Pagbiya sa Tradisyon ug Pagsalig sa Ginoo

Ni Samukelisiwe ug ni Phindile Mkhize

Ang propetikanhon nga tambag mahitungod sa lobola nakapalibog kanamo mahitungod sa umaabot.

Ang pagkahimong young adult usa ka makapalig-on nga panahon sa kinabuhi. Sama sa duha ka sister nga naningkamot sa pagkadisipulo didto sa South Africa, kita kanunay nga adunay mga kasinatian nga makapalig-on sa atong hugot nga pagtuo ug makapadasig kanato mahitungod sa umaabot. Apan usahay, kini nga panahon sa kinabuhi makapalibog samtang mohimo kita og mga desisyon mahitungod sa edukasyon, mga trabaho, ug ilabi na kon kinsa ang minyoan.

O, sa among kahimtang, sa pagsabot kon unsa ang mahitabo kon gusto kami nga magminyo.

Usa ka Wala Damha nga Hagit

Sa South Africa, adunay usa ka karaan nga binuhatan nga gitawag og lobola—komon nga nailhan nga “presyo sa pangasaw-onon”—nga gisunod gihapon sa pipila ka nasod sa Africa karon. “Ang [lobola] usa ka timaan sa paghatag og bili gikan sa pamilya sa pamanhonon ngadto sa pamilya sa pangasaw-onon. Sa karaan nga mga adlaw ang pamilya sa pamanhonon mohatag sa pamilya sa pangasaw-onon og bisan unsa nga adunay bili kanila.”¹

Sa naandan, ang mga baka (gitan-aw isip sagrado sa daghang kultura sa Africa) kasagaran gihatag ngadto sa pamilya sa pangasaw-onon aron sa pagrepresentar og usa ka espirituwal nga koneksiyon nga namugna tali sa duha ka pamilya. Apan niining mga panahona, ang lobola mas kasagaran gibayaran pinaagi sa dagko nga mga kantidad sa kwarta. Ang presyo naimpluwensiya na karon sa edukasyon, trabaho, ug kahimtang sa katilingban sa pangasaw-onon.²

Ang pagbayad og lobola gituyo aron sa pagpakita kon unsa kadako nga bili ang gihatag ngadto sa pangasaw-onon sa iyang pamilya ug sa lalaki nga iyang gustong pakaslan. Nagsimbolo kini og panaghiusa tali sa mga pamilya. Mao nga, sa tibuok namong mga kinabuhi, kanunay kaming naningkamot nga mahimong matinahoron, malamposon, maalamon nga mga babaye. Gusto namo nga mahimong mapasigarbohon ang among pamilya ug bayaran sila sa maayo nga pagpadako kanamo.

Apan niadtong 2014, sa dihang kaming duha anaa sa sayong bahin sa pagkahimong young adult, si Presidente Dieter F. Uchtdorf, kaniadto nagserbisyo isip Ikaduhang Magtatambag sa Unang Kapangulohan, mianhi aron sa pagpamulong ngadto sa mga miyembro sa Africa. Nabati namo ang tiunay nga gugma nga aduna ang Dios alang sa matag usa kanamo samtang namulong siya. Apan, atol sa iyang pakigpulong, gitudlo niya nga ang tradisyon sa lobola wala na mahiangay sa ebanghelyo. Wala niya giawhag ang binuhatan, nag-ingon: “Ang mga sangpotanan sa [presyo sa pangasaw-onon] daghan kaayo ug mosangpot ngadto sa kinaiya nga dili tukma alang sa usa ka miyembro sa Simbahan ni Jesukristo. … Ang paagi sa Ginoo mao ang tinuod nga dalan sa pagdala sa mga pamilya nga magkauban sa kahangtoran.”³

Ang among tibuok nga kultura nalambigit niini nga kustombre, ug kami kanunayng nagdahom usab, mao nga naglibog kami human sa iyang mensahe.

Ang among una nga mga hunahuna kataw-anan: “Wala kami naningkamot og ingon niini ka maayo nga dili ra makakuha og bisan unsa nga baka!”

Apan sa pagkatinuod, naglibog kami. Kon ang Langitnong Amahan dili na gusto namo nga mobuhat niini nga tradisyon, sa dihang kadaghanan sa mga tawo sa among kultura modumili sa kaminyoon kon walay lobola, unsaon man namo sa pagsunod ang Langitnong Amahan ug si Jesukristo ug tahoron ang among kultura ug pamilya? Ang ebanghelyo ingon og lahi na alang sa among mga sakop sa pamilya kinsa dili kabahin sa Simbahan, apan karon mahimo gani kining mas lisod pa gayod nga masabtan alang kanila.

Sa dihang nakita namo ang pipila ka miyembro nga mibiya sa Simbahan tungod dili sila makasabot niini nga pagtulon-an gikan sa usa ka buhi nga propeta, naamgohan namo nga gikinahanglan namo ipadangat ang among mga pangutana ngadto sa Langitnong Amahan.

Pagtinguha og mga Tubag

Sa dihang mipasakop kami sa Ang Simbahan ni Jesukristo sa mga Santos sa Ulahing mga Adlaw isip mga tin-edyer, misaad kami sa usag usa nga kanunayng tabangan ang usag usa nga magpabiling duol ngadto sa Ginoo, bisan unsa pa man ang mahitabo. Midesisyon kami nga bisan asa pa kami dad-on sa kinabuhi, kanunay kaming mohupot sa among hugot nga pagtuo tungod kay nakita namo kon sa unsang paagi ang pagpuyo sa ebanghelyo mosangpot ngadto sa tinuod nga kalipay.

Mao nga, sa dihang nanglimbasog kami sa pagsabot sa mensahe ni Elder Uchtdorf, gihinumdoman namo kana nga saad. Napahinumdoman kami sa importansiya sa paghatag og prayoridad sa relasyon uban sa Langitnong Amahan ug ni Jesukristo ug sa pagsalig sa Ilang gisaad nga mga panalangin. Gitutokan namong duha ang pagpalawom sa among hugot nga pagtuo diha Kanila aron sa pagpalig-on og usab niana nga pagsalig.

Sa dihang ako (Phindi) nag-ampo ngadto sa Langitnong Amahan alang sa giya mahitungod sa pagpakig-date ug kaminyoon, ako adunay usa ka hunahuna nga misantop sa isipan. Gidasig ang usa ka Apostol sa Ginoo sa pag-anhi dinhi sa akong nasod ug sa paghisgot mahitungod sa usa ka tradisyon nga piho sa among kultura tungod ang Langitnong Amahan nakaila kanamo sa indibidwal nga paagi. Nasayod Siya kon unsa tingali ang nagpugong kanamo, ug Siya nagpakabana sa among labing maayo nga mga interes kon mahitungod sa dalan sa pakigsaad.

Sinsero nakong gipamalandongan kini nga kamatuoran ug nakaamgo nga tinud-anay nga dili gusto sa Langitnong Amahan nga malimitahan ang atong mahangtoron nga mga kaminyoon ug mga pamilya sa kalibotanon nga mga tradisyon. Ang paghunahuna mahitungod niini nakatabang kanako nga makakita kon sa unsang paagi ang lobola kasagaran mahimong mahilayan, ilabi na kon ang taas kaayo nga presyo mopugong gayod sa pipila ka magtiayon nga magminyo. Nagsugod akong nakaamgo nga makasalig ko sa Langitnong Amahan ug ni Jesukristo labaw pa kaysa akong kaugalingon nga kahibalo, bisan kon kini lisod.

Ako (Samu) midangop ngadto sa mga kasulatan aron sa pagpangita og mga tubag alang sa akong mga kabalaka mahitungod sa umaabot. Kanunay akong nagtuo nga kini nga ebanghelyo adunay luna alang sa mga pangutana ug nag-awhag kanato sa pag-angkon og kahibalo ug sa pagtinguha og personal nga pagpadayag. Mao nga gitun-an nako og maayo ang Basahon ni Mormon labaw pa kay sa kaniadto. Paglabay sa panahon, nabati nako nga ang mga kamatuoran niana nga basahon nagkompirmar nga makasalig ko sa mga pulong sa mga propeta karon. Nabati nako nga nausab ang akong kasingkasing ug nagkalawom ang akong relasyon sa Langitnong Amahan ug ni Jesukristo.

Samtang nagpadayon ko sa pagkabalaka kon unsa kaha ang akong kaugmaon kalabot sa pagpakig-date ug kaminyoon, nahinumdoman nako ang kamatuoran nga gihatag gikan sa Nephi nga “ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Ug niana, nasayod ko nga makasalig ko Kaniya ug makabaton og paglaom sa Iyang mga saad.

Sama sa gitudlo ni Presidente Russell M. Nelson, ang kinabuhi kabahin sa “[pag]patigbabaw [sa] Dios labaw sa tanan”⁴ ug sa “[pagbuntog] sa kalibotan.”⁵ Ang pagkahibalo niini nakatabang kanamo nga palawman sa hinay-hinay ang among pagsalig sa Langitnong Amahan. Bisan kon wala kami nakahibalo kon sa unsang paagi magmalamposon ang kaminyoon alang kanamo, nasayod kami nga samtang motuman kami sa among mga pakigsaad ug motutok sa among relasyon ngadto Kaniya ug ni Jesukristo, mapanalanginan kami og mga milagro samtang biyaan namo kini nga tradisyon.

Ang Labing Importante nga mga Relasyon

Ang mga relasyon ug pagpakig-date tingali mahimong lisod ug walay kasegurohan alang ni bisan kinsa nga nagtinguha og kaminyoon sa templo bisan asa sa kalibotan. Kon kita makasinati og paghandom alang sa usa ka mahangtoron nga kompanyon, ang umaabot usahay mabati nga makahadlok. Salig namo—personal kaming nag-atubang og daghan kaayong wala mahibaloi kon sa unsang paagi ang kinabuhi magmalamposon sa dihang kadaghanan sa among kultura dili mokonsiderar sa kaminyoon kon dili mobayad og lobola.

Apan bisan pa man sa mga kalagmitan nga batok kanamo (ug bisan unsa man nga mga kalagmitan, mga babag sa kultura, o mga hagit nga tingali inyong giatubang kabahin sa pagpakig-date ug kaminyoon), tinud-anay kaming nagtuo nga ang Langitnong Amahan mopadayon sa pagtabang sa tanan kanato sa pagpaningkamot ug pagtuman sa atong matarong nga mga tinguha samtang ibutang nato ang atong pagsalig diha Kaniya. Kon motutok kita sa atong relasyon ngadto Kaniya ug ni Jesukristo, ang tanan mahitungod sa umaabot dili na kaayo makahadlok ug mas puno sa paglaom.

Usahay mobati kita nga ingon nabiyaan kita, ug maghunahuna kita kon mahimong mas sayon nga motugyan ngadto sa mga kustombre, mga gidahom, ug mga sumbanan sa kalibotan. Apan kon kita mamalandong sa mga panalangin ug sa hingpit nga kalipay nga gitagana sa Ginoo alang kanato isip mga disipulo ni Kristo, makaamgo kita nga wala gayod kita nabiyaan. Anaa kita sa mga kamot sa usa ka mahigugmaon nga Amahan sa Langit, kinsa mogiya kanato ngadto sa dili mahanduraw nga mga panalangin.

Sa kasamtangan, padayon kami sa pagbuhat sa among labing maayo aron espirituwal ug temporal nga mouswag. Nag-ugmad kami og nindot nga mga relasyon sa mga higala, pamilya, ug sa usag usa. Ang mga relasyon nga anaa kami sa among mga minahal—ug ilabi na sa Langitnong Amahan ug ni Jesukristo—kanunay nga motabang kanato nga mobati og koneksiyon ug gugma ug mohatag kanato sa kalig-on nga mopadayon sa dalan sa pakigsaad.

Ang pipila ka matarong nga mga tinguha mahimong ingon og imposible samtang molatas kita sa maayo nga mga butang ug dili maayo nga mga butang sa pagkahimong young adult. Apan samtang magpadayon kita sa pagtuman sa atong mga pakigsaad ug sa pagtinguha sa Ginoo, maghupot kita sa paglaom alang sa mga kaminyoon sa templo. Hangtod niana, sama sa gitudlo ni Presidente Nelson, kita kanunayng mahimong magtinguha ug magpaabot og mga milagro.⁶ Kita makasinati gayod sa hingpit nga kalipay, mga panalangin, ug oo, sa mga milagro sa buhi nga ebanghelyo ni Jesukristo.

Nanghinaot kami nga nasayod kamo nga ang mga milagro ug mga panalangin gitagana usab alang kaninyo.

Ang mga tagsulat nagpuyo sa Gauteng, South Africa.

Mubo nga mga Sulat