O Le Faatuatua o Emilio
Na faasino mai ia te au e se Tiakono —lana epikopo—le uiga “o le i ai o le faatuatua ina ia faamaloloina.”
I ni nai masina ua tuanai atu, na faafuasei ai ona mai tigaina Emilio, o se tasi o tiakono i la matou uarota. Sa le mafai e fomai ona iloa auga o lona mai. Sa faapopoleina o ia ma lona tina ona ua faasolosolo lava ina vaivai ma vave ona fai ifo lona malosi. Sa ave o ia e lona tina i le falemai i le tele o taimi ae lei mafai lava ona maua se tali.
Sa auina mai Emilio e lona tina i le falelotu mo se faamanuiaga faa-perisitua. O se tasi o le korama a le au toeaina ma au, lana epikopo, na maua le avanoa e faamanuiaina o ia, ma sa moe lelei o ia i le po mo se taimi muamua.
Ae peitai, i ni nai aso mulimuli ane na ou maua ai se faamatalaga ua toe oso lona mai ma ua toe foi atu i le falemai. Sa ma faataalise atu ma se tasi o uso i le falemai, ma mafai ona ma o i totonu o lona potu ma asiasi atu ia te ia. Sa ou mafaufau atonu o le a loto vaivai Emilio i lona tulaga faaletonu o loo i ai, sa matua faagaeetia au i se mea na tupu.
Sa matou talanoa e uiga ia Iesu Keriso, ma sa ou faamatalaina o le Faaola e i ai lona mana e mafaia ai soo se mea e tusa ai lea ma lona finagalo. O le tali a Emilio na matua ootia ai lou loto: “Epikopo, ua na o se tofotofoga lenei mea. E i ai lou faatuatuaga o le a vave ona tea ese atu ona o lou faatuatua ia Iesu Keriso.” Sa tuu atu o ma lima i luga o lona ulu ma toe tuuina atu i ai se faamanuiaga.
Ina ua tea lena po sa toe foi Emilio i lona malosi atoatoa e le mafai ona faamatalaina. Sa mafai ona toe foi i ona tiute masani ma alu i le lotu e aunoa ma ni faigata.
Na faaaogaina e Emilio le faatuatua e manaomia e le Faaola e faatino ai lenei ituaiga vavega e tasi e pei ona Ia faatinoina ao i ai i luga o lenei fogaeleele. Ia te au lava ia, o Emilio o se faataitaiga o i latou o loo fetalai ai le Alii, “A o nisi ua foaiina atu i ai ia maua le faatuatua e faamaloloina ai i latou” (MFF 46:19).
E ese le matagofie o le maua o le avanoa e faaaogaina ai le perisitua i o tatou olaga ma iloa ai o loo i ai lo tatou Tama Faalelagi, o le e alofa ia i tatou, ma e tusa ai ma lo tatou faatuatua i Lona Alo, ua mafai ai ona tatou maua vavega i nei aso e gata ai.