O Loo Soifua O Ia!
“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!” (MFF 76:22).
O Le Molimau a Perofeta o Aso e Gata Ai
“O loo soifua o Ia!” O le molimau lea a le Perofeta o Iosefa Samita i le Faaola o Iesu Keriso. Faatasi ai ma lena talitonuga maumaututu, ua molimau ai foi Peresitene uma O Le Ekalesia a Iesu Keriso o le Au Paia o Aso e Gata Ai na sosoo mai ai—o perofeta, o tagatavaai ma talifaaaliga ua lagolagoina—i le moni, paia, Togiola ma le Toetu o le Faaola.
Peresitene Gordon B. Hinckley
“Ua ou iloa e le o au o le ulu o lenei Ekalesia. O le Alii o Iesu Keriso o lona ao lea. O la’u misiona, o lo’u tiutetauave autu, ma lo’u faamamaluga Silisili e maua mai i le tuuina atu o le molimau paia i Lona soifua ai. O Iesu Keriso o le Alo o le Atua, o lē na faamaulalo e afio mai i lenei lalolagi o puapuaga, tauiviga, ma le tiga, ina ia uunaia loto o tagata mo le lelei, ina ia aoao mai le ala o le ola faavavau, ma ofoina mai Ia lava e avea ma taulaga mo agasala a tagata uma. O Ia o le ‘Tupu o Tupu ma le Alii o Alii, ma o le a nofotupu o Ia e faavavau faavavau lava’ (Handel’s Messiah). … Ou te tuuina atu la’u molimau aloaia o loo soifua o Ia ma o loo tu i le itu taumatau o Lona Tama.”1
Peresitene Howard W. Hunter (1907–95)
“Ua tumu a’u i le faafetai … ona o a’u fegalegaleaiga ma ni tagata ua i ai se molimau maumaututu o loo soifua le Atua, o Iesu o le Keriso; ma ou te tuuina atu la’u molimau, o le tala i le pepe na fanau i le falepovi i Peteleema e le o se fagogo o aso ua mavae, ae o Iesu, o le Alo o le Atua sa fanau mai ia Maria i le olaga nei; sa soifua o ia faatasi ma tagata; sa maliu o ia i luga o le satauro ma sa toetu mai; ma e moni lava o loo soifua i ona po nei; ma o ia o se tagata soifua ma o le Faaola o le lalolagi.”2
Peresitene Ezra Taft Benson (1899–1994)
“E i ai nisi taimi e fesili ai, ‘Pe o Mamona ea o ni Kerisiano?’ Tatou te tautino atu le paia o Iesu Keriso. Tatou te vaavaai atu ia te Ia e na o le pau lena o le punavai o lo tatou faaolataga. Tatou te taumafai e ola i Ana aoaoga, ma tatou te sagisagi atu i le taimi o le a toe afio mai ai o Ia i lenei lalolagi e pule ma nofotupu o le Tupu o Tupu ma le Alii o Alii. I upu a se perofeta o le Tusi a Mamona, matou te faapea atu i tagata i le aso, ‘E leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso, le Alii e Pule Aoao’ (Mosaea 3:17).”3
Peresitene Spencer W. Kimball (1895–1985)
“Tatou te tuu [Iesu Keriso] i luga o se tulaga e faapei ua leai lava ma se isi vaega ou te iloa. Ia i tatou, ua le gata ua na o ia le Alo e Toatasi o le Atua, ae o Ia foi o se Atua ma e tatou te gauai uma atu ia te ia …
“Po o le a lava le tele o a tatou tala e uiga ia te Ia, e matua le taitai ona lava.
“E le gata o Ia o le Kamuta, o le Nasareta, o le Kalilaia, ae o Iesu Keriso, le Atua o lenei lalolagi, le Alo o le Atua, ae o le mea aupito taua, o lo tatou Faaola, lo tatou Togiola …
“Ou te faaopoopo atu foi i ai la’u molimau. Ua ou iloa o Iesu Keriso o le Alo o le Atua soifua, ma sa faasatauroina o Ia ona o agasala a le lalolagi.
“O Ia o la’u uo, o lo’u Faaola, o lo’u Alii, ma lo’u Atua.”4
Peresitene Harold B. Lee (1899–1973)
“Ina ua mavae se po umi o le sailiga ma aso o le sauniuniga faaleagaga na mulimuli mai ai, sa oo ina ou iloa i le avea ai o se molimau, e sili atu ona mamana nai lo le vaai, seia oo ina mafai ona ou tautino atu ma le mautinoa lea e le mafai ona faaletonu, ua ou iloa i le malosi uma o lo’u agaga, o Iesu o le Keriso, o le Alo o le Atua soifua, sa soifua o Ia, sa maliu, ua Toetu o Ia, ma o le taimi nei o loo Pulefaamalumalu ai o Ia i le lagi ma taitaia mataupu a lenei ekalesia, lea o loo tauaveina Lona suafa aua o loo folafola atu e lenei ekalesia Ana aoaoga faavae. Ou te tautino atu ai i le lotomaulalo ma tuu atu ia te outou la’u molimau.”5
Peresitene Iosefa Filitia Samita (1876–1972)
“Ua i ai ia Keriso le Faaolataga. Ua oo mai ona o le togiola e le iu ma le faavavau lea na ia faataunuuina e ala i le faamaligiina o lona toto. O Ia o le Alo o le Atua, ma sa afio mai o ia i le lalolagi e laveai tagata mai le oti faaletino ma le faaleagaga lea na oo mai ona o le mea ua tatou ta’ua o le pa’ū.
“Ona o lona agalelei ma le alofa tunoa o le a toetutu mai ai tagata uma mai le tuugamau, ina ia faamasinoina e tusa ma galuega na faia i le tino …
“Ua ou iloa o loo soifua o Ia, e pule o ia i le lagi i luga ma le lalolagi i lalo, ma o le a manumalo foi ona faamoemoega. O Ia o lo tatou Alii ma lo tatou Atua. E pei ona fetalai ia lava ia Iosefa Samita: ‘O le Alii o le Atua lava ia, ma e leai lava se tasi Faaola a e na o ia lava’(MFF 76:1).”6
Peresitene Tavita O. MaKei (1873–1970)
“‘Matou te mafaia faapefea ona iloa le ala?’ o le fesili lea a Toma, a o nonofo ai ma ona uso a aposetolo i le laulau ina ua maea le tausamiga i le po le mafaagaloina o le faalataga; ma o le tali ofoofogia a Keriso o le: ‘O a’u nei le ala, ma le upu moni, ma le ola… .’ (Ioane 14:5–6.) Ma o ia lava lea! O Ia o le punavai o lo tatou mafanafana, o le musumusuga o lo tatou ola, o le tupuga o lo tatou olataga. Afai tatou te mananao e iloa lo tatou sootaga ma lo tatou Atua, tatou te o ia Iesu Keriso. Afai tatou te fia iloa le moni o le tino ola pea o le agaga, ua uma ona faaa’oa’o mai i le Toetu o le Faaola… .
“… O Ia o le Tagata Atoatoa e toatasi ua femaliuai i le lalolagi; o le faaaoaoga silisili o le tamalii; e faale-Atua i le natura; e atoatoa i lona alofa; o lo tatou Togiola; o lo tatou Faaola; o le Alo e mama atoatoa o lo tatou Tama Faavavau; o le Malamalama, o le Ola, o le Ala.”7
Peresitene Siaosi Alapati Samita (1870–1951)
“Na maliu le Faaola ina ia mafai ai ona tatou ola. Na Ia faatoilaloina le oti ma le tuugamau ma ua Ia tuuina atu le faamoemoega o se Toetu mamalu ia i latou uma e usitai i Ana aoaoga.”8
“Ua ou iloa le toatele i le lalolagi latou te lei iloa tatou te talitonu i le misiona paia a lo tatou Alii, ma sa taitaiina au ina ia ou fai atu i le silia ma le faatasi le taimi, e leai ni tagata i le lalolagi e sili atu ona malamalama i le misiona paia a Iesu Keriso, o ē ua matua talitonu lelei ia te ia o le Alo o le Atua, o ē ua matua talitonu ua faapaleina o ia i le mamalu i le itu taumatau o lona Tama, e pei o le Au Paia o Aso e Gata Ai.”9
Peresitene Heber J. Grant (1856–1945)
“Mo tagata o le Ekalesia i le lalolagi atoa, ma tagata e fiafia i le filemu i soo se mea, matou te fai atu, faauta i lenei Tamaalii o Kalilaia ua le na o se Faiaoga Sili, ua le na o se Taitai e le mafaatusalia, a o le Aloalii o le Filemu, o le Tupuga o le Olataga, iinei ma le aso, o le Faaola moni ma le faamaoni o le Lalolagi!
“… O Iesu o le Togiola o le lalolagi, o le Faaola o tagata, o lē na afio mai i le lalolagi ma se misiona na totofi i le lagi e maliu mo le togiolaina o le tagata. O Iesu Keriso o le Alo moni lava o le Atua, o le Alo e Toatasi i le tino. O Ia o lo tatou Togiola, ma e tatou te tapuai foi ia te ia.”10
Peresitene Iosefa F. Samita (1838–1918)
“Na fetalai mai le Agaga Paia o le Atua ia te au—e lei ui mai i le taliga, e lei ui mai i le mata, ae o lo’u agaga, i lo’u itu ola ma le faavavau,—na sa faaali mai ai ia te au o Iesu o le Keriso, o le Alo o le Atua soifua. Ou te tautino atu ia te outou, ua ou iloa o loo soifua lo’u Togiola. E le gata i lea, ua ou iloa o le a ou vaai ia te Ia i lenei lalolagi, ma o le a ou vaai ia te Ia e pei ona i ai o Ia… . Ua faaalia mai e le Alii lenei mea ia te au. Ua ia faatumulia lo’u agaga atoa i lenei molimau, seia oo ina le toe i ai se avanoa e toe masalosalo ai.”11
Peresitene Lorenzo Snow (1814–1901)
“O lena Tamaalii o lē sa afio i le Lagi, o lē sa nofotupu iina a o lei faavaeina le lalolagi, sa foafoaina le lalolagi, ma o lē na afio mai i lalo, i le taulotoaiga o taimi, e faaatoatoa ma laveai i mea sa ia faia, na faaali mai i tagata i lenei augatupulaga.”12
“Tatou te tautino atu i le lalolagi atoa ua tatou iloa, e ala i faaaliga faalelagi, o faaaliga mai le Agaga Paia, o Iesu o le Keriso, o le Alo o le Atua Soifua, ma sa faaali mai ia lava ia Iosefa Samita e faapei lava ona sa ia faia i ona aposetolo anamua, ina ua mavae ona ia toetu mai le tuugamau, ma sa ia faailoa atu ia te ia [le] upumoni faalelagi lea e na o le pau lena e mafai ona faaolaina ai le tagata.”13
Peresitene Wilford Woodruff (1807–98)
“O le faamoemoega o le misiona a Keriso i le lalolagi o le ofoina atu lea o ia lava o se taulaga e togiola ai tagata mai le oti faavavau… . Sa matua atoatoa lava ona ia faia i lona usiusitai i le finagalo o lona Tama i mea uma lava mai le amataga, ma inu ai i le ipu oona sa tuuina atu ia te ia. O i lea na faaalia mai ai le malamalama, le viiga, mamalu, tino ola pea, ma le ola faavavau, faatasi ma lena alofa mama lea e silisili atu nai lo le faatuatua ma le faamoemoe, aua o le Tamai Mamoe a le Atua na faatinoina mo le tagata lena togiola e le mafai e le [tagata] ona faia mo ia lava… .
“E leai se tasi e i ai se mana e faaolaina agaga o tagata ma tuuina atu ia i latou le ola e faavavau, sei vagana le Alii o Iesu Keriso, e tusa ai ma le poloaiga a Lona Tama.”14
Peresitene Ioane Teila (1808–87)
“Sa faamanuiaina lava o ia i le fiafia silisili i totonu nai lo Ona uso a tagata, sa Ia tauivi ma manumalo i mana o tagata ma tiapolo, o le lalolagi foi ma seoli na tuufaatasia; ma sa lagolago-ina e le mana silisiliese o le Aigaatua, ma Ia manumalo ai i le oti, o seoli ma le tuugamau, ma toetu manu-malo mai ai o ia o le Alo o le Atua, le Tama Faavavau, o le Mesia, le Alii o le filemu, o le Togiola, le Faaola o le lalolagi; ina ua maea le galuega e tusa ai ma le togiola, lea na tuu atu e Lona Tama ia te Ia e fai i le avea ai ma Alo o le Atua ma le Atalii o le Tagata.”15
Peresitene Polika Iaga (1801–77)
“Ou te molimau atu o Iesu o le Keriso, o le Faaola ma le Togiola o le lalolagi; ua ou usiusitai i ana fetalaiga, ma iloa ai ana folafolaga, ma lo’u malamalama ua i ai mo ia, e le mafai ona maua mai i le poto o lenei lalolagi, e le mafai foi ona ia aveesea… .
“O lo tatou Alii o Iesu Keriso—o le Faaola, o lē na togiolaina le lalolagi ma mea uma o i ai, o le Alo Pele e Toatasi o le Tama i le tino… . Ua tofo o Ia i le oti mo tagata uma, ma ua totogiina le aitalafu na oo mai i o tatou luga ona o o tatou uluai matua.”16
O Le Perofeta o Iosefa Samita (1805–44)
“O le tala lelei lenei, o le tala e fiafia ai, o le mea lava sa molitino mai ai le siufofoga mai le lagi ia te i ma’ua—
“Na ia maliu mai i le lalolagi, o Iesu lava ia, ina ia faasatauroina mo le lalolagi, ma faamamaina i amioletonu uma;
“Ina ia faaolaina ia te ia i latou uma lava o e na tuuina atu e le Tama i lona mana ma faia ai e ia” (MFF 76:40–42).