Faaliliuga Fou o Tusitusiga Paia

O faaliliuga fou o tusitusiga paia na faamaonia i ni nai tausaga ua tuanai e aofia ai le Tusi a Mamona i le Burmese, Efik, Georgian, Navajo, Pohnpeian, Sesotho, ma le Tshiluba ma le fusitolu o tusitusiga paia i le Gagana Fai Faailoga Amerika, Aferika, Amharic, Arapi, Pisilama, Eleni, Hiligaynon, Hindi, Hmong, Lao, Lingala, Malay, Peresia, Polish, Serbian, Setswana, Sinhala, Solovakia, Solovenia, Tahiti, Tamil, Telugu, Tok Pisin, Take, Twi, Urdu, ma Yoruba.

I se tusi na tusia i le aso 9 Oketopa, 2017, sa lisi ai e le Au Peresitene Sili nei galuega faatino ma faailoa mai se gasologa foi o le a mafai ai e tagata taitoatasi ona suesueina vaega faataitai o faaliliuga a o lei lolomiina le faaliliuga mulimuli.

“A o faagasolo le faaliliuga, e mafai ona faalauiloa atu vaega ua maea i se faagasologa mai i lea taimi i lea taimi,” na tusia ai i le tusi. “O nei vaega faagasolo, e ui e le iloiloina o le vaega mulimuli seia maea le faaliliuga atoa, o le a maua i luga o le LDS.org ma i le polokalama feaveai Gospel Library.” O le faalauiloaga muamua mo ni nai gagana ua filifilia o le a amata i le aso 30 Novema, 2017. A o faamaeaina le faaliliuga, ma iloiloga ma faamaoniga e tatau ai, o le a suitulaga faalauiloaga faagasolo muamua i lomiga mulimuli, faatasi ai ma lomiga e lolomiina e mulimuli mai.

O galuega faatino o le faaliliuga e alu ai ni nai tausaga e pei ona faaliliuina anotusi o tusitusiga paia ma le faaeteete. O le mea lea, o galuega faatino o loo i ai i tulaga eseese. O le uluai faalauiloaga o faaliliuga faataitai ua faamaonia o le a aofia ai le talaaga ua faaliliuina ma iloiloina e taitai i le lotoifale. O vaega faaopoopo o faaliliuga o le a faaauau pea ona faalauiloa mai faavaitaimi. O faaliliuga ua lata ona maea i le taimi nei o le a leai ni [lomiga] faataitai e lolomiina.

Ua talosaga mai le Au Peresitene Sili e faapea, a o faagasolo pe o loo faatalitali galuega faatino o le faaliliuga, o tagata o le ekalesia ma taitai e “faaauau pea ona faaaoga le faaliliuga o i ai nei o Mataupu Faavae o le Faatuatua, tatalo o le faamanatuga, ma tatalo o le papatisoga seia maea faaliliuga fou.”

O lomiga AAG o tusitusiga paia ua faaliliuina ma o loo maua i numera nei o gagana: o le Tusi Paia, 3; e finagalo i lomiga e le AAG o le Tusi Paia, 95; o le Tusi a Mamona, 90; Filifiliga mai le Tusi a Mamona, 21; ma le Mataupu Faavae ma Feagaiga ma le Penina Tau Tele, 58.