“O Mea e 3 Tatou te Aoao mai ia Keriso e uiga i Sootaga,”Liahona, Ape. 2024.
Autalavou Matutua
O Mea e 3 Tatou te Aoao mai ia Keriso e uiga i Sootaga
A o tatou fausia ma faalolotoina sootaga ma isi, o le a tatou maua le faamalieina sili atu ma le olioli.
Ua Asiasi Atu Keriso ia sa Nifaē, saunia e Minerva Teichert
Pe ua e mafaufau ea i le ala na atiae ai e Iesu Keriso ia sootaga ma isi? Mafaufau i ai. Sa Ia silafia i taimi uma tagata sa siomia o Ia (tagai i le Luka 8:43–48; 19:2–10; Ioane 1:47–50). Sa Ia alofa atu i tagata (tagai i le Ioane 11:31–36). Sa Ia aapa atu ia i latou ma taumafai e sii a’e a latou avega (tagai i le Luka 8:26–36; Ioane 5:5–9).
E oo lava i le Tusi a Mamona, na afio mai faaletino Iesu Keriso i sa Nifaē ma valaaulia i latou e o mai ia te Ia “taitoatasi” (3 Nifae 11:15).
O le aapa atu, auauna atu, ma le agaalofa i isi o se vaega taua lea o ituaiga tagata e i ai Keriso. Ma ona o Ia, ua i ai sa tatou faataitaiga e mulimuli ai pe a taumafai e fausia ni sootaga ma tagata o siomia i tatou. O mea nei e tolu e mafai ona tatou aoaoina e uiga i sootaga e faavavau mai le faataitaiga a Iesu Keriso:
Ou Te Le Faasala Foi ia te Oe, saunia e Eva Timothy
1. O Sootaga e Faamanuiaina ai i Tatou i le Taimi Nei ma i le Olaga a Sau
E leai se tasi e fia lagonaina le tuuatoatasi. O se tasi o mea e sili ona taua e mafai ona tatou faia i le lalolagi o le atiina ae lea o sootaga o le a lagolagoina ai i tatou i vaitau eseese o le olaga ma fesoasoani ia i tatou e tumau e oo i le iuga.
Na a’oa’o mai Peresitene Dieter F. Uchtdorf, a’o avea ma Fesoasoani Lua i le Au Peresitene Sili e faapea, “ao aapa atu o tatou lima ma loto i le alofa faaKeriso i isi, o le a tupu ia i tatou se mea matagofie. O le a faamaloloina, ma toe faaleleia, ma sili atu ona malosi o tatou lava agaga. O le a sili atu ona tatou fiafia, sili atu ona toafilemu, ma sili atu ona mataala ma iloa musumusuga a le Agaga Paia.”1
O a tatou sootaga o le a le gata ina faamanuiaina ai i tatou i le lalolagi ae o le a faia foi se vaega taua e fesoasoani ai ia i tatou e ausia le faaeaga.
A o auauna ai o se Fitugafulu Eria, sa saunoa Elder Kevin J Worthen, “O se tasi o faamoemoega o lenei olaga faaletino … o le atiina ae lea o tomai ma uiga e manaomia e faavae ai ni sootaga tumau ma olioli.”2
E finagalo Keriso ia tatou i ai i le lagi faatasi ma Ia. Na Ia fetalai, “Afai foi ou te alu ma sauni se mea e nonofo ai outou, ou toe sau, ou te talia foi outou ia faatasi ma a’u; ina ia i ai outou i le mea ou te i ai a’u” (Ioane 14:3). E mafai ona tatou mulimuli i Lana faataitaiga a o tatou faafaileleina sootaga e mafai ona tatou aveina atu i le lagi. Ua tatou aoao i le Gospel Topics Essays e faapea “e manatu tagata o le Ekalesia e itiiti ifo le faaeaga e ala i ata o mea o le a latou maua ma sili atu e ala i sootaga o loo ia i latou i le taimi nei ma le auala e mafai ai ona faamamaina ma siitia na sootaga.”3
Nai lo le lagonaina e pei o loo tatou ola na o i tatou i le olaga, o le a tatou iloa o a tatou sootaga e mafai ona avea ma ’olo o le saogalemu ma le mafanafana. A o tatou mulimuli i le faataitaiga a Iesu Keriso i le faafaileleina o a tatou sootaga, o le a tatou maua le fiafia ma le olioli sili atu i lenei olaga ma le olaga a sau.
E Fai ma Faamanatuga ia te Au, saunia e Walter Rane
2. O Sootaga Ee Aoga ai Taumafaiga
Afai e te lagona o le fausiaina o sootaga e manaomia ai ni galuega, e le o tuua na o oe.
Na saunoa Elder Worthen: “O sootaga lelei e faavavau e oo mai i se tau. Ina ia alofa moni i isi, e tatau ona tatou vaivai i ni auala fou. O lo tatou alolofa tele ma le popole mo isi o lona uiga o le a aafia i tatou i a latou amioga ma tulaga i auala o le a i ai taimi o le a faaloaloa atu ai le agaga … Ae o le taunuuga e tauia ai le tau.”4
E le faigofie lava ona oo mai ni mea maoae, ma e aofia ai le sootaga na foafoaina e le Faaola ma i tatou e ala i Lana taulaga togiola. Sa ia iloaina o le tigā o le a Ia oo i ai sa matua aoga lava. O Lona alofa sili mo i tatou na faaosofia ai o Ia e faaauau pea i luma e tusa lava pe sa Ia fesili atu pe i ai se isi auala (tagai i le Mataio 26:39).
3. O Le A Fesoasoani Keriso ia i Tatou
Atonu e te mafaufau, “Ou te iloa e taua sootaga! Ou te le lelei tele i le fai uo.”
E malamalama Keriso. Na te silafia le faigata o le fegalegaleai ma le fefe tatou te feagai i nisi taimi pe a taumafai e fesootai ma isi, aemaise lava i se lalolagi ua avea ma se masini faatekinolosi tele.
Sa Ia folafola mai, “Ua lava lo’u alofa tunoa i tagata uma o e faamaulaloina i latou lava i o’u luma; aua afai latou te faamaulaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27
O le a fesoasoani Keriso e taiala i tatou pe a i ai so tatou loto naunautai. Ma a o tatou mulimuli i Lana faataitaiga, ua tuuina mai ia i tatou se folafolaga e faapea i le iuga “o le a tatou faapei o ia” (Moronae 7:48)—ma o lenei mea e aofia ai le faateleina o le alofa mamā ma le atiina ae o sootaga anoa i le ala na Ia faia ai.
A o tatou saili atu ia te Ia, o le a tatou iloa ai ua siomia i tatou i avanoa mo sootaga matagofie ma fesootaiga ma isi.
Na Faalogo Maria i Lana Fetalaiga, saunia e Walter Rane