O Mea Silisili Ese ma le Taua

Saunia e Elder David A, Bednar

O Le Korama a Aposetolo e Toasefululua

O le fuafuaga sili o le fiafia a lo tatou Tama Faalelagi e aofia ai aoaoga faavae, sauniga, ma mea silisili ese ma le taua ina ia mafai ai e i tatou ona tofusia faatasi ai i le amioatua.

O se tasi o luitau sili e tofu fetaia’i ma i tatou i aso uma o le le faatagaina lea o popolega o lenei lalolagi e pulea o tatou taimi ma le malosi ona tatou faatuatuanai ai lea o mea o le faavavau e aupito sili ona taua.¹ E mafai ona faigofie tele ona tata’iese i tatou mai le manatuaina e taulai atu i mea taua faaleagaga e tatau ona faamuamua ona o o tatou tiutetauave e tele ma le mau mea e fai. O nisi taimi tatou te taumafai ai e tamomoe saoasaoa ma e ono galo ai ia i tatou le mea tatou te o i ai ma pe aisea ua tatou tamomoe ai.

Ua faamanatu mai e le Aposetolo o Peteru e faapea o soo o Iesu Keriso, “Ua foaiina mai ia te i tatou ai lona mana Atua o mea uma, e oo ai i le ola ma le amio Atua, i lo tatou iloa lelei o le na valaau mai ia i tatou i lona lelei e silisili lava:

“Ona o lea ua ia folafolaina mai ai o mea silisili ese lava ma le aoga: ina ia tofusia faatasi ai outou i le amio Atua, ina ua sosola ese outou i le amioleaga o i le lalolagi i le tuinanau.”²

O la’u savali e faamamafa ai le taua o mea silisili ese lava ma le taua o loo faamatala mai e Peteru o se faamanatu moni o le mea o loo tatou agai i ai i la tatou malaga i le olaga nei ma le mafuaaga. O le a ou talanoaina foi matafaioi mo le aso Sapati, le malumalu paia, ma o tatou aiga i le fesoasoani ai ia i tatou e manatua nei folafolaga faaleagaga taua.

Ou te tatalo faatauanau ia aoao i tatou taitoatasi e le Agaga Paia a o tatou mafaufau faatasi i nei upumoni taua.

O Lo Tatou Faasinomaga Paia

O le fuafuaga sili o le fiafia a lo tatou Tama Faalelagi e aofia ai aoaoga faavae, sauniga, feagaiga, ma mea silisili ese ma le taua ina ia mafai ai e i tatou ona tofusia faatasi ai i le amioatua. O Lana fuafuaga ua faamanino mai ai lo tatou taunuuga e faavavau ma le ala e tatau ona tatou mulimuli ai e aoao, suia, tuputupu ae, ma i’u ai ina nonofo faatasi ma Ia e faavavau.

E pei ona faamatalaina i le “O Le Aiga: O Se Folafolaga i le Lalolagi”:

“O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga. …

“I le muai olaga, sa iloa ma tapua’i atalii ma afafine agaga i le Atua o lo latou Tama e Faavavau ma sa [latou] talia Lana fuafuaga e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga ma iloa tino ai lo latou taunuuga paia o ni suli o le ola e faavavau”³

Ua folafola mai e le Atua i Ana fanau afai latou te mulimuli i mataupu faavae o Lana fuafuaga ma le faataitaiga a Lona Alo Pele, tausi poloaiga, ma tumau i le faatuatua e oo i le iuga, ona aoga lea o le mana o le Togiola a le Faaola latou te “maua le ola e faavavau, le meaalofa silisili lea o meaalofa uma a le Atua.”⁴ O le ola e faavavau o le folafolaga aupito silisili ese lea ma le taua.

Toefanauina Faaleagaga

Tatou te malamalama atoatoa i folafolaga silisili ese ma le taua ma amata maua ai le natura paia e ala i le taliaina ma le naunautai o le valaau mai o le Alii i le mamalu ma le amioatua. E pei ona faamatala mai e Peteru, e faataunuuina lenei valaau e ala i le taumafai e sosola ese i le amioleaga o i le lalolagi.

A o tatou fetuleni atu i luma ma le gauai atu ma le faatuatua i le Faaola, ona ala mai lea i Lana Togiola ma le mana o le Agaga Paia, “se liuga tele i totonu o i matou, po o totonu o o tatou loto, ua le toe i ai so tatou manao e fai mea leaga, ae ia faia mea lelei e le aunoa.”⁵ Ua toefanauina i tatou; ioe, ua fananauina i le Atua, ma suia mai lo [tatou] tulaga faaletino ma pa’u, i se tulaga o le amiotonu, ua togiolaina e le Atua.⁶ “O lenei, afai o ia Keriso se tasi, o le tagata fou ia: ua mavae mea tuai, faauta, ua faafouina mea uma.”⁷

O sea suiga atoatoa i lo tatou natura e le faapea e vave ona tupu pe tupu foi i le taimi e tasi. E faapei o le Faaola, tatou te le mauaina foi “le atoatoaga i le amataga, ae [maua] e ia le alofa tunoa mo le alofa tunoa.”⁸ “Aua faauta, ua faapea ona fetalai mai o le Alii le Atua: Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti ii ma sina mea itiiti i o; ma e manuia lava i latou o e e faalogologo i a’u mataupu, ma ua’i mai o latou taliga i la’u fautuaga, ona o le a latou aoaoina le poto.”⁹

O sauniga o le perisitua ma feagaiga paia e manaomia mo lenei gasologa faifai pea o le toefanauina faaleagaga; o auala foi ia ua atofa mai e le Atua tatou te maua ai Ana folafolaga silisili ese ma le taua. O sauniga e taliaina ma le agavaa ma manatuaina e le aunoa, e tatala ai auala faalelagi e mafai ai ona tafe mai le mana o le faale-atua i o tatou olaga. O feagaiga e faamamaluina pea lava ma manatuaina e le aunoa e maua ai le faamoemoega ma le faamautinoaga o faamanuiaga i le olaga faapea foi le faavavau.

Mo se faataitaiga, ua folafola mai e le Atua ia i tatou, e tusa ai ma lo tatou faamaoni o le a tatou maua pea e le aunoa le mafutaga ma le sui lona tolu o le AigaAtua, le Agaga Paia lea,¹⁰ ma e ala mai i le Togiola a Iesu Keriso e mafai ai ona tatou maua e le aunoa ma faatumauina le faamagaloga o a tatou agasala,¹¹ ma e mafai foi ona tatou maua le filemu i lenei lalolagi,¹² ma ua motusia e le Faaola noataga o le oti ma sa manumalo o ia i le tuugamau,¹³ ma e mafai ona faatasia aiga i le olaga nei ma le faavavau atoa.

Ma le malamalama lelei, o mea silisili ese uma ma le taua ua ofo mai e le Tama Faalelagi i Ana fanau, e le mafai ona faitauina pe faamatalaina atoatoa. Peitai, e oo lava i le lisi o se vaega o faamanuiaga folafolaina lea faatoa ou tuuina atu, e tatau ona faapogai ai ona “tu ma ofo” i tatou taitoatasi,”¹⁴ ma “faapauu i lalo ma ifo atu i le Tama”¹⁵ i le suafa o Iesu Keriso.

Manatuaina o Folafolaga

Na lapatai mai Peresitene Lorenzo Snow “Ua tele naua lo tatou lilifa atu e faagalo le faamoemoega sili o le olaga, o le faamoemoega na auina mai ai i tatou e le Tama Faalelagi iinei ia maua o tatou tino faitino, faapea foi le valaauga paia na valaauina ai i tatou; ma e tusa ai ma lena, nai lo le faatoilaloina o nai mea iti faatauvaa e le tumau… , ae ua tele taimi ua tatou taulai atu ai i tatou lava i mea o le lalolagi, e aunoa ma le faavanoaina o i tatou lava ia maua mai le fesoasoani faalelagi na saunia e le Atua, ua na o le pau lava lena o le mea e mafai ai e i tatou ona faatoilaloina [na mea le tumau].”¹⁶

O le aso Sapati ma le malumalu paia o punavai patino ia e lua o le fesoasoani faalelagi na saunia e le Atua e fesoasoani ai ia te i tatou e tula’i a’e i luga mai le amioleaga o le lalolagi. Atonu tatou te mafaufau faapea o faamoemoega aupito sili o le tausia o le paia o le aso Sapati ma le o i le malumalu e fesootai ae eseese o la ‘auga. Ae peitai, ou te talitonu o na faamoemoega e lua e tutusa lelei lava ma e galulue faatasi foi e faamalolosia ai i tatou taitoatasi faaleagaga faapea foi i o tatou aiga.

O Le Sapati

Ina ua uma ona foafoa e le Atua o mea uma, sa malolo o Ia i le aso fitu ma sa poloaiina e tasi le aso o vaiaso taitasi ia avea o se taimi e malolo ai e fesoasoani ai i tagata e manatua o Ia.¹⁷ O le Sapati o le taimi o le Atua, o se taimi paia ua vaetofiaina patino mo tapuaiga ia te Ia ma mo le mauaina ma le manatuaina o Ana folafolaga silisili ma taua.

Na poloai mai le Alii i lenei tisipenisione:

“Ma ina ia mafai ona e tausi atili atoatoa oe lava i le lē pisia mai le lalolagi, ia e alu atu i le fale tatalo ma osi a’e i luga au faamanatuga i lo’u aso paia;

“Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese.¹⁸

O le mea lea, i le Sapati tatou te tapuai atu i le Tama i le suafa o le Alo e ala i le auai i le faatinoga o sauniga ma aoao e uiga i le, mauaina, manatua, ma le faafouina o feagaiga. I Lona aso paia, o o tatou mafaufauga, taga, ma amioga o faailoga ia tatou te avatu i le Atua ma o se faailoilo foi lea o lo tatou alolofa mo Ia.¹⁹

O se isi faamoemoega faaopoopo o le Sapati o le siitia lea o la tatou vaaiga mamao mai mea o le lalolagi i faamanuiaga o le faavavau. Pe a tatou aveesea mai i tatou mai lenei taimi paia mai le tele o mea masani e fai i o tatou olaga, e mafai ona tatou “tepa atu i le Atua ma ola ai”²⁰ e ala i le mauaina ma manatuaina o folafolaga silisili ese ma le taua ia e tofusia ai i tatou ma le amioatua.

O Le Malumalu Paia

Sa poloaiina pea lava e le Alii Lona nuu e le aunoa e fausia malumalu, o nofoaga paia e faatino ai e le Au Paia agavaa sauniga paia o le talalelei ma mo i latou lava ma mo e ua maliliu. O malumalu o nofoaga ua silisili ona paia o nofoaga tapuai uma. O le malumalu lava ia o le maota o le Alii, o se avanoa paia e vaetofiaina patino mo tapuaiga i le Atua ma mo le mauaina ma le manatuaina o Ana folafolaga silisilii ese ma le taua.

Ua poloai mai le Alii i lenei tisipenisione “Ia outou faatulaga tatau outou lava; ia saunia mea manaomia uma; ma faatu se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale maopoopo, o se fale o le Atua.”²¹ O le taulaiga autu o le tapuai i le malumalu o le auai lea i le faatinoga o sauniga ma aoao e uiga, mauaina, ma le manatuaina o feagaiga. E ese o tatou mafaufauga, o faatinoga, ma laei i le malumalu mai lo isi nofoaga tatou te asiasi i ai.

O se faamoemoega autu lava o le malumalu o le siitia o la tatou vaaiga mamao mai mea o le lalolagi i faamanuiaga o le faavavau. A tatou aveesea mai i tatou mo sina taimi puupuu mai mea o le lalolagi tatou te masani ai, e mafai ona tatou “tepa atu i le Atua ma ola ai”²² e ala i le mauaina ma le manatuaina o folafolaga silisili ese ma le taua ia e tofusia ai i tatou ma le amioatua.

Faamolemole manatua o le aso Sapati ma le malumalu, o se taimi paia ma se avanoa paia ua vaetofiaina patino mo le tapuaiga i le Atua ma mo le mauaina ma le manatuaina o Ana folafolaga silisili ese ma le taua i Ana fanau. E pei ona faatuina e le Atua, o faamoemoega autu o nei punavai faalelagi o le fesoasoani, e tutusa lelei lava: ina ia taulai atu pea lava pea ma le mamana la tatou gauaiga i lo tatou Tama Faalelagi, o Lona Alo Pele e Toatasi, o le Agaga Paia, ma folafolaga e o faatasi ma sauniga ma feagaiga o le talalelei toefuataiina a le Faaola.

O o Tatou Fale

E taua tele, o le fale e tatau ona avea ma tuufaatasiga aupito maualuga o le taimi ma le avanoa sili ona manatua lelei ai e tagata taitoatasi ma aiga folafolaga silisili ese ma le taua a le Atua. O le tuua o o tatou fale ina ia faaalu se taimi i sauniga lotu i le Aso Sa ma ulufale atu ai i avanoa paia o se malumalu, e taua ae le lava. Sei vagana ua tatou aumaia le agaga ma le malosi e maua mai na gaoioiga paia e foi mai ma i tatou i o tatou fale ona mafai lea ona tatou lagolagoina la tatou taulaiga i faamoemoega sili o le olaga nei ma faatoilaloina ai le amioleaga o loo i ai i le lalolagi. O o tatou aafiaga i le Sapati ma le malumalu e tatau ona avea o ni auala faaleagaga e faatumulia ai tagata taitoatasi ma aiga ma o tatou fale i le afio ai o le Agaga Paia ma le mana, faatasi ai ma le liua faifai pea ma le loloto i le Alii o Iesu Keriso, ma faatasi ai ma “se susulu atoatoa o le faamoemoe”²³ i folafolaga e faavavau a le Atua.

O le Sapati ma le malumalu e mafai ona fesoasoani ia i tatou e faatuina ai i o tatou fale “se ala e silisili ona lelei”²⁴ a o tatou “faaopoopoina ia Keriso i le sauniga i le faaatoaga o tausaga, o i latou uma lava o i le lagi atoa ma i latou o i le lalolagi; o ia lava ua matou maua ai.”²⁵ O mea tatou te faia i o tatou fale e faaaoga ai Ona taimi paia ma faatasi ai ma mea tatou te aoaoina i Lona avanoa paia e taua i le tofusia ai i folafolaga silisili ese ma le taua e maua ai le amioatua.

Folafolaga ma le Molimau

E faigofie lava ona faatoilaloina i tatou i mea e masani ona fai i le olaga. O le moe, o le ‘ai, o le faiga o lavalava, taalo, faamalositino, ma le tele o isi gaoioiga masani e moomia ma e taua. Ae o le iuga lava, o tagata e avea ai i tatou o le taunuuga lea o lo tatou malamalama ma le naunautaiga e aoao mai le Tama, o le Alo, ma le Agaga Paia; ua le na o se aofaiga o a tatou gaoioiga i aso taitasi i lo tatou olaga atoa.

O le talalelei e matuai tele atu nai lo le na o se lisi e siaki o galuega eseese e faatino; nai lo lena, o se ie lalaga tele o le upumoni “ua faavaaina lelei”²⁶ ma ua lalagaina faatasi, ua mamanuina e fesoasoani ai ia tatou faapei o lo tatou Tama Faalelagi ma le Alii o Iesu Keriso, ma tofusia ai ma se amioatua. E moni lava, e faatauasoina i tatou i le vaai i talaatu o le faailoga”²⁷ pe a ufitia lea upumoni faaleagaga moni e tuinanauga, atugaluga, ma le faifaiaga o le lalolagi.

Pe a tatou popoto ma valaaulia le Agaga Paia e avea ma o tatou taiala,²⁸ ou te folafola atu o le a Ia aoao i tatou i le mea moni. “O le a molimau o ia ia Keriso, [ma] faapupula o tatou mafaufau i mea o le lagi”²⁹ a o tatou taumafai e faataunuu lo tatou taunuuga e faavavau ma tofusia i le amioatua.

Ou te tuuina atu la’u molimau o mea silisili ese ma le taua e soofaatasi ma a tatou sauniga ma feagaiga e mautinoa ia. Ua tautino mai e le Alii:

“Ou te tuu atu ia te outou ni faatonuga i le ala e mafai ai ona outou amio i oʼu luma, ina ia liliu mai ia te outou mo lo outou olataga.

O Aʼu, o le Alii, e noatia aʼu pe a outou faia mea Ou te fai atu ai; ae a outou lē faia mea Ou te fai atu ai, e leai se folafolaga mo outou.”³⁰

Ou te molimau atu o loo soifua lo tatou Tama Faalelagi ma o Ia o le Matai’sau o le ata o le faaolataga. O Iesu Keriso o Lona Alo Pele e Toatasi, o lo tatou Faaola ma le Togiola. O loo soifua o Ia. Ma ou te molimau atu o le fuafuaga ma folafolaga a le Tama, o le Togiola a le Faaola, ma le mafutaga a le Agaga Paia e mafai ai ona maua le “filemu i lenei lalolagi ma le ola e faavavau i le lalolagi a sau.”³¹ Ou te molimau atu ai i nei mea, i le suafa paia o le Alii o Iesu Keriso, amene.