O Le Keriso Soifua

O Le Molimau a Aposetolo O Le Ekalesia a Iesu Keriso o le Au Paia o Aso E Gata Ai

“O Le Keriso Soifua: O Le Molimau a Aposetolo,” i le aso 1 Ianuari, 2000, na sainia e le Au Peresitene Sili ma le Korama a Aposetolo e Toasefululua. Sa lolomi ma faasalalauina i le Liahona o Aperila, 2000.

Ao tatou faamanatuina le soifua mai o Iesu Keriso i le luaafe tausaga talu ai, matou te tuuina atu la matou molimau i le moni o Lona soifua le mafaatusalia ma le aoga e le gata mai o Lana taulaga togiola sili. E leai lava se isi ua i ai se aafiaga loloto naua o i latou uma na soifua, ma o le a soifua ai i luga o le fogaeleele.

O Ia o le Ieova Silisili o le Feagaiga Tuai, o le Mesia o le Feagaiga Fou. O Ia le na foafoaina le lalolagi, i lalo o le taitaiga a Lona Tama. “Na Ia faia mea uma lava; e leai foi se mea e tasi na faia, e lei faia e Ia” (Ioane 1:3). E ui ina leai se agasala, ae sa papatisoina o Ia ina ia faataunuuina ai le amiotonu uma. “Sa femaliuai o Ia ma agalelei” (Galuega 10:38), ae na le amanaiaina o Ia. O Lana talalelei o se savali o le filemu ma le agalelei. Na Ia augani mai i tagata uma ina ia mulimuli atu i Lana faataitaiga. Na ia femaliuai i auala o Palesitina, e faamalolo i e mamai, faapupula i e tauaso, ma faatutu mai e na oti. Na Ia aoao atu upumoni o le faavavau, o le tulaga moni sa tatou i ai i le muai olaga, ma le faamoemoega o lo tatou ola i le fogaeleele, ma le tulaga e mafai ona ausia e atalii ma afafine o le Atua i le olaga a sau.

Na ia faatuina le faamanatuga e avea ma faamanatu o Lana taulaga togiola sili. Sa pue faapagotaina o Ia ma faasalaina i ni tuuaiga sese, sa tausalaina ina ia faamalieina ai le motu o tagata, ma faasalaina i le oti i luga o le satauro i Kalevario. Sa tuuina atu Lona soifua e togiola ai agasala a tagata uma. O lana taulaga o se meaalofa foaifua sili lea mo i latou uma e soifua mai i luga o le fogaeleele.

Matou te tautino atu i upu ma le faamaoni aiai, o Lona soifua, lea e totonugalemu i le talafaasolopito o tagata uma, e lei amataina mai i Peteleema pe faaiuina foi i luga o Kalevario. O Ia o le Ulumatua a le Tama, o le Alo Pele e Toatasi i la le tino, o le Faaola ia o le lalolagi.

Na toe tu mai o Ia mai le tuugamau “e avea ma faapolopolo o e ua momoe” (1 Korinito 15:20). I lona tulaga o le Alii Toetu, na Ia asiasi atu ia i latou na alofagia e Ia i le olaga nei. Na Ia asiasi atu foi i isi Ana “mamoe” (Ioane 10:16) i Amerika anamua. I le lalolagi i ona po nei, na faaali atu o Ia ma Lona Tama i le taulealea o Iosefa Samita, i le amataga o le oo mai “o le sauniga i le faaatoaga o tausaga” [tisipenisione o le atoaga o taimi] (Efeso 1:10).

Na tusia e le Perofeta o Iosefa e faatatau i le Keriso Soifua: “O ona fofoga e pei o le afi mumu; o lauao o lona ao e sinasina e pei o le kiona mama; ae sili le pupula o ona fofoga i lo le pupula o le la; ma o lona siufofoga e pei o le taalili o vai tetele, o le siufofoga lava o Ieova ua faapea mai:

“O au le muamua ma le mulimuli; o au o le o loo ola, o au o le na fasiotia; o au o lo outou fautua i le Tama” (MFF 110:3–4).

Ua folafola mai foi le Perofeta e uiga ia te Ia: “O lenei ina ua uma ona faia molimau e tele e uiga ia te Ia, o le molimau tupito mulimuli lenei i mau uma lava, ma te faia ia te Ia: O loo soifua o Ia!

“Aua na ma vaaia o Ia i le itu taumatau lava o le Atua, na ma faalogoina foi le siufofoga o molimau mai o Ia lava lea o le Toatasi na Fanaua e le Tama —

“E mai ia te Ia, ma ui mai ia te Ia, ma o Ia, na foafoaina ai le lalolagi uma, o e nonofo ai foi o atalii ma afafine na fanaua e le Atua” (MFF 76:22–24).

Matou te folafola i upu o le faamaoni aiai, ua toefuataiina mai i le fogaeleele Lana perisitua ma Lana Ekalesia —“ua atinae i luga o le faavae o … aposetolo atoa ma le au perofeta, o le maatulimanu o Iesu Keriso lava lea” (Efeso 2:20).

Matou te molimau atu o le a i ai se aso e toe afio mai ai o Ia i le lalolagi. “Ona faaalia mai ai lea o le pupula o Ieova, e vaaia lava e tagata uma faatasi” (Isaia 40:5). O le a pule o Ia o le Tupu o Tupu ma nofotupu foi o le Alii o Alii, ma o le a tootutuli tulivae uma ma tapuai laulaufaiva uma ia te Ia. O le a o tatou tutu atu taitoatasi ina ia faamasinoina e Ia e tusa ma a tatou galuega ma manaoga o o tatou loto.

Matou te molimau atu, i le avea ai ma Ana aposetolo ua faauuina i le ala e tatau ai—o Iesu o le Keriso Soifua, o le alo tino ola pea o le Atua. O Ia o le Tupu silisili o Emanuelu, o loo afio i le taimi nei i le itu taumatau o lona Tama. O Ia o le malamalama, o le ola, ma le faamoemoega o le lalolagi. Ia faafetaia le Atua mo le meaalofa le mafaatusalia o Lona Alo paia lea.