O Le Mea Tonu Lava Na Ou Manaomia
O le iloa o le a matuai pisi tele lo’u aso, o lea na ou tamoe vave atu ai i fafo o le faitotoa, sa tumu lau ato faafafa na toetoe a pa i tusi aoga, toniga o le puipuiga o le tagata lava ia, seevae siva, o la’u meaai o le aoauli ma le afiafi, o le a ou manaomia ou te ola ai i se isi aso pisi i le kolisi. E lua ni au suega e fai ou te lei lagonaina lo’u saunia i ai, faitauga e lei uma, ma e le lava le taimi ou te alu ai i mea sa ou manao ou te alu i ai i lena aso.
O le ofuina o lou lausakete o le a ou manaomia mo la’u suega i le siva, sa ou lagona ai lava lo’u pei o se vale i la’u ato faafafa lapoa ma lo’u popole ina nei ou le mauaina le taimi tonu o la’u vasega muamua. Ina ua ou lavea ma ou pau i le ogatotonu o se fetaulaigaala pisi i luma o ni tamaiti aoga se toatele faapea ma ni taavale, sa ou tagi ona o lo’u ma ma lo’u le fiafia, faatasi ai ma se pu i lou totini nailoni fou. Faatoa ta le fitu i le taeao, ae o lenei ua ou tagi.
A o ou toe tu ae i luga ma tauetuetu atu i le aoga, sa ou tatalo faatauanau atu i le Alii ina ia auina mai se tagata e faafiafia ia te au. E manaia pe ana faapea ou te vaai i lo’u tina, ae e lua setete le mamao o le mea sa i ai o ia. Atonu o le a tali mai e le Alii la’u tatalo e ala i se tasi o au uo matou te potu faatasi e asiasi mai i sau vaega. Ia atonu foi o le a Ia auina mai le tama o le uarota lea ou te fia alu lava i ai.
Sa ou tilotilo solo ma le naunautai a o ou topetope atu i la’u vasega muamua ae ou te lei vaaia se tasi ou te masani i ai. Sa sue la’u suega muamua, ae o loo ou tagi lava, ma ou nanati atu i la’u vasega lona lua, ae na ou tuai atu. Sa ou le fiafia lava a o ou tamoe atu i la’u vasega lona tolu ma a o ou topetope e sauni mo le isi au suega e sosoo ai. Sa lelei la’u taumafaiga i la’u suega nai lo le mea na ou faamoemoeina, ma sa ou tau toa mai ina ua ou maua se auala savali toafilemu lea e mafai ona ai ai lau meaai a o ou suesue. Sa ou punou lava i au tusi ae ou faalogoina loa o valaau mai se tagata i lou igoa.
Sa ou tepa ae ma iloa ai lo’u faiaoga asiasi, o le ou te lei vaai muamua i ai i le lotoa. Sa saofai mai o ia i ou tafatafa, ma toeitiiti lava atoa le itula o ma talanoa—sa le faatatau i ou le fiafia i lena aso, ae sa faatatau i mea sa sologa lelei mo au, au fuafuaga, ma mea na atugalu ai o ia.
Ana le aluese lava o ia ou te le manatua la’u tatalo augani i lena taeao. Ioe o le a tali mai e le Alii la’u tatalo e ala i le tamaitai na valaauina e vaaia au. Sa ou manao i se tagata e faafiafiaina au i le amataga o lena taeao, ae sa Ia silafia o le a ou saunia e vaai i se uo i se taimi mulimuli ane o le aso—ina ua ou toamalie ina ia mafai ona ou maua le faamafanafanaga sa ou manaomia ma ia tuuina atu le faamafanafanaga i se isi na i ai foi ona lava luitau.
Sa silafia au e le Alii ma auina mai ia te au le mea tonu sa ou manaomia i le taimi tonu na ou manaomiaina ai.
Sa ou tatalo faatauanau atu i le Alii ina ia auina mai se tagata e faafiafia ia te au.