Mea na Faamamafa Mai mai le Konafesi Aoao Faaleafatausaga Lona 187
Faamanuia le Atua,
i le perofeta soifua,
Ia fiafia.
O ana upu foi,
Tatou te manuia ai;
Ia filifili nei,
I mea lelei.
(“Faamanuia le Atua i le Perofeta Soifua,” Viiga, nu. 9, na usuina i le sauniga o le taeao o le Aso Toonai)
Mo le silia ma le 50 tausaga, ua avea ia tala patino faamomoiloto a Peresitene Thomas S. Monson ma le molimau mamana ia Iesu Keriso ma se vaega o le konafesi aoao. Ae ona o le faaletonu o le soifua maloloina, sa matauina ai le le auai uma o Peresitene Monson ma Elder Rober D. Hales o le Korama a le Toasefululua i le konafesi.
E le’i auai, ae sa le’i faaagaloina.
E ui na maimoa mai Peresitene Monson mai lona aiga ma maliu filemu Elder Hales i le falema’i a’o lei amataina le sauniga mulimuli, e le gata sa i ai uma i la’ua i o tatou mafaufau a’o tatou tatalo mo i laua, ae na manino foi lo la’ua faatosinaga i le faagasologa o saunoaga.
Na silia ma le toasefululua failauga na ta’ua Peresitene Monson, e aofia ai Peresitene Russell M. Nelson (tagai i le itulau e 60), o le na faapitoa lava le ta’uaina o le valaaulia a Peresitene Monson i le konafesi talu ai “ina ia suesue ma le agaga tatalo ma mafaufau loloto i le Tusi a Mamona i aso taitasi.”1
O Elder Neil L. Andersen, o le failauga faaiu (tagai i le itulau e 122), na faasoa mai ni faamatalaga lea na saunia e Elder Hales mo le konafesi peitai ua le mafai ona tuuina mai: “Pe a tatou fiilifili e faatuatua, ua tatou saunia e tutu i luma o le Atua,” na tusia a Elder Hales. E moni lava, na filifili e Elder Hales le faatuatua.
E le’i auai, ae sa matuai le’i auai, o Peresitene Monson ma Elder Hales sa le’i i ai i le pulelaa, ae sa la faia se vaega taua i le avea o le konafesi ma vaega anoa i le toatele.
Le perofeta pele e, ia talosia,
Le Atua faamanuia ia e fiafia.
A’o solo le matua o lou soifua
Ia sulu pea le malamalama;
Ia sulu pea le malamalama.
(“Le Perofeta Pele e,” Viiga, nu. 11, usuina i le sauniga aoao a le au perisitua)