O Lau Toonai e Lei Faamoemoeina o le Eseta
A o ou tuputupu ae, e masani lava ona avea le Eseta o se aso malolo faapitoa. A tuua le lotu, e aoao e ou matua le aiga i se lesona e faatatau i le Togiola ma le Toetu; a o le afiafi e fai ai se matou toonai saunia lelei. E masani ona auai mai a matou uo ia matou toonai, lea e le gata i le manaia ao le faafiafia loto. Ona o nei tu, ua avea ai le Eseta ma se aso malolo sili mo au—o se taimi taua mo le aiga e faamanatu ai le Toetu mai o le Faaola.
I se tasi tausaga a o ou aoga i Lonetona, sa na o au ai i le aso o le Eseta, faatoa fai faaafiafi ia sauniga a lau uarota, ma sa matua umi le taeao mo a’u. Sa ou mafaufau i lou aiga i le tele o maila i lo matou va, i le faamanatuina o le Eseta e aunoa ma a’u, ma sa ou lagona le gaogao ma le faanoanoa o lou loto.
Muamua sa ou faatuutuu i ou lagona, peitai sa ou toe tomanatu pe o a ni mea e tatau ona ou faia e faaleleia ai le aso. Na foi atu lou mafaufau i tagata sa ou pasia i nofoaga maualalalo tumutumu ma feomai. E pei o le tele o aai tetele, o nofoaga i lalo e masani ona nofoia e tamaloloa ma fafine e leai ni aiga, ae faalagolago i lima foai o e femalagaa’i. E masani ona ou lagona le ootia o lou loto i o latou manaoga, ma sa manino ai lou iloa e le na o a’u le tagata i Lonetona o loo tuua toatasi i le Eseta. O le fesoasoani atu i tagata ese ua tulai mai o se uiga lelei e faaali ai lou loto faafetai mo ni Eseta ofoofogia sa ou olioli ai o se tamaitiiti.
Sa ou saunia ni tagapepa o meaai e pei o sanuisi, fualaau aina, masi, ma meainu. Na ou agai atu loa i nofoaga i lalo ma sailia tagata sa ou le’i amanaiaina i nisi taimi. O le toatele na matua faaali mai le lotofaafetai mo meaai. Sa ou fai atu ia i latou taitoatasi, “Manuia le Eseta!”
E toe tasi lava le tagapepa o meaai na totoe ae ou tau loa i se tamaloa e foliga mai na matua mafatia lava. E palapala ona lavalava; sa matua tumu ona mata i le faanoanoa o lana pupula. Ina ua ou tuu atu ia te ia le meaai, sa tepa mai o ia ma le ofo.
“O le a lenei?” na fesili mai ai.
“O se meaai, alii,” o lau tali atu lea.
“Faafetai, faafetai tele lava,” na tali mai ai o ia. Na faafuasei ona suia ona foliga i le fiafia ma le lotofaafetai. Na ia uu atu ma le naunau le tagapepa, ma opo mau faapei o se maa taua.
“Aua e te popole,” o lau tala lea, ma le lagona ootia, ina ua vaaia le suiga i ona foliga. “Manuia le Eseta, alii.”
“Manuia le Eseta” na ia tali mai ai.
Ao ou savali atu i le fale, na oo mai upu a le Tupu o Peniamina i lou mafaufau: “Aua faauta, e le ni tagata aisi ea i tatou uma?” (Mosaea 4:19). Sa ou iloa ai a aunoa ma le Faaola, o le a lafoaiina i tatou uma ma solia i vae, ma tuulafoaiina ai. Ae ua aapa mai le Faaola ma ofo mai mo i tatou se mea o loo tatou matua manaomia lava: o le faamoemoe e mafai ona faamamaina i tatou, o le a tatou toe ola mai, ma o le a tatou toe foi atu ia te Ia i se aso.
I le feagai ai ma le agasala ma le oti, o loo ou tu atu foi i luma o le Faaola o se tagata aisi. Ua aapa mai o Ia ia te au i le alofa mutimutivale. I se aso pe a ou tu atu i Ona luma, o le a faaalia le loloto o lou agaga faafetai i ou foliga, e pei ona sa ou vaaia i sina vaega itiiti i foliga o lenei tagata lotomaulalo.
Ao ou savali atu pea i le fale, sa amata ona ou tagi. Sa mou atu lou lagona o le tuua na o a’u; sa suia i le olioli ma se malamalama loloto i upu a le Tupu o Peniamina, ma le alofa mutimutivale o le Faaola. Sa ou faafetai ae ma le loto filemu i le Alii ona o se meaalofa ou te lei faamoemoeina na ou maua mai i lenei tama. Na ou ofo atu ia te ia se meaai faatauvaa, ae na faafoi mai e ia ia te au se toonai moni o le Eseta.