Digital Lamang: Mga Young Adult
Pakig-date uban ang usa ka Plano ug Katuyoan
Pipila ka butang akong nakat-onan nga makahimo sa inyong kasinatian sa pakig-date nga mas yano ug dili kaayo makaugtas.
Pakig-date. Ang pagsulti lamang sa pulong makasugyot og lainlaing mga tubag: usa ka pahiyom, usa ka kusmod, kipat-kipat sa mata, mga kabakaba, ug gani kasukaon. Sa tataw, ang pakig-date dili parehas og kasinatian alang sa tanan. Nakadungog ako sa mga young adult nga nag-ingon nga ang pakigdate makalipay, usa ka makasakit, usa ka padulngan, usa ka trahedya, ug usa ka kadaogan. Bag-ohay akong nakigsulti ngadto sa usa ka batan-ong babaye kinsa, uban sa pangyam-id nga pahiyom, mipasabot sa iyang kinabuhi sa pakig-date isip “wala pa matawo.”
Human sa sobra sa usa ka dosenang katuigan sa pagtudlo sa young adult og mga klase sa pakig-date ug pangandam sa kaminyoon, akong nakaplagan ang duha ka pulong nga motingob sa kasinatian alang sa daghan: malisod ug makuti.
Sa laing bahin, nakita ko nga ang pipila ka maayong pagkasabot nga mga baroganan makahimo sa kasinatian sa pakig-date nga mas yano ug dili kaayo makaugtas. Tanan kini nagsugod sa usa ka solido nga pagsabot sa katuyoan sa Dios alang sa kaminyoon ug ang tahas nga ang pakig-date makahimo sa pagpahiluna sa pundasyon alang sa usa ka malampusong kaminyoon.
Ang Katuyoan sa Dios alang sa Kaminyoon
Kini mahimong bakikaw sa pagsulti og kusog, apan ang kinatibuk-ang ideya sa pakig-date isip usa ka young adult mao nga kini mogiya ngadto sa kaminyoon—o sa labing minos kita naglaom nga kini mahimo. Ang kaminyoon tali sa usa ka lalaki ug sa usa ka babaye, sa ingon, naggiya kanato nga mahimong mas mahisama sa atong langitnong mga ginikanan—adunay usa ka pamilya nga atong kaugalingon.
Nakadungog ako sa daghang mga young adult nga nag-ingon nga ang ideya sa pagminyo makahahadlok tungod kay sila nakaila og daghang mga tawo kansang mga kaminyoon wala molampos. Nahibalo ako nga kini usa ka subo nga reyalidad. Apan ang pagpabilin nga minyo mahimong dili kaayo usa ka sugal nga kita naglaom ug mas usa ka plano nga atong buhaton. Ug kon mas nasabtan nato ang plano sa kaluwasan, mas kita mosabot sa tahas sa kaminyoon sulod niana nga plano.
Sumala sa gitudlo ni Elder Gary E. Stevenson sa Korum sa Napulog Duha ka Apostoles:
“Nakasabot si Satanas nga ang pamilya taliwala ngadto sa plano sa Ginoo sa kalipay. … Siya naningkamot sa pagtisok sa ngil-ad nga mga liso sa kahadlok diha sa inyong kasingkasing, bisan unsa nga magpalayo kaninyo gikan sa pagsinati sa labing mahimayaon, magantihon nga bahin sa mortalidad: ang hayag sa pagkabalaan ug ang kalipay nga moabot gikan sa pagkakaplag og usa ka mahangturong kapikas ug sa pagdala sa mga anak sa Langitnong Amahan nganhi niini nga kalibotan.
“Samtang kamo nag-atubang sa desisyon sa pagsugod sa inyong kaugalingong mahangturong pamilya, ayaw paghulat tungod kay kamo nahadlok. Hinumdomi ang kasulatan, ‘ayaw kahadlok, sumalig ka lamang’ [Marcos 5:36]. Ang akong kaminyoon ug pamilya mga … usa ka literal nga personal nga pagpakita sa dakong plano sa kalipay alang kanako. Nagsaad ako kaninyo nga ang mao mahimong tinuod alang kaninyo. Ang pagpunting diha sa malipayong kahayag nga gidala sa kinabuhi sa pamilya mosalikway sa kahadlok.”1
Aron mahimong naawhag nga mga tigpakig-date, kinahanglan atong tan-awon ang kaminyoon nga mas usa ka sugo; kinahanglan nga atong dawaton ang kamatuoran nga ang kaminyoon mahimo, ug maoy, usa ka kahibulongan, malipayong bahin sa plano sa Langitnong Amahan alang sa Iyang mga anak. Ang pagkaadunay kapikas nga inyong gihigugma ug usa ka pamilya nga inyong gimahal naggiya ngadto sa labing dako nga kalipay sa mortalidad ug sa kahangtoran. Kon kini dili, ang Langitnong Amahan dili mogiya kanato ngadto niana nga dalan. Si Presidente Russell M. Nelson mitudlo, “[Ang] pamahayag kabahin sa pamilya nagtabang kanato sa pag-amgo nga ang celestial nga kaminyoon nagdala og mas dako nga mga kahimoan alang sa kalipay kaysa mahimo sa bisan unsang uban nga pakigrelasyon.”2
Pakig-date og Tarong aron Maminyo og Tarong
Si Presidente Spencer W. Kimball (1895–1985) makausa mitudlo nga aron maminyo og tarong kinahanglan kita nga makig-date og tarong.3 Kana ingon og mas sayon nga sultihon kaysa buhaton. Si Presidente Thomas S. Monson (1927–2018) mihatag og importanting direksiyon ngadto sa young adult nga mga lalaki sa Simbahan kabahin sa hilisgotan: “Pangita og usa ka tawo kang kinsa ikaw mahimong magkabagay.”4
Mubo ug yano, apan hilabihan ka tulukibon.
Apan unsaon nato pagpangita og usa ka tawo? Ug unsaon nato pagkahibalo kon kita magkabagay?
Tungod kay hapit tanan, ang pagpangita og usa ka tawo nagkinahanglan og pakig-date. Kana nga pakig-date kinahanglan nga may katuyoan ug makahuloganon. Sa labing maayo, kini mao ang matang sa pakig-date nga nagtabang kanato sa pagsulay sa pagkabagay. Ang pakig-date naghatag usab kanato og higayon sa pagkat-on sa mga kahanas–oo, ang mga kahanas–sa paghimo og makahuluganong pakigrelasyon.
Una, ang labing dako nga hagit—ang pagkuha og mga date. Ang tibuok nga artikulo mahimong ikapahinungod ngadto niini nga hilisgotan, apan mahimo ba nga ako mosugyot og pito ka yanong mga pulong: “Ang paggawas og kanunay, makakuha og mas daghan.” Ngadto ni bisan kinsa nga gustong makig-date og mas daghan ug makaila og mas daghang mga tawo, nagrekomendar ako sa pag-apil ug sa paggula. Kini mahimong mogamit og pipila ka paninguha sa pagpangita og mga dapit sa inyong matang sa mga tawo, apan kini takos sa puhunan.
Usa sa labing dako nga motagna sa pagkabagay tali sa mga kapikas sa kaminyoon mao ang pagkaparehas og interes. Samtang kamo moadto og mga kalihokan ug mga dapit nga nakapa-interes kaninyo, kamo makakaplag og uban kinsa nakigbahin sa inyong mga interes. Kini kanunay nga makatabang sa paghinumdom nga ang pakigkita og usa ka tawo nagkinahanglan nga makigkita sa usa ka tawo.
Pagkabagay: Duha ka Lakang nga Proseso
Paghunahuna og pakig-date sa pagsulay alang sa pagkabagay isip duha ka lakang nga proseso. Una, samtang kamo nagsugod sa pakig-date, paninguha sa pagpakigdate og lainlaing mga tawo. Ang pag-ila og lainlaing mga personalidad motabang kaninyo sa pagkahibalo kon unsa nga matang sa tawo kamo makasagol og maayo ug unsa ang pangitaon sa usa ka pares. Kini usa ka rason kon ngano ang mga propeta mitambag sa mga tinedyer sa paglikay og eksklusibong mga pakigrelasyon hangtod sila mas dako na og edad ug hinoon sa “pagtukod og maayong mga paghinigalaay ngadto sa daghang mga tawo.”5
Ang pakig-date og lainlaing mga indibidwal mahimong makahagit. Dili tanan ang adunay oportunidad o kapilian sa pag-adto og daghang wala damha nga mga pakig-date. Ug anaa usab ang kuyaw sa pagkalinga og maayo sa pagpangita sa lisod pangitaon nga hingpit nga kabagay.
Maayo na lang, kamo dili kinahanglan nga “sa pormal nga paagi” mo-date og makadaghan nga mahibalo og daghan. Kadaghanan kanato adunay higayon sa pakig-interaksiyon ngadto sa lainlaing mga lalaki ug mga babaye kada adlaw. Kon kita maalamon, kita makagamit niadtong mga pakigrelasyon sa pag-ila og mga kalidad nga atong gustong makita diha sa usa ka kapikas.
Ikaduha, kon kamo magsugod sa pakig-date og usa ka tawo sa mas seryoso nga paagi, pakig-date og lainlain. Sa kasagaran, makita nako ang mga parisan naggahin sa ilang pakig-date nga naglingkod sa sopa nagtan-aw sa ilang paborito nga mga salida sa TV, nga sa dili madugay mobagubol nga ang ilang kapikas dili kinsa ilang gihunahuna nga sila mao.
Sa pagtudlo sa bili sa pakig-date sa lainlaing mga paagi, akong napakita sa akong klase sa institute ang usa ka hulagway nga makita ang katunga nga gitipon nga puzzle sa nawong sa akong asawa. Sa dihang ako nangutana kon sa unsang paagi kini kalabot ngadto sa pakig-date, ang tubag kasagaran, “Imong giusa og pundok ang imong asawa.” Kon inyong tutokan, hinoon, inyong makita nga akong gikuha ang mga piraso sa puzzle sa pagpakita sa iyang kompleto nga hulagway sa ilawom. Ang matag piraso sa puzzle nagrepresentar og inter-aksiyon (o pakigdate) nga nagkuha sa tabon sa usa ka butang mahitungod sa personalidad sa akong asawa.
Lainlaing matang sa inter-aksiyon ang mopadayag sa lainlaing kalidad mahitungod kaniya. Kon ako gusto nga makahibalo mahitungod sa iyang pagka-espirituhanon, kinahanglan kami magbuhat og usa ka butang nga magkauban nga gibase og espirituwal. Sa samang paagi, kon ako gusto nga mahibalo kon unsaon niya sa pakiglabot ngadto sa mga bata, kami makig-uban sa mga bata.
Salig Pa og Dugang, Dili Kaayo Maugtas
Diha taliwala sa kanunay nga pakig-date alang sa pagkabagay, hinumdomi nga ang pakig-date mismo makahimo ug kinahanglan nga makalingaw. Ang pakig-date usa ka higayon sa pakigkita og bag-ong mga tawo, pagmugna og mga panaghigalaay, ug paggula ug pagbuhat og usa ka butang! Ang unang pakig-date dili kinahanglan nga mahimong usa ka pagsulay nga maghimo o magbugto sa tanang umaabot nga mga pakigkita. Bisan og kamo wala pa makakaplag sa inyong kapikas, kamo sa labing kubos nakakaplag og bag-ong higala.
Kitang tanan kinahanglan nga maningkamot paingon sa mahangturong kaminyoon, apan ang sobra nga paghatag og gibug-aton mahitungod sa pakig-date ug kaminyoon, ilabi na ang pagsukod sa inyong bili sa kaugalingon pinaagi sa mga kalamposan sa pakig-date, sa tinuod maghimo kaninyo nga makalolooy. Ang pagkakaplag og magkabagay nga kapikas ug maghimo sa inyong kaminyoon nga malampuson usa ka makalipay, puno sa hugot nga pagtuo nga panaw.
Adunay dako nga kalinaw nahibalo nga kita mapanalanginan sa tanan nga atong gikinahanglan alang sa kalipay ug pag-uswag samtang kita nagpunting sa atong mga pakigsaad ug sa mga katuyoan ug mga saad sa atong mahigugmaong Langitnong Amahan.