Na Faasaoina A’u?
Na fesili mai la’u uo o Rasela pe ma te o ma ia i lana lotu. Sa toaga o ia i lana lotu, ma sa ou fia iloa foi le ala e eseese ai lana lotu mai ia matou. Sa ou faanoi i o’u matua i se faatagaga ma te o ai ma ia. Sa la fai mai e mafai ona ou auai talu ai e lē feteena’i le taimi o latou sauniga tapuai ma matou.
E tele mea o lana lotu ou te le masani ai: o pese ma tatalo e eseese, o le talanoa a le failauga e ese ia te a’u. Ina ua faataamilo mai le peleti mo taulaga ofo, sa ou le iloa le mea e fai.
Mulimuli ane, sa tapa mai le failauga mo soo se tasi i le faapotopotoga na te le’i talia faalauaitele Iesu Keriso o le Faaola, e alu atu i luma. Na faamalosi mai Rasela ou te alu, ae sa ou fetoa’i. I la matou uarota, e le’i fai mai lava le epikopo i se tasi e alu atu i luma ma talia faalauaitele Keriso. Sa ou le iloa le mea e fai. Atonu ou te le’i faia se mea sa taua mo lo’u faaolataga. Na ou tuua le sauniga ma le fenumia’i.
Ina ua ou toe manatunatu i lea aafiaga mulimuli ane, na ou mautinoa ai ua ou talia Iesu Keriso o lou Faaola i se tulaga faalauaitele. Na papatisoina au e se tasi o loo i ai le pule a le perisitua mai ia Iesu Keriso. O lou papatisoga o se osiga feagaiga ma le Tama i le Lagi, o le a ou tauaveina i o’u luga le suafa o Iesu Keriso, ma avea ma ona soo. Na ou folafola atu o le a ou tausi ana poloaiga, ma taumafai ia faapei o Ia. Sa faatasi i lo’u papatisoga latou e umia le perisitua, ma avea ma molimau, atoa ai ma aiga ma tagata o le uarota.
Talu mai lo’u papatisoga ma faamauga, ua ou maua le avanoa i Aso Sa taitasi e talia le faamanatuga ma toe tautino atu i lo’u Tama i le Lagi o le a ou tauave pea i o’u luga le suafa o Keriso.
Atonu o nisi taimi o le a fesiligia foi tatou e Kerisiano o isi lotu pei ona fesiligia e le failauga a la’u uo, pe na o sina eseesega lava i faaupuga. Atonu o le a latou fesili, pe ua faaolaina tatou. Ua fesoasoani mai Elder Dallin H. Oaks, o se tasi o le Korama o Aposetolo e Sefululua i le ala tatou te tali atu ai i lea fesili. “O tagata kerisiano e latou te faapipii faauigaga ese i nisi o faaupuga autu malamalama ma le talalelei, e pei o faasaoina po o le faaolataga. Afai tatou te tuu atu le tali i le mea tonu o loo manatu ai le fesili, pe ua “faasaoina” i tatou, o la tatou tali e tatau ona “ioe.”1
Sa agai pea i luma le tuputupu ae o la’u molimau ia Iesu Keriso, i le taimi sa ma o ai ma la’u uo i lana lotu. Mai lena taimi, ua ou iloa ai o le tele o lo’u aoao o le talalelei e ala i tusitusiga paia ma upu a perofeta soifua, o le tele foi lea o lo’u saunia ma le mautinoa, ia ou tu e fai ma molimau a le Atua i taimi uma (tagai Mosaea 18: 9).