O Se Auala Fou mo Sauniga o le Perisitua Mekisateko ma le Aualofa
“O le a le mea ou te faia e aunoa ma se tusi lesona?” na mafaufau ai Nancy Feragen, o se faiaoga o le Aualofa, ina ua ia muai iloiloa se kopi o le Sau, Mulimuli Mai ia te Au—Mo le Perisitua Mekisateko ma le Aualofa. “I le taimi muamua, sa ou popole,” sa ia tautino mai ai. “Ona oo mai lea o se manatu ia te au: E finagalo le Alii ia i tatou ia faataunuu nisi tiutetauave mo lo tatou aoaoina ma le faateleina o lo tatou faaleagaga o ni uso ma tuagane i le talalelei.”
“E fai si taufaafefe e faalagolago i le Alii ma sau saunia e taitai se talanoaga e aunoa ma ni anomea se tele,” o le tala a Linda Harmon, o se peresitene o le Aualofa, “ae o le taimi lava e te faia ai—pe afai e te saunia oe lava e ala i le tatalo, suesue, alu i le malumalu, ma isi mea e musuia oe e fai—e ese le ofoofogia.”
Aoao Atu i le Ala a le Faaola
“O se tasi o luitau i le mataupu aoaoina fou o le tuu atu i tagata ia aua nei toe aoao atu ‘i le ala lava e tasi,’” na fai mai ai Epikopo Boyd Roberts. “E tatau ona tatou taofi le tau lava o le faasoa atu o faamatalaga, le faia o mea e taofia ai le Agaga, ma tuu atu i le Agaga e aoao atu.”
“O se auala fou o le aoao atu atonu e faigata mo nisi o tagata,” o le tala a Lisa Smith, o se peresitene o le Aualofa, e faasino i le Aoao Atu i le Ala a le Faaola. “O le mafuaaga lena e taua ai le mamanu o metotia lelei o le aoao atu ma uunaia taitai e auai pea i fonotaga a aufono a faiaoga faatasi ai ma faiaoga,” o lana tala lea.
Saunia ma Aoao Atu
Na fai mai David Mickelson, o se faiaoga o vaega a faitaulaga sili, o le fuaitau “aoao atu ma le filiga” i le Mataupu Faavae ma Feagaiga 88:78 “e faatatau i lo tatou sauniuniga muamua ma lo tatou tomai e mulimuli ai ma le filiga i le Agaga a o tatou aoao atu. A tatou aoao atu ma le filiga, o le a faatasi mai tatou le alofa tunoa a le Faaola ma o le a atili aoaoina ma le atoatoa i tatou. Ou te manatu o le auala atoatoa lena a le Alii e aoao atu ai. O le faiaoga—o le tagata e taitaia le talanoaga—e tatau ona naunau ina ia aoaoina e le Agaga.”
E saunia Adam Bushman, o se faiaoga o le korama a toeaina mo lesona e ala i le iloiloina o saunoaga o le konafesi aoao na filifilia, ona mafaufau lea ma le agaga tatalo pe o a mataupu e sili ona taua mo le korama. “Ina ia fesoasoani i alii e maua nisi taimi e mafaufau loloto ai,” sa ia faamatala, “e auina atu se imeli i le aluga o le vaiaso e faapea, ‘O le saunoaga lenei o le a tatou talanoaina ma matou te mananao ia te oe e mafaufau i fesili nei.’”
Fefautuaai ma le Aoaoina Faatasi
“O Aso Sa i le Aualofa e le tau lava o se tiutetauave a taitai,” fai mai ai Brooke Jensen, o se fesoasoani i se au peresitene o le Aualofa. “E manaomia ona faia e tagata taitoatasi se matafaioi ola.”
Sa lagona e Brother Bushman o le nofo ai i se lio na faia ai se eseesega. “Ou te fiafia i ai,” o lana tala lea. “E na te suia le natura o le talanoaga. E na te suia faamoemoega o tagata. Ia e tele atu isi fefaasoaiga. Nai lo le toalua pe toatolu alii e masani ona taliina le fesili, e fefaasoaai mai ni tagata fou.”
Ina ua muai faalogo Rebecca Siebach, o se tamaitai o le Aualofa, e uiga i le taulaiga fou i aufono, sa vave ona ia mafaufau i uo sa le toe toaaga mai. “Sa ou iloa a latou atugaluga,” o lana tala lea. “Sa latou faasoa mai ia te au e uiga i o latou atugaluga e o mai i le lotu, ma sa ou mafaufau, o le avanoa silisili lenei e aapa atu ai ia i latou ma fai atu, ‘Matou te manaomia outou i la matou aufono! Faamolemole, o mai ma faasoa mai!’”
“Ina ua ou talanoa atu mulimuli ane i se aluga o se fonotaga faaleaufono,” o le tala lea a LonaMarie Cook, o se fesoasoani i se au peresitene o le Aualofa, “sa maoae le i ai o ni tagata e lagolagoina le mea sa ou mafaufau i ai ma avea o se vaega o lena vaega.”
Mauaina ma Galue i le Musumusuga
“Matou te fatuina se siosiomaga mo le Agaga e aoao mai ma mo i matou ina ia faalogo ma lagona,” na saunoa ai Epikopo Roberts. “Ona avea lea o le Agaga ma faiaoga, e tau mai ia i tatou mea tatou te manaomia ona fai i o tatou olaga patino, aiga, ma valaauga. O mea tatou te faia o se taunuuga o na musumusuga o mea ia e taitai atu i le liua moni ma le auaunaga.”
Na saunoa mai Susan Farr, o se peresitene o le Aualofa, “E uunaia i tatou e lenei auala ina ia tutu i luga ma fai, e le tau lava o le aluese mai le lesona ma mafaufau ‘e musuia lena [lesona],’ ona vave lea ona galo. E fesoasoani le fefautuaai faatasi ia i tatou e vaai ai o le aoaoina ma le faatinoga e faatatau ia i tatou uma lava—e le na o le faiaoga.”
“A o tatou faamaumauina a tatou lagona ona galulue ai lea e faatatau i ai, ua tatou faatinoina se suiga o le loto ma avea ma auauna sili atu o le Alii,” o le tala a Susan Mitchell, o se fesoasoani i se au peresitene a le Aualofa.
“O le iloaina o oe e tali atu mo se mea ma o le a fesili atu se tasi ia te oe pe o a ni ou lagona,” sa fai mai ai Sister Smith, “e avea oe o se tagata auai ola i le fausia o lau molimau.”
Na saunoa mai Landen Roundy, o se taitai o le vaega o faitaulaga sili, o le imeli atu o faamatalaga o mea na talanoaina ma fuafuaina “e fesoasoani lea i tagata e iloaina aafiaga ua latou mauaina i le aluga o le vaiaso atonu latou te mananao e faasoa mai i le Aso Sa e sosoo ai.”
“Mai i na faamatalaga,” na faaopoopo mai ai Epikopo Roberts, “Ua ou vaaia se agaga o le faasoaina ma le aoaoina pea i le vaiaso atoa a o talanoaina e le usoga manatu ma lagona faaopoopo e ala i imeli, e faamalosia ai la latou korama.”
“E finagalo le Alii ia tatou liliu atu o tatou loto i le tasi ma le isi ma e mafai ona faia lena mea pe a tatou feiloai faatasi ai ma se faamoemoega,” na faaiu ai Sister Siebach. “E fesoasoani lenei mataupu aoaoina fou ia i tatou e faailoa autu e fiafia ai, seti ni sini, tagai i le punavai sao mo tali, maua faaaliga faaletagata lava ia, ma ia aoaoina e le tasi ma le isi a o tatou liliu atu i perofeta soifua mo tali tatou te manaomia i o tatou aso.”