Tumau i le Atua ma Faaleleia le Va
Saunia e Neill F. Marriott
Fesoasoani Lua i le Au Peresitene Aoao o Tamaitai Talavou
O loo ia Keriso le mana e aumaia ai i tatou i se faa’aumeaga alofa ma le Tama ma faapea foi le tasi ma le isi.
E manaomia ona tatou faalolotoina atili lo tatou malamalama ma le usiusitai i le Tama Faalelagi. O lo tatou sootaga ma Ia e faavavau. O i tatou o Ana fanau faapelepeleina, ma o le a le suia lava lena mea. E faapefea ona tatou taliaina ma le loto atoa Lana valaaulia e faalatalata atu ia te Ia ma tatou olioli ai i faamanuiaga ua Ia naunau e tuuina mai ia te i tatou i lenei olaga ma i le olaga a sau?
Na fetalai atu le Alii ia Isaraelu anamua ma ua Ia fetalai mai foi ia te i tatou, “Ioe, o le alofa e faavavau ua ou alofa atu ai ia te oe: o le mea lea ua ou faafualoaina ai lo’u alofa ia te oe.”1 I le talanoa atu e pei o le a faia e le Tama, ua fetalai mai foi le Tama ia te i tatou, “O le a mau oe ia te au, ma a’u ia te oe; o le a savali faatasi ma a’u.”2 O lava lo tatou faatuatuaina o Ia e tumau ai ia te Ia ma savavali ai faatasi ma Ia?
Ua tatou i ai iinei i le lalolagi ia aoao ma tuputupu a’e, ma o le aoaoina ma le tuputupu ae aupito taua o le a maua mai lo tatou sootaga ma le Tama Faalelagi ma Iesu Keriso. Mai la tatou sootaga faamaoni ma i La’ua, e maua ai le poto faaleatua, alofa, mana, ma le gafatia e auauna atu ai.
“O lo tatou tiute o le aoao o mea uma ua faaalia mai e le Atua e uiga ia te ia lava.”3 E tatau ona tatou malamalama o le Atua le Tama na faatautaia Lona Alo o Iesu Keriso, e foafoa le lalolagi mo lo tatou tuputupu ae, na ofoina mai e le Tama Faalelagi Lona Alo e totogi ai le tau o le faamasinoga tonu mo lo tatou faaolataga, ma o le mana o le perisitua a le Tama ma le Ekalesia moni a le Alo faatasi ai ma sauniga e tatau ai, na toefuatai mai mo o tatou faamanuiaga. Pe o e lagonaina le loloto o le alofa ua i ai i tafa uma o a La tapenapenaga mo lo tatou olioli ma le tupututpu a’e? E tatau ona tatou iloa o le fuafuaga a le Tama Faalelagi mo le faaolataga o le, ia tatou usiusitai i tulafono ma sauniga o le talalelei ma maua le ola e faavavau ma avea ai e pei ona i ai nei le Atua.4 O le fiafia moni lea ma le tumau ua ofoina mai e le Tama Faalelagi ia te i tatou. Ma e leai lava se isi fiafia moni ma le tumau.
E mafai e o tatou luitau ona tosoeseina i tatou mai le ala o le fiafia. E mafai ona le maua la tatou sootaga faatuatuaina ma le Atua pe afai e tata’i e tofotofoga i tatou i mea faalavefau nai lo le tatou lotomaualalo ma tootutuli e tatalo.
Ua augani mai lenei fatuga faigofie e iloilo mea tatou te faamuamua:
O nisi mea e taua; a o nisi e leai.
E i ai nai mea e tumau, ae o le tele lava e le au.5
Uso e, o a mea e taua ia te outou? O a mea e tumau ia te outou? O se mea e taua faavavau i le Tama o le, ia tatou aoao ia te Ia, faalotomaualalo i tatou lava, ma ola i le usiusitai ia te Ia i aafiaga i le olaga nei. E finagalo o Ia ia suia lo tatou manatu faapito i le auauna atu ma lo tatou fefefe i le faatuatua. O nei mea taua tumau, e mafai ona aupito faigata le tofotofoina ai o i tatou.
O le taimi nei, faatasi ma mutaaga o lo tatou malosi faaletino, o loo poloai mai ai le Tama ia tatou alolofa i le taimi ua matua faigata ai ona alofa, e auauna atu i le taimi ua faigata ai, ia faamagalo atu i le taimi tatou te le o mautinoa ai pe tatou te mafaia. E faapefea? O le a faapefea ona tatou faia? Tatou te aapa atu ma le lotonaunau mo le fesoasoani a le Tama Faalelagi, i le suafa o Lona Alo, ma faia mea i Lana ala nai lo lo tatou faia ma le faasausili o o tatou lava loto.
Sa ou iloa lo’u faamaualuga ina ua saunoa Peresitene Ezra Taft Benson e uiga i le faamamaina o totonu o le ipu.6 Sa ou manatu ifo o a’u o se sioki. E faapefea ona ou sasaa esea toega o le faamaualuga mai la’u sioki? O le fai faamalosi o i tatou lava ia ia lotomaualalo ma taumafai e uunai i tatou ia alolofa faafoliga i isi, e ‘o’o, ma e le aoga. O a tatou agasala ma le faamaualuga e fatuina ai se va—po o se ava—i lo tatou va ma le punavai o le alofa uma, o lo tatou Tama Faalelagi lea.
Ua na o le Togiola a le Faaola e mafai ona faamama ai i tatou ma a tatou agasala ma punitia ai le va.
Tatou te mananao ia si’omia i tatou i aao o le alofa ma le taitaiga a lo tatou Tama Faalelagi, ma o lea tatou te faamuamua ai Lona finagalo ma faatasi ai ma se loto nutimomoia o loo ole atu ia liligi mai e Keriso au o le vai faamama i a tatou sioki. I le taimi muamua atonu e toulu mai i mataua, ae a o tatou saili, ole atu, ma usiusitai, o le a liligi tele mai. O le a amata ona faatumuina i tatou i lea vai ola, ma taumasuasua ai i Lona alofa, ona mafai lea ona faasipa le sioki o o tatou agaga ma faasoa atu ona ‘anomea i isi o e o galala mo le faamalologa, faamoemoe, ma le fia taulia. A oo ina mama totonu o a tatou ipu, ona amata lea ona maloloina a tatou sootaga i le olaga nei.
O le taulagaina o o tatou lava naunauga e moomia ina ia maua ai se avanoa mo fuafuaga faavavau a le Atua. O le Faaola, o le o avea ma fofoga taumomoli o le Tama, ua aioi mai o Ia ia i tatou e “faalatalata mai ia te au ma o le a Ou faalatalata atu ia te outou.”7 O le faalatalata atu i le Atua e mafai ona faauigaina ia aoao Ana upumoni mai tusitusiga paia, mai le mulimuli i fautuaga faaperofeta, ma le taumafai e fai atoatoa atili Lona finagalo.
Pe o tatou malamalama o loo ia Keriso le mana e aumaia ai i tatou i se faa’aumeaga alofa ma le Tama ma faapea foi le tasi ma le isi? O Ia, e ala i le mana o le Agaga Paia, e mafai ona tuuina mai ia te i tatou le malamalamaaga moomia i sootaga.
Sa ta’u mai ia te au e se faiaoga o le Aoga Sa se aafiaga mamana ma lana vasega o tamaiti e 11-tausaga. O se tasi o i latou o le a ou faaigoaina ia Simi, o se tamaitiiti e le faalogo ma sa faaesea. I se tasi Aso Sa, sa musuia ai le faiaoga e tuuese lana lesona ae ta’u atu le mafuaaga e alofa ai ia Simi. Sa talanoa o ia i lona lotofaafetai ma lona talitonuga i lenei alii talavou. Ona fesili lea o le faiaoga i le vasega e ta’u atu ia Simi se mea latou te talisapaia ai o ia. A o taitasi le vasega ma ta’u atu ia Simi le mea e ala ai ona faapitoa o ia ia i latou, sa faagaugau ifo le ulu o le tamaitiiti ua amata ona tafe ifo loimata i ona foliga. Sa fauina e lenei faiaoga ma le vasega se alalaupapa i le loto tuuatoatasi o Simi. O sina alofa faigofie, sa ta’u atu ma le lotofaamaoni, ua avatu ai le faamoemoe ma le taua i isi. Ou te faaigoaina lea mea o le “faaleleia o le va.”
Masalo o lo tatou olaga i se lalolagi i le muai olaga, atonu, na faavae ai lo tatou naunautai mo le alofa moni, tumau i lenei lalolagi. Ua mamanuina faalelagi i tatou e tuuina atu le alofa ma ia alofagia, ma e oo mai le alofa aupito loloto pe a tatou tasi ma le Atua. Ua valaaulia i tatou e le Tusi a Mamona “ia tatou faalelei ma le [Atua] e ala i le togiola a Keriso.”8
Na tautala Isaia e uiga ia i latou o e ola faamaoni i le tulafono o le anapogi ma avea ai i latou o le ati ae i solo mo a latou lava fanau. O i latou ia o e, ua folafola mai Isaia, o le a “ati ae mea na faatafunaina.”9 I se ala faapena, sa atiae ai e le Faaola solo i le va, po o le mamao o le tatou va, o i tatou ma le Tama Faalelagi. O Ia, e ala i Lana taulaga tele o le togiola, ua tatala ai le ala mo i tatou e maua ai le mana alofa o le Atua, ma mafai ai lea ona tatou ati ae ai “mea ua faatafunaina” i o tatou lava olaga patino. O le faamaloloina o le va faalelagona i le va o le tasi ma le isi, o le a moomia ai lo tatou taliaina o le alofa o le Tama faatasi ai ma se ositaulagaina o o tatou faamoemoega faapito’au masani ma manatu atuatuvale.
I se tasi po e le galo, sa ma feeseesea’i ai ma se tasi ma te aiga, e uiga i se mataupu faaupufai. Sa vave ona ia faitioina ma tuu mai ana lafoga i o’u manatu, ma fai mai e sese o’u manatu a o lologo o matou aiga. Sa pei a’u o se vale ua le maumanatu—ma atonu a e sa’o. Sa ou tootuli e tatalo i lena po, sa vave ona ou faamatala atu i le Tama Faalelagi le faigata o lenei tagata o lo’u aiga! Sa faaauau ona ou talanoa. Atonu sa ou malolo mai lo’u faitio ma sa maua e le Agaga Paia se avanoa e faagauai atu ai au, aua, i lo’u ofo tele, sa sosoo ma lo’u faalogoina o au lava o faapea atu, “Atonu e te finagalo ou te alofa ia te ia.” Alofa ia te ia? Sa ou toe tatalo, ma faapea atu, “E mafai faapefea ona ou alofa ia te ia? Ou te manatu ou te le manao foi ia te ia. E malo lo’u loto; ma ua tiga o’u lagona. E le mafai ona ou faia.”
Ona oo lea, e moni lava, faatasi ai ma le fesoasoani mai o le Agaga, sa ou maua se mafaufauga fou a o ou fai atu, “Ae e alofa Lau Afio ia te ia, Tama Faalelagi. Pe mafai lava ona aumai e Lau Afio ia te au se tufaaga o Lou alofa mo ia—ina ia mafai ai ona ou alofa foi ia te ia?” Sa faamaluluina o’u lagona tiga, sa amata ona suia lou loto, ma amata ona ou vaai i lenei tagata i se tulaga ese. Sa amata ona ou lagonaina lona taua moni na silafia e le Tama Faalelagi. Na tusia e Isaia, “E fusi e Ieova le gau o lona nuu, ma fofoina le manu’a e manunu’a ai i latou.”10
Na oo mai le taimi na punia fiafia ai le ava i lo ma va. Ae e ui ina sa ia le i taliaina lo’u loto ua suia, sa ou aoaoina o le a fesoasoani mai le Tama Faalelagi ia tatou alolofa atu e oo lava foi ia i latou tatou te ono manatu e le mafai ona alolofa i ai, pe afai tatou te ole atu mo Lana fesoasoani. O le Togiola a le Faaola o se ala lea o le tafe mai e le aunoa o le alofa mama mai le Tama o i le Lagi. E tatau ona tatou filifili e tumau i lena alofa ina ia maua ai le alofa mama mo tagata uma.
Pe a tatou tuu atu o tatou loto i le Tama ma le Alo, ua tatou suia le lalolagi—tusa lava pe le suia tulaga o loo siomia ai i tatou. Tatou te faalatalata atu i le Tama Faalelagi ma lagonaina ai Lona taliaina fiafia o a tatou taumafaiga e avea ma soo moni o Keriso. E faateleina lo tatou iloatino, mautinoa, ma le faatuatua.
Ua ta’u mai e Mamona ia tatou tatalo ma le malosi uma o le loto mo lenei alofa, ma o le a faaee mai i o tatou luga mai lona faapogai—o le Tama Faalelagi.11 Ua na o iina e mafai ai ona avea i tatou o ni e fonoina le va o sootaga faaleolaga nei.
O loo pa’i mai le alofa e le i’u o lo tatou Tama mo i tatou, ina ia toe aumaia i tatou i Lona mamalu ma le olioli. Na Ia ofoina mai Lona Alo Pele e Toatasi, o Iesu Keriso, e fonoina le ava o loo taatia mai i malae i lo tatou va ma Ia. O le toe faatasia ma le Tama o i le Lagi o le fatu lea o le alofa tumau ma faamoemoega e faavavau. E tatau ona tatou faia se sootaga ma Ia i le taimi nei e aoao ai pe o le a moni le mea e taua, ia alofa e faapei ona Ia alofa mai ma ia tuputupu ae ma ia faapei o Ia. Ou te molimau atu o lo tatou sootaga faamaoni ma le Tama Faalelagi ma le Faaola, e taua e faavavau ia te i La’ua ma i tatou. I le suafa, o Iesu Keriso, amene.