Matou te Talitonu
O tali pupuu nei i nisi o fesili e masani ona fesiligia ai tagata o le Ekalesia a Iesu Keriso o le Au Paia o Aso e Gata Ai.
O le a e talitonu i ai le Au Paia o Aso e Gata Ai e uiga ia Iesu Keriso? Pe moni ea na toetu o Ia mai le oti? Pe toe afio mai o Ia i le fogaeleele i le mamalu? Pe manaomia Lona alofa tunoa e laveai ai tagata?
O nisi ia o fesili e masani ona fesiligia e tagata, pe a fetaia’i ma le Ekalesia po o ona tagata i le uluai taimi. I le tali atu i fesili, e tatau ona saunia i tatou: O le mea muamua ma le aupito taua, ia faalogo i le taitaiga a le Agaga Paia. O tali pupuu mulimuli mai ai e fatufatua pogati o manatu tuufaatasia tatou te tali atu ai.
E te talitonu ia Iesu Keriso faatalatu’u o lē sa soifua ma aoao atu i le Nuu Paia, pei ona faamauina i le Tusi Paia?
Ioe. Matou te talitonu na fanau mai Iesu ia Maria, folafola atu i le Nuu Paia ao aoao atu i latou mo le tolu tausaga, maliu i luga o le satauro, ma toe faatuina mai i le oti, pei ona mua’i valoia mai e perofeta mo le tele o seneturi, ao lei afio mai o Ia (tagai mo se faataitaiga, Kenese 49:10; Salamo 2:6–7; 22:16–18; 118:22; Isaia 7:14; Mika 5:2). Matou te talitonu na puapuagatia o Ia ma togiolaina agasala a tagata uma, lea ua alagatatau ai le salamo ma le faamagaloga. (tagai – Isaia 53:4–6). Matou te talitonu na Ia faatoilalo le oti ma o lona mana, o le a toetutu mai ai tane ma fafine uma i o latou tino faaletino (tagai Roma 6:5; 8:11). Matou te talitonu i le usiusitai i mataupu faavae o Lana talalelei, o atalii ma afafine uma o le Atua e o mai i le fogaeleele, o le a maua le faaolataga ma toe foi atu e nonofo faatasi ma lo tatou Tama, ma Lona Alo i lo la’ua malo i le lagi (tagai 1 Peteru 3:18; Mataupu Faavae o le Faatuatua 1:3).
Tou te talitonu na toetu moni mai lava le Alii mai le oti?
Ioe. E pei ona tautino mai e Ana Aposetolo i le Tusi Paia. Na vaaia Iesu Keriso i lona tino toetu e le fiaselau o molimau (tagai Luka 24:39; Ioane 20:20; 1 Korinito 15:3–8). Ona o ia o se tagata toetu na aoao atu ai i le faitau afe o isi o ana mamoe (Ioane 10:16) i Amerika, ma faaali atu ia i latou manu’a i Ona lima ma vae, ma le itu, ma aoao atu i latou mo le tele o aso (tagai 3 Nifae 11–28)
Faatasi ma Lona Tama, na Ia faaali ia Iosefa Samita le Itiiti i le 1820. Na taitaia e le Alii lenei perofeta talavou e toefuatai Lana Ekalesia ma le talalelei, talu ai ona ua suia i mataupu a tagata, ina ua maliliu Aposetolo anamua. Na tuuina mai e Iosefa Samita ma se tasi o ana paaga lenei molimau ia Iesu Keriso i le 1832: “O loo soifua o Ia! Aua na ma vaaia o ia i le itu taumatau lava o le Atua, na ma faalogoina foi le siufofoga o molimau mai, o ia lava lea o le Toatasi na Fanaua e le Tama” (MFF 76:22–23).
Tou te talitonu e toe afio mai o Ia i le fogaeleele i le mamalu?
Ioe. Ua molimau mai e tusitusiga paia. “O Iesu lena ua aveina a’e nai ia te outou i le lagi, e faapea ona toe afio mai o Ia, pei o Lona afio atu i le lagi ua outou vaavaai i ai” (Galuega 1:11). “Aua ua ou iloa o loo soifua le na te togiolaina a’u; o aso amuli foi e tulai mai ai o ia i luga o le eleele” (Iopu 19:25). “E afio mai o ia i ao o le lagi e nofotupu i lona nuu i le lalolagi” (MFF 76:63).
Ma le isi, matou te talitonu ona o Lona Toetu o le a faapea foi tatou ona toe maua o tatou tino faaletino: “E ui lava foi ina faaumatia lenei tino pe a mavae atu lo’u pa’u, ae ou te iloa atu le Atua i lou tino” (Iopu 19:26). “Aua faapei ona oti uma ia Atamu, e faapea foi ona faaolaina uma ia Keriso” (1 Korinito 15:22). “E tatalaina foi i le maliu o Keriso noanoaga o le oti faaletino. E toe faatasia le agaga ma le tino i lona uiga atoatoa” (Alema 11:42–43).
Tou te talitonu e manaomia Lona alofa tunoa mo lo tatou faaolataga?
E moni a’ia’i. A aunoa ma le alofa tunoa o Iesu Keriso, e le mafai ona faasaoina se tasi, pe maua faamanuiaga faavavau (tagai Roma 3:23–24). O Lona alofa tunoa, o le a toe tutu tagata uma, ma, o i latou uma e talitonu ma mulimuli ia te Ia, e maua le ola faavavau (tagai Ioane 3:15). Ma le isi, ona o Lona alofa tunoa, o le a faaauau e oo i le faavavau a tatou sootaga paia ma ta’ito’alua ma aiga (tagai Mataio 16:19; 1 Korinito 11:11; MFF 132:19). O nei faamanuiaga faavavau o Ana meaalofa ia mo i tatou; e leai se mea tatou te mafaia na o i tatou ina ia aloaia pe maua ai ia taui.
E ui i lea, ua faamanino mai i tusitusiga paia lo tatou maua o le atoatoa o faamanuiaga o Lona alofa tunoa, i lo tatou faatuatua ma le usiusitai i Ana a’oa’oga. Na aoao mai le Aposetolo o Paulo e le mafai ona tatou faasaoina i tatou lava; tatou te manaomia le alofa tunoa o le Alii. “Aua o le alofa tunoa ua faaolaina ai outou i le faatuatua; e le mai ia te outou foi lea; a o le mea ua foaiina mai e le Atua; e le ona o galuega ina nei mitamita se tasi. Aua o lana galuega lava i tatou, na faia i tatou ia Keriso Iesu, ina ia faia galuega lelei, ua saunia muamua e le Atua, ina ia tatou savavali ai” (Efeso 2:8–10).
Fai mai Iakopo: “E faapea foi le faatuatua, pe afai e le i ai galuega, e mate lava ia ina ua na o ia … o lenei, ua outou iloa ua tauamiotonuina le tagata i galuega, ae le na o le faatuatua” (Iakopo 2:17, 24). Faapei ona fetalai le Faaola i le taulealea mauoa o le na usiusita’i, ma naunau i le ola faavavau, ae e anoanoai isi mea e tatau ona fai (tagai Mataio 19:16–22; Luka 18:18–23). E talitonu le Au Paia o Aso e Gata Ai o le alofa tunoa o Keriso e matua tele lava ma atoatoa mo e talitonu ia Keriso, ma faia mea pei ona ia aoao mai. “Aua ua matou iloa e faaolaina i matou i le alofa tunoa, pe a uma ona faia mea uma tatou te mafaia” (2 Nifae 25:23; faaopoopo le faatusilima).
E ui lava e le mafai e a tatou galuega lelei ona faamamaina ai a tatou agasala, ae tatou te faaalia ai le moni o lo tatou faatuatua ia Iesu Keriso, ma lo tatou faamaoni i le ala sa na Ia savalia.
Tou te talitonu o Iosefa Samita i se isi itu, e pei lava o Iesu Keriso i le fesoasoani e faaola tagata?
Leai. O Iosefa Samita o se perofeta taua i le talafaasolopito o tagata. O le galuega sa na ia faia i se taitaiga faalelagi, na aumaia ai i le fogaeleele faamanuiaga ma le poto lea sa i ai i perofeta a le Atua ma e na mulimuli ai i taimi o le Feagaiga Tuai ma le Feagaiga Fou, ae sa leiloloa. Sa pei lava Iosefa Samita o na perofeta anamua, o se auauna a le Alii o Iesu Keriso o le na aoao mai o le faaolataga ma faamanuiaga uma o le faavavau e faatoa mafai lava ona oo mai, e ala mai i lo tatou Faaola. “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.1 I se tasi taimi na aoao mai ai e le perofeta, “A tatou tomanatu i le paia ma tulaga atoatoa o lo tatou Matai sili, o le ua tatalaina se ala e mafai ai ona tatou o mai ia te ia, e oo lava i le ositaulagaina o ia lava, e liu suavai ai o tatou loto i totonu ia i tatou ona o lona faamaualalo.”2