“O A’u Nei le Ala”
Sa aoao mai e le Faaola ni lesona taua ina ua Ia fetalai, “O A’u …”
O nisi taimi o aafiaga e aupito sili ona manatua pea i tusitusiga paia, e maua i mamanu e faafuasei lava ona tulaga ese mai a o e faitau. Mo se faataitaiga, pe ua e matauina ea e faafia ona ta’ua i le Talalelei a Ioane le fetalai o Iesu i upu “O A’u nei”? Ina ua fetalai Iesu i lenei mea, sa masani ona ia faia se faatusatusaga ina ia mafai ai ona aoao atu tagata pe o ai Ia ma le mea ua Ia faia mo i latou. Tagataga’i totoa ane i nisi o nei faatusatusaga, ma o le a tele mea e te aoaoina ai e uiga i le Faaola.
O Le Areto o le Ola
“O A’u nei le areto o le ola: o le sau ia te au, e le laina lava ia; o le faatuatua foi ia te au, e le toe fia inu lava ia… . O A’u le areto ola ua alu ifo mai le lagi: pe a ‘ai se tasi i lenei areto ona ola ai lea o ia e faavavau” (Ioane 6:35, 51).
O le Tausamaaga o le Paseka e faamanatu ai le faasaolotoina mai o le nuu o Isaraelu mai i Aikupito ma e aofia ai le taumamafa i le areto e le faafefeteina. Ina ua latalata ona po o lenei sauniga, sa faia e Iesu le vavega o le fafagaina o le 5,000. O le toatele o i latou sa vaai i lenei vavega, sa mulimuli ia te Ia aua sa Ia avatu ia i latou meaai, o lea na Ia aoao atu ai ia te i latou ina ia saili mo mea e ‘ai “e tumau i le ola e faavavau” (Ioane 6:27). Ona Ia aoao atu lea ia te i latou e uiga i le manai, ma faamanatu atu ai ia te i latou na aumai mai le lagi e fafaga ai le nuu o Isaraelu i le vao. Sa Ia tautino atu, “O A’u nei le areto o le ola,” e tau atu ai ia te i latou le mea e ‘ai faaleagaga na auina mai e le Tama Faalelagi e ala mai ia te Ia, faapea foi le folafolaga o le ola faavavau na Ia aumaia.
I se tausamaaga o le Paseka i se taimi mulimuli ane, sa faaaoga ai e Iesu le areto e avea ma faailoga o Lona tino o se vaega o le Faamanatuga. A tatou aai i le areto [falaoa] i vaiaso taitasi i le taimi o le Faamanatuga, ua faamanatu mai ia te i tatou e uiga ia Iesu Keriso—o Lana taulaga, o Lona Toetu, ma le folafolaga o le fafagaina e le aunoa faaleagaga e ala i le mafutaga ma Lona Agaga.
O Le Malamalama o le Lalolagi
“O A’u nei o le malamalama o le lalolagi: o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).
Sa ta’ua e Iesu Ia lava o le Malamalama o le Lalolagi i le taimi o le Tausamiga o Fale Apitaga. O po taitasi i le taimi o lenei tausamiga, e tutu ai moli o le malumalu e avea ma faailoga o le Malamalama o le Atua, lea ua auina mai i le lalolagi. Sa folafola mai e Ioane o Iesu “o le Malamalama moni lea, na te faamalamalamaina tagata uma lava i lona maliu mai i le lalolagi” (Ioane 1:9). Ma na ala mai i le Perofeta o Iosefa Samita, sa faaalia mai ai e le Alii o le Malamalama o Keriso “e faamalamalamaina ai o outou mata, o le malamalama lava lea e tasi o loo faapupulaina e outou malamalamaga” ma “faaola i mea uma [ma] o le tulafono lea e pulea mea uma” (MFF 88:11, 13).
E faamalamalamaina o tatou mafaufau ma agaga e ala ia Iesu Keriso. O Lona malamalama e taialaina ai o tatou ala, e fesoasoani tatou te iloa ai le eseesega o le lelei ma le leaga ma faaali mai ai ia te i tatou le ala i le ola faavavau.
O Le Vine
“O a’u nei o le vine, o la outou. O le tumau ia te au, ma a’u ia te ia, o ia lava e fua tele mai; aua e le mafaia e outou ona fai o se mea e tasi pe a a’u le i ai” (Ioane 15:5).
Sa faatusa e Iesu o Ia lava i le vine auau o se tovine. O lenei vine auau e le gata ina mauaa ai le laau atoa i le palapala, ae e fafagaina ai foi vine laiti uma e tulioso mai ai ma fua. O Iesu Keriso o lo tatou taula o le faamoemoe ma o lo tatou punavai o le fafagaina faaleagaga ma le ola. O Ia tatou te maua ai le malosi tatou te manaomia e ola amiotonu ai ma faia galuega lelei. O Ia foi o le faavae o le Ekalesia ma le pogai o lana pule e folafola atu le talalelei ma salalau atu ai i le lalolagi uma.
O Le Leoleo Mamoe Lelei
“O A’u nei o le leoleo mamoe lelei, ua ou iloa a’u mamoe, ua iloa foi a’u e a’u mamoe” (Ioane 10:14).
O tiute autu o se leoleo mamoe o le taitai o mamoe i mea e aai ai ma le vai ma toe faafoi mai i latou i le saogalemu o le lafu. O se leoleo mamoe foi na te puipuia mamoe mai mea matautia e pei o manu feai ma le au gaoi. Ona ua ia iloa lana lafu, o lea e mafai ai ona ia iloa pe a leiloa se mamoe, ona alu lea o ia e sue. E usitai ana mamoe ia te ia ma e talitonuina atoatoa foi o ia.
O Iesu, le Leoleo Mamoe Lelei, e taufonō mai ia i tatou pe a tatou se, ma afai tatou te aoao e faalogo i Lona siufofoga, Na te taitai i tatou i le vao saogalemu o le faaolataga ma le ola faavavau, ma puipuia i tatou mai le matautia o le oti ma le agasala.
“O A’u”
“Ua fetalai atu Iesu ia te i latou, e moni, e moni, ou te fai atu ia te outou, sa a’u i ai, a o lei i ai se Aperaamo” (Ioane 8:58).
I le na o le faapea mai lava, “O a’u,” ua faaupu atoa ai lava e Iesu. O lena faaupuga, ua Ia tautino mai ai o Ia o le Foafoa o le lalolagi ma o Ieova, o le Atua o le Feagaiga Tuai, o le uiga tonu lava o lona igoa o le “O A’u” (tagai Esoto 3:14).
O Iesu o le Alo o le Atua, o le Mesia ma le Faaola, o lē ua faaolaina i tatou mai le agasala ma le oti. Ona o Lona faasinomaga ma le mea na Ia faia mo i tatou, ua mafai ai ona tatou maua le ola faavavau ma avea ai ma tagata e tatau ona avea ai i tatou.