Ua Ou Iloa o Loo Soifua Lou Faaola
I lo’u tausaga muamua i le Iunivesite o Polika Iaga—Idaho (na avea muamua o le Kolisi o Ricks) na ou misia lou aiga. Ae ina ua maea ni nai masina i vasega, na faamautuina ou lagona i le olaga faa-kolisi ma sa ou maua le fiafia. Ina ua manaomia mai au i se telefoni, sa ou i ai i lou potu o loo fai au suesuega.
“Christy, o se tala faanoanoa mo oe,” o le tala lea a lou tina i lona leo ootia, “Ua maliu lou tama i le po nei ona o se mai fatu faigata faafuasei.”
Na matua lofia a’u i lagona fenumiai o le atuatuvale, a o ou taumafai e faavasega le mea ua ou faalogo atu i ai. E lei leva ni nai aso talu ai sa ma faatasi ai ma lo’u tama, ae ou te lei manatu o se taimi mulimuli lea. O le maliu o lo’u tama na matua faateia ai lo matou aiga atoa, e faapea foi i le matou uarota. Faatoa 53 tausaga o lou tama ma sa avea o ia ma se epikopo.
O aso mulimuli ane sa faatumulia i asiasiga, o telefoni mai o aiga, uo, tagata o le uarota ma tuaoi. Na faatumulia o matou lagona i le alofa faaalia, mai ia i latou sa siomia matou. I le falelauasiga o lou tama, sa fetufaai molimau a aiga i manatunatuga o lo matou faatasi ai ma ia; ma sa matou molimau i le ata o le faaolataga, ma le olaga pe a mavae le oti.
O lo’u tama o se tane faamaoni, o se tagata tuuto o le Au Paia, o se Sikauti toaga, ma o se tama ofoofogia. E toatele nisi ua faamanuiaina ona o le olaga sa ola ai o ia. Ina ua uma le sauniga o le falelauasiga, sa faamanuia e lou tuagane matua le tuugamau, ma sa matou tutu o se aiga ma fetagisi masusu i le taimi atoa na usuina ai le, “O Au o se Atalii o le Atua” (Tusipese a Tamaiti, nu. 2).
Na ou toe foi i le aoga i le aso na sosoo ma le falelauasiga. Ou te lei fiafia e toe foi, ae na ou iloa e tatau ona ou agai pea i luma i le olaga, ma faataunuu ou tiutetauave. O ni isi aso e faigofie nai lo isi. E i ai taimi ou te mafaufau ai i lou tama, ma sa ou faamoemoe i lou iloa o le ata o le faaolataga, ma lou faatuatua ia Iesu Keriso e fesoasoani ia te au i le feagai ai ma luitau ma fesili.
E tusa o le lua vaiaso talu ona toesea lou tama, na ou alu ai ma la’u tusi o talaaga i se falelotu i le lotoa a le aoga e tusitusi ou lagona, ma mea na tutupu talu mai le maliu o lou tama. A’o ou tusitusi sa ou lagona le malosi o le Agaga ma sa faatumulia au i se faamautinoaga lofituina o le alofa o lou Tama Faalelagi mo a’u, ma o loo i ai Sana fuafuaga patino mo au, ma o le a le tuulafoaiina lava au. Ina ua uma au tusitusiga sa tata mai logo i faaleotele leo i luga ae latalata i le nofoaga tutotonu o tamaiti aoga, o loo taina le viiga “Ua ou Iloa o Loo Soifua Lou Faaola” (Viiga, nu.73). Na vave ona oo mai upu o le viiga i lou mafaufau:
Ua ou iloa lou Faaola
Ua soifua ia i luga!
Soifua o Ia na maliu,
Soifua Lou Tupu faavavau… .
Ua tu mai pea i faigata.
Tu e soloi ou loimata.
Ua tu e faafilemu mai.
Tu e faamanuia mai.
Ou te iloa o loo soifua lou Faaola, ma ua ou iloa e alofa o Ia ia te a’u. Ona ua ou iloa na toe tu mai o ia i le maliu, ua ou talitonu o lou tama ma o tatou aiga pele ua muamua ia i tatou o le a toe tutu mai. E maeu le mafanafana ina ua iloa nei upu moni.