Vaaiga Puupuu i totonu o se Fonotaga a le Aufono
O le taeao o le Aso Sa, ma o loo nonofo tamaitai e 45 o le Uarota a Bugambilias i Guadalajara, Mekisiko, i se fonotaga. I le mavae ai o le viiga amata, ua valaaulia e le peresitene o le Aualofa Yara Ramirez nisi o i latou e faasoa mai ni aafiaga mai lo latou lesona i le vaiaso na muamua atu.
I le maea ai o le faasoaina e uso o a latou aafiaga mo ni nai minute, e tusi e Sister Ramirez se upu e tasi i luga o le laupapa a o lei nofo i lalo i le lio [o le usoga].
E faapea “Lotogatasi,”.
I lalo o le taitaiga a Sister Ramirez, latou te susue i le Mosaea 18:21 ma faitau, “… ua fili faatasi o latou loto i le lotogatasi ma le alofa o le tasi i le isi.”
“O a mea e mafai ona faia e i tatou o se Aualofa e faatino ai lenei mau?” ua ia fesili ai.
Ua mafaufau tamaitai mo ni nai minute. “Ia, e le mafai e le autalavou ona o i le malumalu,” ua faasoa mai ai se tasi o tamaitai. “E le lava tamaitai matutua e o atu mai i latou.”
“E leai sou manatu,” o le tala lea a se isi tamaitai, ma le tei. “Afai e te le iloaina o loo i ai se manaoga,” na ia fesili ai, “e mafai faapefea ona e fesoasoani?”
“O le mafuaaga lena ua tatou i ai iinei,” na tali atu ai Sister Ramirez. “O loo i ai manaoga faapea ou te aoao e uiga i ai i aufono a uarota lea e mafai ona tatou fesoasoani ai.”
“Aisea tatou te le faia ai se kalena?” ua fautua mai ai se tasi. Ua amata nei ona fia auai le vaega. “Ou te manatu e i ai se faatulagaga a le autalavou i le malumalu e tasi le Aso Tofi i le masina.”
“E faigata ona ou alu au lava ia i le malumalu,” ua tautino mai ai se tina talavou i le vaega. “Ou te lei toe oo iina i se taimi umi, ma ou te lagona lou manatu mo au lava. Ou te fiafia e alu atu ma auauna atu,” o lana tala lea.
Ua ioeina e nisi o tamaitai. Latou te maua foi le faigata ona auai soo e pei ona latou mananao ai.
Ua fautua mai se isi tina talavou, e latou te feauauai e tausi tama i le tasi ma le isi ma feauauai e o i le malumalu.
Ona, amata lea ona fesili tamaitai i le tasi ma le isi i nofoaga latou te nonofo ai ma o ai e nofo i autafa o le autalavou. Latou te talanoaina pe faapefea ona latou feauauai e fesoasoani i le autalavou ia o i lo latou gaoioiga.
“Ia, e tatau ona tatou faamasani foi i le tasi ma le isi,” o le tala lea a se tasi. “E tatau ona tatou faia ni gaoioiga!”
E faaauau ona talanoa mai tamaitai, e ofo mai fautuaga ma faia ni fesili.
I le faaiuga o le fono, e fai atu Sister Ramirez i lana failautusi e aotele mai minute. “O a uma ni tou lagona i le taimi o le fonotaga?” na ia fesili ai.
Latou te tali mai latou te lagona le nofouta atili i manaoga o tagata uma, o lo latou auaunaga sa manaomia, ma sa latou i ai ma ni uo.
“E faalagolago i mea na tatou aafia ai i le aso, o a ni faatinoga faapitoa tatou te mananao e taulai i ai i lenei masina o se Aualofa?” ua ia fesili ai.
O se vaega, sa latou filifili e faia se taumafataga o soo se meaai e aumai e le tagata i lena Aso Sa i le maea ai o le lotu, amata taaalo voli i po o Aso Tofi, faia se kalena mo le auai i le malumalu, ma fuafua pe faapefea ona o atu le autalavou i gaoioiga.
“Ua matou lagonaina le lotogatasi i lenei aso,” ua faaiu ai Sister Ramirez, ma valaaulia tamaitai taitasi e mafaufau i ni auala e mafai ai e ia ona auauna atu i le aluga o le vaiaso. “O le faaauau pea ona tuuina mai e le Agaga Paia o musumusuga ia i tatou a o tatou galulue ai taitoatasi ma o se Aualofa. Ou te valaaulia outou ina ia saunia e faasoa mai a outou aafiaga i le Aso Sa e sosoo ai.”