Tapuai e ala i Viiga
E mafai ona tatou latalata atu i lo tatou Faaola i musika.
Maimau pe a na mafai ona ou pese pei o Sister Schneider. Maimau pe a na ou ta piano pei o Broehr Menendez. Ua faafia ona tatou faalogo, pe mafaufau i ia ituaiga o mea? O nisi taimi tatou te manatu i taleni musika o se meaalofa faapitoa i nisi tagata, o se meaalofa matagofie tatou te faatauaina ae ua manatu tatou te le maua.
I le Ekalesia a Iesu Keriso o le Au Paia o Aso e Gata Ai, o musika ma pese e mo tagata taitasi. O viiga tatou te faaali atu ai le faafetai ma le faamanu, aoao i le talalelei toefuataiina a le Faaola, manatua Lana Togiola, ma tautino atu tatou te mulimuli ia te Ia.
Faaali Atu le Lotofaafetai ma le Faamanu
Ina ua o ese mai Isaraelu anamua mai Aikupito, “Ona pepese ai lea o Mose ma le fanauga a Isaraelu i lenei pese ia Ieova” (Esoto 15:1). A o sopoina e sa Iareto le vasa, “sa latou pepese i viiga i le Atua” (Eteru 6:9). Ina ua faapaiaina le Malumalu o Katelani e le Au Paia o Aso e Gata Ai anamua, sa latou lagiina le viiga fou a William W. Phelps, “Le Agaga Paia ua Pei o le Afi.”1 I tisipenisione taitasi o le talalelei, e sii a’e ai e fanau a le Atua o latou leo ma vivii atu ia te Ia i musika.
O le tele o a tatou viiga i aso nei ua fetufaa’i i le agaga o le olioli ma viiga. Mo se faataitaiga, o se tasi viiga pele mai ia William W. Phelps ua folafola mai ai:
Faaola o Isaraelu,
Lo matou fiafia,
Ma manuia,
O lo matou malu,
I le po ma le ao,
Le Tupu, Lo matou Faaola!2
O viiga e mafai foi ona faaupu ai la tatou faafetai mo faamanuiaga faapitoa, e pei ona ta’u manino mai i lea fuaiupu masani:
Ia viia oe le Atua
Mo le perofeta lelei.
Ua taitaiina e ia
O i matou i ona po nei.
E moni lenei talaiga,
Ua tupu mai ai loto fou.
Ua naunau ai pea le loto,
Matou te auauna ia Oe.3
Ao tatou lagiina nei viiga, ua tatou mulimuli i le poloaiga, “Afai ua e fiafia”—o lona uiga afai ua e olioli pe fiafia—“ia vivii atu i le Alii i pesega, ma fati, ma le tatalo i le viiga ma le faafetai atu” (MFF 136:28).
Aoao Lana Talalelei
E faaopoopo i le faaalia o le faafetai ma le viiga, e aumaia foi e viiviiga avanoa e aoao ai le talalelei a Iesu Keriso. Mo se faataitaiga, o lenei pese masani a tamaiti ua faamalamalamaina ai i se auala faigofie ma le matagofie la tatou sootaga ma lo tatou Tama i le Lagi.
O au o se atalii o le Atua,
Ua na auina mai au iinei
Ia ou nofo ai i lenei lalolagi
Ma matua agalelei.4
O isi viiga ua faailoa mai ai le ala tatou te ola ai i mataupu faavae o le talalelei, e pei o lenei viiga moomia, na tusia i le vaitaimi o paionia.
O mai, o mai, outou le au paia,
Galulue fiafia.
E ui ina mata faigata,
O le a manuia.
Ua sili lava le taumafai,
Ia tiai ia le faavaivai.
Ae faia pea ma le fiafia,
Ua lelei, ua lelei!5
O isi o a tatou viiga pele ua aoaoina ai i tatou ia mulimuli i auauna a Keriso, o Ana perofeta filifilia i o tatou aso. “Viia Le Tagata,” mo se faataitaiga, ua fesoasoani tatou te manatua ai le taua o le matafaioi a le perofeta o Iosefa Samita, i le Toefuataiga o le talalelei.
Viia le na fetaia’i ma Ieova!
Le perofeta na tofia e Iesu
Na te tatala le toe autupulaga
Tupu ma nuu latou te viia.6
O le manatunatu i ia viiga ma isi, ma le suesue i mau mai tusitusiga paia o loo lisiina i tusipese, e mafai foi ona fesoasoani i lo tatou aoaoina o le talalelei, ma manatua ai le Faaola i o tatou olaga i aso taitasi.
Manatua Lana Togiola
O se tasi auala taua sili tatou te manatua ai le Faaola o le aai lea ma feinu i le faamanatuga i vaiaso taitasi. I le sauniuni atu mo lea sauniga paia, tatou te lagiina se viiga. O viiga faamanatuga e faamanatu mai ai ia i tatou le taulaga a Keriso ma lona uiga mo tatou:
E! ua maliu le Faaola;
Le sala ia tauia.
Sa Ia maliu e taulaga ai;
Sa ia maliu e taulaga ai
Tagata ia latou ola ai.7
Lou toto sa totogi ai o la’u sala
Le galo ia au se alofa ua faapena
Leai ou te viia pea o Lona alofa
Seia ifo ai au nei i ona luma.9
Afai e lagiina i le agaga tatalo ma le manatunatu loloto, e fesoasoani upu o viiga faamanatuga tatou te tepa taula’i ai i le Faaola. E saunia e na pese i tatou e talia le faamanatuga ma le malamalama i lona uiga, ma toe tautino atu ai e ave i o tatou luga le suafa o Keriso, ma manatua pea o Ia, ma tausi i ana poloaiga.
Tautino atu ia Mulimuli ia Iesu Keriso
O tautinoga ia mulimuli atu i le Faaola ua faamatalaina i le tele o a tatou viiga. A tatou lagiina nei viiga ua tatou tautino atu i lo tatou Tama i le Lagi ua tatou naunau e mulimuli atu i Lona Alo. Mo se faataitaiga, mafaufau i laina ia:
Matou te faafetai [i] le Tama
Mo lou faaali mai o le ala.
Matou te viia oe i pesega!
Fiafia, e ui, i le malamalama.10
O le viiga—“Ou te Alu i Mea e te Tofia” e i ai se tautinoga tutusa:
Ou te faamoemoe ia te oe
Ma lou alofa mai ia te a’u
Lou finagalo e fai, ma lo’u loto
Ou te usitai ia te oe.11
O a tatou pese—pe o viiviiga, faafetai, iloa, manatunatuga, po o tautinoga—e malie i le Alii. Na Ia fetalai mai, “Aua e olioli lou agaga i le pese a le loto, ioe, o le pese a e amiotonu o le tatalo lea ia te a’u, ma o le a tali i se faamanuiaga i o latou luga” (MFF 25:12).
O le mea e lelei ai, e lei fetalai mai le Alii, “Na o pese matagofie, o se tatalo lea ia te a’u” po o le, “Na o i latou e talenia i musika ou te faalogo atu i ai.” O a tatou fatuga e pei foi o o tatou olaga, e sili ona popole o Ia i faamoemoega o o tatou loto nai lo tomai.
Po o le a lava le maualuga o o tatou tomai, e mafai ona tatou auai i musika i le lagiina lea o viiga. Ma a tatou pepese ma le loto atoa, ua tatou o mai ia Keriso e ala i viiga.