Faaputuina o Fafie i Kuopio
I le faaiuga o le taumafanafana o le 1968 sa ma asiaina ai ma lau soa faifeautalai o Elder Ken Heaton, se aiga e na o se vaega e auai i le ekalesia i Kuopio, Finelani. O le tina ma lana tama teine o ni tagata o le Ekalesia, ae o le tama e leai.
O le talosaga mai a le ava sa ma aoaoina ai i laua ma lana tama teine i lesona a faifeautalai—i se leotele ina ia lagona mai e lona toalua lea sa i totonu o le potu na sosoo atu. Ina ua matou taumafai e aumai o ia matou te auai faatasi, sa fai mai o ia e leai sona taimi. I se tasi taimi o lana alofaga o le, e i ai lana faaputuga fafie i tuafale e manaomia ona tataina ma faaputu mo le taumalulu.
“A faapea la e uma ona tata le fafie ma faaputu, e te faatagaina la i maua e aoaoina oe?” sa ma tau fai fesili ai.
“Ioe,” o lana tali lea. Ae o le matuai tele lava o le fafie, sa ia faaopoopo mai ai, ma e umi lava se taimi e tata ma faaputu ai ona faatoa uma lea.
I ni nai aso mulimuli ane, ina ua uma ona ma faatalitali sei alu le tama e faigaluega, ona ma toe o loa lea i le fale. Faatasi ai ma le faatagaga a le tina, sa ma faaaluina ai le aso atoa e tata ai fafie ma faaputuputu. Na uma le ma galuega i le 5:00 i le afiafi, a o lei umi ae foi mai o ia i le fale. Sa le mafai ona ma faatali e vaai i ona foliga, ae sa ma faatopetope ese a o lei tau mai ia i maua. Ina ua ma taunuu atu i lo ma fale ma ma taeele, sa toe vili atu foi a ma uila i le fale o le aiga pe tusa o le 7:00 i le afiafi.
“Ia, ua uma ona tata fafie!” sa ma tautino atu ai. “Ia o le a e faatagaina la maua e aoaoina oe?”
Sa na o lona ataata lava, lue lona ulu, ma sau loa matou faatasi i le potu pito i luma. O ni nai vaiaso mulimuli ane, ina ua uma ona faalogo i lesona a faifeautalai, sa faapea loa ona papatisoina ma faamauina lenei uso lelei.
“Ua uma uma fafie ona tata!” sa ma tautino atu ai. “Ia o le a e faatagaina la maua e aoaoina oe?”