Savavali i le Faatuatua, Ae Le o le Tino Mai o Mea
O Daggi Ramirez de Vargas ua 15 tausaga o tauaso, ae o le tele lava o itu e manino ai lava lana vaai. “O le vaai faaletino e fai lava si malie,” o le tala lea a le tina ua 70 ona tausaga. “Ae e mafai ona faalavelaveina ai la tatou vaaiga faaleagaga.”
O Tuafafine Daggi, e pei ona lau silafia ai o ia, na po lana vaai ina ua motusi afuafu o ona mata i le mavae ai o ni taotoga o ni tu i ona mata uma e lua.
“O le taimi muamua sa ou mafaufau ai pe o le a faapefea ona ou faia mea uma,” o lana tala lea. “Ae o lea ou te feosofai lelei lava. Ou te faia auli, ou te suisui, ma ou te kuka. E leai lava se isi e fesoasoani mai pe a ou kuka,” o lana tala ata lea. “Ou te faaaogaina ni naifi tetele lava.”
E ui lava i le popole o Tuafafine Daggi i le faatumauina o lona tutoatasi faaletino, ae sa faapena foi lona naunautai e tumau lona faalagolago ia te ia lava i le faaleagaga, i le ola lea i le malamalama o lana lava molimau patino e uiga ia Keriso nai lo le faalagolago i se isi tagata mo se malamalama o le upumoni.
O Le Malamalama o le Talalelei
A o lei auai o ia i le Ekalesia i le 1962, o Tuafafine Daggi, o le ua avea nei ma se tagata o le Uarota a Miraflores, Siteki a Viña del Mar Chile Archupallas, o le taimi lena sa lei leva ona faaipoipo o ia ma sa mafaufau po o le fea le ekalesia moni.
I se tasi po sa fai ai sa na miti e uiga i tagata mai le lalolagi atoa, ma sa ia vaaia ai ni laei sa ese lava le papae. O le aso na sosoo ai, i le fale sa faigaluega ai e tapena, sa ia vaaia ai ia lava laei o tautau i le uaea tautau tagamea.
Sa tau atu e lona pule o ia laei sa faaaoga i malumalu o le Ekalesia Mamona. E lei leva ae feiloai atu Tuafafine Daggi i faifeautalai o e na o mai mai tuluiga o le lalolagi e tatala ona mata faaleagaga i le malamalama o le talalelei.
O Se Ala na Faamalamalamaina e le Upu
E fiafia tele Tuafafine Daggi i le talalelei a Iesu Keriso, ma sa masani ona ia faitauina ma le faamaoni ana tusitusiga paia seia oo lava ina tauaso o ia.
“Ina ua po la’u vaai, sa ou tatalo ina ia mafai ona ou taofimauina Lana upu,” o lana tala mai lea. O le taofimauina o Lana upu sa taua ia te ia o se faailoga o le vaaiga faaleagaga.
Ma e ui ina ua tatau nei ona ia aoaoina le talalelei i isi auala, ae talitonu Tuafafine Daggi “o [lau] afioga o le sulu lea i o’u vae, ma le malamalama i lo’u ala” (Salamo 119:105). O ia o se faataitaiga ola o le folafolaga a le Faaola: “O au nei o le malamalama o le lalolagi: o le mulimuli mai ia te au, e le savali o ia i le pouliuli, ae ia te ia le malamalama o le ola” (Ioane 8:12).
E tusa ai ma se saunoaga a lona toalua, o Juan, sa faamamaluina e le Alii lana [Tuafafine Daggi] talosaga faamaoni. “E matuai pue lelei e lona mafaufau ia mea. E mafai ona ia talanoa e uiga i se mataupu mo le fia itula,” o lana ataata uigā lea.
“Afai e te ole atu, o le a e maua,” o lana tali mai lea. “O loo lelei lava le vaaiga o lo’u agaga.”
Ua Faaalia Mai Galuega a le Atua
O aafiaga ua oo i ai Tuafafine Daggi o le taumafai lea e faatumauina lona faalagolago ia te ia lava i le faaletino ma le faaleagaga talu mai ona po lana vaai, e manatua ai le taulealea tauaso o loo i le Tusi a Ioane o le na fesili ai le au soo, “Rapi e, po o ai ea na agasala, po o ia nei, po o ona matua, ina ua fanau mai o ia o tauaso?”
Ua tali atu le Faaola, “E lei agasala lenei tagata, po o ona matua: ae peitai ina ia faaalia ai o galuega a le Atua ia te ia” (Ioane 9:2–3).
Ua faaalia galuega a le Atua i le soifuaga o Tuafafine Daggi. E ui lava ina po lana vaai, ae ua ia vaaia le tele o vavega ma mafai ona molimau mai “o le faatuatua ua matou savavali ai, ae le o le tino mai o mea” (2 Korinito 5:7).
I se afiafi o se tasi Aso Sa na asiasi mai ai faiaoga o aiga a le aiga. Sa tauivi le aiga ma le leai o se tasi na faigaluega i lena taimi, ma o le po lena sa na o le afa ipu alaisa lava na totoe, ma sina gao fai meaai laitiiti, ma ni tamato laiti se lua. Ae o le agaga faafetai mo nei faiaoga o aiga faamaoni, sa ia talosagaina ai i laua latou te faiaiga faatasi.
“Na fesili mai la’u tama teine pe aisea ua ou faia ai lea mea,” o le tala lea a Tuafafine Daggi. Ae sa fai atu o ia i lana tama teine e seti le laulau. Ona alu lea o ia i le umukuka ma tatalo ai, “Le Alii, sa e fafagaina le 5,000 o tagata. Ae ua ou ole atu mo na o le toafitu [o i matou].”
“O lena araisa sa taumamafa ai ni tagata se toafitu,” sa ia molimau mai ai.
Tuuina Atu o le Faafetai mo Lona Malamalama Ofoofogia
O loo silafia e Tuafafine Daggi e ui ina pogisa lana vaai faaletino, ae o loo i ai se malamalama sili atu lea e mafai ai ona vaai.
Na aoao mai Isaia “e le toe faia le la mou malamalama i le ao; e le faamalamalama foi ia te oe le masina i lona susulu mai: a e faia Ieova mou malamalama e faavavau” (Isaia 60:19).
“Sa fetalai Iesu e uiga i tagata o e ua i ai mata ae le vaai. O loo faapena lava i aso nei,” o le tagi faanoanoa lea a Tuafafine Daggi. “Ua siomia i tatou e vavega, ae e toatele ua latou le vaaia.”
E faafetai Tuafafine Daggi mo le tele o faamanuiaga o loo ia fiafia ai ma taumafai e ola i le apoapoaiga a Peteru ina ia “tautau atu ona lelei na ia valaau ia te outou nai le pouliuli e oo i lona lava malamalama e matua ofo ai” (1 Peteru 2:9).
“O loo ou fiafia lava [i le tulaga o loo o’u i ai]. Ua tuuina mai e le Tama Faalelagi ia te au se soa lelei. Sa ma o atu i le malumalu ma faamauina ai i maua,” o lana tala lea. “Ua tumu lo’u olaga i vavega. I le faaleagaga, o loo lelei lava la’u vaai.”
Agavale: ata pue © Comstock.com; taumatau: ata na pueina e Adam C. Olson
O Iesu o loo Faamaloloina le Tagata Tauaso, saunia e Carl Heinrich Bloch, mai faaaloaloga a le National Historic Museum i Frederiksborg Hillerød, Tenimaka