Ia Atoatoa Ona Lelei o La Outou Amio—I Le Iuga

Saunia e Elder Jeffrey R. Holland

O Le Korama a Aposetolo e Toasefululua

Afai tatou te tutumau, ona i ai lea o se mea i le faavavau o le a faamaea ai ma faaatoatoa ai lo tatou faaleleiga.

Na tusia tusitusiga paia ina ia faamanuia ma faamalosiau ai i tatou, ma e mautinoa lava lo latou faia o lena mea. Tatou te faafetai i le lagi mo mataupu ma fuaiupu uma ua tuuina mai ia i tatou. Ae pe o e matauina mai lea taimi i lea taimi o le a oso mai lava se fuaitau e faamanatu mai ai ia i tatou o loo fai lava si o tatou le ‘a’u’a’u? Mo se faataitaiga, o le Lauga i luga o le Mauga e amata i faaamuia malu ma agavaivai, ae i fuaiupu e sosoo ai, ua ta’u mai ai ia i tatou—faatasi ai ma isi mea—e le gata e aua le fasioti tagata ae faapena foi le aua ne’i ita. Ua ta’u mai ia i tatou e le gata e aua le mulilua ae faapena foi le aua ne’i i ai ni mafaufauga le mama. Mo i latou e ole mai, e ao ona tatou avatu i ai lo tatou pulupulu ona toe avatu foi lea i ai ma le ofutalaloa. E ao ona tatou alolofa i o tatou fili, faamanuia atu ia i latou e fetuu mai, ma ia agalelei atu ia i latou o e inoino mai.¹

Afai o lau suesuega lena o tusitusiga paia i le taeao, ma a uma ona faitau ma na o le pau lea ma ua e mautinoa lava e te le maua ni togi lelei i lau lipoti o le talalelei, o le poloaiga mulimuli la i le filifili ua mautinoa lava le faamaea ai o le galuega: “O lenei ia atoatoa ona lelei o la outou amio, e pei o lo outou Tama … o i le lagi e atoatoa ona lelei o ia.”² I lena poloaiga tomuli, tatou te toe fia foi ai i le moega ma toe pulou le ieafu. O ia sini faaselesitila e foliga mai tatou te le gafatiaina. Ae mautinoa lava e le aumaia lava e le Alii ia i tatou se poloaiga Na te silafia e le mafai ona tatou tausiaina. Ia se’i o tatou vaai po o fea e ave i ai tatou e lenei faafitauli fenumiai.

I le Ekalesia atoa ou te faalogo pea i le toatele o loo tauivi ma lenei faafitauli: “E le lava so’u agavaa.” “Ou te le taitai oo i ai.” “O le a ou le gafataulimaina lava.” Ou te faalogo i nei tala mai le autalavou. Ou te faalogo i ai mai faifeautalai. Ou te faalogo i ai mai tagata fou liliu mai. Ou te faalogo i ai i tagata ua leva ona lolotu. Na matauina e se tasi o tagata malamalama o le Au Paia o Aso e Gata Ai, o Sister Darla Isackson, ua mafai e Satani ona faia ia feagaiga ma poloaiga ia foliga o ni mala ma tausalaga. Mo nisi ua ia liliua ia mataupu ma musumusuga o le talalelei e ita ai le tagata ia te ia lava ma mafua ai ona faanoanoa.³

O le mea lea ua ou fai atu ai nei e leai ma se mea e teena ai pe ta’uleagaina ai soo se poloaiga ua aumai e le Atua ia i tatou. Ou te talitonu i Lona atoatoa, ma ou te iloa o i tatou o Ona atalii ma afafine faaleagaga o loo i ai le gafatia faalelagi e avea ai e faapei o Ia. Ou te iloa foi, i le avea ai ma fanau a le Atua, e le tatau ona tatou faalumaina ma fai upu malolosi ia i tatou lava, e peisea’i a tatou faasalaina i tatou lava o le a avea ai i tatou ma tagata e finagalo le Atua e avea ai i tatou. Leai! Faatasi ai ma se naunautaiga e salamo ma se manao mo le amiotonu faateleina i o tatou loto, ou te faamoemoe o le a tatou sailia le faaleleiga faaletagata lava ia i se ala e le aofia ai le maua ai i le gasegase o le ‘asa po o le le fia tausami, lagonaina o le ātu po o le faaleagaina o lo tatou naunautaiga. E le o le mea lena e finagalo ai le Alii mo fanau Peraimeri po o soo se tasi lava e usuina ma le faamaoni le pese, “O loo ou taumafai ia pei o Iesu.”⁴

Ina ia tuu atu lenei mataupu i le loloto, ou te faamanatu atu ia i tatou uma o loo tatou ola i se lalolagi pa’ū ma o le taimi nei o i tatou o ni tagata pa’ūū. O loo tatou i ai i le malo telesitila; sipelaina i le t,ae le o le s. E pei ona aoao mai Peresitene Russell M. Nelson, o iinei i le olaga faaletino o loo “faatalitali” ai pea le atoatoa.⁵

O lea ou te talitonu ai e lei fuafuaina e Iesu Lana lauga i lenei mataupu e avea o se samala tautala mo le sasaina o i tatou e uiga i o tatou vaivaiga. Leai, ou te talitonu na Ia fuafuaina e avea o se saafiafiga i le Atua ma po o ai le Atua le Tama e Faavavau ma le mea e mafai ona tatou ausia faatasi ma Ia i le faavavau. I soo se tulaga, ou te faafetai i le iloaina e ui lava i o’u vaivaiga, pau le mea ou te iloa e atoatoa le Atua—pau le mea ou te iloa, mo se faataitaiga, e mafai ona Ia alofa atu i Ona fili, aua e tele lava, ona o le“tagata natura”⁶ o i totonu o i tatou, o nisi taimi o oe ma a’u o lena fili. Ou te faafetai tele lava ona e mafai e le Atua ona faamanuia i latou e tuua’ifua o Ia ona o i tatou uma, e aunoa ma le manao po o le faamoemoe e faia lena mea, tatou te tuua’ifua ai o Ia i nisi taimi. Ou te faafetai ona e alofa mutimutivale le Atua ma o se faatupufilemu aua ou te manaomiaina le alofa mutimutivale ma e manaomia foi e le lalolagi le filemu. Ioe, o mea uma tatou te talanoa ai e uiga i le mama o le Tama tatou te talanoa ai foi e uiga i Lona Alo e Toatasi na Fanaua, o le sa soifua ma maliu i le atoatoa lava e tasi.

Ua uunaia a’u e fai atu o le taulai atu i mea e ausiaina e le Tama ma le Alo nai lo o tatou toilalo tatou te le maua ai se aunese se tasi o le faamaoniga mo olaga le puleaina po o le lafoaia ese o o tatou tulaga faatonuina. Leai, mai lava le amataga o le talalelei e mo le “faaatoatoaina ai [o] le au paia, … seia tatou oo atu … ma fai ma tagata matua, ia oo i le fua o le ua matua, e tatau ma le tumu o Keriso.”⁷ Ua na ona ou fautuaina atu o nisi taimi o le faamoemoega autu o se mau po o se poloaiga atonu o le faamanatu mai lea ia i tatou o le matagofie moni lava “o le matua e tusa ma le tumu o Keriso”⁸ e uunaia ai i o tatou loto se alofa tele atu ma le faamemelo mo Ia ma se manao sili atu ia avea e faapei o Ia.

“Ioe, o mai ia ia Keriso, ma faaatoatoaina ia te ia … ,” o loo aioi mai ai Moronae. “Alolofa i le Atua ma o outou manatu atoa, mafaufau, ma le malosi atoa, ona … o lona alofa tunoa e mafai ai ona outou atoatoa ia Keriso.”⁹ Pau le tatou faamoemoega mo le atoatoa moni o le taliaina lea e avea ma se meaalofa mai le lagi—e le mafai ona tatou “mauaina”. O le mea lea, ua ofo mai ai ia i tatou e le alofa tunoa o Keriso e le gata o le faaolataga mai le faanoanoa ma le agasala ma le oti ae o le faaolataga mai a tatou lava faitioga faifai pea.

Se’i o’u faaaogaina se tasi o faataoto a le Faaola e faamatala ai lenei mea i sina auala e ese teisi ai. Sa nofoaitalafu se auauna i lona tupu i le aofaiga e 10,000 taleni. I le faalogo atu i le aioi mai o le auauna mo le onosai ma le alofa mutimutivale, “ona mutimutivale ai lea o le alofa o le alii o lea auauna, ma … faamagalo … le aitalafu.” Ae o lena lava auauna sa lei faamagalo atu i se uso a auauna na aitalafu ia te ia i tenari e selau. I le faalogo atu i lenei mea, sa alaga atu ai le tupu i le na ia faamagaloina, “E le tatau ea ona e alofa atu i lou uso a auauna e pei o a’u foi na ou alofa atu ia te oe?”¹⁰

O loo i ai sina eseesega o manatu i le au atamamai e faatatau i le tau o le tupe o loo ta’ua i i—ma ia faamagalo le vaega e faasino i mea tautupe a le I.S.—ae i le faafaigofieina o le matematika, afai o le aitalafu laitiiti sa lei faamagaloina e 100 taleni, po o le $100 i le tatou tupe i le taimi nei, o lona uiga o le aitalafu 10,000 taleni sa faamagalo fua e tai latalata atu i le $1 piliona—pe sili atu!

I le avea ai ma se aitalafu patino, o se numera tele naua lena—tatou te matua le malamalama lava i ai. (E leai se tasi e faia se faatau tele faapena!) Ae, mo faamoemoega o lenei faataoto, e tatau ona le malamalama i ai; e tatau ona sili atu ma lo tatou gafatia e malamalama i ai, le faia o se tala e sili atu ma lo tatou gafatia e totogiina. O le mafuaaga ona e le o se tala lenei e faatatau i ni auauna se toalua na fefinauai i le Feagaiga Fou. O se tala e faatatau ia i tatou, o le aiga pa’ū o le tagata—o tagata aitalafu faaletino, solitulafono, ma o pagota uma. O i tatou uma o ni tagata aitalafu, ma o le i’uga o le faafalepuipuiina o i tatou uma taitoatasi. O iina o le a tatou tumau ai pe a na le seanoa le alofa tunoa o lo tatou Tupu lea na faasaolotoina ai i tatou ona e alofa o Ia ia i tatou ma o loo “liuliu mai [lona] loto o le agaalofa ia te i [tatou].”¹¹

O loo faaaogaina e Iesu se fuataga e faigata ona malamalama i ai i i ona o Lana Togiola o se meaalofa e faigata ona malamalama i ai na faia i se tau e faigata ona malamalama i ai. O lena mea, e foliga mai ia te au, o se vaega o le uiga i tua atu o le poloaiga a Iesu ia atoatoa. Atonu o le a le mafai ona tatou faataitaia ia taleni e 10,000 o le faaatoatoaga ua ausia e le Tama ma le Alo, ae e le o se mea tele mo i Laua le fai mai ia i tatou ina ia tatou avea atili faapei o se atua i mea iti, ia tatou tautatala ma amio ai, alofa ma faamagalo atu, salamo ma faalelei aemaise ai i le tulaga e 100 sene o le faaatoatoaga, lea e manino lava e i totonu o lo tatou gafatia e faia ai.

Ou uso e ma tuafafine, vagana ai Iesu, e leai lava ni faatinoga atoatoa i luga o lenei faigamalaga faalelalolagi o loo tatou i ai, a o i ai la iinei i le olaga faaletino ia tatou tauivi mo le agai i luma tumau ae le o le faananau i le mea ua ta’ua e saienitisi o amioga o “faananauga le lelei o le faafia atoatoa.”¹² E tatau ona tatou aloese mai lena faamoemoega faaiu o i tatou lava, o isi, ma ou te fia faaopoopo atu, o i latou o e ua valaauina e auauna atu i le Ekalesia—lea mo le Au Paia o Aso e Gata Ai o lona uiga o tagata uma, aua ua valaauina i tatou e auauna atu i se mea.

I lena tulaga, sa tusia ai e Leo Tolstoy se tala e uiga i se faifeau sa faitioina e se tasi o lana aulotu mo le le ola ai e pei ona sa ia tatau ai, o le faitioga sa faaiuina faapea o mataupu faavae ia sa aoaoina e le failauga faaletonuga sa faapena foi ona pepelo ma e le tatau ona talitonuina.

I se tali atu i lena faitioga, sa fai atu le faifeau: “Tagai i lo’u olaga i le taimi nei e faatusatusa i lo’u olaga sa i ai muamua. O le a e iloaina sa ou taumafai lava e ola i le upumoni o loo ou folafolaina atu.” O le le mafai ai ona ola e tusa ma mataupu maualuluga na ia aoaoina, na tautino ai e le faifeau ua ia toilalo. Ae sa tagi o ia:

“Osofai a’u, [pe afai e te manao ai,] ua ou faia lea mea ia te a’u lava ia, ae [aua] le osofaia … le ala o ou mulimuli ai. … Afai ou te iloa le auala i le fale [ae] o loo ou savali onā ai, pe ua le avea ai ea ma ala sa’o ona o loo ou tautevateva solo ai mai le isi itu i le isi itu?

“… Aua ne’i alalaga fiafia atu, ‘Vaai atu ia ia te ia! … Lale ua [tolotolo] atu i totonu o le lopala!’ Leai, aua ne’i fiafia, ae tuu mai … la outou fesoasoani [i soo se taumafaiga e savalia ai le auala e toefoi atu ai i le Atua.]”¹³

Uso e ma tuafafine, o i tatou uma lava o loo saili atu i se olaga sili FaaKeriso nai lo le faamanuiaina masani i le olaga. Afai tatou te tautino atu lena faamaoni ma taumafai ia faaleleia, e le o i tatou la o ni tagata pepelo; o tatou o tagata soifua. Tau ina ia tatou mumusu e tuu atu i o tatou lava tulaga faavasivasi faaletino, ma faaletonu le maalofia o alii ma tamaitai lelei o siomiaina i tatou, ma faamasalosaloina i tatou e uiga i upumoni o le talalelei, o le moni o le Ekalesia, o lo tatou faamoemoe mo lo tatou lumanai, po o le mafai ona i ai le amioatua moni. Afai tatou te tutumau, ona i ai lea o se mea i le faavavau o le a faamaea ai ma faaatoatoa ai—o le faauigaga lea o le Feagaiga Fou o le atoatoaga.¹⁴

Ou te molimau atu i lena taunuuga sili, lea ua faaavanoa mai ia i tatou e le Togiola a le Alii o Iesu Keriso, o Ia lava e faaauau pea “mai le alofa tunoa i le alofa tunoa”¹⁵ seia oo i Lona tino ola pea¹⁶ sa Ia maua ai le atoatoaga o le mamalu selesitila.¹⁷ Ou te molimau atu i lenei itula ma itula uma, faatasi ai ma ona aao ua ma’ila i fao, o loo Ia faaloaloa mai pea ia i tatou i lea lava alofa tunoa e tasi, ma uumauina ma faamalosiau mai ia i tatou, musu e tuu i tatou e o seia tatou taunuu saogalemu ai i le aiga i le opomau a o tatou Matua e Faavavau. Mo sea taimi atoatoa, e faaauau pea ona ou tauivi, po o le a lava le le mautonu. Mo sea meaalofa atoatoa, e faaauau pea ona ou faafetai, po o le a lava le le lelei. Ou te faia ai i le igoa lava o le Atoatoaga lava ia, o Ia o le sa lei le mautonu lava pe sa le’i le lelei lava ae e alofa ia i tatou uma, le Alii o Iesu Keriso, amene.