Tala Faamamai o le Talalelei
O Le Natura Faaselesitila o le Faalagolago o le Tagata ia te Ia Lava
Ou te fiafia tele i upumoni faigofie o le talalelei e pei ona sa aoaoina mai e le au perofeta paia, ma ou te le vaivai lava e tautala e uiga i ai. Talu mai lava le amataga, o loo lapataiina pea le tagata ia tausia e ia o ia lava, i lona faalagolago lea ia te ia lava. E faigofie ona malamalama i le pogai ua faamamafaina mai ai e le Alii lenei mataupu faavae, pe a tatou malamalama i ai e o lua lava lenei mataupu ma le saolotoga.
I lenei la mataupu, na saunoa ai Elder Albert E. Bowen, “E le taliaina … e le Ekalesia soo se polokalama e tuu atu ai i tagata malolosi o mafai ona latou tausia i latou lava, e faalagolago tumau pea [i se isi tagata], ma finau mai, i lea tulaga, e faapea o le aoga moni ma le faamoemoega o le lima foai, o le fesoasoani lea i tagata ia [oo] i se tulaga e mafai ai e i latou ona fesoasoani ia i latou lava ma faapea ai ona saoloto.”1
E tele ni polokalama ua faatulagaina e tagata ma ni faamoemoega lelei ina ia fesoasoani ai i e le tagolima. Ae ui i lea, o le tele o nei polokalama ua fuafuaina faatasi ma se faamoemoega lata mai o le “fesoasoani i tagata,” nai lo le “fesoasoani i tagata ia latou fesoasoani ia i latou lava.” E tatau ona faasino tonu atu a tatou taumafaiga ia avea tagata malolosi ma tagata e faalagolago ia te i latou lava.
Gogosina Faaseegofie
Sa ou otiina mai le tusiga lenei mai le Reader’s Digest i se taimi ua mavae. E faitauina faapenei:
“I lo matou nuu tuaoi lelei o St. Augustine, e tele ai lava gogosina e mamate i le fiaaai ae o loo tele lava meaai. E tele lava i’a, ae e le iloa e gogosina fagogota. Ua tele augatupulaga o latou faalagolago pea i vaa fagota ula e a’e mai ma lafo atu mo i latou mea e totoe mai i a latou upega. O lenei ua siitia ese atu ia vaa fagota. …
“Na fatuina e auvaa fagota ula se Tulaga Uelefea mo … gogosina. Sa le’i ano lava manulele tetele e aoao ia iloa e i latou lava fagogota, ma latou te le’i aoaoina foi a latou fanau e fagogota. Ae na o lo latou faasino lava o a latou fanau i upega ula.
“O lenei la o gogosina, o manulele matagofie ma saoloto lea toetoe a faatusa i ai le saolotoga lava ia, ua tau mamate i le fiaaai ona ua faaseseina i latou i le faatosinaga ‘o se mea mauafua’! Sa latou ositaulagaina o latou saolotoga mo se mea mauafua.
“Ua faapena foi le toatele o tagata. Ua latou manatu e leai se leaga o le taliaina o mea mauafua mai ‘upega ula’ o uelefea a le Malo o le I.S. Ae o le a se mea o le a tupu pe a uma oloa a le Malo? Ae faapefea a tatou fanau i tupulaga o lumanai?
“Aua nei pei i tatou o gogosina faaseegofie. E tatau ona … tatou faasaosaoina a tatou taleni o le lava saunia o mea a le tagata mo ia lava, o tatou tomai e fatufatu mea mo i tatou lava, ma lo tatou magafagafa e faasoasoa lelei ma lo tatou fiafia moni i le saolotoga.”2
O le masani o le manao ma le mauaina o penefiti e le’i galueaiina ua avea nei ma mea ua matuai tumau i o tatou tagata lea e oo lava foi i tagata mauoa, o loo umiaina mea e maua ai ni oa se tele, ua latou faamoemoe foi i le malo e faamautinoa mo i latou se polofiti. O faiga palota e masani ona faia ai mea e folafola atu e sui tauva e faia mo tagata palota mai tupe a le malo. O lenei masani, afai e taliaina ma faatinoina i le lalolagi atoa i soo se atunuu, o le a fai ai ona tagatanuu ma pologa.
E le tatau ona avea i tatou ma tagata e tausi mai e le malo, e tusa lava pe i ai sa tatou aia tatau faaletulafono e faia ai. E manaomia ai se osigataulaga tele o le faaaloalo o le tagata ia te ia lava, ma le tutoatasi faaupufai, faaletino, ma le faaleagaga.
I nisi o atunuu e matuai faigata lava ona tuueseese penefiti galueaiina mai penefiti e le’i galueaiina. Ae peitai, e tutusa lava le mataupu faavae i atunuu uma lava: E tatau ona tatou taumafai ia faalagolago le tagata ia te ia lava ae aua le faalagolago i isi mo le tausiga o i tatou.
O malo e le na o le pau ia o itu e tausalaina. Matou te popole ona o le toatele o matua ua latou faia ni “gogosina faaseegofie” i a latou fanau i lo latou gauaigofie atu ma le tuulima atu o risosi mo le aiga. O le mea moni, o amioga a matua i lenei vaega e sili atu ona leaga nai lo soo se polokalama faalemalo.
E mafai ona tausalaina epikopo ma isi taitai perisitua i le faia o ni “gogosina faaseegofie” i tagata o o latou uarota. O isi tagata ua faalagolago lava i mea faaletupe pe faalelagona i o latou epikopo. O le mea mauafua o le mea mauafua lava, po o le a lava le auala e maua mai ai. E tatau ona faasino tonu lava a tatou gaoioiga faale-Ekalesia ma faaleaiga, i le fesoasoani atu lea i a tatou fanau ma tagata o le ekalesia ia latou faalagolago ia i latou lava. E le mafai ona tatou pulea polokalama faalemalo i taimi uma, ae e mafai ona tatou pulea o tatou lava aiga ma aulotu. Afai o le a tatou aoao atu ia mataupu faavae ma ola ai, o le a tele mea e mafai ona tatou faia e tetee atu ai i aafiaga le lelei ia atonu o i ai i polokalama a malo i soo se atunuu.
Ua tatou iloa e i ai nisi o e, mo ni mafuaaga e le mafai ona latou pulea, e le mafai ai ona latou faalagolago ia i latou lava. O i latou ia sa manatua e Peresitene Henry D. Moyle i lana saunoaga e faapea:
“Ua le faafitia e lenei mataupu faavae taua le fesoasoani e tatau ona maua e e matitiva po o e le tagolima. O [tagata] ua matuai leai se aoga [o le tino atoa], o e matutua, o e mamai e tausia lelei ma le alofa atoa lava, ae o i latou uma o loo malolosi atoatoa ua faatonuina ia fai le mea sili mo ia lava e aloese mai ai i le faalagolago i isi, pe afai e mafai e ana lava taumafaiga ona faia lea tulaga; ia vaai atu i faigata o se mea e le tumau; ae ia tuufaatasi lona faatuatua i lona lava tulaga gafatia ma ia galue malosi. …
“Matou te talitonu e [faapea] e seasea i ni [tulaga e aliae mai] le mafai e ni tagata faatuatua tele, ma lototele, ma le mauai, ma le fiafia i le tutoatasi lea e mumu i o latou loto, ma le mitamita i mea ua latou ausia, ona le manumalo i soo se faafatiatamai latou te fetaiai i le ala.”3
Faalagolago o le Tagata ia te Ia Lava i le Faaleagaga
Ou te fia tautala i le taimi nei e uiga i se upu moni taua lava: o le faalagolago o le tagata ia te ia lava e le o le iuga lena, ae o se auala e oo ai i le iuga. E matuai mafai lava e se tagata ona tutoatasi atoatoa ae le maua ai isi uiga moomia. E mafai ona mauoa se tasi ma le faalagolago atu i se tasi mo se mea, ae a leai se sini faaleagaga e o faatasi ma lenei tutoatasi, e mafai lava ona faatamaiaina ai lona agaga.
O le polokalama uelefea a le Ekalesia e faaleagaga. I le 1936, ina ua faalauiloa mai le polokalama uelefea, sa saunoa ai Peresitene David O. McKay i lenei saunoaga poto:
“O le atiina ae o lo tatou natura faaleagaga o le itu lea e tatau ona sili ona tatou popole i ai. O le faaleagaga o le ausiga aupito maoae lea o le agaga, o le paia i le tagata; ‘o le meaalofa faapaleina sili lea ua avea ai o ia ma tupu i mea uma ua foafoaina.’ O le manumalo lena o le tagata ia te ia lava ma le fesootaiga ma Le paia. Na o le faaleagaga lava e maua ai e le tagata mea e sili ona lelei o le olaga.
“O se mea lea e sapalai ai lavalava i e [leaga] lavalava, ia tuuina atu ia lava ni meaai ia i latou e tau leai ni meaai, ia tuuina atu se aafiaga e aoao ai i latou o e o loo tauivi ma le leai o se faamoemoe lea e oo mai mai le malosi o le paie, ae i le iuga, o faamanuiaga sili lava o le a faaputuina mai le [polokalama uelefea] a le Ekalesia e faaleagaga. “E foliga mai o galuega uma ua faia ua faaletino: o le toe suiina o lavalava, tuuapaina o fualaauaina ma fualaau faisua, faaputuina o meaai, filifilia o fanua lauolaola e faatoa—ua foliga mai e faaletino uma, ae o le faasafuaina atu o nei galuega uma, o le musuia ma le faapaiaina o ia galuega, o le autu lea o le faaleagaga.”4
Ua tau mai ia i tatou e le Mataupu Faavae ma Feagaiga 29:34–35 e faapea, e leai se mea e tau o se poloaiga e faaletino, aua o poloaiga uma e faaleagaga. Ua tau mai ai foi ia i tatou e tatau i le tagata ona avea ma “pule ia te ia lava.” E le mafai e se tagata ona avea ma pule ia te ia lava pe afai e le faalagolago ia te ia lava. O lea foi ua tatou iloa ai o le tutoatasi ma le faalagolago o le tagata ia te ia lava, o vaega taua ia i lo tatou tuputupu ae faaleagaga. Soo se taimi tatou te oo ai i se tulaga e lamatia ai lo tatou faalagolago ia i tatou lava, o le a tatou iloa ai foi le lamatiaina o o tatou saolotoga. A faateleina lo tatou faalagolago i isi, o le a tatou iloa ai le vave ona faaitiitia o lo tatou saolotoga e faia ai se mea.
Ae, ua tatau ona tatou iloaina o le faalagolago o le tagata ia te ia lava, o se tulaga manaomia i le saoloto atoatoa e galue. Ae peitai, ua tatou aoaoina foi e leai se mea e faaleagaga i le faalagolago o le tagata ia te ia lava sei vagana ua tonu filifiliga tatou te faia i lena saolotoga. O le a la se mea e tatau ona tatou faia i le taimi lava tatou te faalagolago ai ia i tatou lava ina ia mafai ona [tatou] tuputupu ae ai faaleagaga?
O le autu lava i le faia o le faalagolago o le tagata ia te ia lava ma mea faaleagaga, o le faaaogaina lea o le saolotoga e usitai ai i poloaiga a le Atua. O loo matuai manino ona tau mai e tusitusiga paia e faapea, o le tiute o i latou o e tagolima, o le foai atu lea i e matitiva.
Siitiaina o Isi
Sa saunoa atu Iakopo i le nuu o Nifae e faapea:
“Ia outou manatu i o outou uso e pei ona outou manatu ia te outou lava, ma ia outou fefaamasaniai ma i latou uma, ma ia tufatufa atu a outou mea ina ia mauoa i latou e pei o outou.
“A o lei sailiili e outou le oloa, ia outou saili le malo o le Atua.
“Pe a uma foi ona outou maua le faamoemoe ia Keriso ona maua lea e outou le oloa, pe afai tou te saili ai; tou te saili ai foi i le fia fai mea lelei—e faaofu ai e le lavalava, ma fafaga i e fiaaai, ma tuusaoloto ai e ua fusifusia, ma auauna atu i e mamai ma e tigaina” (Iakopo 2:17–19).
I la tatou lava tisipenisione, i le na o le 10 ai o masina talu ona faavaeina le Ekalesia, na fetalai mai ai le Alii:
“Afai e te alofa mai ia te au e te auauna mai ia te au ma tausi au poloaiga uma.
“Faauta foi, ia e manatua e matitiva, ma ia faasaoina ni au mea mo lo latou tausiga” (MFF 42:29–30).
O le masina lava lena e tasi, na toe fetalai mai ai le Alii e uiga i lea lava mataupu. O le mea moni, sa fai lava sina faatamala o le au paia. Sa le vave ona latou usitaia [lea poloaiga].
“Faauta, ou te fai atu ia te oulua, e ao ina oulua asiasi atu i e matitiva ma e le tagolima, e fesoasoani atu ai i lo latou faaolatotoga” (MFF 44:6).
E foliga mai o se mea ua ou le malamalama ai le tau poloaiina o i tatou e le Alii ia tatou faia na mea mo lo tatou lava lelei. Na fetalai mai le Alii, “O le maua lona ola, e maumau ai ia te ia: a o le faamaumau i lona ola ona o au, e maua e ia” (Mataio 10:39). E faamaumau o tatou ola e ala i le auauna atu ma le siitiaina o isi. O lo tatou faia faapea, tatou te maua ai le fiafiaga moni ma tumau. O le auauna atu e le o se mea tatou te tigaina ai i lenei lalolagi ina ia mafai ona tatou maua le aia tatau e ola ai i le malo selesitila. O le auauna atu, o le uiga tonu lea e faavae ai se olaga faaeaina i le malo selesitila.
Oka, i se matagofie o le aso o le a tatou faia ai nei mea e aunoa ma le tau poloaiina ona o le mama o o tatou loto. I lena aso, o le a le manaomia ai se poloaiga, aua o le a iloa ai e i tatou lava na pau le ala tatou te maua ai le fiafia moni, o le tatou faia lea o auaunaga le manatu faapito.
Ua outou silasila la i le taua tele o le faalagolago o le tagata ia te ia lava pe a tatou vaai atu i ai o se tulaga manaomia o le auauna atu, ma pe a tatou iloa foi o le auauna atu o le uiga moni lea o le faaleatua? A aunoa ma le faalagolago o le tagata ia te ia lava, e le mafai e se tasi ona faatino nei faanaunauga loloto o le auauna atu. E faapefea ona tatou foai atu pe afai e leai se mea e foai atu? E le mafai ona maua ni meaai mo e o fiaaai pe afai e leai ni meaai o i fata. E le mafai ona maua ni tupe e fesoasoani ai i e matitiva mai se atotupe e leai ni tupe o i ai. E le mafai ona maua mai se fesoasoani ma se malamalamaaga mai se tagata ua galala faalelagona. E le mafai ona maua mai le aoaoina mai se tagata e lei aoaoina. A o le mea e sili ona taua o na mea uma, e le mafai ona maua mai se taitaiga faaleagaga mai i se ua vaivai faaleagaga.
E i ai se uiga felagolagomai i le va o i latou o e mau ma i latou o e matitiva. O le faagasologa o le foai atu e faaeaina ai le tagata mativa ae faamaualaloina ai le tagata mauoa. O le faagasologa e tau fai faapaiaina ai i laua. O e matitiva, e faasaolotoina mai le pologa ma tuaoi o le fiaai, e mafai i le avea ai o ni tagata saoloto ona tutupu ae i o latou gafatia atoatoa i le faaletino ma le faaleagaga. O e mauoa, e ala i le foai atu o a latou mea, e auai i le mataupu faavae o le foai atu. O le taimi lava e faamaloloina ai se tagata, pe ua mafai ona faalagolago ia te ia lava, e aapa atu o ia e fesoasoani atu i isi, ma alu ai lava faapena le taamilosaga.
O i tatou uma e faalagolago le tagata ia te ia lava i nisi o itu, ae faalagolago atu foi i isi i nisi itu. O le mea lea, e tatau ai ona tatou taumafai e fesoasoani atu i isi i itu tatou te malolosi ai. Ae i le taimi lava lena, e le tatau ona taofia i tatou e le faamaualuga mai le taliaina ma le agaga faafetai o le lima fesoasoani o se isi tagata pe a tulai mai se vaega tatou te matuai manaomia ai se fesosaoani. O lo tatou le taliaina ua tatou taofia ai le avanoa e maua ai e le isi tagata se aafiaga faapaiaina.
O se tasi o vaega e tolu na faamamafaina i le misiona a le Ekalesia ia faaatoatoa le Au Paia, ma o le faamoemoega lea o le polokalama uelefea. E le o se polokalama lenei o se aso o le faatamaiaga, ae o se polokalama mo o tatou olaga iinei ma mo le taimi nei, aua o le taimi nei o le taimi lea e tatau ai ona tatou faaatoatoaina o tatou olaga. Talosia ia faaauau ona tatou uumau pea i nei upumoni.
Ata na tusia e Steve Kropp; ata na saunia e Simon Jones; ata pue o Peresitene Romney na saunia e Eldon K. Linschoten