ala atu i le perisitua, ua faaalia le mana faale-Atua i olaga o i latou uma o e osia ma tausia feagaiga o le talalelei ma maua sauniga e faatatau i ai.⁷ O le auala lenei tatou te o mai taitoatasi ai ia Keriso, ia faamamaina, ma faalelei ma le Atua. Ua avanoa le mana togiola a Keriso e ala atu i le perisitua, lea e tilivaina le uta.

O feagaiga ma le Atua e faamaoni ma paia. E tatau i se alii ona saunia mo, aoao e uiga i, ma ulu atu i ia feagaiga ma le faamoemoe e faamamaluina i latou. O se feagaiga e avea ma se tautinoga a le tagata lava ia. I le toe faaupuina o le tusitala Peretania o Robert Bolt, e faatoa osia e se alii se feagaiga pe a ia manao e tuuto atu o ia lava i se tulaga ese i se folafolaga. Na te faia se fesootaiga i le va o le moni o le folafolaga ma lona lava amio mama. Pe a osia e se alii se feagaiga, o loo ia uuina ia lava, e pei o le vai, i ona lima faaofuofu. Ma afai e matala ona tamailima, o le a le mafai ona ia toe mauaina o ia. O se tagata e solia le feagaiga ua le o toe i ai se tagata e tautino atu po o se faamaoniga e ofoina atu.⁸

E osifeagaiga se tagata e umia le Perisitua Arona ia aloese mai le amioleaga, fesoasoani i isi ia faaleleia ma le Atua, ma saunia ina ia maua le Perisitua Mekisateko.⁹ O nei tiutetauave paia e faataunuuina pe a ia aoao atu, papatiso, faamalosia tagata o le Ekalesia, ma valaaulia isi e talia le talalelei. O ana metotia e “faaroketi”. O se taui, ua folafola mai e le Atua le faamoemoe, faamagaloga, le auaunaga a agelu, ma ki o le talalelei o le salamo ma le papatisoga.¹⁰

E osifeagaiga le tagata e umia le Perisitua Mekisateko e faataunuuina ia tiutetauave e faatatau i le Perisitua Arona ma faalautele lona valaauga i le Perisitua Mekisateko.¹¹ Na te faia i le tausia o poloaiga e o faatasi ma le feagaiga. O nei poloaiga e aofia ai le tuuina atu “ma le filiga i upu o le ola e faavavau” i le ola ai i “afioga uma e tulei mai le fofoga o le Atua,¹² molimau atu ia Iesu Keriso ma Lana galuega i aso e gata ai,¹³ e le mitamitavale ia te ia lava,¹⁴ ma avea ma uo o le Faaola, faalagolago atu ia te Ia e pei ona faia e se uo.¹⁵

O se taui, ua folafola mai e le Atua o le a maua e lē o umia le Perisitua Mekisateko ia ki e malamalama ai mealilo a le Atua. O le a ia atoatoa ina ia mafai ai ona ia tu i luma o le Atua. O le a mafai ona ia faatunuuina lana matafaioi i le galuega o le faaolataga. O le a saunia e Iesu Keriso le ala e afio muamua atu ai i luma o lē o umia le perisitua ma o le a faatasi ma ia. O le a i ai le Agaga Paia i le loto o lē umia le perisitua ma o le a sapasapaia o ia e agelu. O le a famalosia ma faafouina lona tino. O le a avea o ia ma suli i faamanuiaga a Aperaamo ma, faatasi ai ma lona faletua, avea ma suli faatasi ma Iesu Keriso i le malo o le Tama Faalelagi.¹⁶ O nei mea o ni “[folafolaga] silisili ese lava ma le aoga.”¹⁷ E leai ni folafolaga sili atu e mafai ona mafaufauina.

I alii taitoatasi o e mauaina le Perisitua Mekisateko, ua faamautu mai e le Atua Ana folafolaga o le feagaiga faatasi ai ma se tautoga.¹⁸ O lenei tautoga ua na o le Perisitua Mekisateko e faatatau i ai,¹⁹ ma o le Atua e tauto i le tautoga, ae le o lē umia le perisitua.²⁰ Talu ai o lenei tulaga uiga ese e aofia ai Lona mana ma le pule faalelagi, e faaaoga e le Atua se tautoga, e faaaoga ai le gagana sili ona malosi e mafai ona ia faia, e faamautinoa mai ai ia i tatou le natura mausali ma lemasuia o Ana folafolaga.

O taunuuga ogaoga e mafua mai i le solia o feagaiga o le perisitua ma le fulitua atoa mai ia i latou.²¹ O le le amanaiaina po o le le popole i se valaauga o le perisitua e tai pei o le faalauiloa atu o le vaivai o mea faitino i totonu o se vaega o le roketi. E lamatia ai le feagaiga o le perisitua aua e mafai ona taitai atu ai i le le manuia o le misiona. O le le usiusitai i poloaiga a le Atua e solia ai le feagaiga. Mo se tasi e faaauau pea ma e le salamo i le solia o feagaiga, e aveesea ia faamanuiaga folafolaina.

Na oo ina ou malamalama atoa i le fesootaiga i le va o le roketi “perisitua” ma le uta o “avanoa e manuia ai mai le mana togiola a Keriso” i le tele o tausaga ua mavae. I se faaiuga o se vaiaso, e lua ni ou tofiga sa i ai. O le tasi o le fatuina o le uluai siteki i se atunuu, ma le isi o le faatalanoaina o se alii talavou ma, a faapea ua sologa lelei mea uma, toefuatai lona perisitua ma faamanuiaga o le malumalu. O lenei alii ua 30 tausaga sa liliu mai i le Ekalesia i le faaiuga o lona vaitausaga o le 20. Sa ia auauna atu i se misiona faamamaluina. Ae ina ua ia toe foi mai i le fale, na leiloa lona ala, ma leiloa lona auai i le Ekalesia. Ina ua mavae ni tausaga, “sa ia iloaina lona tulaga,”²² ma faatasi ma le fesoasoani a taitai perisitua alofa ma tagata agalelei o le ekalesia, sa ia salamo ma toe faaulufale mai e ala i le papatisoina i le Ekalesia.

Mulimuli ane, sa ia talosaga ia toefuatai lona perisitua ma faamanuiaga o le malumalu. Sa matou faatulagaina se taimi mo le Aso Toonai i le 10 i le taeao i le falelotu. Ina ua ou taunuu atu mo faatalanoaga e muamua atu, ua leva ona i ai o ia iina. Sa ia matua naunau lava ia toe maua le perisitua, sa le mafai ona ia faatali.

I le taimi o le ma faatalanoaga, sa ou faaali ia te ia le tusi o loo faamatala ai le iloiloina patino e Peresitene Thomas S. Monson o lana talosaga ma faatagaina ai le faatalanoaga. Sa tagi lenei alii talavou lototele. Ona ou tauina atu lea ia te ia, o le aso o le ma faatalanoaga o le a leai se uiga aloaia i lona olaga. Sa foliga le mautonu o ia. Sa ou tau atu ia te ia e uma loa ona ou toefuataiina ona faamanuiaga, e pau le mea o le a faaali mai i lana pepa faamaumau o uluai aso o lona papatisoga, faamauga, faauuina o le perisitua, ma le faaeega paia. Sa tau toe mole o ia.

Sa ou fai atu ia te ia e faitau mai le Mataupu Faavae ma Feagaiga:

“Faauta, o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou.

“O le mea lenei e mafai ai ona outou iloa pe afai ua salamo se tagata i ana agasala—faauta, e taʼutaʼu atu e ia i latou ma lafoai i ai.”²³

Na tumu ona mata i loimata mo le taimi lona tolu. Ona ou tuuina lea o o’u lima i luga o lona ulu ma i le suafa o Iesu Keriso ma e ala i le pule o le Perisitua Mekisateko, ma faatasi ai ma le faatagaga a le Peresitene o le Ekalesia, sa ou toefuataiina lona perisitua ma faamanuiaga o le malumalu.

O le olioli na ufitia ai i ma’ua sa maoae. Ua ia iloa ua toe faatagaina o ia e umia ma faaaoga le perisitua a le Atua. Ua ia iloa ua toe faagaoioia atoatoa ona faamanuiaga o le malumalu. Sa i ai se osooso i lana laa ma se malamalama susulu e uiga ia te ia. Sa ou matua mitamita ia te ia, ma sa ou lagona le mitamita foi o le Tama Faalelagi ia te ia.

Mulimuli ane, sa faatulagaina le siteki. Sa lelei le auai o le Au Paia naunautai ma faamaoni i sauniga, ma sa lagolagoina se au peresitene matagofie o le siteki. Ae, mo a’u, o le talaaga iloga o le faatulagaina o le uluai siteki i se atunuu sa faamalumaluina e le olioli sa ou lagonaina i le toefuataiina o faamanuiaga i lenei alii talavou.

Ua ou iloaina o le faamoemoega o le faatulagaina o se siteki, po o le faaaogaina o le perisitua a le Atua i soo se auala, ina ia fesoasoani i le Tama Faalelagi ma Iesu Keriso i le La galuega, ma tuuina atu ai i fanau taitoatasi a le Atua le avanoa mo le faaolataga ma le faaeaga. E pei o le roketi o lona faamoemoega o le tilivaina atu o se uta, o le perisitua e tilivaina atu le talalelei a Iesu Keriso, ma mafai ai e tagata uma ona osia feagaiga ma maua ia sauniga e faatatau i ai. “O le toto togiola o Keriso”²⁴ e mafai ona faaaoga i o tatou olaga a o tatou maua le faatosinaga faapaiaina a le Agaga Paia ma maua faamanuiaga ua folafola mai e le Atua.

E le gata i lou usiusitai o oe lava ia i tulafono ma sauniga o le talalelei, ou te valaaulia outou ina ia osia ma tausia feagaiga o le perisitua. Maua le tautoga a le Atua ma Lana folafolaga. Faalautele ou tiutetauave i le perisitua e fesoasoani ai i le Tama Faalelagi ma Iesu Keriso. Faaaoga le perisitua e fesoasoani e tilivaina atu ai i se tasi le avanoa ia manuia ai mai le mana togiola o le Faaola! A o e faia, o le a oo mai faamanuiaga silisili ia te oe ma lou aiga. Ou te molimau atu o loo soifua le Togiola ma o loo taitaia lenei galuega, i le suafa o Iesu Keriso, amene.

Faamatalaga

1. Tagai 1 NIfae 11:31; 2 Nifae 2:8.

2. Tagai Mataupu Faavae ma Feagaiga 121:36.

3. Tagai Mataupu Faavae ma Feagaiga 42:11; tagai foi ia Dallin H. Oaks, “O Ki ma le Pule o le Perisitua,” Liahona, Me 2014, 49–52.

4. Tagai Mataupu Faavae ma Feagaiga 124:95, 130, 132. O le perisitua e mauaina e se alii e le sili atu le tutoatasi ia te ia nai lo le mana togiola o Keriso e tutoatasi ia Keriso.

5. O mau faasino i se feagaiga e fesootai i le perisitua maualalo o loo maua i le Numera 25:10–13; Neemia 13:29; ma le Malaki 2:2–8. O mau faasino e faatatau i se feagaiga i le Perisitua Mekisateko o loo maua i le Joseph Smith Translation, Kenese 14:26–37 (in the Bible appendix); Salamo 110:1, 4; ma le Mataupu Faavae ma Feagaiga 84:39–42. Tagai foi Bruce R. McConkie, “The Doctrine of the Priesthood,” Ensign, May 1982, 32–34.

6. Mataupu Faavae ma Feagaiga 84:48, 50.

7. Tagai Mataupu Faavae ma Feagaiga 84:19–21.

8. Tagai Robert Bolt, A Man for All Seasons: A Play in Two Acts1990), xiii-xiv, 140.

9. Tagai Numera 25:12–13; Neemia 13:29; Esekielu 34:2–6; Malaki 2:2–9; Mataupu Faavae ma Feagaiga 13:1; 20:46–59; 84:33–40.

10. Tagai Eperu 7:19; Mataupu Faavae ma Feagaiga 84:26–27.

11. Tagai Mataupu Faavae ma Feagaiga 84:33.

12. Tagai Mataupu Faavae ma Feagaiga 84:33–44.

13. Tagai Mataupu Faavae ma Feagaiga 84:61–62.

14. Tagai Mataupu Faavae ma Feagaiga 84:73.

15. Tagai Mataupu Faavae ma Feagaiga 84:77–88.

16. Tagai Faaliliuga a Iosefa Samita, Kenese 14:26–37 (i le faaopoopoga o le Tusi Paia); Eperu 7:11; Mataupu Faavae ma Feagaiga 84:19, 33–34, 38, 42, 77–88.

17. 2 Peteru 1:4.

18. Tagai Faaliliuga a Iosefa Samita, Kenese 14:27–31 (i le faaopoopoga o le Tusi Paia); Salamo110:1, 4; Faaliliuga a Iosefa Samita, Eperu 7:19–21 (i le faaopoopoga o le Tusi Paia); Mataupu Faavae ma Feagaiga 84:33–40, 48.

19. TagaiThe Teachings of Ezra Taft Benson 1988), 223; Joseph Fielding Smith, in Conference Report, Apr. 1970, 59; Teachings of the Prophet Joseph Smith sel. Joseph Fielding Smith (1976), 323.

20. E leai se mau faasino faatusipaia po o se tala o le tagata na faatauto i se tautoga a o faia le feagaiga o le Perisitua Mekisateko. Nai lo lena, i le Faaliliuga a Iosefa Samita, Kenese 14:27–31 (i le faaopoopoga o le Tusi Paia); Salamo 110:1, 4; Eperu 7:21ma le Mataupu Faavae ma Feagaiga 84:40, o le Atua e tauto i se tautoga a o Ia osia le feagaiga ma le tagata. Na saunoa Elder Bruce R. McConkie: “Ua tauto le Alii i se tautoga i lona lava suafa … faapea o tagata uma o e tausia feagaiga na osia e fesootai ma le Perisitua Mekisateko o le a mautofi, maua ma mauaina mea uma i lona malo tumau e faavavau. … Na tauto le Atua i se tautoga o le a faaeaina Keriso, ma e toe tauto, i le taimi o le a tofu maua ai e i tatou taitoatasi le Perisitua Mekisateko, o le a tatou maua se faaeaga pe a tatou faamaoni ma faatuatua i mea uma” (“The Doctrine of the Priesthood Ensign, May 1982).

21. Tagai Mataupu Faavae ma Feagaiga 84:41–42. O le salamo e mafai lava i taimi uma mo i latou o e naunau ia sui. Tagai, mo se faataitaiga, Dale G. Renlund, “Salamo: O Se Filifiliga Fiafia,” Liahona, Nov. 2016, 121–24.

22. Luka 15:17.

23. Mataupu Faavae ma Feagaiga 58:42–43.

24. Mosaea 4:2.