O Le Fuafuaga ma le Folafolaga

Saunia e Elder Dallin H. Oaks

O Le Korama a Aposetolo e Toasefululua

O le folafolaga o le aiga o se toefaamamafa lea a le Alii i upumoni o le talalelei e manaomia ona tatou tausia ai i tatou i luitau o i ai nei i le aiga.

E pei ona manino mai i la tatou folafolaga i aiga, ua faamanuiaina tagata o Le Ekalesia a Iesu Keriso o le Au Paia o Aso e Gata Ai i le aoaoga faavae tulagaese ma auala eseese e vaai atu ai i le lalolagi. Tatou te auai ma atamamai foi i le tele o gaoioiga faalelalolagi, ae i nisi o mataupu tatou te le auai ai pe a tatou saili atu e mulimuli i aoaoga a Iesu Keriso ma Ana Aposetolo, anamua ma aso nei.

I.

I se faataoto, sa faamatala ai e Iesu i latou o e “[faalogo] i le upu” ae na oo ina “le fua mai” ina ua “fetinaiina” lena upu ona “o le loto popole i mea a lenei lalolagi ma le pepelo o le oa” (Mataio 13:22). Mulimuli ane, sa faasa’o e Iesu Peteru mo le le gaua’i atu “i mea a le Atua, ae o mea a tagata,” ma tautino atu, “Aua se a le aoga i le tagata pe afai na te maua le lalolagi uma, a e maumau lona ola?” (Mataio 16:23, 26). I Ana aoaoga faai’u, sa Ia ta’u atu i Ana Aposetolo, “Afai a ni tagata o le lalolagi outou, po ua alofa mai le lalolagi i ona tagata; ae [ona] e le ni o o le lalolagi outou … [ua] inoino ai le lalolagi ia te outou” (Ioane 15:19; tagai foi Ioane 17:14, 16).

E faapena foi, ua faaaoga e tusitusiga a uluai Aposetolo a Iesu le faatusa o le “lalolagi” e fai ma faatusa o le faafeagai o aoaoga o le talalelei. “Aua foi tou te amio faatasi ma lenei lalolagi” (Roma 12:2), na aoao mai ai le Aposetolo o Paulo. “Aua o le poto o lenei lalolagi o le valea lea i luma o le Atua” (1 Korinito 3:18–19). Ma, “Ia outou [faaeteete],” sa ia lapatai mai ai, “ne’i faatagataotauaina outou e se tasi … e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso” (Kolose 2:8). Sa aoao mai le Aposetolo o Iakopo e faapea “o le fefaauoa’i ma le lalolagi o le ita lea i le Atua[.] O lenei o se fia uo ma le lalolagi, ua avea o ia ma ita i le Atua” (Iakopo 4:4).

E tele ina faaaoga e le Tusi a Mamona le faatusa lenei o le faafeagai “o le lalolagi.” Sa valoia e Nifae le faafanoga mulimuli o “i latou o e ua ati a’e i luga ina ia tausaafia ai i mata o le lalolagi, ma i latou o e ua saili … i mea o le lalolagi” (1 Nifae 22:23; tagai foi 2 Nifae 9:30). Sa ta’usalaina e Alema i latou o e na “fefete a’e … i mea le aoga o le lalolagi” (Alema 31:27). Ua faaalia i le miti a Liae o i latou o e saili atu e mulimuli i le āi u’amea, le afioga a le Atua, o le a fetaiai ma le faafeagai o le lalolagi. O i latou na tumu i le “fale tele ma le ateatea” lea na vaai i ai Liae sa “faatauemu ma tusitusi mai” le “tamatamailima o le faatauemu” (1 Nifae 8:26–27, 33). I lana faaaliga i le faaliliuina o lenei miti, sa aoao ai e Nifae o lenei faatauemu ma le itu tetee sa sau mai “le motu o tagata o le lalolagi, … le lalolagi ma lona poto; … le faamaualuga lea o le lalolagi” (1 Nifae 11:34–36).

O le a le uiga o nei lapataiga faatusitusiga paia ma poloaiga ina ia le avea ma ni “o o le lalolagi” po o le poloaiga o aso nei ia “lafoai i le lalolagi”? (MF&F 53:2). Sa aoteleina e Peresitene Thomas S. Monson nei aoaoga: “E tatau ona tatou faaeteete i se lalolagi ua mamao ese lava mai mea faaleagaga. E taua lo tatou teenaina o soo se mea e le ogatusa ma o tatou tulaga faatonuina, o le musu e teenaina i le faagasologa, e lafoai ai le mea e sili ona taua: o le ola e faavavau i le malo o le Atua.”¹

Sa foafoaina e le Atua lenei lalolagi e tusa ma Lana fuafuaga e saunia ai se nofoaga mo Lana fanau e ola ai faaletino e fai ma laasaga talafeagai e agai atu ai i mamalu ua Ia finagalo ai mo Ana fanau uma. E ui o loo i ai malo ma mamalu e tele, ae o le finagalo silisili o lo tatou Tama Faalelagi mo Ana fanau o le mea lea na ta’ua e Peresitene Monson “o le ola e faavavau i le malo o le Atua,” o lona uiga o le faaeaga i aiga. E sili atu lenei nai lo le faaolataga. Ua faamanatu mai e Peresitene Russell M. Nelson ia i tatou, “I le fuafuaga e faavavau a le Atua, o le faaolataga o se mataupu faaletagata lava ia; [ae] o le faaeaga o se mataupu faaleaiga.”²

O le talalelei toefuataiina a Iesu Keriso ma le folafolaga musuia i aiga, lea o le a ou talanoaina mulimuli, o aoaoga taua ia e taialaina ai sauniuniga faaletino mo le faaeaga. E ui e tatau ona tatou ola faatasi ma tulafono o le faaipoipoga ma isi tumasani o se lalolagi ua faateteleina le amioleaga, ae o i latou e tauivi mo le faaeaga e tatau ona faia ni filifiliga patino i le olaga faaleaiga, e tusa ma le ala a le Alii i soo se taimi lava e ese ai mai le ala a le lalolagi.

I lenei olaga faaletino, e le o i ai ma so tatou manatuaina po o a mea na muamua atu i lo tatou fanau mai, ae o lenei la ua tatou oo i mea faafeagai. Tatou te tuputupu ae ma matutua faaleagaga e ala i le filifili e usitai i poloaiga a le Atua i se soloaiga faifai pea o filifiliga sa’o. E aofia i nei mea ia feagaiga ma sauniga ma le salamo pe a sese a tatou filifiliga. I se faatusatusaga, afai e leai so tatou faatuatua i le fuafuaga a le Atua ma e le usiusitai pe le faia foi ma le loto i ai mea e ao ona fai, ua tatou misia lena tuputupu ae ma le faatagatamatua. Ua aoao mai le Tusi a Mamona, “O le olaga lenei o le taimi lea mo tagata e saunia ai e fetaiai ma le Atua” (Alema 34:32).

II.

O le Au Paia o Aso e Gata Ai e malamalama i le ata o le faaolataga a le Atua ua i ai so latou vaaiga tupito faalelalolagi lea ua fesoasoani ia i latou e iloa ai le mafuaaga mo poloaiga a le Atua, le natura lemasuia o Ana sauniga manaomia, ma le matafaioi autu a lo tatou Faaola, o Iesu Keriso. Ua faasaoina e le Togiola a lo tatou Faaola i tatou mai le oti ma, afai tatou te salamo, o le a laveaiina i tatou mai le agasala. Faatasi ma lena vaaiga faalelalolagi, ua i ai i le Au Paia o Aso e Gata Ai ni faamuamua ma ni faiga tulagaese ma ua faamanuiaina i le malosi e onosaia ai le le fiafia ma tiga o le olaga faaletino.

E mautinoa foi, o faatinoga a i latou e taumafai e mulimuli i le ata o le faaolataga a le Atua e mafai ona tupu ai le malamalama sese pe oo foi ina feteenai ma tagata o le aiga po o uo e le talitonu i ona mataupu faavae. O ia feteenaiga e tupu soo lava. O augatupulaga uma na saili atu e mulimuli i le fuafuaga a le Atua sa oo i luitau. I aso anamua, na tuuina atu e le perofeta o Isaia le malosi i le fanauga o Isaraelu, lea na ia ta’ua “outou o e ua iloa le amiotonu, … ua i o latou loto la’u tulafono.” Ia i latou na ia fai atu ai, “Aua le fefefe i le faalumaina mai e tagata, aua foi le faavaivai i lo latou faifai mai” (Isaia 51:7; tagai foi 2 Nifae 8:7). Ae po o le a lava le mafuaaga o feteenaiga ma i latou e le malamalama pe talitonu i le fuafuaga a le Atua, ae o i latou e malamalama, e poloaiina i taimi uma e filifili le ala a le Alii ae le o le ala a le lalolagi.

III.

O le fuafuaga o le talalelei e tatau ona mulimuli ai aiga taitasi e saunia ai mo le ola e faavavau ma le faaeaga, ua otooto atu i le folafolaga a le Ekalesia 1995, “O Le Aiga: O Se Folafolaga i le Lalolagi.”³ O ana folafolaga, o le mea moni, e manino lava le eseese ma nisi o tulafono o i ai nei, faiga masani, ma mea ua taliaina e le lalolagi o loo tatou ola ai nei. I o tatou aso, o eseeega e aupito sili ona manino o le nonofo faapouliuli e aunoa ma le faaipoipo, faaipoipoga o le itupa e tasi, atoa ai ma le tausiga o se fanau o loo i ai i ia sootaga faapea. O i latou e le talitonu pe le fia saili i le faaeaga ma o loo sili ona faatosinaina e ala o le lalolagi, e manatu i lenei folafolaga i le aiga ua na o se faamatalaga o aiaiga faavae e tatau ona suia. I se eseesega, ua faamautu e le Au Paia o Aso e Gata Ai o le folafolaga i le aiga ua faauigaina ai le ituaiga o sootaga faaleaiga lea e mafai ona tupu ai le vaega sili ona taua o lo tatou atinaega e faavavau.

Ua tatou molimauina le faatelevaveina ma le faatupulaia o le taliaina lautele o le nonofo faapouliuli e aunoa ma le faaipoipo ma le faaipoipoga o le itupa e tasi. O le faamaoniga ua ioeina e ala i faasalalauga, a’oga, ma e oo foi i mea manaomia faalegaluega, ua tupu ai ni luitau faigata mo le Au Paia o Aso e Gata Ai. E tatau ona tatou taumafai e faapaleni manaoga faatautavā o le mulimuli i tulafono o le talalelei i o tatou olaga patino ma aoaoga, e oo lava i lo tatou saili e faaali atu le alofa mo tagata uma.⁴ I le faia o lea mea o nisi taimi tatou te feagai ai, ae le tatau ona tatou fefefe ai, ma le mea na ta’ua e Isaia “o le faalumaina mai e tagata”.

E talitonu le Au Paia o Aso e Gata Ai ua liuaina, o le aoaoga faavae i le folafolaga i le aiga, lea na fofogaina mai i le toetoe atoa le kuata seneturi talu ai, o le toefaamamafa lea a le Alii i upumoni o le talalelei e manaomia ona tatou tausia ai i tatou ia manumalo i luitau o i ai nei i le aiga. O faataitaiga e lua o le faaipoipoga o le itupa e tasi ma le nonofo faapouliuli e aunoa ma le faaipoipo. E 20 tausaga talu ona mavae le fofogaina o le folafolaga i le aiga, ae faatagaina e le Faamasinoga Maualuga a le Iunaite Setete le faaipoipoga o le itupa e tasi, ma soloia ai le faaipoipoga ua faitau afe tausaga o tapulaa mo na o se alii ma se tamaitai. O le pasene faate’ia o fanau a le Iunaite Setete e fananau mai i se tina e le faaipoipo i se tama sa faifai malie lava: 5 pasene i le 1960,⁵ 32 pasene i le 1995,⁶ ma i le taimi lenei ua silia ma le 40 pasene.⁷

IV.

E amata le folafolaga i le aiga i le tautinoga, “o le faaipoipoga i le va o se alii ma se tamaitai ua faauuina e le Atua ma o le aiga e totonugalemu i le fuafuaga a le Foafoa mo le taunuuga e faavavau o Ana fanau.” O loo faamautu mai ai foi “o le tulaga tane po o le fafine [o le tagata] o se vaega taua lea o le muai olaga, olaga faitino, ma le faasinomaga e faavavau ma le faamoemoega.” O loo tautino mai foi e faapea, “Ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.”

Ua faamautu mai e le folafolaga le tiute faifai pea o le tane ma le ava ina ia fanafanau ma uluuluola ai le lalolagi ma o le la tiutetauave paia o le alofa ma le tausi e le tasi o le isi ma le la fanau: “E tatau ona fanauina fanau i totonu o feagaiga o le faaipoipoga, ma ia tausia e se tama ma se tina o e ua faamamaluina ma le faamaoni atoatoa feagaiga faaleulugalii.” O loo lapatai mai ma le mamafa e tetee atu i le sauaina o taitoalua ma fanau, ma ua faamautu mai “e maua le fiafia i le olaga faaleaiga pe a faavae i aoaoga a le Alii o Iesu Keriso.” Ma le mea mulimuli, o loo valaau mai mo le faalauiloaina atu o “na fua faatatau [aloaia] ua fuafuaina ina ia faatumauina ma faamalosia ai le aiga o se iunite faavae o malo.”

I le 1995, na tuuina mai ai e se Peresitene o le Ekalesia ma isi Aposetolo e 14 a le Alii nei faamatalaga taua faaleaoaoga faavae. I le avea ai ma se tasi o na Aposetolo e toafitu o loo soifua pea, ou te lagona le tiute e faasoa atu mea na taitai atu i le folafolaga i le aiga mo le silafiaina e tagata uma o e e mafaufau i ai.

O le musumusuga na iloa ai le manaoga mo se folafolaga i le aiga na oo mai i le au taitai o le Ekalesia i le silia ma le 23 tausaga talu ai. O se mea na faateia ai nisi o e na mafaufau o upumoni faaleaoaoga faavae e uiga i le faaipoipoga ma le aiga sa malamalama lelei i ai e aunoa ma le toe ta’uaina.⁸ Ae peitai, sa matou lagonaina le faamautinoaga ma matou galulue ai loa. Sa faailoaina mataupu ma talanoaina e uso o le Korama a le Toasefululua mo le toeitiiti tausaga atoa. Sa fautuaina le gagana, iloiloina, ma toe lauliliuina. Sa matou faaauau pea ona aioi atu ma le agaga tatalo i le Alii mo Lana musumusuga i mea e tatau ona matou ta’u atu ma le auala e tatau ona ta’u atu ai. Sa matou aoao uma “i lea fasifuaitau ma lea fasifuaitau, o le mataupu i lea mataupu,” e pei ona folafola mai e le Alii (MF&F 98:12).

I le taimi o lea faagasologa o faaaliga, sa tauaao atu ai se tusiga fautuaina i le Au Peresitene Sili, o e vaavaaia ma faasilasilaina aoaoga ma le aoaoga faavae a le Ekalesia. Ina ua mavae ona faia e le Au Peresitene isi suiga, sa faasilasila atu ai loa le folafolaga i le aiga e le Peresitene o le Ekalesia, Gordon B. Hinckley. I le sauniga a tamaitai i le aso 23 o Setema, 1995, sa ia faalauiloa atu ai le folafolaga i upu nei: “Ona o le tele o mataupu sese ua manatu le lalolagi o upumoni ia, faatasi ma le tele o le taufaasese e faatatau i tulaga faatonuina ma tulaga faatauaina, faatasi ai ma le tele o faaosoosoga ma faatosinaga o loo pisia lemu ai mai le lalolagi, ua matou lagona ai e tatau ona lapatai ma muai lapatai atu.”⁹

Ou te molimau atu o le folafolaga i le aiga o se malelega o le upumoni e faavavau, o le finagalo o le Alii mo Ana fanau o e sailia le ola e faavavau. Ua avea pea ma faavae o aoaoga ma faatinoga a le Ekalesia mo le 22 tausaga talu ai ma o le a faaauau pea mo le lumanai. Mafaufau i ai, aoao atu, ola ai, ma o le a faamanuiaina outou a’o tou fetaomi atu i luma agai i le ola e faavavau.

I le fasefulu tausaga talu ai, sa aoao mai ai Peresitene Ezra Taft Benson e faapea “e tofu lava le augatupulaga ma ona tofotofoga ma ona avanoa e tutu atu ai ma faamaonia latou lava.”¹⁰ Ou te talitonu o o tatou uiga e faatatau i le folafolaga i le aiga ma lona faaaogaina o se tasi lea o na tofotofoga mo lenei tupulaga. Ou te tatalo mo tagata uma o le Au Paia o Aso e Gata Ai ia tutu mausali i lena tofotofoga.

Ou te faamaea atu i aoaoga na saunoa i ai Peresitene Gordon B. Hinckley i le lua tausaga talu ona ia faasilasila atua le folafolaga i le aiga. Sa ia saunoa: “O loo o’u vaaia se lumanai matagofie i se lalolagi ua matua le mautonu lava. Afai o le a tatou pipiimau pea i a tatou tulaga faatauaina, afai o le a tatou atinae i luga o lo tatou tofi, afai o le a tatou savavali i le usiusitai i luma o le Alii, afai o le a tau lava o le tatou ola i le talalelei, o le a faamanuiaina i tatou i se auala mataina ma matagofie. O le a vaavaai mai [tagata] ia i tatou o ni tagata tulaga ese o e ua mauaina le ki i se fiafiaga tulaga ese.”¹¹

Ou te molimau atu i le upumoni ma le taua e faavavau o le folafolaga i le aiga, sa faaalia mai e le Alii o Iesu Keriso i Ana Aposetolo mo le faaeaga o le fanau a le Atua (tagai Mataupu Faavae ma Feagaiga 131:1–4), i le suafa o Iesu Keriso, amene.