Faia o ni Uo

Faagaeetiaina e le Tatalo

E tatalo tamaiti uma i le lalolagi atoa i le Tama Faalelagi—e pei lava o oe! O le masina lenei, sei o tatou feiloai atu ia Iareto Asalini o Porto Alegre, Pasila

O Iareto Asalini, e 10 tausaga, sa matuai faanoanoa lava i lona vaai atu i lona faiaoga ma tamaiti o lana au o o atu i le vaalele e aunoa ma ia, e o i Goiânia mo le Suega Siamupini o Tagafiti a le Atunuu o Pasila. Sa tatalo malosi o ia ina ia mafai ona faatagaina o ia e le aufaigaluega a le malae vaalele e alu ina ia mafai ona latou tauva faatasi ma lana au. Ae sa latou fai ifo e le mafai ona malaga o ia e aunoa ma le uluai kopi o lona pepa fanau. Na pau le mea sa ia aumaia o se kopi. Sa i ai i le fale le uluai kopi.

O lea, a o sauni le latou au e puipui le siamupini lea sa ia fesoasoani ai i le manumalo i le vaega a le latou tupulaga i le tausaga na muamua atu, sa toe foi ai i laua ma lona tina i le fale. Sa mafaufau lava o ia i upu mulimuli a lona faiaoga ia te ia: “Afai e te le alu atu i le tauvaga, o le a faiaina le au atoa. Matou te manaomia oe.”

O le isi malaga na avanoa o le taeao na sosoo ai. E mafai ona oo atu ai i le tauvaga, e fetaui tonu lava lona oo atu—ae o le a leai se avanoa e koleni sauniuni ai pe faamasani ai i mea e faaaoga.

“Tina,” sa ia fai atu ai ina ua la taunuu i le fale, “sa e aoaoina au pe a tatou tatalo faatauanau, o le a tali mai le Alii i a tatou tatalo. Sa ou tatalo ma lo’u loto atoa, ae leai se mea na tupu. Afai ou te alu i le malaga taeao, o le a leai so’u avanoa.”

Sa faamautinoa atu e le tina o Iareto ia te ia “e mafaia mea uma e le Atua” (Mataio 19:26). Sa telefoni atu o ia i le malae vaalele. I totonu o se afa itula, na valaau atu ai le ofisa malaga ma fesili atu pe mafai ona alu atu vave Iareto i le malae vaalele. Na avanoa se nofoa i se malaga o le a aluese atu i le taimi lava lena.

“E mafai e le Tama Faalelagi ona tali mai i a tatou tatalo!” O mafaufauga ia o Iareto a o faanatinati atu i lona potu e faafetai atu i le Tama Faalelagi.

Sa fetaui lava le taimi na oo atu ai Iareto, o se tagata o le Uarota a Intercap, Siteki a Porto Alegre Pasila Partenon, i le tauvaga ma maua ai e ia le tulaga tolu ma fesoasoani i lana au e toe manumalo i le siamupini a le vaega o le latou tupulaga i le atunuu atoa.

Iareto ma Tagafiti

O le ono o tausaga o Iareto, sa lesitala ai o ia e lona tina i le vasega lava e tasi na avanoa mo lona matua i le iunivesite i le lotoifale: tagafiti. Sa ofo le faiaoga i lona iloaina sa leai ma se poto masani o Iareto i lenei taaloga. Sa faia e le faiaoga a le iunivesite se suega a Iareto ma fesoasoani i sana faataitaiga i se kalapu lauiloa i tagafiti. Sa talia Iareto i le au, ma o le fa masina mulimuli ane, sa ausia ai e ia lava le tulaga ono i se tauvaga a le setete.

O lana sini ia tauva i se aso i taaloga o le Olimipeka. Ina ia ausia lena sini, e lima itula i aso uma e koleni ai o ia sei vagana ai Aso Sa.

Iareto ma le Upu o le Poto

E taumafai lava Iareto ia tausia le mama o lona mafaufau ma lona tino ma ia le tagofia ni mea e faaleagaina ai. Ua ia iloa e tatau ona ia tausia lelei lona tino pe afai e manao ia avea o se tagata tafiti lelei. Ae o ana sini mo le Olimipeka e le na o le pau lea o le mea ua uunaia ai o ia e tausi lelei ia lava. “Afai ou te le tausia le Upu o le Poto, e ese mai le faaleagaina o lo’u ola maloloina, o le a le mafai ona ou toe foi atu e nonofo faatasi ma le Tama Faalelagi. O le Upu o le Poto o se poloaiga,” na fai mai ai Iareto.

O Le Faataitaiga a Iareto

E leai se isi o le au a Iareto e auai i le Ekalesia, o lea e faaeteete ai lava o ia ia fai ma faataitaiga lelei ma agalelei atu i isi tagata. Sa valaaulia muamua e Iareto ana uo ina ia latou faaaluina faatasi se faaiuga o le vaiaso ma sa ia aveina atu i latou i le lotu. Sa ia tuu atu ia i latou ni ofutino papae ma ni fusiua e faaaoga. “Ou te taumafai lava i taimi uma ia ou saunia e fesoasoani atu,” o lana tala lea. “Ou te tatalo mo tagata o la’u au o e o loo tauva ma faapea foi ona aoao i latou i le faiga o tatalo.”

E faaaoga ma le faaaloalo e Iareto ia suafa o le Tama Faalelagi ma Iesu Keriso. E le palauvale pe faaaoga e ia upu masoa, ma e taumafai o ia e fesoasoani atu i isi ia faia foi faapea. Fai mai a ia, “E vaavaai lava e au uo ia le tasi ma le isi, ina ia aua nei o latou tautatala i ni upu leaga, a o ou i ai.”

O Le Aiga o Iareto

E alofa lava Iareto i lona aiga. “E ese le manaia o soo se mea matou te faia ma lo’u aiga,” o lana tala lea. O Samu, o le uso o Iareto, e tasi le tausaga e matua ai o ia [ia Iareto]. E fiafia lava i laua e faifai mea faatasi, ae maise lava o le pepese. Sa la pepese foi i se fonotaga faapitoa lea na saunoa ai Bonnie D. Parkin, a o avea ma peresitene aoao a le Aualofa, ma Cheryl C. Lant, peresitene aoao a le Peraimeri.

Mea e Sili Ona Fiafia i ai Iareto

Pese a le Peraimeri: “O Le Tatalo a le Tamaitiiti” (Tusipese a Tamaiti, 6–7)

Meaai: Araisa, pi uli, ma pateta palu. Fai mai Iareto, “Ia, ma le avea ai o se gaucho lelei [o se tagata mai le setete o Rio Grande do Sul], ou te fiafia lava i se papakiu [BBQ] manaia.”

Taaloga: Tagafiti ma le soka

Faapasi taimi: Taaloga vitio

Mau: Iakopo 1:5—Fai mai Iareto, “ou te fiafia lava i le talafaasolopito o le olaga o Iosefa Samita.”

Mataupu i le aoga: Saienisi, talafaasolopito, ma aoaoga faamalositino

Fagafao: E lua taifau ma pusi e lua

Ata mai faaaloaloga a le aiga o Asalini

O Gafea o le Lalolagi e I Ai Porto Alegre, Pasila?