“PE SE A LA OUTOU UPU IA TE AU, PE O AI?”

Sa fai atu e le Faaola i Ona soo lenei fesili, ma sa tali atu Peteru, “O oe o le Keriso, o le Alo o le Atua soifua” (tagai Mataio 16:15–16). O tali nei a le tupulaga talavou laiti ma le au talavou matutua mai le salafa o le lalolagi i le fesili lava lea e tasi:

Ua tele mea ua faia e Iesu Keriso mo au. Ua Ia aumaia ia te au lo’u aiga ma le talalelei. E fesoasoani o ia i a’u suesuega. Ua tele ni sikolasipi ua ou mauaina, ma ou te talitonu o faamanuiaga nei mai ia te Ia. A na le afio mai o Ia e faasino mai ia i tatou le ala e ola ai, semanu e le mafai ona tatou toe foi atu i lo tatou Tama Faalelagi.

Bryan N., 13, Honduras

Ua ou iloa o le puapuaga, maliu, ma le Togiola a le Faaola, ua mafai ai ona tatou toetutu ma mafai ai ona faaolaina i tatou faaleagaga ma le faaletino. Ona o le faatuatua ma le salamo, ua ou iloa ai e mafai ona faamagaloina i tatou i a tatou agasala.

Joan O., 19, Filipaina

I aso lava la ua leva, sa femaliuai ai se tamalii i lenei lalolagi, o se tamalii e ona ia faatinoga ma upu ia ua liua ai le faitau miliona o olaga—-e aofia ai ma a’u. O Ia o Iesu Keriso. O loo faaauau pea ona uunaia e Lana taulaga togiola lo’u olaga i aso taitasi. E matua maofa le iloa o Ona manu’a, e mafai ai ona faamalolo o tatou lava manu’anu’a. Ona ua ou iloa o Iesu o le Keriso, o lea ua ou sauniuni ai e auauna atu o se faifeautalai faamisiona ma folafola atu Lana talalelei i tagata o le lalolagi o ē e lei lagonaina lava Lona alofa e le uma. O Ia o le Faaola ma le Togiola o lo’u agaga.

Kristian M., 24, Kalaotia

Ua faia e Iesu Keriso le mea e leai se tasi o i tatou e mafai ona faia. Ia te au lava ia, o le mauaina o le Perisitua Arona o se taimi ofoofogia lea aua sa ou iloaina, o le mea lea e finagalo le Alii ou te faia. Sa ou mulimuli i Lana faaaoaoga. Ua ou iloa o le a Ia taitaiina pea au ma aoao mai ia te au le ala.

Limhi G., 17, Mekisiko

Ina ua mavae le maliu o lo’u tina, sa amata ona lofituina le olaga. Sa i’u ina ou liliu atu i lo’u epikopo mo se fautuaga. O le mea sa ia ta’u mai ia te au, e le o le mea lea sa ou mafaufau i ai, ae sa suia ai lo’u olaga. Sa ia fautuaina au ina ia ou faalagolago i le Tama Faalelagi e ala i le tatalo, faitau tusitusiga paia, ma talitonu o le a i ai le Faaola mo au—ia matua talitonuina lava o Ia ma o le a mama ai a’u avega. I le lua ma le afa tausaga mulimuli ane, sa ou iloa ua i ai pea lava pea le filemu ia i matou ona o lo matou Faaola ma le mea na Ia faia mo i matou.

Whitney W., 19, Arisona, ISA

Ua ou iloa o loo soifua Keriso. E alofa o Ia ia te au, ma sa Ia ofoina mai Lona soifua mo au. O Ia o la’u uo. O Ana aoaoga, ua ou aoaoina ai le auala e avea ai faapei o Ia. E faamaoni o Ia, e agalelei, atoatoa, ma tumu i le alofa. Sa puapuagatia o Ia i Ketesemane mo tagata uma. Ua ou iloa o Ia o le Keriso Soifua, o lo’u Faaola, o lo’u Papa, ma lo’u Alii.

Claudia R., 25, Mekisiko

O le ola ae i le Ekalesia ma ou alu i le Peraimeri, sa ou aoao ai e uiga ia Iesu Keriso mai lava a o ou teineitiiti. Ua tupu malosi atili ai la’u molimau talu mai na taimi. I le taimi nei la lea ua ou i ai i se misiona, ua ou fiafia lava i le avanoa e faasoa atu ai le talalelei ma molimau atu ia Iesu Keriso i aso uma.

A ou mafaufau i le Faaola ma mea uma ua Ia faia mo au, ou te manao lava ia ou latalata atili atu ia te Ia. Ua ou faatatauina ia te a’u lava ia mea sa ou aoaoina a o laitiiti. Ua ou fiafia lava ina ua mafai ona ou fesoasoani i isi tagata ia latou lagonaina le alofa o lo tatou Faaola o Iesu Keriso. O lenei molimau ua le na o ni upu ou te tautala atu ai—e mai i lo’u loto.

Susana V., 21, Toga