O La’u Tatalo i totonu o se Pa Povi
Ona o se lamala, sa tatau ai ia i maua ma lou toalua o Ioane, ona a le o le faatau atu o le ma lafu povi i se tau faatautiai po o le aveese atu o i latou mai le Vanu o Melba, i Idaho sautesisifo, ISA. O le mea na laki ai, na maua e Ioane se laufanua taalaelae i le faatoaga a le aiga o se tausoga, sa tu i le eria o Preston, e tusa ma le 300 maila (480 km) le mamao.
Sa matou tuupoina ma se aveloli e la’u uma atu i ai povi e 40 i se uta e tasi, ae sa faalefiafia tele o ia i le lauleaga o le auala o le pa povi lea e tau atu i le vao e aai ai povi, e 20 isi maila (32 km) e mamao ai. I lo ma le fiafia tele, sa ia tuuina i latou i pa povi na lata mai [i le auala] Sa matou i ai iina, i le leva o le taeao ma ni povi se 40 e fia lauina ae sa leai se auala e fai ai.
Sa taofi e Ioane se faifaatoaga a le nuu, ma faamatala atu i ai le ma faafitauli, ma talosagaina mo se fesoasoani. O nai minute mulimuli ane, na mulimuli atu ai Epikopo Steve Meeks ma lona atalii laitiiti ia i maua i le pa povi e vaai po o le a se mea e mafai ona fai.
Na amata ona le nofonofo lelei povi. O le vaaia o se vaega na motu o le pa, sa tamomoe atu loa i ai povi, e tau saili se mea e saoloto ai. Na taufai lolou uma e povi le pa agai i le isi fanua na pa—sei vagana ai se povi e tasi. Sa mafai ona sao i le isi itu le tele o lona tino, ae na see le isi ona vae pito i tua i le va o ni laupapa se lua. Sa iu ina tautau o ia i luga o le pa i se tulaga matautia, na o le tasi le vae pito i luma na tau le papai i le eleele. Sa ia aaina solo ma le ita le isi ona vae pito i tua i se taumafaiga ina ia faasaolotoina o ia.
O le faamamuluina o le povi o le a manaomia ai ni meafaigaluega e siligi ai. Afai ae gau lona vae, o lona uiga e tatau ona tape o ia. O le tapeina o se povi o le a matuai tele ai lava se avega tautupe ia i maua.
O le povi na sili atu i le 1,000 pauna (455 kg) le mamafa, ma e le mafai ona ma latalata atu i ai, pe fesoasoani atu foi i ai pe ana mafai. O le faafitauli i luga o le pa na fefefe uma ai isi povi.
Ou te le’i manatu na i ai se mea e mafai ona matou faia, ae o le taimi lena, na ou manatua ai le fautuaga a Amoleka i le Tusi a Mamona: “Ia tagi atu ia te ia pe a i ai outou i o outou fanua, ioe, ia tagi atu ia te ia ona o a outou lafu uma lava” (Alema 34:20). Sa ou aluese mai le isi vaega, tootuli, ma tatalo atu ma le faamaoni atoa o lou loto. O le faaiuina o lau faatoga, sa ou augani ai, “Le Tama Faalelagi, faamolemole sei fesoasoani mai i le povi.”
Sa ou toe foi atu i le pa, sa memumemu lava ou laugutu i le tatalo. Ae o le taimi lea ua fai si toa mai o le lafu, na aofia ai ma le povi sa i luga o le pa.
Na faafuasei lava, ona aluese mai le manu na sili ona tele o le faapotopotoga mai le lafu. O le teteeina o a matou taumafaiga ina ia toe faafoi o ia i tua, sa agai atu ai o ia i le povi o loo tautau. Sa punou lona ulu, ma faapau i ona tulivae, ma fosi lana tolotolo i lalo o le povi na lavea, ma tu lemu ae lava i ona vae. Sa ia siiina le povi na lavea i luga o le ea ona tuutuu malie ifo lea o ia i lalo. Na matala ese le povi! E le lelei foi faapea le faiga pe ana fai i se siligi.
A o taufetuli atu povi e lua i le lafu, sa pulatoa atu Epikopo Meeks ma le le talitonu i le mea na faatoa ia molimauina. Na maligi ou loimata a o ou musumusu faapea, “Le Tama Faalelagi, Faafetai Lava.”
Soo se isi lava e iloa fai lafupovi o le a ia tauina atu o povi latou te le foiaina ni mea i o latou mafaufau. Ae e i ai se faamalamalamaga o lenei mea na tupu. E faafofoga ma tali mai le Tama Faalelagi i talosaga. Sa Ia taliina la’u tatalo—i se pa povi i Preston, Idaho.
Ou te le’i manatu e i ai se mea e mafai ona faia e faasaoloto ai le povi, ae o le taimi lena na ou manatua ai le fautuaga a Amoleka i le Tusi a Mamona.