O Le Taua le Mafuatiaina

Saunia e Joy D. Jones

Peresitene Aoao o le Peraimeri

E mafai ona tatou olioli soo i musumusuga malu a le Agaga Paia o loo faamaoniaina le upumoni o lo tatou taua faaleagaga.

A o asiasi atu i le atunuu o Siera Leone i Aferika i Sisifo, sa ou auai ai i se fonotaga sa faatautaia e se taitai o le Peraimeri a le siteki. Sa taitai Mariama i le alofa, alofatunoa, ma le talitonuga ma sa faigofie ona manatu ua leva ona avea o ia ma tagata o le Ekalesia. Peitai, o Mariama o se tagata sa lei leva ona liliu mai.

Sa auai lona uso laitiiti i le Ekalesia ma valaaulia Mariama e auai i se vasega a le Ekalesia ma ia. Sa matua faagaeetia Mariama i le savali. O le lesona sa faatatau i le tulafono o le legavia. Sa ia talosaga ia o atu faifeautalai e aoao atili o ia ma sa lei pine ae maua sana molimau o le Perofeta o Iosefa Samita. Sa papatisoina o ia i le 2014, ma sa papatisoina lana tama teine i le masina ua tuanai. Mafaufau i aoaoga autu e lua na taitai atu i le liua o Mariama, o le tulafono o le legaviā ma le Perofeta o Iosefa Samita, o manatu ia e lua e tele ina vaai i ai le lalolagi o se mea e le fetaui, pasiā, pe le talafeagai. Ae sa molimau Mariama sa pei o ia o se pepe na tosina atu i le molī. Fai mai o ia, “Ina ua ou mauaina le talalelei, na ou mauaina au lava ia.” Sa ia iloaina lona taua e ala i mataupu faavae paia. O lona taua o se afafine o le Atua sa faaali atu ia te ia e ala i le Agaga Paia.

Ia sei o tatou feiloai atu nei i le auso Singh mai Initia. O Renu i le itu taumatau, o le uluai uso o le auso toalima na muamua auai i le Ekalesia, na faasoaina manatu nei:

“Ae ou te lei amata sailiili i le Ekalesia, ou te lei lagonaina moni o au o se tagata faapitoa. Sa na o a’u o se tasi o le toatele o tagata, ma sa lei aoaoina moni au e lo’u sosaiete ma le aganuu e i ai so’u taua faaletagata lava ia. Ina ua ou aoaoina le talalelei ma aoaoina e faapea o a’u o se afafine o lo tatou Tama Faalelagi, sa suia ai a’u. Sa faafuasei ona ou lagonaina le faapitoa—sa foafoa moni e le Atua a’u ma foafoaina lo’u agaga ma lo’u olaga ma se taua ma se faamoemoega.

“Ae ou te lei mauaina le talalelei i lo’u olaga, sa ou taumafai i taimi uma e faamaonia atu i isi o au o se tagata faapitoa. Ae ina ua ou iloaina le upumoni, o au o se afafine o le Atua, sa le toe moomia ona ou tau faamaonia atu se mea i soo se tasi. Na ou iloa e faapitoa lava au. … Aua lava ne’i manatu o oe o se meanoa.”

Sa sa’o atoatoa le saunoaga a Peresitene Thomas S. Monson ina ua ia siiina mai upu nei: “O le taua o se agaga o lona gafatia lea e avea ai ma Atua.”¹

Sa faamanuiaina talu ai nei a’u e feiloai i se isi tamaitai talavou e malamalama i lenei lava upumoni e tasi. O lona igoa o Taiana. Sa ma feiloai i le Falemai o Tamaiti Laiti i le Aai o Sate Leki. Sa i ai Taiana i le vasega amata o le a’oga maualuga ina ua maua i le kanesa. Sa tauivi o ia i se taua ma le lototoa mo le 18 masina ae lei maliu o ia i ni nai vaiaso talu ai. Sa tumu Taiana i le malamalama ma le alofa. Sa lauiloa o ia i lana ataata tele ma lana faailoga “lima matua uma e lua i luga.” A fesili isi, “Aisea ua tupu ai ia te oe Taiana?” o lana tali, “Aisea e le tatau ai ona tupu ia te au?” Sa saili Taiana e avea e faapei o lona Faaola, o le na ia matua alofa i ai. I a’u asiasiga, sa ou iloa ai sa malamalama Taiana i lona taua paia. I le iloaina o ia o se afafine o le Atua na ia maua ai le filemu ma le lototele e feagai ai ma ona tofotofoga lofituina i le ala lelei na ia faia ai.

Ua aoao mai e Mariama, Renu, ma Taiana i tatou e faapea o le a faamautu mai e le Agaga ia i tatou taitoatasi lo tatou taua paia. O le iloaina moni o oe o se afafine o le Atua o le a aafia ai vaega uma o lou olaga ma taiala oe i auaunaga e te tuuina atu i aso taitasi. Sa faamalamalama mai e Peresitene Spencer W. Kimball i upu mamalu nei:

“O le Atua o lou Tama. E alofa o Ia ia te oe. E matua le mafuatiaina le faatauaina o oe e Ia ma lou tina i le lagi. … E tulagaese oe. O se ituaiga e tasi, ua foafoa i le atamai e faavavau lea ua e maua ai le tofi i le ola e faavavau.

“Ia leai lava se fesiligiaina e lou mafaufau o lou taua o se tagata patino. O le faamoemoega atoa lava o le fuafuaga o le talalelei o le mauaina lea o se avanoa mo outou taitoatasi ia ausia ai o outou gafatia atoa, o lona uiga o le alualu i luma e faavavau ma le avanoa i le tulaga atua.”²

Se’i o’u faasino atua le manaomia ona tuueseese o upu taua nei e lua: taua ma le agavaa. E le tutusa upu ia e lua. O le taua faaleagaga o lona uiga o le faatauaina o i tatou lava i le auala o loo faatauaina ai i tatou e le Tama Faalelagi, ae le o le auala e faataua ai e le lalolagi i tatou. Sa fuafuaina lava lo tatou taua ae tatou te lei o mai i lenei lalolagi. “E le mafuatia le alofa o le Atua ma o le a tumau pea e faavavau.”³

I le isi itu, e ausia le agavaa e ala i le usiusitai. Afai tatou te agasala, e faaitiitia lo tatou agavaa, ae le faaitiitia ai lava lo tatou taua! E faaauau pea ona tatou salamo ma tauivi pea ina ia faapei o Iesu faatasi ma lo tatou taua. E pei ona aoao mai Peresitene Polika Iaga: “O le mea sili ona itiiti, le agaga sili ona maualalo ua i ai nei i le fogaeleele … , e tutusa le taua ma lalolagi.”⁴ E tusa lava po o le a, e i ai lava lo tatou taua i le silafaga a lo tatou Tama Faalelagi.

E ui i lenei upumoni ofoofogia, e toafia i tatou e tauivi mai lea taimi i lea taimi, ma manatu po o ni lagona le lelei e uiga ia i tatou lava? O a’u. O se mailei faigofie. O Satani o le tama o pepelo uma, aemaise lava pe a oo i le faafoligaseseina o lo tatou lava natura paia ma le faamoemoega. O le manatu faatauvaa ia i tatou lava e le faia ai se lelei mo i tatou. Ae na te taofiofia i tatou. E pei lava ona aoao soo ai i tatou, “E leai lava se tasi e mafai ona faia oe ia lagona le le taua e aunoa ma lau faatagaga.”⁵ E mafai ona tatou taofi le faatusatusa o lo tatou leaga i tulaga silisili o le isi tagata. “O le faatusatusa e faoaina le olioli.”⁶

I se eseesega, e faamautinoa mai e le Alii ia i tatou i taimi tatou te maua ai mafaufauga mama, o le a Ia faamanuiaina i tatou i le talitonuga maumaututu, e oo lava i le talitonuga maumaututu e iloa ai po o ai moni lava i tatou. E leai lava se isi taimi sili ona taua e faalogo ai i Ana upu [i lo le taimi nei]. “Ia tuu le amiomamā e teuteuina ai ou mafaufauga e lē aunoa,” sa Ia fetalai mai ai. “Ona malosi ai lea o lou faatuatua fai ifo i luma o le Atua … ma avea ai le Agaga Paia ma au aumea tumau.”⁷

Sa faaali mai e le Alii lenei upumoni faaopoopo i le Perofeta o Iosefa Samita: “O ia o lē na te maua se mea mai i le Atua, ia ta’u e ia ua mai i le Atua; ma ia tuu atu ia te ia e olioli ua ta’u agavaa o ia e le Atua na te mauaina lena mea.”⁸ A tatou lagonaina le Agaga, e pei ona faamalamalama mai e lenei fuaiupu, tatou te iloaina o mea ua tatou lagonaina ua mai lo tatou Tama Faalelagi. Tatou te faamamalu ma viia o Ia mo le faamanuiaina o i tatou. Ona tatou olioli lea ona ua ta’u agavaaina i tatou e mauaina.

Mafaufau o loo e faitauina tusitusiga paia i se taeao ma ua musumusu lemu atu le Agaga ia te oe o mea o loo e faitauina e moni. O mafai ona e iloaina le Agaga ma fiafia ua e lagonaina Lona alofa ma ua agavaa e mauaina?

Tina, atonu e te tootuli i talaane o lau tama fa tausaga le matua a o ia faia lana tatalo moe. Ona lofituina lea o oe i se lagona a o e faalogo atu. E te lagonaina le mafanafana ma le filemu. E puupuu lava le lagona, ae ua e iloaina i lena lava taimi, ua ta’u agavaaina oe e maua. Atonu e seasea tatou mauaina se faailoaga tele faaleagaga i o tatou olaga; ae e mafai ona tatou olioli soo i musumusuga mālū a le Agaga Paia, o loo faamaoniaina le upumoni o lo tatou taua faaleagaga.

Sa faamalamalama mai e le Alii le sootaga i le va o lo tatou taua ma Lana taulaga togiola sili ina ua Ia fetalai:

“Ia manatua ua tele lava le taua o agaga i le silafaga a le Atua;

“Aua, faauta, na mafatia le Alii lo oulua Togiola i le oti i la le tino; o le mea lea na mafatia o ia i le tiga o tagata uma, ina ia mafai ona salamo tagata uma ma o mai ia te ia.”⁹

Uso e, ona o mea na Ia faia mo i tatou, “ua noatia ai i tatou ia te ia i noataga alofa.”¹⁰ Sa Ia fetalai mai: “Ma na auina mai a’u e lo’u Tama ina ia sii ae au i luga o le satauro; ma a mavae ona sii ae o au i luga o le satauro, ina ia mafai ona ou aumai o tagata uma ia te au.”¹¹

Sa faamalamalama mai foi e le Tupu o Peniamina lenei fesootaiga mausali ma lo tatou Faaola: “Ma faauta, o le a mafatia o ia i faaosoosoga, ma tiga o le tino, ma le fia ʼai ma le fia inu, ma le lailoa, e sili atu i lo le mea e mafai e le tagata ona onosaia, vagana ai ua oti; aua faauta, e sau le toto mai ona pu afu uma, ona o le a tele naua o lona mafatia mo le amioleaga ma mea inosia a ona tagata.”¹² O lena mafatiaga ma taunuuga o lena mafatiaga ua tumu ai o tatou loto i le alofa ma le lotofaafetai. Sa aoao mai Elder Paul E. Koelliker, “Pe a tatou aveesea ia faatosinaga lea e tosoina i tatou i le lalolagi ma faaaogaina lo tatou faitalia e saili ai o Ia, ua tatou tatalaina o tatou loto i se malosiaga faaselesitila ma uunaia ai i tatou e agai atu ia te Ia.”¹³ Afai o le alofa tatou te lagonaina mo le Faaola ma mea na Ia faia mo i tatou e sili atu i lo le malosi tatou te tuu atu i vaivaiga, masalosalo ia te oe lava ia, po o mausa leaga, ona Ia fesoasoani lea ia i tatou e faatoilalo mea ia e mafua ai puapuaga i o tatou olaga. Na te laveaiina i tatou mai ia i tatou lava.

Se’i o’u toe faamamafaina atu: afai e malosi atu le toso a le lalolagi nai lo le tatou faatuatua ma le faalagolago i le Faaola, o lona uiga e manumalo lava la le toso a le lalolagi i taimi uma. Afai tatou te filifili e taulai atu i o tatou mafaufauga le lelei ma masalosalo i lo tatou taua, nai lo le pipii atu i le Faaola, o le a oo ina faigata atili ona lagona ia uunaiga a le Agaga Paia.

Uso e, aua ne’i tatou fenumiai po o ai i tatou! E ui e masani lava ina faigofie atu ona faavailolo faaleagaga nai lo le tuuina atu o le taumafaiga faaleagaga ina ia manatuaina ma opomauina lo tatou faasinomaga paia, ae e le mafai ona tatou faia lena uiga lamatia i nei aso e gata ai. I le avea ai ma usoga, ia tatou “faamaoni ia Keriso; … ma talosia ia sii ae [i tatou] i luga e Keriso, ma talosia ia mau e faavavau i lou mafaufau ona mafatia ma lona maliu, … ma lona alofa mutimutivale ma le tali-tiga, ma le faamoemoe o lona mamalu ma le ola faavavau.”¹⁴ A o siitia i tatou e le Faaola i faavae maualuga atu, e mafai ona sili atu ona manino la tatou vaai e le gata po o ai i tatou ae o le a tatou latalata atili ia te Ia nai lo le mea tatou te mafaufauina. I le suafa paia o Iesu Keriso, amene.