O Mai ia Keriso
O upu “o mai ia Keriso” o ni valaaulia. O se valaaulia pito i sili ona taua e mafai ona e ofoina atu i se isi tagata. O se valaaulia sili ona taua e mafai ona talia e se tagata. Mai le amataga o le Toefuataiina mai o le talalelei i lenei tisipenisione, o se tiute na tuuina mai e Iesu Keriso i Ona sui vaaia. O lo latou tiute o le “lapatai, folafola, apoapoai, aoao, ma valaaulia atu tagata uma ia o mai ia Keriso.”1
O tagata taitoatasi uma o le Ekalesia, ina ua latou taliaina le feagaiga o le papatisoga, o le a avea ma soo o le ua folafola atu o le a tulai o se molimau a Iesu Keriso i taimi uma i soo se nofoaga o le a ia i ai.2 O le faamoemoega o le tatou molimau o le valaauliaina lea o tagata e o mai ia te Ia.
O i tatou uma lava e tatau ona matua malosi lo tatou manao e aoao pe faapefea ona tuuina atu lena valaaulia i se auala sili ona lelei. Ua o tatou iloa mai i nisi o mea na tutupu e i ai nisi o le a le tali mai. Ua na o ni nai tagata sa tali ina ua tuuina atu e le Faaola lava Ia lenei valaaulia i le taimi o Lana misiona i le lalolagi. Ae sa matua tele Lona olioli ia i latou na faalogo i Lona leo. Ma e tele lo tatou olioli ina ua o mai i latou sa tatou valaauina e o mai ia te Ia.
Ia Silafia o Ia o le Ala
E taua lo tatou toe manatunatu i taimi o lo tatou lava olaga ina ua tali mai tagata. Ia te au lava ia, ua ou vaai i le faasologa masani pe a taliaina e tagata lena valaaulia. I vaega taitasi, e faaali atu e le Agaga Paia ni mea moni se tolu ia te i latou. O mea tutupu o le a le masani ona sau ai i le faasologa lea o le a ou tuuina atu, ae o le a oo uma lava i loto o i latou o e o mai ma le faamaoni ia Keriso.
Muamua, o le a o latou lagonaina ua na o le tasi le auala e mafai ona latou maua ai le fiafia e sili ona o latou mananao ai i lenei olaga ma le olaga a sau, o le ala lea ia Iesu Keriso. O le a o latou talitonu i upu nei mai le Tusi a Mamona: “Faauta, ou te fai atu ia te outou, e pei ona tonu ia mea, o soifua le Alii le Atua, e faapea foi ona leai se tasi igoa i lalo o le lagi, ua na o lenei, o Iesu Keriso, ua ou tautala atu ai, e mafai ona faaolaina ai tagata.”3
O lena faamaoniga e le faigofie ona lagona e le lalolagi o loo i ai ni faaupuga faapea e leai se Atua, e leai se agasala, ma o le fiafia e maua i lea fiafiaga. Ae o o tatou leo e mafai ona sili atu ona malolosi, pe afai tatou te maua le meaalofa o le tauaveina lea o le molimau mautu o Iesu o le Keriso ma le Faaola o le lalolagi. O lena molimau o le a sili lona malosi mai lou lava malamalama i le Togiola a Iesu Keriso i lou olaga. Afai e te manatunatu pea i le suiga o lou olaga e ala i Lana Togiola ma e faafetai ia te Ia e le aunoa, o le a e iloaina o lau molimau mo Ia o le a e maua ai le mana e te pai atu ai i agaga o isi tagata. Ina ua lagona e i latou na e valaauliaina e ala i lau lava molimau lena molimau, o le a o latou taliaina o Ia e avea ma o latou Alii ma Faaola. Ma o lena taliaina, ina ua oo mai, o le a faamafanafanaina ai o latou agaga ma lou agaga.
Feagaiga ma Usitai
Lona lua, o i latou ua o mai faamaoni ia te Ia ua osia feagaiga e usitai ma mulimuli ia te Ia. E mafai ona amata i le tausia o nai folafolaga laiti, e pei o le faitauina o le Tusi a Mamona poo le auai i le lotu faamanatuga. E tatau ona fai ma fua o lo latou faatuatua ia Iesu Keriso ma le Faaola. Ina ua latou tausia ia folafolaga i lo latou faatuatua, o le a o latou faalogoina se mea. E ono le mafai ona latou faailoa mai o latou lagona i upu, ae latou te maua ni faalogona lelei atu. O le usiusitai, e oo lava i mea laiti, o le a aumaia ai faamanuiaga mai le Atua. Ma i se taimi, o le a amata ona latou lagona le loto salamo ma le naunautai e osia feagaiga o le papatisoga, ina ia ave i o latou luga le suafa o le Faaola, ma faamamaina mai agasala.
E faia e tagata filifiliga taua mo ni mafuaaga se tele. I le taimi muamua, sa le mafai e se tama sa ma aoaoina ona iloa le taua o le papatisoina. Mulimuli ane, sa ia taumafai ina ia lelei i lona olaga atoa. E leai ni ana agasala matuia. Sa papatisoina o ia ao tamaitiiti i le isi ekalesia. Ae peitai ona oo mai ai lea o mea e lua i lona mafaufau. Tasi, o le Faaola na papatisoina ona o lona usiusitai, ae leai lava sana agasala. O le isi, sa ia manao ia tuuina atu o ia i le Faaola e ala i le pule o le perisitua moni, e pei ona afio atu Iesu ia Ioane ina ia papatisoina o Ia.
O se tasi alii talavou na ma aoaoina na filifili e papatiso ona o lona loto momomo ona o lagona faanoanoa na ia te ia ona o ana agasala. Ina ua alu ae o ia mai le vai o le papatisoga, sa tago mai ona lima ma fusi atu lou ua, loimata na maligi ifo i ona alafau, ma ia faapea mai i lou taliga, “Ua ou mama. Ua ou mama.”
O a latou filifiliga e osia feagaiga i le papatisoga na alu ae mai le faatuatua masani. Ua o latou iloa afai latou te tausia le feagaiga ia usitai i poloaiga a le Faaola, o le a Ia tausia Lana feagaiga ma i latou na te taitaiina atu i latou agai i le ola e faavavau. Ua saunia i latou e omai ia te Ia ina ia o latou suia ma taitaia e Ia ma, i se taimi, o le a avea faapei o Ia.
Taumafai ia Faapei o Ia
O le a tatou oo atu i le mea lona tolu ua ou maitauina i olaga o i latou ua o mai faamaoni ia te Ia. Sa taumafai i latou ia pei o Ia. Sa amata ona latou taumafai ia faia i isi e pei ona latou iloa e faia foi e Ia. O oe ma au ua vaaia lena i tagata faatuatua ina ua faatoa uma lo latou papatisoga ma mauaina le Agaga Paia. E faatasi ona ma o ma lau soa faifeautalai e asiasi i se aiga na ma aoaoina ma papatiso i ni vaiaso talu ai. Sa auina atu maua e matua i le potu i lalo ma sa faaali mai ia i maua se potu. O le potu moe lea o le tasi o o laua afafine e toalua. Ae o lea ua nonofo faatasi nei ma lona uso. O le potu lea ua ia le toe faaaogaina sa tumu i mea uma e manaomia e le aiga i faalavelave faafuasei.
Ma te lei aoaoina lava ia te i latou se mea e uiga i sauniuniga mo faalavelave faafuasei. Ina ua ma fesiligia pe aisea ua o latou faia ai lenei mea faigata i lenei taimi vave, o le tali na latou faitauina i le mekasini a le Ekalesia e faapea e finagalo le Alii ina ia saunia aiga e tausia i latou lava atoa ai ma isi. Ona latou faapea mai lea, “E le o le mea ea lena o loo fai e le Au Paia o Aso E Gata Ai?”
O lena faatuatua faigofie na faalauteleina atu i mea uma na latou lagona e finagalo le Faaola latou te faia. Ma e na umi lava o i ai pea lo latou naunautaiga e mulimuli ia te Ia. Ma na suia ai i latou. Sa ia i latou le loto alolofa, taumafai e fesoasoani i isi. Ae na tupu lena mafai e faaali atu le alofa. Ma o le mamanu masani lena ia i latou uma ua ou iloa o loo faaauau pea ona o mai ia te Ia i se taimi atoa o le olaga.
E i ai taimi tatou te talanoa ai i le faatumauina o tagata lotu e pei o loo tatou taofiofia i latou mai le o ese atu. E mafai ona tatou faia ma e tatau ona tatou faauo ia i latou ua faia filifiliga e omai ia te Ia. E mafai ona faalotovaivaiina i latou pe a fetaiai ma faafitauli, e pei ona oo mai pea o faafitauli. Ae e tatau ona tatou manatua o le uo sili lava ma mautinoa o loo latou maua o le Faaola ma Lona Tama, o lo latou Tama foi lea. O le Tama Faalelagi ma le Faaola o le a auina atu ia te i latou le Agaga Paia ia faamafanafana ma faamautu lo latou faatuatua pe afai ua latou usitai ma le lotomaualalo. Mo, se faataitaiga, a e alu e te faiaoga asiasi pe e te asiasi faaleaiga ma ni tagata fou faatoa liliu mai, afai e te tuuina atu i ai se avanoa e tatalo ai pe aoao pe fai se avanoa mo se feiloaiga, e tatau ona e tuuina atu ia te ia se isi faalaeiauga nai lo le na ona faaali atu o le alofa. O le a toto mai ai mana o le lagi. Ma o iina o le a siitia ai i latou e ala i faigata ma puipuia ai i latou mai le faamaualuga pe a oo mai faamanuiaga ia i latou, o le a oo mai lava ia faamanuiaga.
O Le Suiga o le Loto
E i ai se isi mea matagofie o le a tupu. A tuuina atu lou loto e valaaulia tagata e o mai ia Keriso, o le a suia lou loto. O le a e faia Lana galuega mo Ia. O le a e iloaina ai o loo tausia pea e Ia lana folafolaga e i ai faatasi ma oe i lau auaunaga. O le a e iloa ai o Ia. Ma i se taimi o le a avea oe e pei o Ia ma “faaatoatoaina outou e Ia.”4 I le fesoasoani atu i isi e o mai ia te Ia, o le a e iloaina ai o loo e sau foi oe ia ia te Ia. Afai e te fia latalata ia te Ia, lagona Lona filemu, o le auala sili e mafai ona e faia ai o Lana galuega.
O Ia lea na fetalai mai:
“Ia outou o mai ia te au, o outou uma o e tigaina ma mafatia i avega, o au foi e malolo ai outou.
“Ia outou amoina lau amo, ma ia outou faaaoao ia te au; aua o au le agamalu ma le loto maualalo, ona maua lea e outou o le malologa mo o outou agaga.
“Aua e ave gofie lau amo, o lau avega foi e mama ia.”5
Ou te molimau atu o le a Ia tausia lena folafolaga mo i latou tatou te valaauliaina ia te Ia. Ma e na te tausia lena folafolaga ia i latou o e auauna ia te Ia i le valaauina lea o tagata.