FESOASOANI ATU I ISI IA O MAI IA TE IA
“Sister Hopkins, o Aveolela ia e toasefulu (10) o le a e faiaoga ai i lenei tausaga,” o le faaaliga lea a le fesoasoani o le au peresitene o le Peraimeri. O a’u o se tagata faatoa liliu mai, ma ou te ta’u atu na ou palaai i lea valaauga. E mafai faapefea ona ou aoao atu se mea ou te lei malamalama lelei i ai i le taimi nei? E faapefea ona ou taulimaina le anoanoai o nei tamaiti tiotio? Peitai, na faamalosiau mai le epikopo ma le peresitene o le Peraimeri, o le a faamanuiaina a’u ona o le taliaina o lenei valaauga lofituina.
Na ou iloa o le a ou manaomia le tuuina atu atoatoa o a’u taumafaiga ou te aoaoina ai le talalelei ina ia mafai ai ona aoao atu, o le mea lea, o vaiaso taitasi ou te faitau ai le tusi lesona—o se puna o le malamalama tele o le talalelei—ma tatalo ma manatunatu loloto pe faapefea ona faatatau mataupu faavae i lo’u lava olaga, atoa ma tamaiti. A o o’u suesue ma aoao atu, sa ou maua se molimau o lo tatou tofi paia o ni fanau a le Atua. Na ou iloa le taua ma le tulaga ese o tagata taitoatasi. O lesona faigofie i le Peraimeri ua le gata ina faasusuluina ai foliga o Ana fanau faapelepele, ae ua faatupuina ai foi le fatu o se molimau, na ou maua ina ua ou ui ifo i le vai o le papatisoga.
O lena tausaga taua faatasi ma tamaiti Aveolela, na aumaia le loto faafetai ia te a’u mo se valaauga na suia ai lou olaga. Na suia a’u, faapea foi tamaiti i aoaoga a Iesu Keriso.