O Ai Iesu Keriso?
Ina ua feiloai ma le Toasefululua i Kaisareia Filipo, sa fesili Iesu, “Pe se a la outou upu ia te au, po o ai?” Sa tali atu Simona Peteru, o le Aposetolo matua, “O oe o le Keriso, o le Alo o le Atua soifua” (Mataio 16:15–16). Na tautino mulimuli ane e Peteru o Iesu “na muai faauuina a o lei faavaeina le lalolagi” (1 Peteru 1:20). Sa i ai o Ia “faatasi ma le Tama i le amataga, ma [o le] Ulumatua” (MFF 93:21).
Ina ua tuuina atu (tagai Alema 42:5, 8) le fuafuaga a le Tama—le fuafuaga o le faaolataga ma le fiafia (tagai Alema 34:9), sa manaomia se tasi e togiola ma saunia le faaolataga ma le alofa mutimutivale mo i latou uma e taliaina le fuafuaga (tagai Alema 34:16; 39:18; 42:15). Sa fesili le Tama, “O ai ea ou te auina atu?” O Ia lē o le a faaigoa ia Iesu na filifili lava ia ma le naunautai e tali atu, “O Au lenei, auina atu au” (Aperaamo 3:27). “Lou Tama e, ia faia lou finagalo, ma ia ia te oe pea le mamalu e faavavau” (Mose 4:2).
I le sauniuniga, sa foafoaina le lalolagi: “Na ou foafoaina [le lalolagi] e ala atu i le Atalii, o lo’u Atalii lea e Toatasi na Fanaua,” o le folafolaga lea a le Tama (Mose 1:33; tagai foi i le Efeso 3:9; Helamana 14:12; Mose 2:1).
O Faalagiga o Iesu Keriso
Sa iloa o ia o Ieova e perofeta o le Feagaiga Tuai (tagai Aperaamo 1:16; Esoto 6:3). Sa faaalia i perofeta Lona afio mai: “Faauta o le Tamai Mamoe a le Atua, ioe, o le Alo o le Tama Faavavau!” (1 Nifae 11:21; tagai foi i le Ioane 1:14). Sa ta’u atu foi i lona tina, “E te faaigoa ia te ia o Iesu… . e ta’ua foi o le Alo o le Silisili ese” (Luka 1:31–32).
E tele faalagiga ma suafa o loo faamatala mai ai lava Lana misiona ma le galuega paia. O Ia lava na aoao mai: “O A’u o le malamalama ma le ola o le lalolagi. O A’u o le Alefa ma le Omeka, o le amataga ma le gataaga” (3 Nifae 9:18). “O a’u … o lo outou fautua i le Tama” (MFF 29:5; tagai foi MFF 110:14). “O A’u le leoleo mamoe lelei“ (Ioane 10:11). “O A’u o le Mesia, o le Tupu o Siona, o le Papa o le Lagi” (Mose 7:53). “O A’u nei le areto o le ola: o le sau ia te au, e le laina lava ia [pe] toe fia inu” (Ioane 6:35). “O A’u o le vine moni, a o lo’u Tama o le galue vine ia” (Ioane 15:1). “O A’u nei o le toe tu ma le ola, (Ioane 11:25). “O a’u … o le fetu ao pupula” (Faaaliga 22:16), “O Iesu Keriso, lo outou Faaola, o A’u o le Sili” (MFF 29:1).
O Ia o le Puluvaga (tagai 1 Timoteo 2:5), o le Faaola (tagai Luka 2:11), o le Togiola (tagai MFF 18:47), o le Ulu o le Ekalesia (tagai Efeso 5:23), o le Maa Tulimanu (tagai Efeso 2:20). I le aso mulimuli, “o le a faamasino ai e le Atua … e Iesu tagata e tusa ma [le] talalelei” (Roma 2:16; tagai foi i le Mamona 3:20).
“Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi (Ioane 3:16); ”o lea e oo mai ai le togiola talu le Mesia Paia; aua ua tumu o ia i le alofa tunoa ma le upu moni” (2 Nifae 2:6).
Sa tele ina fesiligia le Perofeta o Iosefa Samita, “Pe o a mataupu faavae autu o lo tatou talitonuga?”
“O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, e faapea na maliu o Ia, na tanumia, ma toetu mai i le aso tolu, ma afio i le lagi; ma o isi mea uma e faatatau i lo tatou talitonuga ua na o ni faaopoopoga i ai.”1
Lotomaulalo o Iesu Keriso
I le taimi na pu’eina ai o ia a o loma Lona Faasatauroga, na maliu mai le Alii mai Ketesemane. I le taimi lena na faalataina ai, sa se’i ai e Peteru lana pelu ma taia ai Maliko, o se auauna a le ositaulaga sili. Na fetalai atu Iesu:
“Ina toe sulu ia o lau pelu i lona faamoega… .
“Fa te oe ea ou te le mafaia ona aioi atu nei i lo’u Tama, ona aauina mai ai lea e ia ia te au o agelu e sili ona toatele i lekeona e sefulu ma le lua?” (Mataio 26:52–53).
I le taimi atoa o tauemuga, fai faatautala, sasaina, ma le faamafatiaga faaiu o le faasatauroga, sa gugu le Alii ma agamalu—vagana ai, i le taimi e tasi o le ogaoga o le vaaiga lea na faaalia ai le aano moni o le aoaoga faavae faaKerisiano. Na oo mai lena taimi i le taimi o le faamasinoga. Ua fai atu Pilato, ua fefe, ia Iesu: “E te le gagana mai ea ia te au? Po ua e le iloa, o ia te au le pule e faasatauro ia te oe, o ia te au foi le pule e tatala ia te oe?” (Ioane 19:10).
Ua na ona mafai e se tasi ona vaai faalemafaufau i le mamalu le leoa ina ua fetalai le Alii: E leai sau pule ia te au, ana le tuuina mai ia te oe mai luga” (Ioane 19:11). O le mea na tupu mulimuli ane ai, e le’i tupu ona sa i ai ia Pilato le pule e fai ai, ae ona sa i ai i le Alii le naunau e taliaina.
“Ou te tuuina atu lo’u ola,” na fetalai mai ai le Alii, “ina ia ou toe au mai ai.
“E leai se tasi na te aveeseina ia te au, a e peitai au, ou te tuuina atu e a’u lava. O ia te au le pule e tuuina atu, o ia te au foi le pule e toe au mai ai” (Ioane 10:17–18).
Togiola a Iesu Keriso
I luma mai o le Faasatauroga ma tua mai, e toatele tamalii na tuuina atu ma le naunau o latou soifua i faatinoga lē manatu faapito o le lotonuu. Peitai e leai lava se tasi na feagai ma mea sa onosaia e Keriso. Sa i Ona luga le avega o agasala a tagata uma, o tausalaga uma o tagata. Ma totoe ai i se tulaga le mautinoa, le Togiola. E ala i Lona naunautai, sa mafai ai e le alofa mutimutivale ma le faamasinoga tonu ona toe faaleleia, lagolagoina tulafono faavavau, ma faataunuu ai le puluvagaina lea semanu e le mafai ona togiolaina le tagata pe a leai.
O Lana filifiliga na talia ai le sala e avea ma sui o tagata uma, mo le aofaiga atoa o amioleaga uma ma mea pi’opi’o; o le faasaua, ola le mama, o le faapi’opi’o, ma le talapepelo; o tuinanau; o fasioti tagata ma le faataugā ma le matautia—o mea uma na i ai po o mea uma o le a tulai mai i lenei fogaeleele. I lona filifilia ai, sa Ia fetaiai ai ma le malosi matautia o lē ua le gata i le tino pe oo foi i ai tiga faaletino. O Ketesemane lena!
Pe na faapefea ona faataunuu le Togiola, tatou te le iloa. E leai se tagata ola na matamata a o Liliuese le amioleaga ma lafi i le maasiasi i luma o le Malamalama o lena tagata e mama atoatoa. E le mafai e le amioleaga uma ona tape lena Malamalama. Ina ua maea ona fai le mea na fai, ua uma ai foi ona totogi le sala. Ua le taulau le aia a le oti ma seoli ia i latou uma o e ua salamo. Ua i’u ina saoloto tagata. Ona mafai lea e tagata uma e ola ona fili- fili e mulimuli i lena Malamalama ma togiolaina ai.
O lenei taulaga e le i’u, “e faaolaina tagata uma lava i [lenei] togiola a Keriso pe a tausia poloaiga ma sauniga o le Talalelei” (Mataupu Faavae o le Faatuatua 1:3).
“Togiola” i Tusitusiga Paia
O le upu faaPeretania atonement [togiola] e tolu lava upu: at-one-ment, o lona uiga ia tuu ia tasi; tasi ma le Atua; ia toe faalelei, ia fai se leleiga, totogi le sala.
Ae tou te silafia o le upu atonement e na o le faatasi lava ona ta’ua i le Feagaiga Fou faaPeretania? Na o le tasi lava! Ou te sii maia i le tusi a Paulo i Roma:
“Ua maliu Keriso ma sui o i tatou.
“… Ua lelei i tatou ma le Atua i le maliu o lona Alo, o lenei, afai ua lelei i tatou ma le Atua, e matua faaolaina lava i tatou i lona soifua.
“A e le gata i lea, a ua tatou mitamita foi i le Atua, ona o lo tatou Alii o Iesu Keriso, o ia ua tatou maua mai ai nei le togiola” (Roma 5:8, 10–11; ua faaopoopo le faatusilima).
Na o le pau lava lena o le ta’ua o le upu atonement i le Feagaiga Fou faaPeretania. E ui i upu uma a o le togiola! E le o se upu faapea e le’i iloa, aua na faatele ona faaaoga i le Feagaiga Tuai e tusa ma le tulafono a Mose, ae peitai e na o le faatasi i le Feagaiga Fou. O se mea ofoofogia tele ia te au.
E na o le tasi le faamalamalamaga ou te iloa. Tatou sue le Tusi a Mamona. Na tautino mai e Nifae o le Tusi Paia “sa i ai le malamalama o le talalelei a le Atua, na molimau i ai le au aposetolo e toasefulu ma le toalua,” ma “ina ua uma ona alu atu ai i lima o le au aposetolo e toasefulu ma le toalua a le Tamai Mamoe, nai tagata Iutaia i nuu ese, ona e iloa atu ai lea le faavae o le lotu tele ma le inosia, e sili ona inosia i lotu ese uma lava, aua faauta, ua latou aveeseina vaega e tele ua malamalama mai le talalelei a le Tamai Mamoe, ma ua latou aveeseina foi feagaiga e tele a le Atua” (1 Nifae 13:24, 26).
Sa faamalamalama mai e Iakopo le lotu tele ma le inosia i upu nei: O le mea lea e fano ai lē tau ma Siona, o Iutaia atoa ma nuu ese, o pologa atoa ma e saoloto, o tane atoa ma fafine, aua o i latou ia o le fafine talitane o le lalolagi uma, aua o i latou o e le au ia te au e au ese ia te au, o loo fetalai mai ai le Atua” (2 Nifae 10:16).
Fai mai foi Nifae, “Ona o mea e tele ua malamalama ma le taua ua aveeseina nai le tusi, … e matua toatele, ioe, e iu ina i ai ia Satani le pule tele ia te i latou” (1 Nifae 13:29). Ona ia vavalo ai lea o le a toefuatai mai mea taua (tagai 1 Nifae 13:34–35).
Ma sa toefuataiina mai lava. I le Tusi a Mamona, o le upu togiola i lona foliga ma le taimi, e faa-39 ona ta’ua mai ai. Ou te ta’ua na o le fuaiupu e tasi mai le Alema: “O lenei foi, ua le mafai ona faataunuuina le ala o le alofa, sei iloga ua faia le togiola, o le mea lea ua togiola ai e le Atua lava mo agasala a le lalolagi, ina ia faataunuuina le ala o le alofa, e faamalie ai iuga o le faamasinoga, ina ia sao ona lelei le Atua, o le Atua amiotonu, o le Atua foi ua finagalo alofa” (Alema 42:15; ua faaopoopo le faatusilima).
E na o le faatasi i le Feagaiga Fou ae 39 i le Tusi a Mamona. O le a la se isi molimau sili atu o le Tusi a Mamona o se tasi lea molimau moni ia Iesu Keriso?
Ma e le na o le pau ai lena. O upu atone, atoneth, ma le atonement e faalima ona ta’ua i le Mataupu Faavae ma Feagaiga ae faalua i le Penina Tau Tele. E fasefulufitu mau maoae le taua. Ae e le na o le pau ai lena! E fiaselau isi fuaiupu o loo fesoasoani e faamatala le Togiola.
Saolotoga
O le tau o le Togiola na tauave e le Alii e aunoa ma se tau faamalosia, aua o le saolotoga o se mataupu faavae tautupu. E tusa ai ma le fuafuaga, e tatau ona faamamaluina le saolotoga. Na i ai lava mai le amataga, mai Etena.
“Ona fetalai mai lea o le Alii ia Enoka: Faauta i ou uso nei; o i latou o galuega a ou lava lima, ma na ou tuuina atu ia i latou lo latou poto i le aso na ou foafoaina ai i latou; ma o le Faatoaga foi o Etena, na ou tuuina atu ai i le tagata lona saolotoga” (Mose 7:32).
Pe o a lava isi mea na tutupu i Etena, i le taimi lenei taimi silisili o le tofotofoina, sa faia e Atamu se filifiliga. Ina ua uma ona poloaiina e le Alii ia Atamu ma Eva ina ia fanafanau ma uluuluola ai le lalolagi, ma poloaiina foi i laua e aua nei aai i le laau e iloa ai le lelei ma le leaga, sa Ia fetalai atu, “E ui i lea, ia faitalia oe ma lau filifiliga i ai, aua ua tuuina atu ia te oe; peitai, ia e manatua ua ou faasaina, aua o le aso e te ai ai, e te oti ai lava” (Mose 3:17).
E matua tele naua manatu taua e aumai faamalosi le tagata i le olaga faitino. O lena mea e feteenai ma le tulafono tonu e tatau ai ma le fuafuaga. O le fuafuaga na aumai, o fanau agaga taitasi a le Atua o le a maua se tino faitino ma o le a taitasi foi ma tofotofoina. Na iloa e Atamu e tatau ona i ai le tagata ma o lea sa ia faia ai lana filifiliga. “Na pau Atamu ina ia i ai tagata, ua ola tagata ina ia latou maua le olioli” (2 Nifae 2:25).
Na taumafai loa Atamu ma Eva e fanafanau ma faatumu le lalolagi e pei ona poloaiina ai i la’ua. O le foafoaina o o la’ua tino i foliga o le Atua, o se foafoaga e ese mai ai, sa matua taua i le fuafuaga. O lo la’ua Pau na sosoo ai, sa tatau ai foi pe afai e tatau ona tula’i mai le olaga faitino ma faagasolo le fuafuaga.
Tatau Ai o le Togiola
Na faamatala e Nifae le mea e tupu i o tatou tino ma o tatou agaga sei vagana ai ua i ai “se togiola e le iu. O o tatou agaga,” na ia fai mai ai, “e avea foi i tatou faapei [o le tiapolo].” (Tagai 2 Nifae 9:7–10.)
E seasea o’u faaaogaina le upu a’ia’i. E seasea lava fetaui i ai. Ua ou faaaogaina nei—faalua:
Ona o le Pau, o lea ua taua a’ia’i le Togiola ina ia i ai le Toetu, ma faatoilalo ai le oti faaletino.
Ua matua taua a’ia’i le Togiola mo tagata ina ia faamamaina ai i latou lava mai agasala ma faatoilalo ai le oti lona lua, le oti faaleagaga, o le vavaeeseina mai lea mai lo tatou Tama Faalelagi, aua e faavalu ona ta’u mai e mau e leai se mea eleelea e mafai ona ulufale atu i le afioaga o le Atua (tagai 1 Nifae 10:21; 15:34; Alema 7:21; 11:37; 40:26; Helamana 8:25; 3 Nifae 27:19; Mose 6:57).
O na upu o mau, “Ia faitalia oe ma lau filifiliga i ai, aua ua tuuina atu ia te oe” (Mose 3:17), ua faafeiloai atu ai Atamu ma Eva ma a la’ua fanau i mea le mautinoa uma o le olaga. I le olaga faitino, ua saoloto tagata e filifili, ma e tofu le filifiliga ma sona taunuuga. O le filifiliga na faia e Atamu na saga faamalosia ai le tulafono o le faamasinoga tonu, lea e manaomia ai le faasalaga o le le usiusitai o le oti.
Peitai o na upu na fetalai i ai i le faamasinoga, “E leai sau pule ia te au, ana le tuuina mai ia te oe mai luga” (Ioane 19:11), ua faamaonia e tutusa lava ma le taua o le alofa mutimutivale. Na auina mai se faaola e totogi le aitalafu ma faasaoloto tagata. O le fuafuaga lena.
Sa manatu Korianetona le atalii o Alema, e le fetaui le tatau ona mulimuli mai ni sala i agasala, ae pe manaomia foi ona i ai ni faasalaga. I se lesona maoae, sa aoao atu ai e Alema le ata o le faaolataga i lona atalii ma faapena foi ia i tatou. Sa talanoa Alema e uiga i le Togiola ma ta’ua ai e faapea, “O lenei, ua le mafai ona oo mai le salamo i tagata, sei iloga ua i ai le sala” (Alema 42:16).
Afai o le sala o le tau lea e manao ai le salamo, e le tele se tau e totogi. O taunuuga, e oo lava i taunuuga tiga, e puipuia ai i tatou. O se mea faatauvaa e pei o le tagi o se tamaitiiti i le tiga o lona lima pe a pa’i i le afi, e mafai ona aoaoina ai i tatou. Sei vagana ai le tiga, e ono faaumatia le tamaitiiti.
Faamanuiaga o le Salamo
Ou te fiafia lava e tautino atu o le a ou le maua lava se filemu, po o se fiafia po o se saogalemu, i se lalolagi e aunoa ma le salamo. Ou te le iloa lava po o le a la’u mea e fai pe a na faapea e leai se auala e mo a’u e tape ai a’u mea sese. O le a tele atu le mafatia nai lo le mea e mafai ona ou gafatia. Atonu tou te mafaia, ae o a’u e leai.
Na faia le Togiola. Ua aumaia ai i taimi uma le faamagaloga aloaia mai agasala ma mai le oti pe afai tatou te salamo. O le salamo o le auala lea e manumalo ai i le agasala ma le oti. O le salamo o le ki lea e mafai ona tatalaina ai mai totonu le falepuipui. O loo umia i o tatou lima lena ki, ma ua ia i tatou foi le saolotoga e faaaoga ai.
Faauta i le taua tele o le saolotoga; faauta foi i le taua a’ia’i o le saolotoga e filifili ai.
E ta’a’ina e Lusifelo i ana auala poto a tatou filifiliga, e faasese ai i tatou e uiga i taunuuga o le agasala. Latou te faaosoosoina ma ana agelu i tatou ina ia le agavaa, ma amioleaga. Peitai na te le mafaia—i le faavavau atoa, na te le mafaia, faatasi ma lona mana uma na te le mafaia—ona faataumaoia atoatoa i tatou, e le mafai e aunoa ma lo tatou maliega. A na faapea e oo mai le saolotoga i le tagata e aunoa ma le Togiola, semanu o se meaalofa e afua ai le faafanoga.
Na Faia i Ona Foliga
Ua aoaoina i tatou i le Kenese, i le Mose ma le Aperaamo, i le Tusi a Mamona, ma le faaeega paia, o le tino o le tagata na faia i le foliga o le Atua i se isi foafoaga e ese mai ai. A na faapea o se isi auala na aumaia ai le Foafoaga, semanu e leai se Pau.
A na fai ua na o ni manu ia tagata, ona fetaui lea o le i ai o le saolotoga e aunoa ma le faamasinoina.
Ou te iloa lelei foi e i ai tagata atamamai ua vaavaai ifo i meaola ma maa e saili ai le tupuaga o le tagata. Latou te le vaavaai i totonu o i latou lava e saili ai le agaga iina. Ua latou aoao i latou lava e fuaina mea i le taimi, i le ta’i afe i le tamiliona, ma fai mai o meaola nei ua ta’ua o tagata, na o mai uma lava faafuaveta. Ma ua latou saoloto e faia, aua ua ia i latou le saolotoga e filifili ai.
Peitai o la tatou le saolotoga e filifili ai. Tatou te vaavaai a’e i luga, ma i le vanimonimo tatou te vaaia ai galuega silisiliese a le Atua ma fuaina mea i vaitau o taimi, o vaitaimi uumi, o tisipenisione, o faavavau. O le tele o mea tatou te le iloa, tatou te taliaina i le faatuatua.
Peitai o le mea lenei ua tatou iloa! Sa fuafuaina uma “a o lei faavaeina le lalolagi” (MFF 38:1; tagai foi i le MFF 49:17; 76:13, 39; 93:7; Aperaamo 3:22–25). O mea na tutupu mai le Foafoaga e oo i mea na faaiu i ai e lei faavaea i luga o se meamao; o loo faavae i luga o filifiliga! Na fuafua lava faapena.
Ua tatou iloa lena mea! Lenei upumoni faigofie! A na faapea e leai se Foafoaga ma leai se Pau, semanu e le manaomia se Togiola, po o se Faaola e fautua atu mo i tatou. Semanu e le manaomia ona i ai Keriso.
Faailoga o le Togiola
I Ketesemane ma Kolokota, sa faamaligiina ai le toto o le Faaola. I seneturi i luma atu, sa faia ai le Paseka o se faailoga ma se ituaiga o mea o le a oo mai. O se sauniga e ao ona tausisia e faavavau. (Tagai Esoto 12.)
Ina ua folafola mai le mala o le oti i luga o Aikupito, sa poloaiina aiga taitasi o sa Isaraelu e ave se tamai mamoe—o le ulumatua po’a e le pona. O lenei tamai mamoe e fasi e aunoa ma le gauia o se ponaivi, ma faaaoga lona toto e faailoga ai faitotoa o fale. Sa folafola atu e le Alii o le a laaloa le agelu o le faafanoga i fale ua faailogaina ma o le a le fasiotia i latou o i ai. Sa faasaoina i latou i le toto o le tamai mamoe.
Ina ua mavae le Faasatauroga o le Alii, na le toe manaomia e le tulafono o le taulaga le faamaligiina o le toto. Na faia lena mea, e pei ona aoao atu Paulo i le nuu o Eperu, “na fai faatasi … le taulaga e tasi mo agasala” (Eperu 10:10, 12). Talu mai lena taimi, o le taulaga ua faia i le agaga salamo ma le loto momomo—salamo.
Ma o le a faamanatuina lava e faavavau le Paseka o le faamanatuga, lea tatou te faafouina ai a tatou feagaiga o le papatisoga ma aai ai ma feinu i le faamanatuga o le tino o le Tamai Mamoe a le Atua ma Lona toto, lea na faamaligiina mo i tatou.
E le o se mea faatauvaa le toe ta’u mai o lea faailoga i le Upu o le Poto. I tua atu o le folafolaga o le Au Paia i lenei augatupulaga o ē o le a usiusitai o le a mauaina le malosi ma oa sili o le malamalama o lenei: “O A’u foi le Alii, ou te avatua ia i latou le folafolaga o le a laaloa ia i latou le agelu o le faafanoga, e pei o le fanauga a Isaraelu, a e le fasia i latou” (MFF 89:21).
E le mafai ona ou talanoa atu ia te outou i o’u lagona e uiga i le Togiola e aunoa ma le ootia o lo’u loto. E pa’i ifo i lagona e aupito sili ona o’oo’o o le faafetai ma le tiutetauave. E faanaunau atu lo’u loto ia te Ia na aumaia le [Togiola]—o lenei Keriso, o lo tatou Faaola, lea ua avea ai a’u ma se molimau. Ou te molimau atu ia te Ia. O Ia o lo tatou Alii, o lo tatou Togiola, o lo tatou Puluvaga i le Tama. Na ia faatauina i tatou i Lona toto.
I le lotomaulalo ou te tapaina le Togiola a Keriso. Ou te le ma lava e tootuli i lalo e tapuai i lo tatou Tama ma Lona Alo. Aua o le saolotoga o la’u lea, ma o le mea lea ua ou filifili e fai!