Teuina o Meaai a le Aiga: O Se Savali Fou
Siaki le aso na uma ai le aoga o ou manatu e uiga i le teuina o meaai i le fale. Atonu e manaomia ona e lafoai nisi o na manatu.
I le avea ai o se tina nofotoatasi e faigaluega i se ofisa loia i Phoenix, Arisona, ISA, sa tauivi ai Evelyn Jeffries e sue le taimi ma le avanoa talafeagai mo le teuina o meaai i le fale. E ui ina sa auai o ia i gaoioiga ma fonotaga e uiga i le teuina o meaai ma taumafai e usitai i le fautuaga faaperofeta, ae e pei lava o le toatele o tagata o le Ekalesia, sa faigata ia te ia ona mafaufau po o le a se mea o le a fai i le faitau selau o pauna saito sa faatonuina o ia e tatau ona i ai mo i laua ma lana tama teine.
Ina ua fautuaina e se tuafafine o le uarota se auala e ese mai, sa iloa e Tuafafine Jeffries o le autu i le faamanuiaina o le teuina o meaai i le fale: o le faifai soo ma le faifai malie o le faateleina o lana sapalai meaai.
O le tuuese o se aofaiga faapitoa i lana paketi mo le teuina o meaai i le fale, sa faapea ona ia faatauina ai ni aitema faaopoopo mai le faleoloa i vaiaso taitasi. Sa ia faatauina foi se aitema o meaai autu e pei o saito ma pi mai le nofoaga autu o meaai e teu a le Ekalesia i masina taitasi.
O ni tausaga se tele mulimuli ane, ia Oketopa 2002, sa faagaeetia ai lava Tuafafine Jeffries ina ua fautuaina e Peresitene Gordon B. Hinckley (1910–2008) e faapea, e tatau i tagata o le Ekalesia ona faaaoga se taumafaiga faigofie atu i le teuina o meaai i le fale.
“E mafai ona tatou amatamata i nai mea iti,” na saunoa ai Peresitene Hinckley. “E mafai ona tatou amata teu ni meaai mo le vaiaso, ma faasolosolo malie atu ai lava ona teu mo se masina, ona sosoo ai lea ma le tolu masina.”1
Sa taua e Tuafafine Jeffries e faapea “o le manaia o lenei faiga o le fetaui tonu lea i aiga ua faatoa amataina a latou polokalama o le teuina o meaai, faapea foi ma i latou o loo nonofo i ni fale e laiti ane faapea ma fale mautotogi, ia e manaomia ai ni avanoa se tele ae faigata ona maua. Na silafia lelei lava e Peresitene Hinckley lena suiga ma e manaomia ona fetuutuunai ina ia mafai ona faamanuiaina uma ai i tatou mai le polokalama musuia a le Alii.”
O Se Taumafaiga Fou
I le agaga o le saunoaga a Peresitene Hinckley, na filifili ai taitai o le Ekalesia e toe sailiili ma le totoa i la latou auala o le faatinoina o le faalagolago o le tagata ia te ia lava, ma silasila ai i ni auala e faamamafaina ai manatu o le saunia mo le teuina o meaai i le fale ma tulaga tautupe. O se taunuuga, na lomiaina ai e le Ekalesia le tamaitusi Ia Saunia Mea Tatau Uma: Teuina o Meaai a le Aiga,o loo otootoina atu ai ni taiala fou mo le saunia o le aiga, lea ua tuuina atu ai i tagata o le Ekalesia se auala faigofie, e fa laasaga i le faaputuina o a latou meaai e teu i le fale.
O auala nei:
-
Ia faaputu se sapalai laitiiti o meaai lea ua avea o se vaega masani o a outou mea e ai i aso taitasi, seia oo ina lava mo se tolu masina.
-
Teu vaiinu.
-
Ia faavae se tupe faaleoleo e ala lea i le teuina o sina seleni i vaiaso taitasi ma faasolosolo ai lava ona faatupulaia i se aofaiga talafeagai.
-
O le taimi lava e ausia ai e aiga ia faamoemoega muamua e tolu, ua fautuaina i latou e faalautele a latou taumafaiga, i tulaga e mafai ai, i se sapalai o meaai masani e umi ona teu e pei o saito, fatupi, ma isi meaai masani.
Na saunoa le Epikopo Pulefaamalumalu o H. David Burton e uiga i nei taiala fou e faapea, “O le matou faamoemoega o le faatuina lea o se polokalama faigofie, e le taugata, ma ausiagofie e fesoasoani ai i tagata ia avea ma ni tagata e faalagolago ia i latou lava. Matou te lototele lava o le faailoaina atu o nei laasaga faigofie, e mafai ai, i le aluga o taimi ona maua se faamanuiaina sili atu.”
Taiala 1: Faaputuputu malie lau sapalai o le tolu masina.
Amata i mea laiti ma fai le mea sili e te mafaia. Amata i le faatauina o nai aitema faaopoopo e faaopoopo i au meaai e teu i vaiaso taitasi. Taumafai e faaputu se sapalai o se vaiaso se tasi; ona faatele atu lea i se sapalai o se masina se tasi, ma faasolo atu ai i se sapalai o le tolu masina. O le faaputuputuina malie o lau sapalai, e mafai ai ona e aluese mai faafitauli tautupe ma e amata uia ai le ala e agai atu i le faalagolago o le tagata ia te ia lava.
Ua iloa e le aiga o Lugo i Valencia, Venesuela, o lenei faiga fou o le amatamata malie atu ma le faifai soo, e tauia ai i ni vaega tetele. Ina ua uma ona faalogologo i le konafesi aoao, na lagona ai e Uso Omar Lugo, o se tagata o le Ekalesia i le Itu o Falcón Venesuela, le musuia e amata ona teuina ni ana meaai. Sa ia talanoaina lea mataupu ma lona aiga, ma sa latou ioe ai e mulimuli i le fautuaga a le perofeta.
Na amata ona latou tuueseina ni meaai, vai, ma tupe, o le taimi lava ma sina mea itiiti. O le taimi muamua sa faigata ai lava ona iloa se eseesega. Ae ina ua mavae sina taimi na iloa ai e le aiga o Lugo sa latou faaputuputuina ni mea faaleoleo se tele. O ni nai masina talu ona amata faaputuina a latou meaai e teu i le fale, na tulai mai ai se solotetee a tagata faigaluega i Venesuela lea na faaletonu ai le tele o galuega a tagata i le lotoifale. O Uso Lugo o se tasi lea o i latou na iu ina leai ni galuega.
Mo se taimi, sa ola ai lona aiga i a latou tupe na teu. O le fitu masina mulimuli ane na faalagolago tele ai le aiga o Lugo i meaai sa latou teuina. Na toeitiiti atoa le lua tausaga o tau sue se galuega a Uso Lugo, ae sa mafai ona ola lona aiga i luitau faigata o le leai o se galuega. Sa latou faaputuputu malieina a latou mea faaleoleo, ma ina ua oo mai faigata, sa saunia i latou ma sa faamanuiaina i latou e le Alii.
E pei o le aiga o Lugo, o le a faamanuiaina tagata o le Ekalesia ona o lo latou usiusitai i le fautuaga a le Au Peresitene Sili, a o latou faaputuputuina malie a latou meaai e teu i le fale. “Matou te talosaga atu ina ia outou atamamai a o outou teuina ia meaai ma vai ma faaputuputu a outou tupe teu,” na saunoa mai ai le Au Peresitene Sili. “Aua foi nei soona faia; mo se faataitaiga, e le o se faiga faautauta le nofo aitalafu ina ia teuina ai a outou meaai uma i le taimi e tasi.” Ae, ua latou fautuaina se faiga faatauvaa, ma faifaipea. “O le fuafuaina ma le faaeteete, e te mafaia ai i se taimi umi ona faavaeina se sapalai o meaai e teuina i le fale ma se vaega tupe faaleoleo.”2
Taiala 2: Teu vaiinu.
I taimi e pagatia ai, o le i ai o ni vai e inu e mafai ona fai ma eseesega i le va o le ola ma le oti—pe o soo se tulaga i le va o le toafilemu ma le atuatuvale. Ia sei fesili la i le auaiga o Kawai, o ni tagata o le Siteki a São Paulo Pasila. E 20 tausaga o latou teuina ni meaai ma vai. E ui lava o le latou falemautotogi laitiiti e le tele se avanoa na totoe ai, ae sa filifili lava le auaiga o Kawai e faamuamua le teuina o meaai ma vai i le fale.
Sa faamatala e Tuafafine Kawai e uiga i se tasi aafiaga na aoga tele ai lena filifiliga. “Sa ou i ai i le falemai i le faatoa uma ai ona ou fanau, ae ou iloa ai sa i ai se faaletonu i paipa i le taulaga,” o le tala lea a Tuafafine Kawai. “E faitau selau afe tagata na le maua se suavai. Ae sa ou le popole i le toe foi atu i le fale. Sa toafilemu lo’u mafaufau i le iloaina o le a i ai ni vai e inu a lo’u aiga.”
Taiala 3: Ia faataatiaese se tupe itiiti.
Mai le Au Peresitene Sili na oo mai ai le fautuaga lenei: “Matou te fautuaina outou pe o fea lava o outou nonofo ai i le lalolagi ina ia saunia mo faigata e ala i le tagatagai i le tulaga o a outou mea tau tupe. Matou te uunaia outou ina ia faautauta i a outou tupe faaalu. … Teu sina tupe e le aunoa, e faifai malie ai lava ona fausia se tupe faaleoleo.”3
I le konafesi aoao ia Aperila 2007 na toe faamamafaina ai e Epikopo Keith B. McMullin, Fesoasoani Lua i le Au Epikopo Pulefaamalumalu lenei mataupu faavae, i le apoapoai atu i tagata o le Ekalesia e “teuina sina tupe, na o ni nai siliva i vaiaso taitasi. O lenei auala faigofie o le a le umi ae mafai ai e i latou ona i ai se faapolopolo mo ni masina se tele.”4
O le faaputuputuina malie o se tupe faaleoleo, o le a tatou saunia ai mo tofotofoga e le muai iloaina ma maua ai se fuataga faaopoopo o le saogalemu ma le toafilemu i o tatou loto.
Taiala 4: Pe afai e mafai, ia faifai malie le teuina o se sapalai mo se taimi e umi atu.
“Mo manaoga mo taimi uumi,” ua faamalamalama mai i le tamaitusi Ia Saunia Mea Tatau Uma, “o meaai ia o le a umi se taimi e lelei ai ma e mafai ona e faaaogaina ina ia ola ai pea, e pei o saito, araisa papae, ma pi.”5
O le faatulagaina o le teuga o mea e manaomia mo se taimi umi e faigofie atu nai lo le mea ua manatu i ai nisi tagata. Na faatautaia e Dr. Oscar Pike ma ana paaga o le Matagaluega o Taumafa Paleni, Taumafa Fuafua, ma le Saienisi o Taumafa a le Iunivesite a Polika Iaga, ni suesuega loloto e uiga i le teuina o meaai. Sa latou maua ai se mea e faateia ai: o le teuina faalelei ma le teuina o meaai e maualalo lava le susu, e faatumauina ai le tele o lona tofo lelei ma le tele o lona paleni mo le 20 i le 30 tausaga pe sili atu foi pe a teuina—e sili atu le umi nai lo le manatu sa i ai muamua.
O lona uiga e mafai e tagata o le Ekalesia ona teu ni meaai faapitoa mo se taimi umi e aunoa ma le popole e faaaoga faasolosolo ia meaai. E mafai ona latou toa lelei o le a i ai lava a latou sapalai e tausi ai i latou pe afai ua leai lava nisi mea e ai.
O Le Taimi e Amata Ai o Nei Lava
“Atonu i aso ua mavae o le faaputuina o se sapalai meaai mo le tausaga atonu sa fai si taufaafefe ma e faasa foi i nisi o nofoaga,” o le saunoaga lea a Dennis Lifferth, o le pule faatonutonu o Auaunaga Uelefea a le Ekalesia. “Ae o le faiga fou lenei ua talosagaina ai i tatou e fai le mea sili tatou te mafaia, e tusa pe afai na pau le mea tatou te mafaia o le taatiaese lea o se apa meaai se tasi pe lua i vaiaso taitasi. Afai ua saunoa mai le perofeta ina ia tatou faia se mea, e mafai ona tatou sailia se auala e faataunuu ai le poloaiga ma maua ai faamanuiaga.”
“O le polokalama fou lenei e mafai lava e tagata uma ona fai,” o le faamalamalama mai lea a Epikopo Burton. “O le laasaga muamua lava o le amata. O le lona lua o le faaauau ai pea. E le afaina pe o le a le vave tatou te ausiaina ai, ae tau lava o le amata ma faaauau ai lava e tusa ai ma mea tatou te gafatia.”
Ata na tusia e Welden C. Andersen
Pito i lalo i le agavale: ata pue na saunia e David Newman; pito i lalo i le taumatau: Polika Iaga, na saunia e John Willard Clawson
I le 1936 na amataina ai le polokalama faauelefea a le Ekalesia i lalo o le taitaiga a le Au Peresitene Sili. Mai le tauagavale: Tavita O. MaKei (Fesoasoani Lua), Heber J. Grant (Peresitene), ma J. Reuben Clark Jr. (Fesoasoani Muamua).