Liliu Atu i le Alii

Saunia e Bishop W. Christopher Waddell

Fesoasoani Lua i le Au Epikopo Pulefaamalumalu

I lenei aafiaga faaleolaga nei, e le mafai ona tatou pulea mea uma e tutupu ia i tatou, ae e ia te i tatou le pulea atoatoa o le ala tatou te tali atu ai i suiga i o tatou olaga.

I le tautotogo o le 1998, sa mafai ai ona ma tuufaatasia ma Carol se malaga faapisinisi ma se tafaoga faaleaiga ma ave ai le ma fanau e toafa, faatasi ai ma lo’u tina faaletulafono ua faatoa maliu lana tane, i Hawaii mo ni nai aso.

O le po a’o loma le matou malaga i Hawaii, sa ta’u mai e le fomai o le ma atalii e fa masina le matua, o Jonathan, e faaluaina le afaina o lona taliga, ma sa ta’u mai e le mafai ona ave o ia pe a ma le tolu i le fa aso. Sa faia le faaiuga e nonofo ia Carol ma Jonathan, ae alu pea le matou malaga ma le isi vaega o le aiga.

O la’u faailo muamua lava e le o le malaga lea sa ou manao ai, na tupu a o lei leva ona matou taunuu. Ao savalivali atu i lalo o se auala e faaitualalua ai niu i le susulu o le masina, faatasi ai ma se vaaiga o le sami i o matou luma, sa ou faliu e fai atu se tala i le matagofie o le motu, ma i lena taimi o le faanaunau alofa, nai lo lo’u vaai atu ia Carol, sa ou tilotilo atu i mata o lo’u tina faaletulafono—o le, se’i ou faaopoopo atu lava, e ese lo’u alofa i ai. E le o le mea lea sa ou faananau i ai. E lei faamoemoe foi Carol e faaalu lana tuuaga i le fale na o ia ma le ma atalii pepe e ma’i.

O le a i ai taimi i o tatou olaga tatou te iloa ai i tatou lava ua i se ala e lei mafaufauina, fetaiai ma tulaga e sili atu ona matuia nai lo se tuuaga ua faalavefauina. E faapefea ona tatou tali atu pe a tutupu mai mea e tele ina le mafai ona taofiofia, e fesuiai ai le olaga sa tatou fuafuaina pe faamoemoe foi i ai?

I le aso 6 o Iuni, 1944, sa a’e ai i uta i le Matafaga o Omaha ia Ailama Shumway, o se taulealea liutena lona lua i le Ami a le Iunaite Setete, o se vaega o le osofaiga o le D-day. Sa tulaueleele saogalemu, ae i le aso 27 o Iulai, a o avea o ia o se vaega o le osofaiga Tuufaatasi, sa matuai faamanualia lava o ia i se maina o auupega e faatamaia tane o le militeli na pasae. I se minute, sa matua aafia lava lona faamoemoega faafomai i le lumanai. Ina ua uma ni mau taotoga, lea na fesoasoani ai ia te ia e toe malosi mai le tele o manu’a ogaoga, e lei toe pupula lava ia Uso Shumway. E faapefea ona ia tali atu i ai?

Ina ua mavae tausaga e tolu i se falemai toefatufatua’i, sa ia toe foi i le fale i Lovell, Wyoming. Sa ia iloa ua le toe mafai ona taunuu lana miti e avea ma se fomai, ae sa ia naunau e agai i luma, ia faaipoipo, ma lagolagoina se aiga.

Sa iu ina maua sana galuega i Baltimore, Maryland, o se faufautua toefatufatuai ma se tagata faapitoa o galuega mo e tauaso. I lona lava faagasologa o le toefatufatuai, sa ia aoaoina ai o e tauaso e gafataulimaina le tele naua nai lo le mea sa ia iloa, ma i le valu tausaga o i ai i lea tulaga, sa toatele atu tagata tauaso sa ia faafaigaluegaina nai lo se isi lava faufautua i le atunuu.

Ua mautinoa nei i lona tomai e maua mea e tausi ai se aiga, sa faamalamalama loa Ailama i lana manamea i lona ta’u atu ia te ia, “Afai o le a e faitauina meli, soka ia totini, ma ave le taavale, e mafai ona ou faia isi mea uma.” E lei leva ae faamauina i la’ua i le Malumalu o Sate Leki ma iu ina faamanuiaina i se fanau e toavalu.

I le 1954, na toe foi ai le au Shumways i Wyoming, lea na faigaluega ai Uso Shumway mo le 32 tausaga o se Faatonusili o Aoga mo e Logonoa ma Tauaso. I le taimi lena, sa galue o ia mo le fitu tausaga o se epikopo o le Uarota Muamua a Cheyenne, mulimuli ane avea ma peteriaka o le siteki mo le 17 tausaga. Ina ua litaea, sa galulue foi Brother ma Sister Shumway o se ulugalii matutua faamisiona i le Misiona a Lonetona Egelani i Saute.

Na maliu Ailama Shumway ia Mati 2011, ma sa tuua e ia se talatuu o le faatuatua ma le faalagolago i le Alii, e oo lava i tulaga faigata, i se fanau toatele, ma fanau a fanau, ma fanau a fanau a fanau.¹

Atonu na suia le olaga o Ailama Shumway i le taua, ae e lei masalosalo lava i lona natura paia ma ona gafatia faavavau. E faapei foi o ia, o i tatou o atalii ma afafine agaga o le Atua, ma sa tatou taliaina Lana fuafuaga lea e mafai ai e i [tatou] ona maua se tino faitino ma maua ai aafiaga faalelalolagi ina ia alualu ai i luma seia tau atu i le faaatoatoaga ma oo ai ina tatou iloa [lo tatou] taunuuga paia o ni suli o le ola e faavavau.”² E leai se aofaiga o suiga, tofotofoga, po o tetee e mafai ona fesuia’ia le ala o le faavavau—ua na o a tatou filifiliga lava, a o tatou faaaogaina la tatou faitalia.

O suiga, ma taunuuga o luitau, lea tatou te fetaiai i le olaga nei e oo mai i ni siepi ma ituaiga lapopoa ma aafia ai i tatou taitoatasi i ala tulaga ese. E faapei o outou, ua ou molimauina uo ma aiga o feagai ma luitau e afua ona o:

O le oti o se e pele.
O se tete’aga matuitui.
Atonu e leai lava se avanoa e faaipoipo ai.
Ma’i po o se manu’a matuia.
E oo lava i faalavelave faalenatura, e pei ona sa tatou molimauina talu ai nei i le lalolagi atoa.

Ma e umi le lisi. E ui atonu e tulaga ese “suiga” taitasi i o tatou tulaga taitasi, e i ai se elemene e laugatasia ai i faigata po o luitau e tulai mai ai—e i ai lava le faamoemoe ma le filemu e le aunoa e ala i le taulaga togiola a Iesu Keriso. O le Taulaga Togiola a Iesu Keriso ua saunia ai le toe fuataga e faasa’o ai ma faamalolo tino uma e manu’anu’a, o agaga ua manu’alia, ma loto ua nutimomoia.

Na te silafia, i se ala e leai lava se isi e mafai ona malamalama i ai, le mea tatou te moomia, taitoatasi, ina ia mafai ai ona agai i luma i le lotolotoi o suiga. E le faapei o uo ma e pele ia i tatou, o le Faaola e le gata ina lotofaavauvau faatasi ma i tatou, ae e mafai foi ona Ia malamalama atoatoa, aua sa i ai foi o Ia i le mea o tatou i ai nei. E le gata i le totogiina o le tau ma puapuagatia mo a tatou agasala, sa savalia foi e Iesu Keriso ala uma, taulimaina luitau uma, feagai ma tiga uma—faaletino, faalelagona po o le faaleagaga—o le a tatou fetaiai i le olaga nei.

Na aoao mai Peresitene Boyd K. Packer: “O le alofa mutimutivale ma le alofa tunoa o Iesu Keriso e le faatuaoia ia i latou o e agasala … , ae aofia ai le folafolaga o le filemu e faavavau mo i latou uma o e o le a talia ma mulimuli ia te Ia. … O Lona alofa mutimutivale o se faamalologa sili lea, e oo lava i se tagata le sala sa faamanualia.”³

I lenei aafiaga faaleolaga nei, e le mafai ona tatou pulea mea uma e tutupu ia i tatou, ae e ia te i tatou le pulea atoatoa o le ala tatou te tali atu ai i suiga i o tatou olaga. E le o faa’ite’ite mai i lenei mea faapea o le a leai ni taunuuga ma faigofie foi ona taulima ia luitau ma faigata tatou te fetaiai. E le o faa’ite’ite mai faapea o le a tatou saoloto mai tiga po se lototiga. O le uiga e i ai le afuaga mo le faamoemoe ma ona o le Togiola a Iesu Keriso, ua mafai ai ona tatou agai i luma e saili aso e sili atu—aso e tumu i le olioli, malamalama, ma le fiafia.

I le Mosaea tatou te faitau ai i le tala ia Alema, o le sa faitaulaga i le Tupu o Noa, ma lona nuu, o e, ina ua uma ona faailoa atu i ona tagata … na o ese atu i le vao ae lei oo mai autau a le tupu o Noa.” Ina ua mavae aso e valu, “sa latou taunuu … i se laueleele matagofie tele ma lafulemu” lea na “latou faatutu ai o latou faleie ma amata ona galueaiina le eleele, ma fausia fale.”⁴

Ua foliga mai ua i ai so latou faamoemoe. Na latou taliaina le talalelei a Iesu Keriso. Sa papatisoina i latou o se feagaiga o le a latou auauna atu i le Alii ma tausi ana poloaiga. Ma “sa latou fanafanau ma faasolo malolosi tele lava i le laueleele.”⁵

Peitai, o le a le pine ae toe suia o latou tulaga. “Sa i ai se autau a sa Lamana i tuaoi o le laueleele.”⁶ E lei pine ae nofopologa Alema ma lona nuu, ma “sa oo ina matua tele lava o latou puapuaga sa amata ona latou tagi malosi atu i le Atua.” E le gata i lea, sa poloaiina i latou e o latou leoleo e tuu a latou tagi, a leai, “ma o soo se tasi e maua o valaau atu i le Atua, o le a fasiotia.”⁷ E lei faia e Alema ma lona nuu se mea e agavaa ai i lo latou tulaga fou ua latou i ai. O le a se latou tali i ai?

Nai lo le latou tuua’ia o le Atua, sa latou liliu atu ia te Ia ma “sasaa atu o latou loto ia te ia.” I le tali atu i lo latou faatuatua ma tatalo, sa tali atu le Alii: “Ia faamafanafanaina outou. … “O le a ou … faamāmāina foi avega ua tuu i o outou tauau, e oo ia te outou tou te le lagonaina i latou i luga o o outou tua.” E lei umi, “sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauaʼi atu ma le fiafia ma le onosai i le finagalo atoa o le Alii.”⁸ E ui e lei faasaolotoina mai le nofopologa, ae o le liliu atu i le Alii, ae le mai le Alii, sa faamanuiaina i latou e tusa ai ma o latou manaoga ma tusa ai ma le poto o le Alii.

E pei ona sa aoao mai e Elder Dallin H. Oaks: “E tele auala e oo mai ai faamanuiaga o le faamalologa, e fetaui lava ma o tatou manaoga taitoatasi, e pei ona silafia ai e Ia o lē e alofa silisili ia i tatou. O nisi taimi e faamaloloina e se ‘faamalologa’ o tatou ma’i pe faamatuu ese atu ai a tatou avega. Peitai, o nisi taimi e ‘faamaloloina’ i tatou e ala i le tuuina mai o le malosi po o le malamalama po o le onosai e onosaia ai avega ua tuu mai i o tatou luga.”⁹

Mulimuli ane, “sa oo ina matua tele lava lo latou faatuatua ma lo latou onosai,” sa laveaiina Alema ma lona nuu e le Alii, “ma sa latou avatu le faafetai,” “aua a latou i ai i le pologa, ma sa leai se tasi sa mafai ona lavea’ia i latou vagana ai le Alii lo latou Atua.”¹⁰

O le faitioga faanoanoa o le, e tele taimi, o i latou e manaomia, ua liliu ese mai o latou lava punavai atoatoa o le fesoasoani—o lo tatou Faaola, o Iesu Keriso. E i ai se tala faatusi paia masani o le “gata apamemea” o loo aoao ai i tatou e i ai sa tatou filifiliga pe a tatou feagai ma luitau. Ina ua toatele le fanauga a Isaraelu e u e “gata uogo,”¹¹ “sa sii ae i luga se faatusa … e faapea o soo se tasi e tepa ae i ai e mafai ona ola. [Ae sa avea ma se filifiliga.] Ma e toatele sa tepa i ai ma ola ai.

“… Peitai sa i ai le toatele o e sa sili atu ona maaa tele sa latou le fia tetepa ae ai, ma o lea na fano ai i latou.”¹²

E faapei o Isaraelu anamua, ua fautuaina foi i tatou e vaavaai atu i le Faaola ma ola ai—aua e faigofie Lana amo ma o Lana avega foi e mama ia.

Na aoao atu e Alema le Itiiti lenei upumoni paia ina ua fai mai, “Ua ou iloa o ai lava e tuu atu lo latou faalagolago i le Atua e lagolagoina i o latou tofotofoga, ma o latou faalavelave, ma o latou puapuaga, ma o le a sii ae i latou i luga i le aso gataaga”¹³

I nei aso e gata ai, ua saunia foi e le Alii le mau punaoa, a tatou “gata apamemea,” o ia mea uma ua mamanuina e fesoasoani ai ia tatou vaavaai atu ia Keriso ma tuu atu lo tatou faatuatuaga ia te Ia. O le taulimaina o luitau o le olaga e le o le faatuatuanai i le mea moni ae o le mea tatou te filifili e taulai i ai ma le faavae tatou te filifili e fausia.

O nei punaoa e aofia ai, ae le na o le pau ia:

Suesue ia tusitusiga paia ma aoaoga a perofeta soifua.
Tatalo ma le loto faamaoni ma anapogi faisoo.
Aai ma feinu ma le agavaa i le faamanatuga.
Auai soo atu i le malumalu.
Faamanuiaga o le perisitua.
Fautuaga poto faapolofesa.
Vai ma fualaau, pe a faatonuina lelei ai ma faaaoga e pei ona faamaonia ai.

Po o le a lava le suiga o tulaga o le olaga e oo mai, ma pe o a foi ala e lei faamoemoeina tatou te ono malaga ai, pe faapefea ona tatou tali atu i ai o se filifiliga. Liliu atu i le Faaola ma puemau mai Lona aao o loo faaloaloa mai o le filifiliga aupito sili lava lea e le aunoa.

Na aoao mai e Elder Richard G. Scott le upumoni faavavau lenei: “O le fiafia moni tumau faatasi ma le malosiaga e oo mai ai, lototoa, ma le gafatia e faatoilalo ai luitau aupito faigata e maua mai se olaga e faatotonugalemu ia Iesu Keriso. … E leai se faamaoniga o taunuuga vave, ae e i ai le faamautinoaga mautu e faapea, i le taimi a le Alii, o le a oo mai faaiuga, o le a manumalo le filemu, ma o le a faatutumuina mea o gaogao.”¹⁴

Ou te faasoa atu la’u molimau i nei upumoni. I le suafa, o Iesu Keriso, amene.