Savali a le Au Peresitene Sili
O Mai ia te Ia i le Tatalo ma le Faatuatua
Ia e faatuatua ia Ieova ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”1 O le saunoaga lena a le poto o Solomona, le atalii o Tavita, le tupu o Isaraelu.
Na tautino mai Iakopo, le uso o Nifae, “Ia outou faamoemoe atu i le Atua ma le le mafaagaeetia o le manatu, ma ia tatalo ia te ia ma le faatuatua tele lava.”2
I lenei tisipenisione, i se faaaliga na tuuina mai i le Perofeta o Iosefa Samita, na fetalai mai ai le Alii, “Ia faalagolago ia te au i manatunatuga uma; aua le masalosalo, aua le fefe.”3
O lenei fautuaga paia musuia ua oo mai ia i tatou i aso nei e pei o se vai manino i se lalolagi ua matutu.
Ua tatou ola i aso faigata. Ua tutumu ofisa o fomai i tagata o e ua lofituina i faafitauli faalelagona faapea ma le popolevale faaletino. Ua tumusaisai faamasinoga o le tatalaina o faaipoipoga ona o tagata ua i ai faafitauli ua le mafai ona foia. Ua faigaluega i ni taimi umi ia taitai o punaoa faaletagata i ofisa o le malo ma falegaosi oloa i se taumafaiga e fesoasoani atu i tagata ma o latou faafitauli.
Sa faaiuina e se tasi o alii ofisa mo punaoa faaletagata o le na tofia na te taulimaina tagi mo faafitauli e le tuga tele se aso na ese le pisi i le tuuina o se faailoga tausua laitiiti i luga o lana kesi mo i latou e i ai faafitauli ua le mafai ona foia. Sa faitauina, “Sa e taumafaia le tatalo?” O le mea atonu na te le’i iloaina o lenei fautuaga faatauvaa o le a fofoina ai le tele o faafitauli, tuuitiitia ai le tele o mafatiaga, taofia ai le tele o le solitulafono, ma aumaia ai le filemu sili atu ma le faamalieina i le agaga o le tagata nai lo [fautuaga] e mafai ona maua mai se isi lava ala.
Na fesiligia se faamasino iloga a Amerika po o le a se mea e mafai e i tatou o tagatanuu o atunuu o le lalolagi ona fai e tuuitiitia ai le solitulafono ma le le usiusitai i tulafono ma ia aumaia ai le filemu ma le faamalieina i o tatou olaga ma o tatou atunuu. Sa tali mai o ia ma le faaeteete, “Ou te fautuaina se toe foi i le faiga masani tuai o tatalo faaleaiga.”
Malosiaga i le Tatalo
I le avea ai o ni tagata, pe tatou te le faafetai ea ona e le o avea le tu masani o tatalo faaleaiga ma se mea tatou te le o toe faia? E leai lava se vaaiga e sili atu ona matagofie i lenei lalolagi atoa nai lo le vaaia o se aiga o tatalo faatasi. O loo i ai se uiga moni i tua atu o le faaupuga e masani ona taua “O le aiga e tatalo faatasi e au faatasi.”
Na aoao mai le Alii e faapea, ia fai a tatou tatalo faaleaiga ina ua Ia fetalai, “Ia tatalo i o outou aiga i le Tama i lo’u igoa, ina ia manuia a outou ava, ma la outou fanau.”4
E mafai ona outou auai faatasi ma au a o tatou vaavaai atu i se aiga masani o le Au Paia o Aso e Gata Ai o tatalo atu faatasi i le Alii? O le tama, tina, ma tamaiti taitoatasi e tootutuli, punonou o latou ulu, ma moeiini o latou mata. E faatumulia le fale i se lagona manaia o le alofa, lotogatasi, ma le toafilemu. A o faalogo atu le tama i lona atalii laitiiti o tatalo atu i le Atua ina ia fai e lona tama ia mea sao ma ia usiusitai i faatonuga a le Alii, e te manatu o le a faafaigata i se tama faapena ona faamamalu i le tatalo a lona atalii pele? A o faalogo atu se teine talavou i le augani a lona tina lelei i le Alii ina ia mafai ona musuia lana tama teine i le filifilia o ana uo, ma ia saunia o ia lava mo se faaipoipoga i le malumalu, e te talitonu o se tama teine faapena o le a taumafai e faamamalu i lenei aioiga faamaulalo a lona tina, o le e alofa tele i ai o ia? A tatalo faatauanau faatasi tama, tina ma le fanau taitoatasi ina ia ola agavaa o latou atalii lelei ina ia mafai, i le taimi e tatau ai, ona maua se valaau e auauna atu o ni amepasa a le Alii i galuega faamisiona a le Ekalesia, pe tatou te le amata ea ona vaaia le tutupu ae o na atalii i le faatamatane faatasi ai ma se naunautaiga tele e auauna atu o ni faifeautalai?
Ou te mautinoa lava o tatalo faaleaiga na faaosofia ai se tusi na tusia i ni tausaga ua mavae e se tamaitai o le Au Paia o Aso e Gata Ai na aoga i le aoga maualuga i Colorado. Na talosagaina ni tamaiti aoga e saunia se tusi e tusia mo se alii maoae e filifili lava e le tamaitiiti aoga ia. E toatele na ave a latou tusi i tagata taaalo lauiloa, i se tagata iloga i le suesueina o le vateatea, i le peresitene o le Iunaite Setete, ma isi lava tagata lauiloa. Ae o lenei tamaitai talavou, na ave lana tusi i lona tama, ma na ia taua i lana tusi: “Ua ou filifili e tusi atu lenei tusi ia te oe, Tama, ona o oe o le alii aupito maoae ua ou iloaina. O le faanaunautaiga tele o lo’u loto o le, ia mafai ona ou ola ina ia ou maua le faamanuiaga o le i ai i o outou tafatafa ma Tina ma isi tagata o le tatou aiga i le malo selesitila.” Na leai se isi tusi na sili atu ona faapelepele na maua e lena tama.
A o tatou tuuina atu i le Alii a tatou tatalo faaleaiga ma tatalo a le tagata lava ia, ia tatou faia o lea i le faatuatua ma faalagolago atu ia te Ia. Ia tatou manatua le aveae a Paulo i Eperu: “Aua e tatau i le alu atu i le Atua ona talitonu o loo soifua o ia, o ia foi na te tauia mai o e matua saili ia te ia.”5 Afai o loo i ai se tagata o i tatou na faatuai ona faalogo i le fautuaga ia tatalo e le aunoa, e leai se isi taimi e tatau ona fai ai nai lo nei lava. Na tautino mai William Cowper, “E gatete Satani, pe a ia vaaia le [tagata o le] Au Paia e aupito sili ona vaivai ua tootuli.”6 O i latou o e manatu faapea o le tatalo e ono iloa ai le vaivai faaletino pe faaleatamai, e tatau ona manatua e leai se tagata e mafai ona tu maualuga atu nai lo le taimi e i ai o ia i ona tulivae.
E le mafai ona tatou iloa pe o le a le faatuatua, pe afai e le’i ia i tatou lava [le faatuatua], e le mafai ona tatou mauaina pe afai tatou te teenaina. E le mafai ona i ai faatasi le faatuatua ma le masalosalo i le mafaufau e tasi i le taimi e tasi, aua o le a tuliese e le tasi le isi.
Taliaina o Lana Valaaulia
Afai o lo tatou manao o le aveesea o masalosaloga uma ae ia suia ai se faatuatua tumau, e tatau ona tatou taliaina le valaaulia ua faasafua mai ia te oe ma au i le Tusi a Iakopo:
“A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia.
“A ia ole atu ma le faatuatua, aua lava nei masalosalo. Aua o le masalosalo e tusa ia ma le peau o le sami ua sousou i le matagi ma felafolafoaiina.”7
O lenei folafolaga na faaosofia ai le taulealea talavou o Iosefa Samita e saili i le Atua i le tatalo. Sa ia tautino mai ia i tatou i ana lava upu:
“Sa iu ina oo ifo i lou mafaufau le tonu e faapea e ao ona … ou faia e pei ona faatonu mai e Iakopo, o le ole atu lea i le Atua. Sa oo ina tonu ia te au ou te ‘ole atu i le Atua,’ ma lou manatu afai na te foaiina fua mai le poto ia i latou ua leai se poto, ma le le toe tautaua, o le a ou taumafai i ai.
“O lea, e tusa ai ma le mea ua tonu ia te au o le ole atu lea i le Atua, sa ou alu atu ai loa i le vao ou te tatalo atu. … O le taimi muamua lava lea na faatoa ou faia ai se taumafaiga faapea, aua e ui lava i mea uma na ou popole ai, ou te lei taumafai lava e tatalo ma le leo.”8
Ia, afai sa tatou mumusu e ole atu i le Atua lo tatou Tama Faavavau ona tatou te lei faia lava se taumafaiga e tatalo, e mautinoa lava e mafai ona tatou maua le lototele mai le faataitaiga a le Perofeta o Iosefa. Ae ia tatou manatua, e pei ona faia e le Perofeta, e tatau ona faia a tatou tatalo ma le faatuatua, aua lava le masalosalo.
O le faatuatua lea, ae le o le masalosalo na vaai ai le uso o Iareto i le tamatamaiaao o le Atua o pai atu i maa o le tali mai i lana olega.9
O le faatuatua lea, ae le o le masalosalo na fauina ai e Noa le vaa e usiusitai ai i le poloaiga mai le Atua.10
O le faatuatua lea, ae le o le masalosalo lea na malie ai Aperaamo e tuuina atu lona atalii pele o Isaako e fai ma taulaga.11
O le faatuatua lea, ae le o le masalosalo na taitaiina ai e Mose le fanauga a Isaraelu mai Aikupito ma ui atu i le Sami Ulaula.12
O le faatuatua lea, ae le o le masalosalo na soloia ai i lalo e Iosua ma e na mulimuli ia te ia aupa o Ieriko.13
O le faatuatua lea, ae le o le masalosalo, na vaai ai Iosefa i le Atua lo tatou Tama Faavavau, ma Iesu Keriso, Lona Alo.14
Ia, e ono faapea mai le au masalosalo o nei tala maoae o le faatuatua na tutupu i aso ua leva, ma ua sui taimi.
Pe ua sui moni ea taimi? Pe tatou te le o alolofa ea i le taimi nei, e pei ona masani ai, i a tatou fanau ma mananao ia latou ola amiotonu? Pe tatou te le o manaomia ea i le taimi nei, e pei ona masani ai, le tausiga alofa faalelagi a le Atua? Pe tatou te le o faaauauina ea i le taimi nei, e pei ona masani ai, ona i ai i Lona alofa tunoa ma aitalafu ia te Ia mo le ola ua Ia tuuina mai ia i tatou?
E le o i ai se suiga tele i aso nei. O loo faaauau pea ona aumai e le tatalo le mana—mana faaleagaga. O loo faaauau pea ona aumai e le tatalo le filemu—filemu faaleagaga.
Faatuatua i lona Faatinoga
Po o fea lava o tatou i ai, e mafai lava ona faafofogaina ma tali mai lo tatou Tama Faalelagi i le tatalo e tuuina atu i le faatuatua. E faapitoa ona moni lenei mea i galuega faamisiona i le lalolagi atoa. A o pulefaamalumalu ai i le Misiona a Kanata, i lalo o le taitaiga a Peresitene David O. McKay (1873–1970), na ma maua ai ma Sister Monson le avanoa e galulue faatasi ai ma nisi o alii ma tamaitai sili ona lelei i lenei lalolagi atoa. O soifuaga moni o nei faifeautalai talavou na faaalia ai le faatuatua ma le tatalo.
Sa saofai ai i totonu o lou ofisa i se tasi aso se faifeautalai fou na faatoa taunuu atu. Sa atamai, malosi, fiafia, ma faafetai ona o le avea [o ia] ma se faifeautalai. Sa faatumulia o ia i le naunautai ma se manao e auauna atu. Ao ma talanoa, sa ou fai atu i ai, “Elder, ou te manatu o loo lagolagoina malosi oe e lou tama ma lou tina i lou valaauga faamisiona.” Sa punou lona ulu ma tali mai, “Ia, e le sa’o atoatoa [lena manatu]. Silasila oe, Peresitene, o lo’u tama e le o se tagata o le Ekalesia. E le talitonu o ia e pei o i tatou, o lea na te le talisapaia atoatoa ai le taua o lo’u tofiga.”
E aunoa ma le faatuai ma le musuiaina e se Faapogai ae le o au lava, na ou fai atu ai ia te ia, “Elder, afai o le a e auauna atu ma le faamaoni ma le maelega i le Atua i le talaiina atu o Lana savali, o le a auai lou tama i le Ekalesia a’o lei maea lau misiona.” Sa ia uumauina lou lima na pei e taofi e se faau, na loimata ona mata ma amata ona tafe ifo i ona alafau, ma sa ia faapea mai, “O le vaaia ua taliaina e lo’u tama le upumoni o le faamanuiaga aupito maoae lea e mafai ona oo mai i lou olaga.”
Sa lei nofonofovale lenei alii talavou ma faamoemoe ma moomoo ia faataunuuina lena folafolaga, ae sa ia mulimuli i le fautuaga poto na tuuina mai anamua: “Tatalo ia pei lava e faalagolago mea uma i le Atua. Galue ia pei lava e faalagolago mea uma ia te oe.” O le tulaga lena na i ai le auaunaga faamisiona a lenei alii talavou.
O konafesi uma lava a faifeautalai ou te sailia ai o ia a o lei amataina fonotaga ma fesili atu i ai, “Elder, o le a se tala mai i lou Tama?”
O lana tali mai i taimi uma lava o le, “Leai se agai i luma, Peresitene, ae ou te iloa o le a faataunuu e le Alii le folafolaga ua tuuina mai ia te au e ala mai i lau susuga o lo’u peresitene o le misiona.” Na mavae aso sosoo ma vaiaso, o vaiaso na sosoo ma masina, ma mulimuli ane, i le toe lua vaiaso maea le ma misiona ma toe foi atu i le aiga, na ou mauaina ai se tusi mai le tama o lenei faifeautalai. Na tusi mai lena tama:
“Pele Uso Monson:
“Ou te fia faafetai tele atu lava ia te oe ona o le tausiga lelei o lou atalii o le e lei leva ona maea mai lana misiona i Kanata. O ia o se faamalosiauga ia i matou.
“Sa folafola atu i lo’u atalii ina ua tuuvaa atu o ia i lana misiona o le a avea au ma se tagata o le Ekalesia a o lei toe taliu mai o ia. O lenei folafolaga, ou te talitonu sa faia ia te ia e lau susuga, e aunoa ma so’u iloaina.
“Ou te fiafia lava e lipoti atu e faapea, sa papatisoina au i le Ekalesia i le toe tasi le vaiaso ao lei faamaeaina lana misiona ma o le taimi nei o loo avea au ma faatonu o taaloga afeleti a le autalavou ma o loo i ai foi sou tofiga faafaiaoga.
“O loo aoga nei lo’u atalii i le BYU, ma e lei leva foi ona papatisoina lona uso laitiiti ma faamauina o se tagata o le Ekalesia.
“Ou te toe faafetai atu ia te oe mo le agalelei ma le alofa tele na faaalia i lo’u atalii e ona uso i le misiona i le lua tausaga ua tuanai.
“Ma le faamaoni lava, o se tamā loto faafetai.”
Ua toe taliina foi le tatalo faamaualalo o le faatuatua.
O loo i ai se laina auro e i ai i tala uma o le faatuatua mai lava i le amataga o le lalolagi e oo mai i le taimi nei. O Aperaamo, Noa, le uso o Iareto, le Perofeta o Iosefa Samita, ma le anoano o isi na mananao e usiusitai i le finagalo o le Atua. Sa i ai ni o latou taliga e mafai ona lagona, mata e mafai ona vaai, ma loto e mafai ona iloa ma lagona.
Sa latou le masalosalo lava. Sa latou talitonuina.
E ala i tatalo a le tagata lava ia, e ala i tatalo faaleaiga, e ala i le faalagolago i le Atua ma le faatuatua, ae le o le masalosalo, e mafai ai ona tatou maua Lona mana malosi laveai. O Lana valaau ia i tatou e pei lava ona i ai i taimi uma: “O mai ia te au.”15
Ata na tusia e Matthew Reier; Vaai le Uso o Iareto i le Tamatamaiaao o le Alii, saunia e Arnold Friberg, © IRI
O le faatuatua lea, ae le o le masalosalo na vaai ai le uso o Iareto i le tamatamaiaao o le Atua o pai atu i maa o le tali mai i lana olega.
Tauagavale: ata na tusia e Craig Dimond; taumatau: ata na pueina e David Newman
Iesu Keriso, saunia e Harry Anderson, © IRI