Aisea Tatou te Papatiso ai mo e ua Maliliu?
Mai se lauga o le konafesi aoao o Oketopa 2000.
Ua leva ona tauivi le au failotu Kerisiano ma le fesili, O le a le faasinomaga o le o piliona o tagata o e na ola ma maliliu e aunoa ma se malamalama e uiga ia Iesu? Faatasi ai ma le Toefuataiga o le talalelei a Iesu Keriso, ua oo mai ai le malamalama i le faaolaina o i latou ua maliliu ae lei papatisoina ma le avea o le Atua ma “[Atua e] sao ona lelei, o le Atua amiotonu, o le Atua foi ua finagalo alofa” (Alema 42:15).
Ae peitai a o i ai i le soifuaga lenei, sa valoia e Iesu e faapea, o le a Ia talai atu foi i e ua maliliu. Ua tau mai e Peteru o lenei mea na tupu i le va o le Faasatauroga ma le Toetu o le Faaola (tagai 1 Peteru 3:18–19). Sa molimauina e Peresitene Iosefa F. Samita (1838–1918) i se faaaliga e faapea, sa asiasi atu le Faaola i le lalolagi o agaga ma “faatulagaina e ia ana au ma tofia ana avefeau mai e [agaga] amiotonu, o e ua faaofuina i le mana ma le pule, ma tofia i latou e o atu ma avatu le malamalama o le talalelei ia i latou sa i ai i le pogisa. …
“Sa aoaoina i latou ia i le faatuatua i le Atua, le salamo mai agasala, le faia o papatisoga sui mo e ua oti mo le faamagaloina o agasala, [ma] le mea foai fua o le Agaga Paia i le faaee atu o lima” (MFF 138:30, 33).
O le aoaoga faavae e faapea e mafai e tagata o soifua ona faia papatisoga ma isi sauniga talafeagai e fai ma sui o e ua maliliu sa toe faaalia mai i le Perofeta o Iosefa Samita (tagai MFF 124; 128; 132). Sa ia iloaina o agaga o loo faatalitali i le toetutu o loo ofoina atu i ai e le gata o le faaolataga o le tagata lava ia, ae e mafai foi ona fusia i latou i le lagi o ni tane ma ni ava ma faamauina i o latou tama ma tina i augatupulaga uma ua mavae ma faamauina ia i latou a latou fanau i augatupulaga uma o le lumanai. Sa faatonuina e le Alii le Perofeta e faapea, o nei sauniga paia e na o totonu lava o se maota ua fausia i Lona suafa, o se malumalu lea e faataunuuina lelei ai (tagai MFF 124:29–36).
E le tatau ona ese i soo se Kerisiano le mataupu faavae o sauniga sui. I le papatisoga o se tagata soifua, e galue ai le taitai, e sui, i le tulaga o le Faaola. Pe le o le talitonuga autu ea a lo tatou faatuatuaga e faapea, o le ositaulaga a Keriso na togiola ai mo a tatou agasala e ala i le fai ma sui e faamalieina ai le poloaiga o le faamasinoga tonu mo i tatou? E pei ona faailoa mai e Peresitene Gordon B. Hinckley (1910–2008): “Ou te manatu o galuega faaola mo e ua maliliu e latalata atu i le taulaga togiola a le Faaola lava Ia nai lo nisi lava galuega ou te iloaina. E tuuina atu ma le alofa, e aunoa ma se faamoemoe mo se taui pe toe totogi se mea. Matuai matagofie lea mataupu faavae.”1
O nisi ua le malamalama ma faapea o agaga o e ua maliliu “ua papatisoina i le ekalesia Mamona e aunoa ma lo latou iloa.”2 Ua latou manatu ua tatou maua le paoa e faamalosi ai se agaga e uiga i mataupu o faatuatuaga. Ae leai, tatou te le o faia lena mea. Na tuuina mai e le Atua i le tagata lona saolotoga mai lava i le amataga. E le lisiina e le Ekalesia i latou [ia ua maliliu ma faia papatisoga sui] i a latou lisi o tauvalaauga pe faitauina i latou i le faitau aofai o ona tagata auai.
O lo tatou naunau ina ia faaolaina e ua maliliu faapea ma le taimi ma punaoa o loo tatou faaaogaina mo lena tautinoga, i mea uma, o se faaalia o a tatou molimau e uiga ia Iesu Keriso. E faaalia ai se faamatalaga e sili ona mamana e mafai ona tatou faia e uiga i Lona tagata ma [Lana] misiona paia. E molimau, muamua, e uiga i le Toetu o Keriso; lona lua, e uiga i le le gata o Lana Togiola; tolu, o Ia o le faapogai tutasi o le faaolataga; fa, ua Ia faatulagaina ni tulaga mo le faaolataga; ma le lima, o le a faapea ona toe afio mai o Ia.
O Le Mana o le Toetu o Keriso
E uiga i le Toetu, na fesili ai Paulo, “A faapea, pe faapefea e ua papatisoina ma sui o e ua oti, afai e moni e le toetutu e ua oti? ona o le a ea ua papatisoina ai i latou ma sui o e ua oti?” (1 Korinito 15:29). Tatou te papatiso mo e ua maliliu aua ua tatou iloa o le a toetutu i latou. “E toe tuuina atu le agaga i le tino, ma le tino i le agaga; ioe, e toe tuuina atu ivi ma gaugaivi uma, taitasi i lona lava tino; ioe, e leai lava se lauulu e tasi e le iloa; a e tuuina atu mea uma i lo latou tino e tatau ai ma le atoatoa” (Alema 40:23). “Aua o le mea lava lea na maliu ai Keriso, ma ua toetu mai ai, ma ua soifua ai, ina ia faia o ia ma Alii i e ua oti atoa ma e o ola” (Roma 14:9).
E matuai tele le afaina o mea tatou te faia e faatatau ia i latou o e ua maliliu, aua o loo ola i latou i le taimi nei o ni agaga ma o le a toe ola foi o ni tagata ola pea, ona o Iesu Keriso. Ua tatou talitonu i Lana fetalaiga ina ua Ia fetalai, “O Au nei o le toe tu ma le ola: o le faatuatua mai ia te au, e ui lava ina oti, a e ola lava ia” (Ioane 11:25). E ala i papatisoga o loo tatou faia e fai ma sui o e ua maliliu, tatou te molimau atu ai e faapea “aua faapei ona oti uma ia Atamu, e faapea foi ona faaolaina uma ia Keriso. …
“Aua e tatau ona pule o ia, seia tuuina e ia ona fili uma lava i lalo o ona vae.
“O le toe fili e faaumatia, o le oti lea” (1 Korinito 15:22, 25–26).
O Iesu Keriso, o le Pogai Tutasi o le Faaolataga
O lo tatou naunau ia mautinoa ua ofoina atu i o tatou tuaa ua maliliu le papatisoga i le suafa o Iesu o se molimau lea i le mea moni e faapea, o Iesu Keriso o “le ala, ma le upu moni, ma le ola” ma “e le alu atu lava se tasi i le Tama, pe a le ui mai ia te [Ia]” (Ioane 14:6). O nisi Kerisiano i aso nei, o e popole mo le toatele o tagata ua maliliu e aunoa ma se malamalama ia Iesu Keriso, ua amata ona tau manatunatu pe moni ea e na o le “tasi le Alii, tasi le faatuatuaga, e tasi le papatisoga” (Efeso 4:5). Ua latou fai mai, o le talitonu o Iesu o le Faaola lea e toatasi, o le faasausili lea, papau o le tofa, ma le fai manatu. Ae peitai, tatou te faapea atu, o se manatu sese lea. E leai se le tonu o i ai i le Tasi o le e mafai ona oo mai ai le faaolataga, pe a ofoina atu le Tasi lena ma Lana faaolataga i tagata uma, ma e leai se tasi e le aofia ai.
O Tulaga o le Faaolataga ua Faatulagaina e Keriso
Ona ua tatou talitonu o Iesu Keriso le Togiola, ua tatou taliaina ai foi Lana pule e faatulaga ai ni tulaga ina ia mafai ona tatou maua Lona alofa tunoa. Ana leai semanu tatou te le popole lava i le papatisoina mo e ua maliliu.
Na faamautu mai e Iesu e faapea “e vaapiapi le faitotoa, e lauitiiti foi le ala e tau atu i le ola” (Mataio 7:14). Sa Ia fetalai patino mai, “Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5). O le uiga o lenei mea e ao ona tatou “salamo, ma ia taitasi ma papatisoina outou … i le suafa o Iesu Keriso mo le faamagaloina o agasala, ona maua lea … o le mea foai fua mai o le Agaga Paia lea” (Galuega 2:38).
E ui lava ina sa leai Sana agasala, ae na papatisoina lava Iesu Keriso ma maua le Agaga Paia. Na fetalai o Ia, “O le ua papatisoina i lo’u igoa, o ia e foaiina i ai le Agaga Paia e le Tama e pei o au nei; o lenei, ina mulimuli mai ia ia te au, ma faia mea ua outou vaavaai mai ai ia te au ua ou faia” (2 Nifae 31:12).
E leai ni tuusaunoaga na faia; e leai ni tuusaunoaga e manaomia. O le toatele o e o le a talitonu ma papatisoina—e aofia ai le fai ma sui—ma tumau i le faatuatua, o le a faaolaina, “e le na o i latou na talitonu ia [Keriso] ina ua mavae ona afio mai o Ia i le vaeluaga o aso, i le tino, a o i latou uma mai le amataga, e faapea i latou uma na i ai a e lei afio mai o ia” (MFF 20:26). O le mafuaaga lenei na talaiina ai le talalelei “i e ua oti, ina ia faasalaina i latou i le tino i la le tagata, a e ola ai i le agaga i la le Atua” (1 Peteru 4:6).
Faasaolotoina o e ua Maliliu mai le Falepuipui
O sauniga sui o loo tatou faataunuuina i totonu o malumalu, e amataina i le papatisoga, ua mafai ai se sootaga maopoopo i le va o augatupulaga e faataunuuina ai le faamoemoega o le foafoaga o le lalolagi. O le mea moni, a aunoa ma nei sauniga, “e matua faatafunaina lava le lalolagi atoa i Lona [Keriso] afio mai” (MFF 2:3).
I tusitusiga paia, o agaga o e ua maliliu o nisi taimi e faatatau i ai, o loo i le pouliuli po o le falepuipui (tagai Isaia 24:22; 1 Peteru 3:19; Alema 40:12–13; MFF 38:5). O le manatunatu ai i le fuafuaga matagofie a le Atua mo le togiolaina o Lana fanau nei, sa tusia ai e Iosefa Samita le salamo lenei: “Ia olioli o outou loto, ma ia sili ona fiafia. Ia alaga le lalolagi i pesega. Ia tautala mai e ua oti i pese o viiga faavavau i le Tupu o Emanuelu, le na faatonuina a o lei i ai le lalolagi, ina ia tatou togiolaina i latou mai lo latou falepuipui aua o le a saoloto e pagota” (MFF 128:22).
O lo tatou tiute e faasafua atu i le mamao ma i le loloto e pei o le alofa o le Atua ia aofia ai Ana fanau i taimi ma atunuu uma. O a tatou taumafaiga e fai ma sui o e ua maliliu e fai ma molimau mamana o Iesu Keriso o le Faaola paia o tagata uma. O Lona alofa tunoa ma folafolaga e faapea foi ona oo atu ia i latou uma o e le mauaina o Ia i lenei olaga. Ona o Ia, e moni lava o le a faasaolotoina ai pagota.
Ata o le vai papatisoga o le Malumalu o Newport Beach Kalefonia na saunia e Welden C. Andersen, © IRI, e le mafai ona kopiina; O Ioane le Papatiso o loo Papatisoina Iesu, na saunia e Harry Anderson, © IRI
Ata pue o le vai papatisoga o le Malumalu o Helsinki Finelani na saunia e John Luke, © IRI, e le mafai ona kopiina; O Loo Soifua Lou Faaola, saunia e Roger Loveless, e le mafai ona kopiina