O Le galuega a le Togiola

TAOFIA LE IGOA

Sa ou iloa e i ai le fuafuaga a le Alii mo lou atalii, ae ina ua ia filifilia le auala sa ou moomoo maimau pe ana ia le uia, sa ou le mautinoa pe faapefea ona ia toe foi mai.

Na ou auai i le Ekalesia a Iesu Keriso o le Au Paia o Aso E Gata Ai i le 1992 i Netherlands. Ae peitai, e lei auai lou toalua ma sa ia le faatagaina la ma fanau o Alex ma Petra, e papatisoina (suia igoa). E ui lava, o matou uma e toatolu e auai atu i le lotu ma fai a matou afiafi faaleaiga i taimi uma.

Sa alualu lelei mea uma mo ni nai tausaga seia oo ina 13 tausaga o Alex, ma ia faasilasila ai e le toe fia alu i le lotu pe auai foi i ni afiafi faaleaiga. Ae ina ua faasolosolo matua, sa faaauau ona matua faaletonu mea uma. Sa matua faigata ia te au ona ou toe latalata ia Alex ona e le gata ua amata ona inupia ma ulaula, ae ua pepelo foi e uiga i ana amioga. Sa momomo ai lou lotu, ma sa maligi ou loimata i le tele o taimi ma ou tatalo e le aunoa ma ou aioi faatauanau i le Tama Faalelagi ina ia fesoasoani i lou atalii.

I le tasi po ao ou nofonofo filemu i totonu o le malumalu, sa ou vaaia ai se ata i lou mafaufau. O se alii talavou o loo tufaina le faamanatuga. Sa foliga mai o loo faamanatu mai e le Alii ia te au le moni o le mana o Lana Togiola, ma faamalosiauina au ou te alofa i lou atalii ma ou latalata pea i ona tafatafa.

Ae peitai, ao faagasolo pea le taimi, sa oo ina matua faigata le olaga. Ina ua ma tetea ma le tama o Alex, sa matua faanoanoa lava Alex. Sa ou iloa na ia manaomia se fesoasoani, ae peitai e le i manao i lau fesoasoani ma sa lei fia faalogo pe a ou taumafai e talanoa ia te ia.

I se tasi po na talosaga mai ai le matou Peresitene o le paranesi pe mafai ona sau e talanoa ia Alex. Sa le fiafia i ai Alex ae peitai na malie i ai i se la talanoaga. Ina ua maea le talanoaga sa matua ita Alex i le Peresitene o le paranesi ina ua faamalosiau atu ia te ia e ave sana misiona, ma faapea mai, “Afai o le Peresitene o le paranesi o se tagata moni o le Atua, e tatau ona sili atu lona iloa. Ua tatau ona ia iloa ou te le o agavaa ou te alu—aisea la e faalavelave mai ai ia te au?” I le po lava lena na ou iloa ai o loo i ai se fuafuaga a le Alii.

Sa amata ona atagia mai le fuafuaga i se auala e le i fuafuaina ina ua ou maua se telefoni mai le ofisa o leoleo. O loo taofia Alex. Sa fai o ma ofutalaloa mafanafana ma lou toalua fou ma o atu i le tulua o po ma ao e aumai Alex mai le ofisa o leoleo. E lei faaalia so ma le fiafia ma e le tele foi ni a ma tala na fai.

Ina ua matou taunuu i le fale, sa faamatala mai e Alex le mea na tupu ina ua la gaoia ma lana uo se tamai uilaafi. Sa matua salamo o ia i le mea na ia faia. Sa ou vaaia ai mo se taimi muamua se alii talavou ua salamo.

O le taofia e leoleo o se taimi lea o le liua o Alex ao ia amata ona maitauina iuga o ana gaioiga ma le mea o loo agai i ai lona olaga. Amata mai i lena aso, sa matua tele faamanuiaga na amata ona oo mai i lo matou aiga.

O le aso na sosoo ai na tau mai ai e Alex lona talosagaina o le leoleo e vili mai ia i maua aua sa ia mautinoa ma te alolofa ia te ia. Sa ia iloaina foi le tele o mea ua ia faia ua ma mafatia ai, ma sa ia faafetaia lo ma onosai ma le le gaoia i ia mea.

Sa i ai ni uo lolotu a Alex na aapa atu ma fesoasoani ia te ia. Sa valaaulia o ia e se tasi o ana uo i gaioiga a le Ekalesia. Sa tuuina atu e le isi le Tusi a Mamona ma tuuina atu ia te ia se lui ina ia faitauina. Ma e ui lava i se faafitauli i lana faitau, sa ou maitauina lava Alex o loo ia faitauina i lea taimi ma lea taimi.

O le faamanuiaga na sosoo ai—pe a mafai ona faitauina uma—ina ua fai mai Alex pe mafai ona ma faatauina se suti mo ia ona o lea ua mafaufau ua manao e alu i le lotu. Sa ou faapea ai mo na o le Kerisimasi. Ae peitai sa ou matua ofo lava, ina ua faaauau lava ona auai ina ua maea aso malolo.

O le isi faamanuiaga na sosoo ai na foliga mai toetoe lava a le mafai ona ou malamalama ai. Na faailoa mai e Alex o ia o le a papatiso. Sa ia le i manaomia se fesoasoani mai ia te au ma na ia fuafuaina lava mea uma ma le fesoasoani mai o ana uo ma faifeautalai sa aoaoina o ia. Sa ou matua ofo ina ua oo mai le aso, ma sa mafai ai ona ou vaai i lou atalii i ona laei papae, ma faataunuu ni feagaiga paia

Mulimuli ane a o ia faamatalaina le tala o lona liliu mai, sa ou iloa ai le faigata o tiga ma faanoanoaga na oo i ai Alex, ae na fesoasoani ia te ia e faalotomaualaloina e tootuli i ona tulivae ma ole atu mo se fesoasoani. Sa faamatalaina e Alex : “I se tasi po ina ua mamafatu lava lau avega e tauaveina, sa ou manatua ai upu a se uo lelei o le sa faamanatu mai ia te au e tatau ona ou tatalo mo se fesoasoani. I lena po sa ou manatu ai o le a ou taumafai e fai. Sa leai lava se isi faitotoa na matala mo au, ma talu mai lava ona aoaoina au e lou tina ou te tatalo, sa ou tootuli i lalo ma moeiini ou mata. Ao ou amata ona ou faatauanau atu mo se fesoasoani, sa oo mai ia te au se lagona matagofie tele. O le a le mafai ona galo ia te au lea lagona; sa ou lagonaina le alofa mama o Keriso. Sa ou lagona ua aveesea ou faafitauli ma au. E lei toe foi mai ai lava ou lagona popole talu mai lena taimi, ma faamanuiaina ai au i le molimau ia Iesu Keriso. Na suia lou loto, ma ou manao ai ou te mulimuli ia Iesu Keriso.”

Ina ua maea lona papatisoga, faamauga, ma le faaeeina o lona perisitua, sa valaauina ai Alex e tufaina le faamanatuga—o le faatusa paia o le taulaga a le Faaola. O le mea lena sa ou vaai i ai i le malumalu i le tele o tausaga ua mavae o lea ua avea ma se mea moni i ou lava luma. Sa ou faafetai lemu ae i le Tama Faalelagi mo le mea sa ou molimauina. O se taimi paia lea mo au.

O le tala e tatau ona muta ai iina, ae peitai e leai. Sa ou maitau mai lena taimi ao faaauau ona galue le Togiola i le olaga o lou atalii. Manatua le Peresitene musuia a lo matou paranesi? Sa faaauau ona ola ma faamalosia le molimau a lou atalii, ma o le valaaulia a le Peresitene o le paranesi na avea ma mea moni. Ua faatoa maea mai le misiona a Alex. Sa faaalu lona lua tausaga e aapa atu ai ma fesoasoani i isi tagata—e pei ona aapa atu le Alii ia te ia.

Ou te matua faafetai lava i le avea ai ma tina o Alex, ae peitai e sili ona ou faafetai i le Togiola a Iesu Keriso o loo galue i ola o i tatou uma lava.