E Na’o Tusiga Faatekinolosi: Talavou Matutua
O ni Auala e 4 e Maua ai le Mana o Fesootaiga Lelei
E sili atu nai lo na o le ataata po o le fai atu o ni mea lelei—e faatatau i le fesoasoani atu i isi ia lagonaina le alofa o le Atua.
E ui o uo faasamasamanoa e masani ona talitonu o a’u o se tagata fiafia, ou te le’i mafaufau lava ia te a’u ia o se tagata fiafia e pei o le susulu o le la. O le mea moni, o loo i ai se faamanatu tele o o‘u uiga e le fiafia tele i nisi taimi e tautau i luga o le puipui o le potu malolo a o’u matua.
I se tasi tau mafanafana a o o’u laitiiti, na o mai ai ou matua matutua e asiasi mai, ma sa matou faaaogaina le avanoa e faatulaga ai ni puega ata o le aiga. Sa ou saunia atoatoa i lo‘u ofu mamanu sikuea piniki ma se pulou e pea i ai, ae sa vave lava ona suia i le le lelei ina ua le aumaia so‘u nofoa e pei o nofoa sa nonofo ai isi tagata o le aiga.
I lo‘u le fiafia, sa ou faauu ai i la’u faauu sili ona tele mo le sauniga atoa, ma faapisia mea semanu e avea o se aafiaga matagofie i lo‘u aiga ma le faatupuina o le fiasefulu o tausaga o tausuaga e uiga i “le ofu faa’u’u.”
E ui e mafai ona ou ata i ai i le taimi nei, o lena ata o le aiga o se faamanatu faifai pea ia te a’u o le mana o le taulai atu i le lelei. O le iai i le itu taulai atu i le lelei i taimi uma e sili atu ai le fiafia i le olaga—aua o ai e maua le fiafia moni i le ita i taimi uma? E le o ta‘ua, o le tumau i le itu lelei ua leva ona fesootai atu i manuia eseese o le soifua maloloina e pei o le faaitiitia o le atuatuvale, maualalo le tulaga lamatia o faamai o le fatu, ma e oo lava i se olaga umi atu.1
Ae o le tumau i le itu lelei e le aafia ai na o i tatou o ni tagata taitoatasi. O lo tatou tumau i le itu lelei (po o le leai o se mea) e mafai ona aafia ai tagata taitasi tatou te fegalegaleai i ai. Ua poloaiina i tatou “ia fiafia” (tagai Mataupu Faavae ma Feagaiga 61:36; 78:18), ma a o tatou faia i a tatou fesootaiga, e mafai e i tatou lava—ma i latou o siomiaina i tatou—ona lagona atili le alofa o lo tatou Tama Faalelagi ma le Faaola.
O ni nai auala nei e mafai ona tatou pa‘i atu ai i le mana o fesootaiga lelei.
1. Mulimuli i faataitaiga o fesootaiga a le Faaola.
Mo le faataitaiga sili o fesootaiga lelei, e mafai ona tatou vaai atu i le Faaola, o le sa faaalia Lona alofa mo isi e ala i le fegalegalea‘i ma le agalelei, agaalofa, ma le malamalama.
Na aoao mai Elder L. Lionel Kendrick, o se Fitugafulu o le Pulega Aoao ua malolo faamamaluina: “O fesootaiga faaKerisiano o ni faailoga o le alofa ae le o le ita, upumoni ae le o le talafatu, agaalofa ae le o le fefinaua‘i, faaaloalo ae le o le tauemuina, fautuaga ae le o faitioga, faasa‘oga ae le o le ta‘usalaina. E tautalagia ma le manino ae le o le fenumia‘i. Atonu latou te malu pe faigata foi, ae e tatau lava ona agamalu i taimi uma.2
E manino lava le auala tatou te fai atu ai se mea e tutusa lava le taua ma mea tatou te fai atu ai,3 se lesona sa ou aoaoina o se tamaitiiti a’oga ta piano. O le aoaoina o le piano mo le tele o lo‘u olaga, sa ou maua ai se aafiaga i le tele o le mau sitaili faalefaiaoga. E ui e mafai ona faalotovaivaia le tuuina atu o se lisi e le muta o fuaitau faamusika ia atoatoa, ae sa faamanuiaina a’u i le i ai o ni faiaoga e tulaga ese i le ofoina atu o faasa‘oga i se auala faaosofia ma le agaalofa, ma sa ou aoao ai e uiga i le mana tele o se upu agalelei e tautalagia.
2. Taumafai ia maua se vaaiga lelei.
Pe tatou te iloaina pe leai, o o tatou uiga faaalia e mafai ona aafia ai le ala tatou te fesootai ai ma isi—ma le tele o isi vaega o o tatou olaga. Na saunoa Peresitene Thomas S. Monson (1927–2018): “E tele naua mea i le olaga e faalagolago i o tatou uiga faaalia. O le auala tatou te filifili e vaai ai i mea ma tali atu ai i isi e tele se eseesega e faia ai. O le faia o le mea sili tatou te mafaia ona filifili lea ia fiafia i o tatou tulaga, e tusa lava po o le a, e mafai ona aumaia ai le filemu ma le faamalieina.”4
O se tasi auala e atiina’eina ai se uiga lelei o le valaaulia lea o le Agaga i o tatou olaga. E mafai ona tatou faia lenei mea e ala i le suia o le masalosalo ma le fefe i le faatuatua (tagai Mataupu Faavae ma Feagaiga 6:36), taliaina o le meaalofa o le salamo, taumafai malosi e faamalosia a tatou molimau, ma saili ia iloa le aao o le Alii i o tatou olaga. Ua ou iloa foi a o o’u faatulagaina (ma mulimuli ai) i le taimi mo le suesueina o tusitusiga paia, ou te lagonaina le sili atu ona lelei i le aso atoa. O nei mea uma e fesoasoani tatou te lagona atili ai le Agaga Paia, ma taitai atu ai i lagona sili atu o le faamoemoe.
Ioe, o le tumau i le itu lelei e le faapea o le taofiofi o lagona le lelei uma, e faapena foi. O nisi taimi ou te pa’ū atu ai i le mailei o le mafaufau faapea e leai so’u faatuatua pe afai ou te faailoa atu ni atugaluga po o lagona o le faanoanoa. Ae e pei ona faamalamalama mai e Sister Sharon Eubank, Fesoasoani Muamua i le Au Peresitene Aoao o le Aualofa: “O le fiafia e le faapea o le po o se ataata pepelo i ou foliga e tusa lava po o le a le mea o tupu. Ae o lona uiga o le tausia o tulafono a le Atua ma atiae ma siitia isi. Pe a tatou fausiaina, pe a tatou siitia ia avega a isi, e faamanuia o tatou olaga i auala e le mafai e o tatou tofotofoga ona aveesea.”5 E ui o le a tatou oo uma i lagona le lelei i le olaga atoa, ae e mafai ona tatou maua le fiafia sili atu a o tatou aloese mai le nonofo ai i o tatou faanoanoaga ma saili e siitia isi.
3. Mafaufau i le sootaga fuataga.
Atonu e le mafai ona fuaina le talitonu o le a lelei mea uma, ae o nisi o talitonuga e mafai ona fesoasoani ia i tatou e fuaina ai le lelei o loo tatou i ai i a tatou fegalegaleaiga. Mo le tele o tausaga, sa suesue ai e le fomai faalemafaufau o John Gottman le mea e faia e maua ai se sootaga maloloina. Ina ua uma ona matauina le faitau afe o ulugalii, sa ia fuafuaina se mamanu e mafai ona fesoasoani e valoia ai pe o le a nonofo faatasi pe tuueseese ulugalii i tausaga a sau i le silia ma le 90 pasene le sa‘o.6
O lana mea autu na maua? I taimi o feteenaiga, o ulugalii fiafia e masani ona mulimuli i se fuataga o fegalegaleaiga lelei e le itiiti ifo ma le lima mo fegalegaleaiga le lelei taitasi. O fegalegaleaiga lelei e mafai ona aofia ai le ofoina atu o se faamalo, malamalama, ma le faamaoniaina o le vaaiga a le isi tagata, ae o fegalegaleaiga le lelei e mafai ona aofia ai le faasesepa o mata, avea ma e taufaatauvaaina pe le ano i ai, ma le faitioina.7
E ui o sailiiliga a Gottman e taulai atu i ulugalii faaipoipo, o ana faaiuga e mafai ona faatatau i ituaiga uma o sootaga ma faailoga ai aafiaga leaga o le le fiafia.
Ua apoapoa‘i mai le Aposetolo o Paulo, “Aua ne’i alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.” (Efeso 4:29). Atonu e le o taimi uma e tutusa ai la tatou vaaiga ma isi, ae e mafai ona tatou le malilie e aunoa ma le le malie. Ma a o tatou saili ia faagaeetia—e oo lava i le feagai ai ma feteenaiga—e mafai ona tatou faamamaina avega ma faia se avanoa mo le olioli sili atu.
4. Ia avea ma “faaa’oa’o o e faatuatua.”
Ua ou ataata nei mo le pueina o ata o aiga (e tusa lava pe tatau ona ou tu), ma ua amata ona ou malamalama i le ala e mafai ai e o’u lava uiga ona aafia ai i latou o siomia a’u, mo le lelei po o le leaga.
A o o’u mamao mai le atoatoa, ou te taumafai e faia se taumafaiga faapitoa ina ia punouai pe a ou i ai i se talanoaga ma se tasi, e faailoa atu lo‘u agaga faafetai mo lo’u toalua ma isi e pele ia te a‘u, ma iu ai ina “avea ma faaa’oa‘o i e ua faatuatua, i le upu, ma le amio, ma le alofa” (1 Timoteo 4:12)..
O le tuufaatasiga o nei mea laiti—o se taliga o le faalogo, o se faamautinoaga lelei, o se faatoesega faamaoni—lea e masani ona tele sona aafiaga. O nei mea iti, lea e fesoasoani ia i tatou e faataitai i lo tatou Faaola, e mafai ai ona tatou faasoa atu le alofa o le Atua.
Ma i le faasoaina atu o Lona alofa, o le a tatou lagonaina foi e i tatou lava.