Saili ma Laveai
O le a le uiga ia te oe o le saunia mo mea e tutupu faafuasei? I le Dominican Republic, o lona uiga o nei alii ma tamaitai talavou ua saunia e tuuina atu se fesoasoani.
Latou te fesoasoani i tagata e manunua i faalavelave tautaavale. Latou te laveaiina tagata taeele e malelemo ma saili tagata sopo po o tagata suesue i ana e leiloloa pe manunua. I aso malolo latou te faagaoioia ai ni tulaga i tafatafa o auala savali e fesoasoani ai ia i latou o e pagatia. Latou te fesoasoani i polokalama o tuiga i le lotoifale. Ma latou te iloa mea e fai i le taimi o se mafuie, afa, po o isi faalavelave.
Ua aoaoina i latou i tulaga faavae ma maualuga atu o fesoasoani muamua, laveaiina i vai, laveai i nofoaga vaiti, tali atu i taimi o faalavelave, ma tomai e ola ai. Latou te iloa a latou tusi lesona mo aoaoga faamasani ma faataitaiga i potuaoga, ae latou te aooga faamasani foi i totonu o potuaoga, sopo i mauga ma ana ia latou te faataitaia ai ni tulaga pagatia moni. Ona latou faafetauia lea o tulaga moni o faalavelave faafuasei.
Talu lava ona faatulagaina la latou polokalama i le 2003, ua latou fesoasoani ai i le silia i le 300 tagata, o le toatele lava na i ai ni manuaga tuga pe ogaoga. Sa latou fesoasoani foi e faatosina atu le toatele o le tupulaga mai auala o faafitauli i a latou potopotoga ma aoao i latou e uiga i le loto pulea ma le alofa.
E Faasinotonu i le Auauna Atu
O i latou o le Comité de Emergencias Santo de los Últimos Días, o le Komiti a le Au Paia o Aso e Gata Ai mo Faalavelave Faafuasei, o se vaega volenitia e avanoa mo soo se tasi e naunau e mulimuli i a latou tulafono o le faaaloalo ma le auauna atu. Ma o lo latou totonugalemu o loo i ai ni tupulaga o le Au Paia o Aso e Gata Ai, e taitaiina e ni tagata matutua tuutoina. E sili i le 200 le autalavou ua auai i le vaega talu lona amata mai.
“Sa ou iloa le komiti ina ua ou sau i se sauniga papatisoga i se tasi Aso Toonai,” o le tala lea a Junior Rivera. “Sa ou vaaia i totonu o se isi potu, ia nei tamaiti uma e pei o au, sa ofu uli, ma se anavatau i o latou mitiafu ma pulou, sa aoaoina ia fesoasoani muamua. O le mea na matuai ou fiafia lava i ai o le taimi na ou iloaina ai sa sauniuni i latou e fesoasoani atu i isi tagata. Sa ou vaai i ai o se auala e fai ai se mea lelei, ma o se tasi lena o aoaoga a le Ekalesia, o le aapa atu ma fesoasoani ia i latou o siomia i tatou.”
Sa faamatala mai e Onel Rodriguez e faapea, e aoao e le vaega ia faiga e talitutusa lava ma mataupu faavae o le talalelei. “Mo se faataitaiga,” na ia fai mai ai, “i se faalavelave faafuasei, ua matou aoao ai ia taulimaina muamua o tatou lava aiga. Ma a tatou iloa loa ua saogalemu i latou, ona mafai loa lea ona tatou fesoasoani atu i isi. O le mea lena o loo aoao mai e le Ekalesia e uiga i le uelefea. Tausi muamua o tatou lava aiga; ona fesoasoani atu ai lea i isi.”
Fai mai Franklin de los Santos, o le galue ai i le sauniuni mo taimi o faalavelave ua fesoasoani ia te ia e iloa ai o nisi taimi e tutusa lava le taua o le manaomia o le saili ma laveai faaleagaga ma le tausiga faaletino. “O nisi tagata e manaomia se fesoasoani po o ni upu agalelei po o se molimau e faasoa atu e fesoasoani latou te malolosi ai,” o lana tala lea. “A tatou ola i le talalelei, e tatau foi ona tatou tausia ma faamalolosia isi tagata i le faaleagaga.”
E Faasinotonu i le Faatinoina
Sa taua e Omar Rodriguez o le tele o gaoioiga a le komiti sa faaaoga e faataunuu ai tulaga manaomia o le Tiute i le Atua ma ua fuafuaina ina ia o faatasi ma gaoioiga a le Perisitua Arona ma le Mutuale.
Fai mai José Núñez, o le fesoasoani lua i le au epikopo a le Uarota a La Caleta, a o aoaoina e le autalavou le talalelei i a latou vasega ma korama, e fesoasoani le komiti ia latou faatatauina mea o loo latou aoaoina i aso uma o le olaga. “A i ai i latou i le auala ma maua se fesootaiga tuusao ma tagata matitiva, ona latou iloa moni ai lea o le uiga o le alofa atu i le tasi,” o lana saunoaga lea “Latou te atiina ae le alofa mo tagata e siomia i latou. Ma latou te atiina ae foi le alofa mo i latou lava aua latou te aoao e uiga i le loto pulea, ma o lena tulaga latou te maua ai le toa e galulue ai i ni auala talafeagai e le afaina po o fea lava latou te i ai.”
Na taua foi e Uso Núñez, e le suitulaga le komiti i gaoioiga masani a le Ekalesia. “Na te faaopoopo atu i ai,” o lana tala lea. “Mo se faataitaiga, i korama a le au perisitua ma vasega a Tamaitai Talavou, e aoaoina ai i latou i mataupu faavae o le talalelei. Ae o gaoioiga e mafuli atu i le talalelei e pei o galuega fesoasoani a le komiti ma isi, latou te maua ai le avanoa e faataitai ai mea na latou aoaoina.” O se tasi lena o auala, na ia fai mai ai, e mafai ona avea ai i latou ma “e anaana i le upu, a e aua le na ona faalogologo i ai” (Iakopo 1:22).
E Faasinotonu i le Alalafaga
Fai mai Omar e masani ona talosagaina le komiti e fesoasoani i polokalama a le alalafaga e pei o tuiga o le misela. “Matou te fia auai i soo se mea lava e manaomia ai le fesoasoani,” o lana tala lea, “ma ua silafia lava e le alalafaga lena mea. Latou te faatuatuaina i matou aua matou te saunia lelei lava.” O le mea moni, o le comité, sa faavaeina e tagata o le Ekalesia i Basilio Cabrera ma Domingo Peralta, o loo faaaogaina ia metotia e tasi e pei ona faaaoga e iunite o le Koluse Mumu ma le puipuiga a le malo. Ua tuuina atu e le matagaluega o le soifua maloloina lautele i le vaega ua lagolagoina e le AAG se faamamaluga faapitoa, ma na tuuina atu foi e pulega a nuu ma itumalo ni taui i le vaega.
Sa taua e Uso Núñez ua fatuina e le komiti ni fuafuaga e tali atu ai i faalavelave faafuasei e tusa ai ma se suesuega o sone pagatia i Santo Domingo ma alalafaga lata mai. “I se faalavelave faafuasei matou te o atu ai i na sone ma iloilo pe o i ai ni tagata o le Ekalesia e manaomia le fesoasoani,” o lana saunoaga lea. “Ae o le taimi lava foi lena, matou te iloiloina ai manaoga o tagata uma i lena eria ma lipoti atu i taitai. Matou te faailoaina po o le fea nofoaga o le a sili atu ona pagatia pe a tulai mai se afa, mafuie, lologa, po o se mea faapena. Ua matou iloa po o le fea eria o le a manaomia ona tapena ese i se taimi vave. Ua matou iloa foi ia lala laau e tatuu ina ia taofia ai ni mea e faaleagaina pe a oo mai ni matagi malolosi. O se vaega lenei o mea ua tofia le autalavou e fai.”
E faataatiaese foi e sui o le komiti ia nisi o o latou taimi malolo i le Kerisimasi ma le Eseta ina ia, mafai ona latou auai i se matavao e 24-itula, i lalo o le taitaiga a le au matutua. “Matou te faia lenei mea aua o aso nei e toatele ai tagata e lavevea i faalavelave pe oo i ni puapuaga ona o lo latou inupia,” na saunoa ai Uso Núñez. O le mea moni ua aoao ai sui o le komiti, i se auala sili ona mataalia, o le taua o le ola i le Upu o le Poto (tagai MFF 89).
Saunia, Naunau, Uunaia
Aisea lava ua faaavanoa ai e sui o le komiti o latou taimi ina ia auauna atu? Aisea e fai ai fua na mau aoaoga faamasani?
Fai mai Omar e ui ina tele se taimi ma se taumafaiga e alu ai, ae e matuai aoga lava. Na te lagonaina faapitoa le fiafia ona e mafai ona ia fesoasoani atu i isi tagata, o se mea sa ia aoaoina tele i le maea ai o le afa fulifao o Noel. “O lo tatou tiute o le fesoasoani ia i latou e manaomia le fesoasoani ia maua ni lavalava ma ni meaai,” na ia fai mai ai. “Sa ou vaai i tagata na pagatia, ma mafai ona avatu ia i latou ni lavalava ma ni meaai, ma vaaia ai lo latou faamalieina, o na vaaiga ou te lagona ai lava le fiafia.”
Fai mai Osiris Rodriguez na te talisapaia le lotogatasi na te lagonaina i le komiti. Na te vaai i ai o se faalauteleina o le lotogatasi lea na te lagonaina i totonu o lana korama ma faatasi ai ma le autalavou i le lautele o le Ekalesia.
Fai mai Junior Batista, o le na auai i le Ekalesia i ni nai masina ua mavae, ina ua ia faalogo i le komiti mo faalavelave faafuasei, sa naunau lava o ia ina ia auai i ai. Ma e lei faanoanoa ai lava o ia. “Matou te lagonaina ni lagona lelei ona o loo matou faataunuuina le poloaiga o loo fai mai e tatau ona tatou alolofa atu le tasi i le isi. Ua tatou faatasi o ni uso ma ni tuafafine, atalii ma ni afafine o le Atua.”
A i ai ni ou lagona faapena e uiga i le auauna atu, o le a faaauau ona e auauna atu.
Ata na pueina e Richard M. Romney
Osiris Rodriguez
Junior Rivera
Junior Batista
José Núñez